ການຮັບມືກັບການປ່ຽນແປງຂອງດິນຟ້າອາກາດໄດ້ຖືກກຳນົດວ່າ ແມ່ນໜຶ່ງໃນບັນດາໜ້າທີ່ຈຸດສຸມຂອງຫວຽດນາມໃນປີ 2016 ໃນສະພາວະທີ່ຫວຽດນາມແມ່ນໜຶ່ງໃນບັນດາປະເທດໄດ້ຮັບຜົນສະທ້ອນໃຫຍ່ກວ່າໝູ່ຈາກປະກົດການທີ່ບໍ່ດີຂອງທຳມະຊາດ. ຕາມນັ້ນແລ້ວ, ຫວຽດນາມຈະສຸມແຫຼ່ງກຳລັງ, ເພີ່ມທະວີການຮ່ວມມືສາກົນ, ຕິດແທດກັບການປະຕິບັດເປົ້າໝາຍຂອງກອງປະຊຸມຄັ້ງທີ 21 ສົນທິສັນຍາຂອບຂອງສະຫະປະຊາຊາດກ່ຽວກັບການປ່ຽນແປງຂອງດິນຟ້າອາກາດ(COP 21).
(ພາບປະກອບ)
|
ບັນດາການເຄື່ອນໄຫວທີ່ຫວຽດນາມໃຫ້ບຸລິມະສິດປະຕິບັດລວມມີ : ຊຸກຍູ້ການຮ່ວມມືລະຫວ່າງຫວຽດນາມກັບບັນດາປະເທດ, ບັນດາຄູ່ຮ່ວມມືຜ່ານຂອບເຂດຮ່ວມມື 2 ຝ່າຍ ແລະ ຫຼາຍຝ່າຍ; ຍາດແຍ່ງການຫນູນຊ່ວຍທາງດ້ານການເງິນ, ການມອບໂອນເຕັກໂນໂລຢີ ແລະ ຍົກສູງກຳລັງຄວາມສາມາດ.
ປະຖົມປັດໄຈທີ່ສະດວກ ນັບແຕ່ປີ 2015
ປີ 2015 ແມ່ນປີໄດ້ຮັບຮູ້ກ່ຽວກັບຄວາມມານະພະຍາຍາມຫຼາຍຢ່າງຂອງລັດຖະບານຫວຽດນາມໃນການດັດປັບໃຫ້ແທດເໝາະກັບ ການປ່ຽນແປງຂອງດິນຟ້າອາກາດ. ທາງດ້ານແຫຼ່ງກຳລັງ, ລັດຖະບານຫວຽດນາມໄດ້ສະຫງວນເງິນ 3.000 ຕື້ດົງເພື່ອລົງທຶນໃຫ້ແກ່ 16 ໂຄງການຮັບມືກັບການປ່ຽນແປງຂອງດິນຟ້າອາກາດ. ເຖິງວ່າຍັງເປັນຈຳນວນໜ້ອຍເມື່ອທຽບໃສ່ຄວາມຮຽກຮ້ອງຕ້ອງການຂອງບັນດາທ້ອງຖິ່ນກໍຕາມ, ແຕ່ໄດ້ສະແດງໃຫ້ເຫັນຄວາມມານະພະຍາຍາມ ແລະ ຄວາມຕັດສິນໃຈຢ່າງໃຫຍ່ຫຼວງຂອງ ລັດຖະບານຫວຽດນາມໃນການລົງທຶນກໍ່ສ້າງບັນດາຮູບແບບດັດປັບໃຫ້ແທດເໝາະກັບ ການປ່ຽນແປງຂອງດິນຟ້າອາກາດເຊັ່ນ: ປູກປ່ານ້ຳເຄັມແຄມທະເລ, ບັນດາໂຄງການກໍ່ສ້າງຄັນຄູທີ່ສຳຄັນ, ຄັນຄູກັນນ້ຳເຄັມ…
ລັດຖະບານຫວຽດນາມກໍເອົາໃຈໃສ່ເຖິງການຄຸ້ມຄອງຄວາມສ່ຽງໄພທຳມະຊາດ ແລະ ດັດປັບໃຫ້ແທດເໝາະກັບ ການປ່ຽນແປງຂອງດິນຟ້າອາກາດໃນແຜນຜັງພັດທະນາຕົວເມືອງ ແລະນຳໃຊ້ທີ່ດິນ. ຕາມນັ້ນແລ້ວ, ການພັດທະນາລະບົບເຂດຊຸມຊົນຮັບມືກັບໄພນ້ຳຖ້ວມ ແມ່ນຕ້ອງປະຕິບັດຕາມທິດຮັກສາສິ່ງແວດລ້ອມຊີວະພາບ ພ້ອມທັງຄ່ອຍຫຼຸດຜ່ອນການນຳໃຊ້ບັນດາພະລັງງານແຮ່ທາດ, ຫຼຸດຜ່ອນການປ່ອຍອາຍພິດເຮືອນແກ້ວ.
ຫວຽດນາມໄດ້ສ້າງບັນດານະໂຍບາຍ ແລະ ແຜນງານເພື່ອແນໃສ່ແກ້ໄຂຜົນສະທ້ອນຈາກການປ່ຽນແປງຂອງດິນຟ້າອາກາດ, ພ້ອມກັນນັ້ນ ກໍຍູ້ແຮງວິວັດການຫັນໄປສູ່ພື້ນຖານເສດຖະກິດຂຽວສະອາດກວ່າ. ການປະກາດໃຊ້ ແລະ ປະຕິບັດນະໂຍບາຍ, ກົດໝາຍກ່ຽວກັບ ການປ່ຽນແປງຂອງດິນຟ້າອາກາດໄດ້ສ້າງພື້ນຖານໃຫ້ແກ່ບັນດາກະຊວງ, ຂະແໜງການ ແລະ ທ້ອງຖິ່ນຕ່າງໆ, ພິເສດແມ່ນບັນດາແຂວງຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ຜັນຂະຫຍາຍປະຕິບັດບັນດາມາດຕະການຮັບມືກັບ ການປ່ຽນແປງຂອງດິນຟ້າອາກາດຢ່າງມີປະສິດທິຜົນ. ເປັນໜ້າສົນໃຈແມ່ນກົດໝາຍວ່າດ້ວຍອຸຕຸນິຍົມ ອຸທົກກະສາດໄດ້ຮັບການຮັບຮອງເອົາຈາກສະພາແຫ່ງຊາດ ອັນໄດ້ຕອບສະໜອງຄວາມຮຽກຮ້ອງຕ້ອງການດ້ວຍຫຼາຍຮູບຫຼາຍແບບຂອງວຽກງານປ້ອງກັນ, ຕ້ານ ແລະ ຜ່ອນເບົາໄພທຳມະຊາດ, ປະກອບສ່ວນພັດທະນາເສດຖະກິດ-ສັງຄົມແບບຍືນຍົງ.
ແລະ ກໍໃນປີ 2015, ບົດລາຍງານພິເສດຂອງຫວຽດນາມກ່ຽວກັບການຄຸ້ມຄອງຄວາມສ່ຽງໄພທຳມະຊາດ ແລະ ບັນດາປະກົດການດິນຟ້າອາກາດທີ່ບໍ່ດີ ແນໃສ່ຊຸກຍູ້ການ ດັດປັບໃຫ້ແທດເໝາະກັບ ການປ່ຽນແປງຂອງດິນຟ້າອາກາດ ໄດ້ຮັບການປະກາດ. ນີ້ກໍແມ່ນບົດລາຍງານຮອບດ້ານທີ່ສຸດ, ແນະນຳລະບົບຄຸ້ມຄອງຄວາມສ່ຽງໄພທຳມະຊາດ ແລະ ບັນດາປະກົດການດິນຟ້າອາກາດທີ່ບໍ່ດີຢູ່ຫວຽດນາມ ມຸ່ງໄປສູ່ອະນາຄົດທີ່ມີກຳລັງແຮງຕ້ານຢັນ ແລະ ໝັ້ນຄົງ.
ຜັນຂະຫຍາຍບັນດາມາດຕະການຮັບມືກັບ ການປ່ຽນແປງຂອງດິນຟ້າອາກາດຢ່າງຮອບດ້ານ
ປີ 2016, ຫວຽດນາມສືບຕໍ່ເປັນເຈົ້າການປະຕິບັດບັນດາມາດຕະການຮັບມືກັບການປ່ຽນແປງຂອງດິນຟ້າອາກາດຢ່າງຄົບຊຸດ, ເພີ່ມທະວີການຮ່ວມມືສາກົນ, ປຸກລະດົມບັນດາແຫຼ່ງກຳລັງ , ປະຕິບັດວຽກງານຮັບມືກັບການປ່ຽນແປງຂອງດິນຟ້າອາກາດຢ່າງມີປະສິດທິຜົນ; ໃຫ້ບຸລິມະສິດລົງທຶນສ້າງບັນດາໂຄງການຮັບມືກັບ ການປ່ຽນແປງຂອງດິນຟ້າອາກາດທີ່ສຳຄັນ ແນໃສ່ປະຕິບັດຂໍ້ຕົກລົງປາຣີຢ່າງມີປະສິດທິຜົນ. ເມື່ອເຕື້ອງເຖິງບັນດາວິທີການແກ້ໄຂໂດຍລະອຽດ, ທ່ານ ຝ້າມວັນເຕີ້ນ ຮອງຫົວໜ້າກົມອຸຕຸນິຍົມ ອຸທົກກະສາດ ແລະ ການປ່ຽນແປງຂອງດິນຟ້າອາກາດ ໃຫ້ຮູ້ວ່າ :
“ ກະຊວງຊັບພະຍາກອນທຳມະຊາດ ສິ່ງແວດລ້ອມ ແລະ ບັນດາກະຊວງ, ຂະແໜງການຕ່າງໆຈະເຮັດບັນດາລະບຽບການດ້ານກົດໝາຍເພື່ອໃຫ້ສັດຕະຍາບັນຂໍ້ຕົກລົງປາຣີໂດຍໄວ ຄືກ່ອນເດືອນເມສາປີ 2016. ທາງກະຊວງຍັງຈະສ້າງແຜນການດັດປັບໃຫ້ແທດເໝາະກັບ ການປ່ຽນແປງຂອງດິນຟ້າອາກາດເພື່ອສອດຄ່ອງກັບຂອບສົນທິສັນຍາຂອງສະຫະປະຊາຊາດກ່ຽວກັບການປ່ຽນແປງຂອງດິນຟ້າອາກາດ, ໃນນັ້ນມີການກຳນົດກ່ຽວກັບແຫຼ່ງກຳລັງ ແລະ ການເຄື່ອນໄຫວລະອຽດເພື່ອຜັນຂະຫຍາຍປະຕິບັດເປົ້າໝາຍຫຼຸດຜ່ອນ 8% ປະລີມານການປ່ອຍອາຍພິດເຮືອນແກ້ວ. ນັບແຕ່ນີ້ເຖິງປີ 2030 ຫວຽດນາມຄວນຫັນປ່ຽນໄປສູ່ການນຳໃຊ້ເຕັກໂນໂລຢີໃໝ່ດ້ວຍການປ່ອຍກາກບອນໜ້ອຍ ”
ຫວຽດນາມກໍພວມສົມທົບກັບບັນດາປະເທດພວມພັດທະນາອື່ນໆໃນການເຈລະຈາເພື່ອຫັນບັນດາຂໍ້ມາດຕາໃນຂໍ້ຕົກລົງປາຣີເປັນລະອຽດ ແລະ ປະຕິບັດບັນດາຄຳໝັ້ນສັນຍາທີ່ໄດ້ຍົກອອກມາ. ໃນຍາວນານ, ຫວຽດນາມຈະກວດກາ, ອັບເດັດບັນດາແຜນກຳນົດ, ສຸມແຫຼ່ງກຳລັງລົງທຶນໃຫ້ແກ່ການເຄື່ອນໄຫວຕ້ານການປ່ຽນແປງຂອງດິນຟ້າອາກາດ. ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ຢືນຢັນວ່າ :
“ ເພີ່ມທະວີການຄຸ້ມຄອງລັດ, ສ້າງລະບົບກົດໝາຍ, ກົນໄກນະໂຍບາຍໃຫ້ສົມບູນແບບ ແລະ ປະຕິບັດບັນດາມາດຕະການເປັນເຈົ້າການຮັບມືກັບການປ່ຽນແປງຂອງດິນຟ້າອາກາດ, ປ້ອງກັນ ແລະ ຕ້ານໄພທຳມະຊາດ, ຄຸມຄອງຊັບພະຍາກອນທຳມະຊາດ ແລະ ຮັກສາສິ່ງແວດລ້ອມຢ່າງຄົບຊຸດ. ຍົກສູງຄວາມສາມາດພະຍາກອນ, ກ່າວເຕືອນໄພທຳມະຊາດ, ຕິດຕາມການປ່ຽນແປງຂອງດິນຟ້າອາກາດ. ເຊີດຊູຄວາມຮັບຜິດຊອບຂອງບັນດາຂະແໜງການ, ຂັ້ນຕ່າງໆ, ບັນດາກຳລັງ ແລະ ປະຊາຊົນທຸກໆຄົນ, ເພີ່ມທະວີການຮ່ວມມືສາກົນ, ໃຫ້ບຸລິມະສິດລົງທຶນສ້າງບັນດາໂຄງການຮັບມືກັບການປ່ຽນແປງຂອງດິນຟ້າອາກາດທີ່ສຳຄັນ ແລະ ຈຳເປັນ”
ເລື່ອງເປັນເຈົ້າການຜັນຂະຫຍາຍບັນດາມາດຕະການຮັບມືກັບ ການປ່ຽນແປງຂອງດິນຟ້າອາກາດຢ່າງຄົບຊຸດນັ້ນ ບໍ່ພຽງແຕ່ເປັນການຫຼຸດຜ່ອນບັນດາຄວາມທ້າທາຍຈາກການປ່ຽນແປງຂອງດິນຟ້າອາກາດທີ່ມີຕໍ່ຫວຽດນາມເທົ່ານັ້ນ, ຫາກຍັງປະກອບສ່ວນສຳຄັນເຂົ້າໃນການປະຕິບັດເປົ້າໝາຍພັດທະນາເສດຖະກິດ-ສັງຄົມແບບຍືນຍົງໃນປີ 2016 ແລະ ຊຸມປີຕໍ່ໆໄປ