(vovworld)- ວັນທີ 1/1/2017, ຫວຽດນາມ ກາຍເປັນປະເທດເຈົ້າພາບຈັດຕັ້ງເວທີປາໄສການຮ່ວມມືເສດຖະກິດ ອາຊີ ປາຊີຟີກ (APEC) ຢ່າງເປັນທາງການ ນີ້ແມ່ນເວທີປາໄສການຮ່ວມມືເສດຖະກິດສຳຄັນອັນດັບຫນຶ່ງລະຫວ່າງສອງທະວີບ ອາຊີ - ເອີລົບ. 11 ປີນັບແຕ່ເມື່ອເປັນຄັ້ງທຳອິດ ທີ່ຫວຽດນາມ ເປັນເຈົ້າພາບຈັດຕັ້ງ APEC ປີ 2006, ດ້ວຍທິດນຳ ເປັນເຈົ້າການ, ຕັ້ງຫນ້າ ແລະ ມີຫົວຄິດປະດິດສ້າງ, APEC 2017 ຈະເປັນຂີດໝາຍໃຫມ່ຂອງຫວຽດນາມ ບົນເສັ້ນທາງເຊື່ອມໂຍງ.
ບັນດາການນຳເຂົ້າຮ່ວມ APEC 2006
ພາບ:dansinh
|
ໃນໄລຍະກວ່າ 25 ປີແຫ່ງການສ້າງຕັ້ງ ແລະ ພັດທະນາ, ເວທີປາໄສ APEC ນັບມື້ນັບຢັ້ງຢືນແມ່ນກົນໄກການຮ່ວມມືດ້ານເສດຖະກິດແຖວຫນ້າຂອງພາກພື້ນ ແລະໃນໂລກ, ພາໄປເຖິງວິວັດທະນາການຫັນການຄ້າ ແລະ ການລົງທຶນເປັນເສລີ, ຊຸກຍູ້ທ່າອ່ຽງການຮ່ວມມື. ຕໍ່ຫນ້າບັນດາການຫັນປ່ຽນຢ່າງເລິກເຊິ່ງໃນໂລກ ແລະ ທ່າອ່ຽງ ຮ່ວມສຳພັນຢູ່ພາກພື້ນ, ບົດບາດ APEC ຍິ່ງເປັນສິ່ງທີ່ຂາດບໍ່ໄດ້. APEC ນັບມື້ນັບຕ້ອງເພີ່ມທະວີ ເພື່ອຜົນປະໂຫຍດລວມ, ການຮັກສາສັນຕິພາບ, ສະຖຽນລະພາບ, ການຮ່ວມມືເພື່ອການພັດທະນາແບບຍືນຍົງ ແລະ ຄວາມວັດທະນາຖາວອນ.
ໃນສະພາບການນັ້ນ, ການຈັດຕັ້ງປີ APEC 2017, ຫນ້າທີ່ຂອງຫວຽດນາມ ນັ້ນແມ່ນຕ້ອງເຮັດແນວໃດເພື່ອສະແດງໃຫ້ເຫັນວິໄສທັດຍຸດທະສາດຂອງຕົນກ່ຽວກັບ ອາຊີ ປາຊີຟີກ ພວມມີການຫັນປ່ຽນຢ່າງແຮງນີ້.
ສະຕິກ່ຽວກັບປະຊາຄົມພວມມີການຫັນປ່ຽນ
ຫົວຂໍ້ຂອງ APEC 2017 ແມ່ນ“ສ້າງກຳລັງຫນູນໃຫມ່, ພ້ອມກັນເພີ່ມພູນຄູນສ້າງໃຫ້ອະນາຄົດລວມ” ໄດ້ສະແດງໃຫ້ເຫັນການກຳນົດທິດບຸລິມະສິດຂອງ APEC ໃນໄລຍະໃຫມ່. ສິ່ງດັ່ງກ່າວສ່ອງແສງໃຫ້ເຫັນຄວາມຫວັງລວມຂອງບັນດາສະມາຊິກພ້ອມກັນມານະພະຍາຍາມເພື່ອໃຫ້ປີ 2017 ຈະສ້າງກຳລັງຫນູນໃຫມ່ຊ່ວຍໃຫ້ APEC ຟື້ນຟູທ່າເຕີບໂຕດ້ານເສດຖະກິດ ແລະ ການຄ້າ, ເປີດກວ້າງການຮ່ວມມືໄປສູ່ບັນດາຂົງເຂດໃຫມ່ ແລະ ເຮັດໃຫ້ການຮ່ວມສຳພັນພາກພື້ນເລິກເຊິ່ງກວ້າງຂວາງກວ່າ. ພ້ອມກັນນັ້ນ ແມ່ນສ້າງວິໄສທັດໃຫ້ APEC ຫລັງປີ 2020, ຍົກສູງທີ່ຕັ້ງບົດບາດຂອງເວທີປາໄສ, ຜ່ານນັ້ນ ປະກອບສ່ວນ “ເພີ່ມພູນຄູນສ້າງໃຫ້ອະນາຄົດລວມ” ນັ້ນແມ່ນສ້າງປະຊາຄົມອາຊີ ປາຊີຟີກ ສັນຕິພາບ, ສະຖຽນລະພາບ, ພັດທະນາ ແລະວັດທະນາຖາວອນ. ໃນສະພາບການໂລກ, ທ່າອ່ຽງໂລກາພິວັດ, ອາລັກຂາການຄ້າພວມພົ້ນເດັ່ນຂຶ້ນ, ທ່ານ Alain Bollard, ຜູ້ອຳນວຍການຝ່າຍບໍລິຫານຄະນະເລຂາ APEC ຖືວ່າ:
“ນີ້ແມ່ນປີ ທີ່ຫວຽດນາມ ປະສົບກັບສິ່ງທ້າທາຍຫລາຍຢ່າງ. ກອງປະຊຸມສຸດຍອດ ຢູ່ ເປຣູ ໄດ້ຍົກອອກສານສືບຕໍ່ເຊື່ອມໂຍງກັບເສດຖະກິດ ແລະ ຕ້ານຄືນທ່າອ່ຽງການອາລັກຂາ. ຫວຽດນາມ ຈະສະແດງໃຫ້ເຫັນຄວາມສາມາດການຊີ້ນຳນຳພາຂອງຕົນຄືແນວໃດ. ພວກຂ້າພະເຈົ້າ ລໍຖ້າ ຫວຽດນາມໃນເຫດການ APEC 2017 ຈະສືບຕໍ່ນຳພາເພື່ອສ້າງຄວາມເຫັນດີເຫັນພ້ອມ, ສືບຕໍ່ລາຍການຊຸກຍູ້ດ້ານການຄ້າພາກພື້ນ ອາຊີ ປາຊີຟີກ, ລໍຖ້າຂໍ້ລິເລີ່ມໂລກາພິວັດແບບໃຫມ່. ຂ້າພະເຈົ້າເຊື່ອໝັ້ນວ່າ ຫວຽດນາມ ຈະສຳເລັດບົດບາດປະທານ APEC 2017 ເປັນຢ່າງດີ.”
ຫວຽດນາມໄດ້ຮັບຄວາມໄວ້ເນື້ອເຊື່ອໃຈຈາກເພື່ອນມິດສາກົນ ກໍຍ້ອນ ທີ່ຕັ້ງບົດບາດ ແລະ ກຳລັງແຮງໃຫມ່ຂອງຫວຽດນາມ ພາຍຫລັງ 30 ປີແຫ່ງການປ່ຽນແປງໃຫມ່ ກໍຄືບັນດາການປະກອບສ່ວນຢ່າງຕັ້ງຫນ້າຂອງຫວຽດນາມໃນ APEC ກໍຄືບັນດາກົນໄກຮ່ວມມືຫລາຍຝ່າຍໃນໄລຍະຜ່ານມາ. ເພາະສະນັ້ນ ເລື່ອງເປັນເຈົ້າພາບຈັດຕັ້ງ APEC 2017, ຫວຽດນາມ ມີຄວາມເອົາໃຈໃສ່ເປັນພິເສດໃນການຍົກອອກບັນດາຂໍ້ລິເລີ່ມ ດ້ວຍຈິດໃຈໃຫມ່ ນັ້ນແມ່ນເປັນເຈົ້າການ, ຕັ້ງຫນ້າໃນການ ແລະ ເຂົ້າຮ່ວມການສ້າງຮູບປະທຳໃນ APEC, ເພື່ອຕອບສະຫນອງຄວາມຮຽກຮ້ອງຕ້ອງການໃຫມ່ ຂອງ APEC. ທ່ານນາງ ຫງວຽນຫງວຽດງາ, ເອກອັກຄະລັດຖະທູດ, ທີ່ປຶກສາຂັ້ນສູງຄະນະເລຂາ APEC ຫວຽດນາມ ປີ 2017 ໄດ້ຢືນຢັນວ່າ:
“ໃນບັນດາຂໍ້ລິເລີ່ມປະຈຸບັນ ລ້ວນແຕ່ສຸມໃສ່ບັນດາບຸລິມະສິດໃຫຍ່ຂອງ APEC ແລະ ເໝາະສົມກັບຄວາມຮຽກຮ້ອງຕ້ອງການໃຫມ່ຂອງການເຕີບໂຕ ແລະ ການຮ່ວມສຳພັນ. ໃນນັ້ນ ສິ່ງສຳຄັນທີ່ສຸດແມ່ນການເຕີບໂຕຄຸນນະພາບ. ສະນັ້ນ ຫວຽດນາມ ຕ້ອງມີຂໍ້ລິເລີ່ມກ່ຽວກັບການເຕີບໂຕດ້ານຄຸນນະພາບ, ກ່ຽວກັບການເຊື່ອມຈອດ, ການສ້າງໂຄງປະກອບເສດຖະກິດຄືນໃຫມ່. ສິ່ງດັ່ງກ່າວແມ່ນເໝາະສົມກັບຄວາມຮຽກຮ້ອງຕ້ອງການຂອງຫວຽດນາມ ແລະ ເໝາະສົມກັບຄວາມຮຽກຮ້ອງຕ້ອງການໃຫມ່ຂອງ APEC ປະຈຸບັນ. ພວກເຮົາຈະມີບັນດາຂໍ້ລິເລີ່ມ ໃນນັ້ນຖືເປັນສຳຄັນການເພີ່ມທະວີ ແລະ ການຫນູນຊ່ວຍສຳລັບບັນດາວິສາຫະກິດຂະຫນາດກາງ ແລະ ນ້ອຍ, ບັນດາຂໍ້ລິເລິ່ມກ່ຽວກັບການບຳລຸງສ້າງແຫລ່ງຊັບພະຍາກອນມະນຸດ.”
ເພີ່ມພູນຄູນສ້າງນ້ຳໃຈມິດຕະພາບ, ການຮ່ວມມື ແລະ ການສະຫນິດຕິດພັນກັບບັນດາຄູ່ຮ່ວມມື
ເລື່ອງເປັນເຈົ້າພາບຈັດຕັ້ງປີ APEC ແມ່ນຈຸດສຸມການຕ່າງປະເທດຂອງຫວຽດນາມ ຮອດປີ 2020, ສະແດງໃຫ້ເຫັນຄວາມຕັດສິນໃຈຂອງຫວຽດນາມໃນການເຊື່ອມໂຍງເຂົ້າກັບສາກົນຢ່າງເລິກເຊິ່ງ ກວ້າງຂວາງ ແລະ ຍົກລະດັບການພົວພັນຕ່າງປະເທດຫລາຍຝ່າຍ. ດ້ວຍທີ່ຕັ້ງບົດບາດ ແລະ ກຳລັງແຮງຂອງປະເທດຊາດນັບມື້ນັບໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ ແລະ ບົດຮຽນຈັດຕັ້ງປີ APEC 2016 ສຳເລັດຜົນ, ເລື່ອງ ເປັນເຈົ້າພາບຈັດຕັ້ງປີ APEC ຄັ້ງທີ 2 ເປັນການປະກອບສ່ວນສຳຄັນທີ່ສຸດຂອງຫວຽດນາມ ສຳລັບເວທີປາໄສໃນສະພາບການໃຫມ່, ມຸ່ງໄປເຖິງການສະເຫລີມສະຫລອງ 20 ປີ ຫວຽດນາມ ກາຍເປັນສະມາຊິກຂອງ APEC (1998-2018). ນີ້ກໍແມ່ນກາລະໂອກາດເພື່ອໃຫ້ຫວຽດນາມພ້ອມກັບບັນດາສະມາຊິກປະຊາຄົມ ອາຊຽນ ເພີ່ມພູນຄູນສ້າງນ້ຳໃຈມິດຕະພາບ, ການຮ່ວມມື ແລະ ການສະຫນິດຕິດພັນກັບບັນດາຄູ່ຮ່ວມມື, ບັນດາວິສາຫະກິດ, ເພື່ອນມິດໃນພາກພື້ນ. ທ່ານ ບູ່ຍແທງເຊີນ, ຮອງລັດຖະມົນຕີການຕ່າງປະເທດຫວຽດນາມ ຢືນຢັນວ່າ:
“ປີ APEC 2017 ຈະແມ່ນໂອກາດເພື່ອໃຫ້ພວກເຮົາສະແດງໃຫ້ເຫັນພາບພົດຂອງພືນຖານເສດຖະກິດຫວຽດນາມ ມີການປ່ຽນແປງໃຫມ່, ຂະຫຍັນຂັນເຄື່ອນ, ເຕັມໄປດ້ວຍຄວາມສາມາດບົ່ມຊ້ອນ ແລະ ຕັ້ງຫນ້າເຊື່ອມໂຍງເຂົ້າກັບສາກົນ. ຮູບພາບຊາວຫວຽດນາມ ຮັກຫອມສັນຕິພາບ, ປອງດອງ, ໄມຕິຈິດ, ສະຫນິດສະຫນົມ ແລະ ມີຄວາມສີວິໄລ. ປີ APEC 2017 ກໍແມ່ນໂອກາດເພື່ອໃຫ້ວິສາຫະກິດ, ທ້ອງຖິ່ນ, ປະຊາຊົນຫວຽດນາມ ປະກອບສ່ວນເຂົ້າໃນການຮ່ວມມືຂອງ APEC, ມີຄວາມເຂົ້າໃຈກ່ຽວກັບບັນດາຜົນປະໂຫຍດອັນແທດຈິງຊື່ງ APEC ນຳມາໃຫ້ຢ່າງຄົບຖ້ວນກວ່າ.”
ໃນສະພາບການ ທີ່ຫວຽດນາມ ພວມຍາດແຍ່ງແຫລ່ງກຳລັງຈາກສາກົນ ເພື່ອຮັບໃຊ້ການປະຕິບັດຍຸດທະສາດພັດທະນາເສດຖະກິດ ສັງຄົມປີ 2011-2020, APEC 2017 ສ້າງກາລະໂອກາດຫລາຍຢ່າງຕື່ມອີກໃຫ້ແກ່ບັນດາເຂດແຄ້ວນ, ທ້ອງຖິ່ນ ແລະ ປະຊາຄົມວິສາຫະກິດຫວຽດນາມ ໄດ້ພັດທະນາ, ພົວພັນແລກປ່ຽນ, ໂຄສະນາກ່ຽວກັບປະເທດຫວຽດນາມ ປ່ຽນແປງໃຫມ່, ຂະຫຍັນຂັນເຄື່ອນ, ມີຄວາມສາມາດບົ່ມຊ້ອນຫລາຍຢ່າງ ພວມໃນເສັ້ນທາງເຊື່ອມໂຍງຢ່າງຮອບດ້ານ ດ້ວຍທີ່ຕັ້ງບົດບາດໃຫມ່.