(vovworld) - ພ້ອມກັບການພັດທະນາຂອງສະມາຄົມ ປະຊາຊາດ ອາຊີຕາເວັນອອກສ່ຽງໃຕ້ (ອາຊຽນ) ແລະ ທ່າອ່ຽງເຊື່ອມໂຍງຂອງໂລກ, ອາຊຽນນັບມື້ນັບປັບປຸງການພົວພັນສອງຝ່າຍກັບບັນດາຄູ່ຮ່ວມມື, ຜ່ານການສ້າງກົນໄກ ກໍ່ຄືເອກະສານນິຕິກຳຮັບຮອງຂໍ້ຕົກລົງຂອງຝ່າຍຕ່າງໆ. ປະຈຸບັນ, ຂອບເຂດການຮ່ວມມື ອາຊຽນ + 1 ແມ່ນຂອບເຂດການຮ່ວມມືທີ່ບັນລຸໄດ້ຜົນງານຫຼາຍຢ່າງ, ທັງແມ່ນກົນໄກຮ່ວມມືນອກກຸ່ມທີ່ມີປະສິດທິຜົນທີ່ສຸດຂອງອາຊຽນ.
ອາຊຽນ+1ແມ່ນຂອບເຂດການຮ່ວມມືສອງຝ່າຍຂອງ ອາຊຽນກັບແຕ່ລະຄູ່ຮ່ວມມືນອກກຸ່ມ. ນີ້ແມ່ນຂອບເຂດການຮ່ວມມືນອກກຸ່ມ ທີ່ໄດ້ຮັບການສ້າງຕັ້ງກ່ອນໝູ່ຂອງອາຊຽນ. ນັບແຕ່ໄດ້ຮັບການສ້າງຕັ້ງ, ອາຊຽນໄດ້ ສ້າງຕັ້ງການພົວພັນສອງຝ່າຍກັບອົງການ ແລະ ປະເທດຕ່າງໆ ໃນພາກພື້ນກໍ່ຄືຢູ່ໃນໂລກ, ເພື່ອແນໃສ່ປັບປຸງທີ່ຕັ້ງຂອງ ອາຊຽນ. ປະຈຸບັນ, ອາຊຽນຮັກສາການພົວພັນກັບ 10 ຄູ່ຮ່ວມມືຄື: ຈີນ, ສເກົາຫຼີ, ການາດາ, ຍີ່ປຸ່ນ, ອິນເດຍ, ອົດສະຕາລີ, ອາເມລິກາ, ສະຫະພາບເອີລົບ, ລັດເຊຍ ແລະ ນິວຊີແລນ.
ກອງປະຊຸມລັດຖະມົນຕີ ອາຊຽນ - ອີຢູ
ພາບ:TTXVN
|
ຊຸກຍູ້ການຮ່ວມມືດ້ານເສດຖະກິດຕ່າງຝ່າຍຕ່າງມີຜົນປະໂຫຍດ
ໃນໄລຍະຜ່ານມາ, ການພົວພັນລະຫວ່າງອາຊຽນກັບບັນດາຄູ່ຮ່ວມມືໃນຂອບເຂດ ອາຊຽນ+1 ໄດ້ຮັບການຍູ້ແຮງ ແລະ ຍົກສູງ. ນອກຈາກສືບຕໍ່ນະໂຍບາຍ ເປີດກວ້າງການພົວພັນກັບຕ່າງປະເທດ, ຍາມໃດອາຊຽນກໍ່ຍົກສູງຄວາມສຳຄັນຂອງເລື່ອງຮັບປະກັນການພົວພັນລະຫວ່າງອາຊຽນກັບບັນດາຄູ່ຮ່ວມມື, ບົນພື້ນຖານເຄົາລົບເຊິ່ງກັນ ແລະ ກັນ ແລະ ຕ່າງຝ່າຍຕ່າງມີຜົນປະໂຫຍດ, ຮັກສາບົດລາດເປັນໃຈກາງຂອງອາຊຽນ ໃນການສ້າງໂຄງປະກອບພາກພື້ນໃຫ້ເໝາະສົມກັບຈຸດພິເສດ ແລະ ຜົນປະໂຫຍດຂອງພາກພື້ນ, ບົນພື້ນຖານກົນໄກຕ່າງໆ ໂດຍອາຊຽນຊີ້ນຳນຳພາ. ສິ່ງດັ່ງກ່າວກໍ່ໄດ້ຮັບຄວາມເຫັນດີເປັນເອກະພາບສູງຈາກບັນດາຄູ່ຮ່ວມມື.
ບັນດາຄຳໝັ້ນສັນຍາສະຫນັບສະຫນູນບັນດາຄູ່ຮ່ວມມືໃນໄລຍະຜ່ານມາ ແມ່ນກຳລັງຫນູນຊ່ວຍໃຫ້ບັນດາປະເທດ ອາຊຽນ ສ້າງ ແລະ ປັບປຸງປະຊາຄົມທີ່ຂະຫຍັນຂັນເຄື່ອນ ແລະ ພັດທະນາ. ພິເສດ, ກົນໄກເຈລະຈາ ອາຊຽນ +1 ໄລຍະຫລັງປີ 2015 ມີຄວາມໝາຍສຳຄັນ ສຳລັບທີ່ຕັ້ງບົດບາດຂອງກຸ່ມ ແລະ ກໍແມ່ນນະໂຍບາຍບຸລິມະສິດຂອງອາຊຽນ. ປະຈຸບັນ ອາຊຽນ ບັນລຸໄດ້ບັນດາຜົນງານໃຫຍ່ສຸດໃນການເຊື່ອມໂຍງດ້ານເສດຖະກິດ ນັ້ນແມ່ນ ສ້າງຕັ້ງປະຊາຄົມເສດຖະກິດ ອາຊຽນ (AEC) ເມື່ອທ້າຍປີ 2015. ສະນັ້ນ ການຮ່ວມມືດ້ານເສດຖະກິດການຄ້າໃນຂອບເຂດ ອາຊຽນ +1 ໄດ້ຮັບຄວາມສົນໃຈຈາກບັນດາປະເທດສະມາຊິກ ແລະ ຖືວ່າ ນີ້ແມ່ນຈຸດສຸມບຸລິມະສິດ. ທຳອິດແມ່ນເວົ້າເຖິງປະເທດຍີ່ປຸ່ນ ຊື່ງແມ່ນປະເທດຢູ່ ອາຊີ ມີແຫລ່ງກຳລັງດ້ານເສດຖະກິດເຂັ້ມແຂງ. ຍີ່ປຸ່ນ ໄດ້ສະຫງວນການຫນູນຊ່ວຍຫລາຍຢ່າງໃຫ້ແກ່ວິວັດການສ້າງປະຊາຄົມຂອງ ອາຊຽນ, ໃນນັ້ນມີຄຳໝັ້ນສັນຍາຫນູນຊ່ວຍຮັດແຄບຊ່ອງຫວ່າງການພັດທະນາ, ຫັນ “ການເຕີບໂຕມີຄຸນນະພາບສູງ” ຢູ່ ອະນຸພາກພື້ນແມ່ນ້ຳຂອງ ໃຫ້ປະກົດຜົນເປັນຈິງ, ຜັນຂະຫຍາຍຍຸດທະສາດ ໂຕກຽວ 2015. ປະຈຸບັນ, ສອງຝ່າຍ ຊຸກຍູ້ການສຳຫລວດກວດຄືນ ວິວັດການ10 ປີແຫ່ງການຮ່ວມມື ຄູ່ຮ່ວມມືເສດຖະກິດຮອບດ້ານ ອາຊຽນ - ຍີ່ປຸ່ນ, ມູ່ງໄປເຖິງວິວັດການແຫ່ງໄລຍະໃຫມ່ 2016-2025. ສຳລັບຄູ່ຮ່ວມມື ອົດສະຕາລີ, ສັນຍາການຄ້າເສລີ ອາຊຽນ - ອົດສະຕາລີ - ນິວເຊີແລນ ໄດ້ຮັບການລົງນາມເມື່ອປີ 2012 ພວມເສີມຂະຫຍາຍທ່າແຮງ. ຫວ່າງແລ້ວນີ້, ອົດສະຕາລີ ໄດ້ຕໍ່ກຳນົດເວລາການຜັນຂະຫຍາຍໂຄງການຫນູນຊ່ວຍການຮ່ວມມືເສດຖະກິດຮອດປີ 2018 ແລະ ໂຄງການຮ່ວມມືພັດທະນາ ອາຊຽນ ອົດສະຕາລີ ໄລຍະ II ຮອດປີ 2019 ດ້ວຍຄຳໝັ້ນສັນຍາຫນູນຊ່ວຍ 34 ລ້ານ USD. ທີ່ກອງປະຊຸມ ອາຊຽນ ອົດສະຕາລີ ດຳເນີນໃນຂອບເຂດກອງປະຊຸມລັດຖະມົນຕີການຕ່າງປະເທດ ອາຊຽນ ຄັ້ງທີ 49 ຢູ່ ລາວ, ອົດສະຕາລີ ໃຫ້ຄຳໝັ້ນສັນຍາ ສະຫງວນຈຳນວນເງິນກວ່າ 100 ລ້ານ AUD ໃນຮອບເວລາ 5 ປີ ໃຫ້ແກ່ແຜນການ Colombo ໃຫມ່ ເພື່ອແນໃສ່ຫນູນຊ່ວຍການເພີ່ມທະວີການຮ່ວມມືດ້ານການສຶກສາ ແລະ ການຮ່ວມສຳພັນປະຊາຊົນ ລະຫວ່າງອົດສະຕາລີ ແລະ ບັນດາປະເທດ ອາຊຽນ. ການພົວພັນດ້ານເສດຖະກິດ ອາຊຽນ ລັດເຊຍ ໃນຊຸມປີມໍ່ໆມານີ້ ສືບຕໍ່ໄດ້ຮັບການຊຸກຍູ້ ຜ່ານການຜັນຂະຫຍາຍວິວັດການຮ່ວມມືລົງທຶນ ແລະ ການຄ້າ ອາຊຽນ - ລັດເຊຍ, ຜັນຂະຫຍາຍບັນດາແຜນດຳເນີນງານກ່ຽວກັບວິທະຍາສາດ, ເຕັກໂນໂລຊີ, ກະສິກຳ, ພະລັງງານ ແລະ ການຄ້ຳປະກັນດ້ານສະບຽງອາຫານ. ສອງຝ່າຍ ພວມເຫັນດີສົມທົບກັນຈັດຕັ້ງພິທີສະເຫລີມສະຫລອງ 20 ປີແຫ່ງການພົວພັນຄູ່ຮ່ວມມືໃນປີນີ້. ອາຊຽນ ແລະ ລັດເຊຍ ກໍເຫັນດີຜັນຂະຫຍາຍແຜນການດຳເນີນງານໄລຍະ 2016 -2020 ຢ່າງມີປະສິດທິຜົນ ເພື່ອແນໃສ່ຫັນຄວາມສາມາດບົ່ມຊ້ອນແຫ່ງການຮ່ວມມືໃນບັນດາຂົງເຂດທີ່ຕ່າງຝ່າຍຕ່າງມີຄວາມສົນໃຈໃຫ້ປະກົດຜົນເປັນຈິງ.
ໜູນຊ່ວຍອາຊຽນຮັບມືກັບບັນດາບັນຫາປ້ອງກັນຄວາມສະຫງົບທົ່ວໂລກ
ການພົວພັນ ອາຊຽນ ກັບບັນດາຄູ່ຮ່ວມມືໃຫຍ່ຄື: ອາເມລິກາ, ຈີນ, ສ. ເກົາຫຼີ, ອີຢູ ລ້ວນແຕ່ບັນລຸໄດ້ຄວາມຄືບໜ້າກະໂດດຂັ້ນ. ໄປຄຽງຄູ່ກັບການຊຸກຍູ້ເສດຖະກິດ, ການຄ້າ, ການລົງທຶນ, ບັນດາຄູ່ຮ່ວມມືນີ້ຍັງໜູນຊ່ວຍພໍສົມຄວນໃຫ້ແກ່ ອາຊຽນ ໃນການຮັບມືກັບບັນດາສິ່ງທ້າທາຍຄື: ການກໍ່ການຮ້າຍ, ລັດທິຫົວຮຸນແຮງການໃຊ້ຄວາມຮຸນແຮງ, ຄວາມໝັ້ນຄົງໃນການເດີນເຮືອ, ອາດຊະຍາກຳທາງອິນເຕີເນັດ, ການຄ້າສັດປ່າ ແລະ ການຄ້າມະນຸດ.
ດັ່ງນັ້ນ, ອາດຈະເຫັນກົນໄກຮ່ວມມືໃນຂອບເຂດ ອາຊຽນ +1 ແມ່ນກົນໄກຮ່ວມມືມີລັກສະນະຮອບດ້ານທີ່ສຸດເມື່ອທຽບໃສ່ການຮ່ວມມືໃນບັນດາຂອບເຂດການຮ່ວມມືນອກກຸ່ມອື່ນຂອງ ອາຊຽນ. ອາຊຽນ +1 ກໍ່ແມ່ນກົນໄກຮ່ວມມືທີ່ບັນລຸໄດ້ບັນດາໝາກຜົນແທດຈິງທີ່ສຸດສຳລັບ ອາຊຽນ ກໍ່ຄືສຳລັບບັນດາຄູ່ຮ່ວມມື. ບັນດາຄູ່ຮ່ວມມືລ້ວນແຕ່ໃຫ້ຄຳໝັ້ນສັນຍາສະໜັບສະໜູນ ແລະ ໜູນຊ່ວຍ ອາຊຽນ ເພື່ອໃຫ້ປະຊາຄົມພັດທະນາ, ຮັດແຄບຊ່ອງຫວ່າງພັດທະນາ ແລະ ຮັກສາບົດບາດໃຈກາງຂອງ ອາຊຽນ ໃນວິວັດທະນາການພາກພື້ນ, ໜູນຊ່ວຍພໍສົມຄວນກ່ຽວກັບດ້ານການເງິນຢູ່ໃນລະດັບແຕກຕ່າງກັນ. ສິ່ງດັ່ງກ່າວຢັ້ງຢືນຜົນງານ ແລະ ປະສິດທິຜົນຂອງ ອາຊຽນ +1, ສ້າງເງື່ອນໄຂອຳນວຍຄວາມສະດວກເພື່ອໃຫ້ບັນດາປະເທດ ອາຊຽນ ແລະ ບັນດາຄູ່ຮ່ວມມືພົບປະກັນ, ແບ່ງປັນທັດສະນະ, ສ້າງຄວາມໄວ້ເນື້ອເຊື່ອໃຈ, ຊຸກຍູ້ການຮ່ວມມືເສດຖະກິດ - ການຄ້າ. ພ້ອມທັງຮ່ວມມືປ້ອງກັນຄວາມສະຫງົບໃນຂອບເຂດ ອາຊຽນ +1 ກໍ່ຄືຊ່ວຍໃຫ້ບັນດາປະເທດ ອາຊຽນ ຮັບມືກັບບັນດາບັນຫາຄວາມສະຫງົບປອດໄພໃນທົ່ວໂລກຄື: ການກໍ່ການຮ້າຍ, ອາດຊາຍາກຳຂ້າມຊາດ. ພ້ອມກັບການພັດທະນາຂອງ ອາຊຽນ ແລະ ທ່າອ່ຽງເຊື່ອມໂຍງຂອງໂລກ, ອາຊຽນ +1 ພວມນັບມື້ນັບຢັ້ງຢືນບົດບາດຂອງຕົນ, ສະແດງລັກສະນະປະສິດທິຜົນຂອງຕົນໃນການຮ່ວມມື 2 ຝ່າຍ ກັບບັນດາຄູ່ຮ່ວມມືໃນທຸກໆຂົງເຂດ.