(vovworld)- ມະຫາໄຊລະດູບານໃຫມ່ ເມື່ອວັນທີ 30/4/1975 ແມ່ນຫນ້າປະຫວັດສາດອັນສະຫງ່າອົງອາດໃນປະຫວັດສາດແຫ່ງການສ້າງສາ ແລະ ປົກປັກຮັກສາປະເທດຊາດອັນຍິ່ງໃຫຍ່ຂອງຊາດຫວຽດນາມ. ດ້ວຍໄຊຊະນະນີ້, ຊາດຫວຽດນາມ ໄດ້ສຳເລັດພາລະກຳປະຫວັດສາດອັນສະຫງ່າລາສີ ແມ່ນປົດປ່ອຍພາກໃຕ້ຫວຽດນາມຢ່າງສົມບູນ, ທ້ອນໂຮມປະເທດຊາດເປັນເອກະພາບ, ນຳຫວຽດນາມກ້າວເຂົ້າສູ່ສັງກະລາດແຫ່ງເອກະລາດ ແລະ ພ້ອມກັນສ້າງສາປະເທດຊາດໃຫ້ຮັ່ງມີ, ເຂັ້ມແຂງ, ອີ່ມໜຳສຳລານສົມບູນພູນສຸກ. ບົດຂຽນຂອງນັກຂ່າວ ທູຮວາ.
ຊາວ ໄຊງ່ອນ ຂ່ຳນັບຊົມເຊີຍມະຫາໄຊລະດູບານໃຫມ່ປີ 1975
|
ຫວຽດນາມ ແມ່ນປະເທດເປັນເອກະພາບດ້ານວັດທະນະທຳ, ຜືນແຜ່ນດິນຕິດຕໍ່ກັນຈາກ ….. (ດ່ານຊາຍແດນ ຫວຽດນາມ -ຈີນ) ຮອດແຫລມກາເມົາ. ທ້ອນໂຮມປະເທດຊາດເປັນເອກະພາບ ແມ່ນທ່າອ່ຽງຈຳເປັນໃນປະຫວັດສາດຂອງຊາດຫວຽດນາມ.
ແຕ່ຄວາມຈິງ, ພາຍຫລັງເຊັນສັນຍາ ເຊີແນວ ເມື່ອ ປີ 1954, ແມ່ນ້ຳ ເບນຫາຍ ຢູ່ເສັ້ນຂະຫນານ 17 ກາຍເປັນເສັ້ນຂີດຂັ້ນແບ່ງແຍກສອງພາກຂອງປະເທດຊາດ. ໃນຕະຫລອດ 20 ປີ ນັ້ນ, ປະຊາຊົນທັງຊາດຫວຽດນາມ ໄດ້ເສຍເລືອດເນື້ອເຫື່ອແຮງຢ່າງຫລວງຫລາຍ ເພື່ອຈຸດໝາຍທ້ອນໂຮມປະເທດຊາດເປັນເອກະພາບ. ແລະ ວັນທີ 30/4/1975 ແມ່ນວັນປະເທດຊາດໄດ້ທ້ອນໂຮມເຂົ້າເປັນເອກະພາບ.
ທ້ອນໂຮມປະເທດຊາດເປັນເອກະພາບ
ສົງຄາມໂດຍອາເມລິກາ ປຸກລະດົມ ຢູ່ພາກໃຕ້ຫວຽດນາມ ມີລະດັບຄວາມດຸເດືອດຮ້າຍແຮງທີ່ສຸດ, ໄດ້ກໍ່ຄວາມເສຍຫາຍ ແລະ ຄວາມເຈັບປວດຕໍ່ຊາດຫວຽດນາມ. ເມື່ອປະເທດຊາດຖືກຮຸກຮານ, ພື້ນຖານເອກະພາບຂອງຊາດຖືກນາບຂູ່, ປະທານໂຮ່ຈິມີນ ເຄີຍເວົ້າວ່າ: “ປະເທດຫວຽດນາມແມ່ນປະເທດເອກະພາບ, ຊາດຫວຽດນາມແມ່ນຊາດດຽວ. ແມ່ນ້ຳອາດຈະຖືກເຫືອດແຫ້ງ, ພູອາດຈະຖືກເຈືອນ ແຕ່ສັດຈະທຳນັ້ນບໍ່ອາດປ່ຽນແປງໄດ້.” ກອງທັບ ແລະ ປະຊາຊົນຫວຽດນາມ ໄດ້ເຮັດໃຫ້ຍຸດທະສາດສົງຄາມຂອງອາເມລິກາຖືກປະລາໄຊ, ບັງຄັບໃຫ້ອາເມລິກາ ຕ້ອງເຊັນສັນຍາປາຣີ ກ່ຽວກັບການຢຸດຕິສົງຄາມຢູ່ຫວຽດນາມ. ການບຸກໂຈມຕີຂະຫນາດໃຫຍ່ ແລະ ການລຸກຮື້ຂຶ້ນລະດູບານໃຫມ່ປີ 1975 ໄດ້ສິ້ນສຸດລົງດ້ວຍໄຊຊະນະຂອງການຕໍ່ຕ້ານຕ້ານອາເມລິກາ ກູ້ຊາດ.
ໄຊຊະນະເມື່ອວັນທີ 30/4/1975 ໄດ້ສ້າງບາດລ້ຽວອັນຍິ່ງໃຫຍ່ໃນປະຫວັດສາດຂອງຊາດຫວຽດນາມ, ນຳປະເທດຊາດກ້າວເຂົ້າສັງກະລາດເອກະລາດເສລີພາບ, ເອກະພາບ, ສັງຄົມນິຍົມ. ມະຫາໄຊປີ 1975 ໄດ້ເຮັດໃຫ້ສົງຄາມຮຸກຮານຂະຫນາດໃຫຍ່ສຸດ, ຍາວນານທີ່ສຸດ ແລະ ດຸເດືອດທີ່ສຸດຫລັງສົງຄາມໂລກຄັ້ງທີ 2 ຖືກປະລາໄຊ, ເຮັດໃຫ້ຍຸດທະສາດທົ່ວໂລກຄັດຄ້ານການປະຕິວັດ ຂອງອາເມລິກາ ຖືກປີ້ນຂວ້ຳ, ປະກອບສ່ວນເຮັດໃຫ້ລະບົບ ລັດທິຈັກກະພັດ ຖືກຊຸດໂຊມ, ພ້ອມທັງເພີ່ມທະວີກຳລັງແຮງຂອງລະບົບສັງຄົມນິຍົມ.
ໄຊຊະນະຂອງການຕໍ່ຕ້ານຕ້ານອາເມລິກາ ກູ້ຊາດ ແມ່ນໄຊຊະນະຂອງນ້ຳໃຈຮັກຊາດທີ່ແຮງກ້າ, ຂອງຄວາມມຸ້ງຫວັງສັນຕິພາບ, ເອກະລາດ, ເສລີພາບ ແລະ ທ້ອນໂຮມປະເທດຊາດເປັນເອກະພາບຂອງປະຊາຊົນໃນທົ່ວປະເທດ. ນີ້ກໍ່ແມ່ນໄຊຊະນະຂອງສິລະປະຍຸດການທະຫານຫວຽດນາມ ພາຍໃຕ້ກຳລັງແຮງສັງລວມຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ຂອງນ້ຳໃຈມິດຕະພາບ ແລະ ການສະຫນັບສະຫນູນ, ການຊ່ວຍເຫລືອອັນໃຫຍ່ຫລວງ, ມີປະສິດທິຜົນຈາກເພື່ອນມິດສາກົນ, ການຮ່ວມສຳພັນສູ້ຮົບ, ຮຽງບ່າຮຽງໄຫລ່ຕ້ານສັດຕູໂຕດຽວຂອງປະຊາຊົນສາມປະເທດຫວຽດນາມ, ລາວ, ກຳປູເຈຍ.
ປະເທດຊາດໝັ້ນຄົງເຂັ້ມແຂງ
42 ປີ ພາຍຫລັງໄດ້ຮັບໄຊຊະນະເມື່ອວັນທີ 30/4/1975, ປະເທດ ຫວຽດນາມ ໄດ້ປະຕິບັດການປ່ຽນແປງໃຫມ່ປະສົບຜົນສຳເລັດ ແລະ ຍາດໄດ້ບັນດາຜົນງານອັນຍິ່ງໃຫຍ່, ມີຄວາມໝາຍປະຫວັດສາດ. ຫວຽດນາມ ໄດ້ຫລຸດພົ້ນອອກຈາກສະພາບດ້ອຍພັດທະນາ, ກາຍເປັນປະເທດພວມພັດທະນາ ມີລາຍຮັບປານກາງ. ການເຕີບໂຕດ້ານເສດຖະກິດສະເລ່ຍບັນລຸເກືອບ 7% /ປີ. ອົງປະກອບເສດຖະກິດໄດ້ຮັບການຫັນປ່ຽນຢ່າງຕັ້ງຫນ້າ. ອຸດສາຫະກຳ ແລະ ການບໍລິການກວມ 83% ຍອດຈຳນວນ GDP. ຂອບຂະຫນາດ ແລະ ກຳລັງແຮງດ້ານເສດຖະກິດແມ່ນເພີ່ມຂຶ້ນຢ່າງບໍ່ຢຸດຢັ້ງ. GDP ເພີ່ມຂຶ້ນທົບ 7 ເທົ່າ ແລະ ວົງເງິນສົ່ງອອກເພີ່ມຂຶ້ນທົບ 200 ເທົ່າເມື່ອທຽບໃສ່ກ່ອນປີ1975. GDP ສະເລ່ຍໃສ່ຫົວຄົນໃນປີ 2016 ບັນລຸ ປະມານ 2.200 USD. ຜົນງານທີ່ບັນລຸໄດ້ໃນບັນດາຂົງເຂດ ໃນໄລຍະ 40 ປີຜ່ານມາ ໄດ້ສ້າງພື້ນຖານ ແລະ ປະຖົມປັດໄຈສຳຄັນເພື່ອໃຫ້ຫວຽດນາມສືບຕໍ່ປ່ຽນໃຫມ່ ແລະ ພັດທະນາຢ່າງແຮງ, ຮອບດ້ານກວ່າໃນໄລຍະໃຫມ່.
ໃນໄລຍະໃຫມ່, ຫນ້າທີ່ສ້າງສາ ແລະ ພັດທະນາປະເທດຫວຽດນາມ ໄດ້ວາງອອກສິ່ງທ້າທາຍຫລາຍຢ່າງ. ນັ້ນແມ່ນ ສ້າງລະບອບນະໂຍບາຍໃຫ້ສົມບູນແບບ ແລະ ປະຕິບັດພື້ນຖານເສດຖະກິດການຕະຫລາດຕາມກຳນົດທິດສັງຄົມນິຍົມຢ່າງມີປະສິດທິຜົນ, ຮັບປະກັນສະຖຽນລະພາບເສດຖະກິດມະຫາພາກ, ຍູ້ແຮງການປະຕິບັດ ສາມບາດກ້າວບຸກທະລຸຍຸດທະສາດ ແລະ ກຳລັງແກ້ງແຍ້ງ. ຫວຽດນາມ ລະດົມ ແລະ ນຳໃຊ້ບັນດາແຫລ່ງກຳລັງພາຍໃນ ແລະ ຕ່າງປະເທດຢ່າງມີປະສິດທິຜົນ, ພັດທະນາວິສາຫະກິດຢ່າງແຮງ, ສ້າງທຸກເງື່ອນໄຂສະດວກເພື່ອໃຫ້ປະຊາຊົນມີຄວາມເສລີພາບ, ມີຫົວຄິດປະດິດສ້າງພັດທະນາການຜະລິດດຳເນີນທຸລະກິດ, ພັດທະນາເສດຖະກິດຕິດພັນຢ່າງແຫນ້ນແຟ້ນກັບການພັດທະນາວັດທະນະທຳ, ຮັບປະກັນຊີວິດສັງຄົມ. ຫວຽດນາມ ມຸ່ງໄປເຖິງການສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງນັບມື້ນັບສູງໃນເງື່ອນໄຂເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ.
ໄຊຊະນະວັນທີ 30/4/1975 ເຮັດໃຫ້ປະເທດຊາດໄດ້ຮັບການທ້ອນໂຮມເປັນເອກະພາບຢ່າງສົມບູນ. ຈິດໃຈຂອງມະຫາໄຊລະດູບານໃຫມ່ປີ 1975 ແມ່ນພື້ນຖານເພື່ອໃຫ້ປະຊາຊົນຫວຽດນາມ ສ້າງສາປະເທດຊາດໃຫ້ໝັ້ນຄົງເຂັ້ມແຂງ.