ທ່ານ ດາວຫງອກຢຸງ ເລຂາຄະນະພັກກຸ່ມບັນດາອົງການສຳນັກງານຂັ້ນສູນກາງກ່າວຄຳເຫັນທີ່ກອງປະຊຸມ (ພາບ: http://dangcongsan.vn)
|
ກອງປະຊຸມຜັນຂະຫຍາຍວຽກງານຂົນຂວາຍປະຊາຊົນປີ 2014 ໂດຍຄະນະພັກກຸ່ມບັນດາອົງການສຳນັກງານຂັ້ນສູນກາງປະຕິບັດດ້ວຍເນື້ອໃນ “ ເພີ່ມທະວີ ແລະ ປ່ຽນແປງໃໝ່ວຽກງານຂົນຂວາຍປະຊາຊົນ” ຖືກຈັດຂຶ້ນໃນວັນທີ 25 ແລະ 26/2 ຢູ່ຮ່າໂນ້ຍ.
ວຽກງານຂົນຂວາຍປະຊາຊົນທັງແມ່ນປະຖົມປັດໄຈ, ທັງແມ່ນກຳລັງຊຸກຍູ້ການພັດທະນາເສດຖະກິດ-ສັງຄົມ ແລະ ໄດ້ຮັບຖືວ່າ ແມ່ນໜ້າທີ່ການເມືອງຂອງບັນດາອົງການຈັດຕັ້ງພັກ, ລັດ ແລະ ບັນດາອົງການຈັດຕັ້ງການເມືອງ-ສັງຄົມ. ວຽກງານຂົນຂວາຍປະຊາຊົນໃນໄລຍະໃໝ່ ແມ່ນການໂຄສະນາ, ສຶກສາອົບຮົມ, ຂົນຂວາຍ, ເກ້ັຍກອມທຸກໆຄົນປະຕິບັດບັນດາແຜນນະໂຍບາຍ, ແນວທາງຂອງພັກ, ນະໂຍບາຍ, ກົດໝາຍຂອງລັດ, ຕອບສະໜອງຄວາມຮຽກຮ້ອງຕ້ອງການໃນການປ່ຽນແປງໃໝ່ຂອງປະເທດຊາດ ແລະ ເຊື່ອມໂຍງເຂົ້າກັບເສດຖະກິດສາກົນ .
ເພີ່ມທະວີ ແລະ ປ່ຽນແປງໃໝ່ການນຳພາຂອງພັກທີ່ີມີຕໍ່ວຽກງານຂົນຂວາຍປະຊາຊົນ.
ຈຸດໝາຍໃຫຍ່ກ່ວາໝູ່ຂອງວຽກງານຂົນຂວາຍປະຊາຊົນໃນສະພາບການໃໝ່ ແມ່ນປັບປຸງຄວາມເຊື່ອໝັ້ນຂອງປະຊາຊົນທີ່ມີຕໍ່ພັກ ແລະ ລັດ. ຕາມນັ້ນແລ້ວ, ຄະນະພັກຂັ້ນຕ່າງໆຕ້ອງສືບຕໍ່ຮ່ຳຮຽນ, ຄົ້ນຄວ້າ, ຊາບຊຶມຢ່າງເລິກເຊິ່ງກ່ຽວກັບບັນດາມະຕິ, ຄຳສັ່ງ, ຂໍ້ກຳນົດຂອງພັກ ແລະ ລັດກ່ຽວກັບວຽກງານຂົນຂວາຍປະຊາຊົນ, ໂດຍສະເພາະແມ່ນມະຕິເລກທີ 25 ຂອງຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 11 ກ່ຽວກັບ “ການເພີ່ມທະວີການນຳພາຂອງພັກທີ່ີມີຕໍ່ວຽກງານຂົນຂວາຍປະຊາຊົນໃນໄລຍະໃໝ່”
ເພື່ອປະຕິບັດວຽກງານຂົນຂວາຍປະຊາຊົນເປັນຢ່າງດີນັ້ນ, ພະນັກງານ, ສະມາຊິກພັກ, ລັດຖະກອນແຕ່ລະຄົນໃນລະບົບການເມືອງຕ້ອງໃກ້ຊິດຕິດແທດ, ເຂົ້າໃຈປະຊາຊົນ, ເປັນແບບຢ່າງເພື່ອໃຫ້ປະຊາຊົນເຮັດຕາມ. ທ່ານ ດາວຫງອກຢຸງ ເລຂາຄະນະພັກກຸ່ມບັນດາອົງການສຳນັກງານຂັ້ນສູນກາງ ຖືວ່າ :
“ເລຂາຄະນະພັກ, ຫົວໜ້າອົງການສຳນັກງານ, ຫົວໜ່ວຍຕ່າງໆຕ້ອງດຳເນີນການສົນທະນາກັບ ພະນັກງານ, ສະມາຊິກພັກ, ລັດຖະກອນ ແລະ ຊາວຜູ້ອອກແຮງງານເປັນປະຈຳ ເພື່ອກຳແໜ້ນຄວາມມຸ່ງມາດປາດຖະໜາ, ຄວາມໃນໃຈ, ຮັບເອົາຄຳເຫັນປະກອບ ແລະ ແກ້ໄຂບັນດາບັນຫາເກີດໃໝ່ຢ່າງທັນການ. ເຊີດຊູສະຕິຄວາມຮັບຜິດຊອບ, ຄຸນສົມບັດ, ສ້າງຖັນແຖວພະນັກງານທີ່ສາມາດຮັບໃຊ້ປະຊາຊົນເປັນຢ່າງດີ, ຕ້ອງຮັບຟັງຄຳເຫັນຂອງປະຊາຊົນ ແລະ ເພື່ອປະຊາຊົນ. ຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດຂອງປະທານໂຮ່ຈິມິນກ່ຽວກັບການຍົກສູງຈິດໃຈຄວາມຮັບຜິດຊອບ, ຕ້ານລັດທິສ່ວນບຸກຄົນ, ຄຳເວົ້າຕ້ອງໄປຄຽງຄູ່ກັບການກະທຳ ”
ວຽກງານຂົນຂວາຍປະຊາຊົນຂອງພັກ ມຸ່ງໄປສູ່ຄວາມຍຸຕິທຳລະຫວ່າງບັນດາຊົນຊັ້ນໃນສັງຄົມ, ຊົນເຜົ່າ, ສາສະໜາ......ໃນລະບົບການເມືອງ ແລະ ໃນທົ່ວສັງຄົມ. ແຕ່ລະເປົ້າໝາຍທີ່ແຕກຕ່າງກັນກໍຮຽກຮ້ອງໃຫ້ມີແບບວິທີປ່ຽນແປງໃໝ່ວຽກງານຂົນຂວາຍປະຊາຊົນ ຕ້ອງແຕກຕ່າງກັນ.
ຍົກສູງສະຕິຄວາມຮັບຮູ້ ແລະ ຄວາມຮັບຜິດຊອບຂອງບັນດາອົງການຈັດຕັ້ງພັກ.
ວຽກງານຂົນຂວາຍປະຊາຊົນໃນປີ 2014, ສືບຕໍ່ມຸ່ງໄປສູ່ຂັ້ນຮາກຖານໃຫ້ແຂງແຮງ, ເພີ່ມທະວີ, ກຳແໜ້ນສະພາບການຂອງປະຊາຊົນ, ໂຄສະນາ, ເກັ້ຍກອມ ສ້າງຄວາມເຫັນດີເຫັນພ້ອມໃນທົ່ວສັງຄົມ, ປັບປຸງກຸ່ມກ້ອນສາມັກຄີທົ່ວປວງຊົນ. ຄະນະພັກຂັ້ນຕ່າງໆ ນຳເນື້ອໃນ ວຽກງານຂົນຂວາຍປະຊາຊົນເຂົ້າໃນແຜນປະຕິບັດງານປະຈຳເດືອນ, ໄຕມາດ ແລະ ທັງປີ. ຕາມທ່ານ ຫງວຽນຢີຫວຽດ, ຮອງຫົວໜ້າຄະນະຂົນຂວາຍປະຊາຊົນສູນກາງແລ້ວ, ໃນການສ້າງນະໂຍບາຍ, ຕ້ອງຖືເປັນສຳຄັນການຮັບເອົາຄຳເຫັນຂອງປະຊາຊົນ, ຮັບປະກັນຫຼັກການເຫັນເຫັນພ້ອມກັບຈິດໃຈຂອງປະຊາຊົນ. ທ່ານກ່າວວ່າ :
“ວຽກງານຂົນຂວາຍປະຊາຊົນຂອງອຳນາດການປົກຄອງ, ກ່ອນອື່ນໝົດ ແມ່ນເລີ່ມມາຈາກທັດສະນະເພື່ອປະຊາຊົນ. ຕ້ອງເລີ່ມຈາກໄລຍະສ້າງກົນໄກ, ນະໂຍບາຍ, ກົດໝາຍ, ແລ້ວກໍໂຄສະນາເຜີຍແຜ່, ຊ່ວຍໃຫ້ປະຊາຊົນເຂົ້າໃຈວຽກງານຂົນຂວາຍປະຊາຊົນປະຕິບັດ ກົນໄກ, ນະໂຍບາຍ, ແຜນນະໂຍບາຍຂອງພັກ ແລະ ຮັບຟັງຄຳເຫັນຂອງປະຊາຊົນ, ເສີມຂະຫຍາຍກຳລັງແຮງຂອງ ປະຊາຊົນ ”
ເພື່ອປ່ຽນແປງໃໝ່ວຽກງານຂົນຂວາຍປະຊາຊົນຢ່າງມີປະສິດທິຜົນນັ້ນ, ກໍຄວນຍູ້ແຮງການປະຕິບັດຂະບວນການແຂ່ງຂັນ “ຂົນຂວາຍປະຊາຊົນຢ່າງຄ່ອງແຄ້ວ” ແລະ ບັນດາຂະບວນການແຂ່ງຂັນຮັກຊາດ, ຂົນຂວາຍທົ່ວປວງຊົນຕັ້ງໜ້າເຂົ້າຮ່ວມການຕໍ່ສູ້ປ້ອງກັນ ແລະ ຕ້ານໄພສໍ້ລາດບັງຫຼວງ, ການຟຸມເຟື່ອຍ.
ຍູ້ແຮງວຽກງານຂົນຂວາຍປະຊາຊົນໃນບັນດາອົງການສຳນັກງານແຫ່ງລັດ.
ເພີ່ມທະວີ ແລະ ປ່ຽນແປງໃໝ່ວຽກງານຂົນຂວາຍປະຊາຊົນຂອງບັນດາອົງການສຳນັກງານແຫ່ງລັດ ແມ່ນໄດ້ຮັບຖືວ່າ ແມ່ນຂອດບຸກທະລຸໃນການຊີ້ນຳການຈັດຕັ້ງປະຕິບັດ ວຽກງານຂົນຂວາຍປະຊາຊົນໃນໄລຍະໃໝ່. ທ່ານ ຫງວຽນເທ້ຈຸງ ຮອງຫົວໜ້າຜູ້ປະຈຳການຄະນະຂົນຂວາຍປະຊາຊົນສູນກາງ ມີຄວາມເອົາໃຈໃສ່ເປັນພິເສດການປະຕິບັດຂໍ້ກຳນົດປະຊາທິປະໄຕຢູ່ຂັ້ນຮາກຖານ. ທ່ານກ່າວວ່າ :
“ ຂ້າພະເຈົ້າຖືວ່າ ຂໍ້ກຳນົດປະຊາທິປະໄຕຢູ່ຂັ້ນຮາກຖານແມ່ນຕ້ອງປະຕິບັດເປັນປະຈຳ ແລະ ຕໍ່ເນື່ອງ, ເພື່ອເຮັດແນວໃດໃຫ້ແຕ່ລະອົງການສຳນັກງານ, ຫົວໜ່ວຍ ລ້ວນແຕ່ເອົາໃຈໃສ່ ແລະ ປະຕິບັດຂໍ້ກຳນົດປະຊາທິປະໄຕເປັນຢ່າງດີ. ຖ້າຫາກປະຕິບັດຂໍ້ກຳນົດປະຊາທິປະໄຕເປັນຢ່າງດີນັ້ນ, ໝາຍຄວາມວ່າ ສາມາດເສີມຂະຫຍາຍກຳລັງແຮງຂອງພະນັກງານ, ສະມາຊິກພັກ, ມະຫາຊົນ, ສາມັກຄີດີກ່ວາເກົ່າ. ໃນຂໍ້ກຳນົດປະຊາທິປະໄຕຢູ່ຂັ້ນຮາກຖານ, ປະຊາຊົນມີຄວາມເອົາໃຈໃສ່ທີ່ສຸດ ແລະ ຮຽກຮ້ອງໃຫ້ປະຕິຮູບລະບຽບການບໍລິຫານເປັນຢ່າງດີ, ຕ້ອງຖືເອົາລະດັບຄວາມພໍໃຈຂອງປະຊາຊົນ ແລະ ວິສາຫະກິດເປັນເຄຶ່ອງວັດແທກໃຫ້ແກ່ການ ປະຕິຮູບລະບຽບການບໍລິຫານ ”
ວຽກງານຂົນຂວາຍປະຊາຊົນແມ່ນໜ້າທີ່ຮັບຜິດຊອບຂອງທັງລະບົບການເມືອງ, ໃນນັ້ນ, ພັກເປັນຜູ້ນຳພາ, ອຳນາດການປົກຄອງມີບົດບາດບໍລິຫານການປະຕິບັດ, ແນວໂຮມປະເທດຊາດຫວຽດນາມ ແລະ ບັນດາອົງການຈັດຕັ້ງມະຫາຊົນມີບົດບາດຕິດຕາມກວດກາ, ສັງເກດຕີລາຄາເພື່ອປະຕິບັດສິດເປັນເຈົ້າຂອງປະຊາຊົນ. ປ່ຽນແປງໃໝ່ວຽກງານຂົນຂວາຍປະຊາຊົນ, ຫັນບັນດາຮູບ ການຂົນຂວາຍປະຊາຊົນເປັນຫຼາຍຮູບຫຼາຍແບບ ແນໃສ່ປັບປຸງ ແລະ ເພີ່ມທະວີສາຍພົວພັນລະຫວ່າງພັກ ແລະ ປະຊາຊົນ, ມຸ່ງໄປສູ່ການສ້າງປະເທດຫວຽດນາມສັນຕິພາບ, ສະຖຽນລະພາບ ແລະ ເຊື່ອມໂຍງເຂົ້າກັບສາກົນ.