ວັນທີ 8/8, ສະຫະສະມາຄົມບັນດາປະເທດອາຊີຕາເວັນອອກສ່ຽງໃຕ້ (ອາຊຽນ) ໄດ້ຈັດຕັ້ງສະເຫຼີມສະຫຼອງວັນສ້າງຕັ້ງຄົບຮອບ 47 ປີ (8/8/1967 - ວັນທີ 8/8/2014). ຜ່ານໄລຍະເກືອບ 5 ທົດສະວັດແຫ່ງການສ້າງຕັ້ງ ແລະ ຂະຫຍາຍຕົວ, ປະຈຸບັນ ອາຊຽນໄດ້ກາຍເປັນພາກພື້ນພັດທະນາທີ່ຂະຫຍັນຂັນເຄື່ອນ ແລະ ສາມັກຄີ, ແມ່ນຄູ່ຮ່ວມມືທີ່ຂາດບໍ່ໄດ້ຂອງບັນດາປະເທດໃຫຍ່ ແລະ ບັນດາອົງການຈັດຕັ້ງສາກົນທີ່ສຳຄັນ.
(ພາບປະກອບ) |
ຫວນຄືນໄລຍະເກືອບ 5 ທົດສະວັດແຫ່ງການສ້າງຕັ້ງ ແລະ ຂະຫຍາຍຕົວ, ເປັນທີ່ຈະແຈ້ງແລ້ວວ່າ ອາຊຽນໄດ້ປ່ຽນແປງຢ່າງຫຼວງຫຼາຍ, ພິເສດແມ່ນການປ່ຽນແປງກ່ຽວກັບການຈັດຕັ້ງ ແລະ ລັກສະນະຂອງອົງການຈັດຕັ້ງນີ້. ຈາກຈຳນວນ 5 ປະເທດສະມາຊິກໃນເບື້ອງຕົ້ນ, ອາຊຽນໄດ້ກາຍເປັນກຸ່ມເຊື່ອມຈອດລະຫວ່າງ 10 ປະເທດອາຊີຕາເວັນອອກສ່ຽງໃຕ້, ພ້ອມກັນມຸ່ງໄປສູ່ການສ້າງປະຊາຄົມ ແລະ ສ້າງຄວາມເຊື່ອໝັ້ນ. ໄລຍະເກືອບ 5 ທົດສະວັດທີ່ຜ່ານມາ, ຈາກ ສະຫະສະມາຄົມບັນດາປະເທດຮ່ວມມືນຳກັນ ໂດຍອີງບົນກົນໄກທີ່ບໍ່ໜັກແໜ້ນ, ນັ້ນແມ່ນຖະແຫຼງການການເມືອງປີ 1967, ມາຮອດປະຈຸບັນ, ອາຊຽນເຄື່ອນໄຫວບົນພື້ນຖານບັນດາຫຼັກການກົດໝາຍ, ກອບກົດໝາຍ ແລະ ບັນດາກົງຈັກໃນກົດບັດອາຊຽນ. ອາຊຽນນັບມື້ນັບຮ່ວມສຳພັນຢ່າງແໜ້ນແຟ້ນ, ກາຍ ເປັນກົງຈັກສົມບູນແບບ ແລະ ເປັນຄູ່ຮ່ວມມືທີ່ຂາດບໍ່ໄດ້ຂອງບັນດາປະເທດໃຫຍ່ ແລະ ບັນດາອົງການຈັດຕັ້ງສາກົນທີ່ສຳຄັນ. ເຄັດລັບເພື່ອສ້າງໃຫ້ມີ ອາຊຽນຄືໃນວັນນີ້ ກໍແມ່ນນ້ຳໃຈສາມັກຄີເພື່ອຈຸດໝາຍສ້າງ “ ພາກພື້ນແຫ່ງສັນຕິພາບ, ຄວາມໝັ້ນຄົງ ແລະ ສະຖຽນລະພາບຍາວນານ, ເສດຖະກິດເຕີບໂຕແບບຍືນຍົງ, ຄວາມກ້າວໜ້າທາງສັງຄົມ ແລະ ວັດທະນາຖາວອນ”
ປັດໄຈທີ່ຂາດບໍ່ໄດ້ສຳລັບສັນຕິພາບ, ຄວາມໝັ້ນຄົງໃນພາກພື້ນ
ຕາມທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວາງວິງແລ້ວ, ຈຸດທີ່ພົ້ນເດັ່ນໃນອາຊຽນ, ນັ້ນແມ່ນເລື່ອງ ອາຊຽນໄດ້ ແລະ ພວມກາຍເປັນປັດໄຈທີ່ສຳຄັນ, ແມ່ນເສົາຄ້ຳຂອງບັນດາຄວາມມານະພະຍາຍາມລວມໃນພາກພື້ນສຳລັບການສ້າງສະພາບແວດລ້ອມແຫ່ງສັນຕິພາບ, ສະຖຽນລະພາບໃນພາກພື້ນນີ້. ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວາງວິງ ກ່າວວ່າ :
“ໃນປະຫວັດສາດແຫ່ງການພັດທະນາອາຊຽນ, ພິເສດໃນໄລຍະມໍ່ໆມານີ້, ອາຊຽນໄດ້ເສີມຂະຫຍາຍບົດບາດທີ່ຕັ້ງໜ້າຂອງຕົນທີ່ມີຕໍ່ສັນຕິພາບ, ຄວາມໝັ້ນຄົງ, ສະຖຽນລະພາບ ແລະ ການຮ່ວມມືໃນພາກພື້ນໂດຍຜ່ານບັນດາລະບົບ, ບັນດາເວທີ່ປາໄສຂອງອາຊຽນ, ພ້ອມກັນນັ້ນ, ກໍພ້ອມກັບເລື່ອງອາຊຽນສົນທະນາ, ແບ່ງປັນບົດຮຽນສ້າງບັນດາມາດຖານດ້ານການປະພຶດໃນພາກພື້ນ. ອາຊຽນໄດ້ຮັບການຮັບຮູ້ ແລະ ສະໜັບສະໜູນບົດບາດເປັນໃຈກາງຂອງອາຊຽນໃນພາກພື້ນຈາກບັນດາປະເທດຄູ່ຮ່ວມມື, ປະເທດໃຫຍ່”
ຕໍ່ໜ້າສະພາບການໃນປະຈຸບັນທີ່ມີຄວາມສັບສົນ, ສິ່ງທ້າທາຍຊຶ່ງກ່ຽວຂ້ອງເຖິງການຂັດແຍ້ງ, ຍາດຊິງອະທິປະໄຕ, ໃນນັ້ນມີບັນຫາທະເລຕາເວັນອອກ. ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວາງວິງ ຖືວ່າ ເພື່ອສືບຕໍ່ຮັກສາບົດບາດເປັນໃຈກາງຂອງຕົນນັ້ນ, ຈຳເປັນຕ້ອງມີຄວາມມານະພະຍາຍາມຢ່າງໃຫຍ່ຫຼວງຂອງ 10 ປະເທດອາຊຽນ . ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວາງວິງ ກ່າວຕໍ່ໄປວ່າ :
“ທີ່ 1 ແມ່ນຕ້ອງເພີ່ມທະວີຄວາມສາມັກຄີ ແລະ ສ້າງປະຊາຄົມອາຊຽນໃຫ້ສຳເລັດຜົນເພື່ອເສີມຂະຫຍາຍກຳລັງພາຍໃນຂອງຕົນ. ທີ່ 2 ແມ່ນປັບປຸງບັນດາກົງຈັກ ແລະ ຂອບເຂດຮ່ວມມືຂອງອາຊຽນ. ທີ່ 3 ສຳລັບບັນດາບັນຫາໃນພາກພື້ນຊຶ່ງກ່ຽວຂ້ອງເຖິງສັນຕີພາບ, ຄວາມໝັ້ນຄົງ ແລະ ການຮ່ວມມືນັ້ນ, ອາຊຽນຕ້ອງມີສຽງເວົ້າຢ່າງເປັນເຈົ້າການຂອງຕົນໂດຍອີງບົນບັນດາຫຼັກການຂອງອາຊຽນ, ແບ່ງປັນຜົນປະໂຫຍດຂອງອາຊຽນກັບບັນດາປະເທດທີ່ເຂົ້າຮ່ວມໃນການຮ່ວມມືພາກພື້ນນີ້, ບໍ່ຖືກຄອບງຳຈາກບັນດາປະເທດໃຫຍ່.
ປະຊາຄົມທີ່ສາມັກຄີ, ໝັ້ນຄົງເຂັ້ມແຂງ
ຕາມແຜນງານແລ້ວ, ອາຊຽນຈະປະກາດການສ້າງຕັ້ງຂອງ ປະຊາຄົມອາຊຽນໃນວັນທີ 31/12/2015. ນີ້ແມ່ນຂີດໝາຍທີ່ມີຄວາມໝາຍສຳຄັນຍິ່ງໃນປະຫວັດສາດແຫ່ງການພັດທະນາຂອງ ອາຊຽນ. ດ້ວຍກວ່າ 800 ໜ້າວຽກທີ່ວາງອອກໃນແຜນງານກໍ່ສ້າງ ປະຊາຄົມອາຊຽນ ນັບທັງ 3 ເສົາຄ້ຳການເມືອງ, ຄວາມສະຫງົບ, ເສດຖະກິດ ແລະ ວັດທະນະທຳສັງຄົມ, ມາຮອດປະຈຸບັນ, ປະຊາຄົມອາຊຽນໄດ້ສຳເລັດກວ່າ 80% ຈຳນວນວຽກງານ.
ປະຊາຄົມອາຊຽນໄດ້ຮັບການສ້າງຕັ້ງຂຶ້ນ ເປັນຂີດໝາຍແຫ່ງການພັດທະນາກ່ຽວກັບທາດແທ້ຂອງອາຊຽນ, ແຕ່ວິໄສທັດຂອງອາຊຽນພາຍຫຼັງປະຊາຄົມ ອາຊຽນໄດ້ຮັບການສ້າງຕັ້ງ ແມ່ນສິ່ງທີ່ສຳຄັນ. ດັ່ງນັ້ນ, ບັນດາການນຳອາຊຽນໄດ້ຕັດສິນໃຈສ້າງວິໄສທັດພັດທະນາ ປະຊາຄົມອາຊຽນຫຼັງປີ 2015. ກ່ຽວກັບບັນດາໜ້າທີ່ຂອງອາຊຽນໃນໄລຍະທີ່ຈະມາເຖິງ, ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວາງວິງ ເນັ້ນໜັກວ່າ :
“ອາຊຽນຕ້ອງສາມັກຄີ, ຕ້ອງເສີມຂະຫຍາຍໄດ້ສຽງເວົ້າຢ່າງເປັນເຈົາການຂອງຕົນ ແລະ ພິເສດແມ່ນຕ້ອງຮັກສາໃຫ້ໝັ້ນຄົງ ແລະ ຮັບປະກັນການປະຕິບັດບັນດາຫຼັກການທີ່ໄດ້ວາງອອກໃນພາກພື້ນ, ໃນນັ້ນ ມີກົດໝາຍສາກົນ. ແລະ ຕໍ່ໜ້າບັນດາບັນຫາໃນພາກພື້ນນັ້ນ, ອາຊຽນຕ້ອງມີສຽງເວົ້າດ້ວຍຄວາມຮັບຜິດຊອບຂອງຕົນ. ນັ້ນແມ່ນບັນດາຈຸດໝາຍທີ່ ອາຊຽນຈະມຸ່ງໄປເຖິງ”
19 ປີແຫ່ງການເຂົ້າຮ່ວມທີ່ມີຄວາມຮັບຜິດຊອບໃນອາຊຽນ
19 ປີແຫ່ງການເຂົ້າຮ່ວມອາຊຽນ, ຫວຽດນາມໄດ້ເຊື່ອມໂຍງຢ່າງເລິກເຊິ່ງ ແລະ ກວ້າງຂວາງເຂົ້າໃນຄວາມມານະພະຍາຍາມລວມຂອງອາຊຽນ ແລະ ພ້ອມກັບ ອາຊຽນມຸ່ງໄປສູ່ປະຊາຄົມ. ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວາງວິງ ຢືນຢັນວ່າ :
“ ພວກເຮົາໄດ້ພະຍາຍາມພ້ອມກັບບັນດາປະເທດອາຊຽນຮັບປະກັນຄວາມສາມັກຄີ, ສະແດງໃຫ້ເຫັນບົດບາດເປັນເຈົ້າການຂອງອາຊຽນ ແລະ ພິເສດແມ່ນການຮັກສາບັນດາຫຼັກການຂອງກົດໝາຍສາກົນໃຫ້ໝັ້ນຄົງ ແລະ ບັນດາການປະກອບສ່ວນຂອງພວກເຮົາພ້ອມກັບບັນດາປະເທດອາຊຽນ ເພື່ອໃຫ້ອາຊຽນສະແດງໃຫ້ເຫັນບົດບາດຂອງຕົນຕໍ່ໜ້າບັນດາບັນຫາທີ່ສັບສົນ, ຍົກຕົວຢ່າງຄືບັນຫາທະເລຕາເວັນອອກ, ໄດ້ສະແດງໃຫ້ເຫັນແຈ້ງສິ່ງນີ້, ຄືສາມາດອອກຖະແຫຼງການ 6 ຫຼັກການຂອງອາຊຽນ, ອອກຖະແຫຼງການເມື່ອວັນທີ 10/5 ກ່ຽວກັບບັນດາສະພາບການທີ່ສັບສົນໃນໄລຍະມໍ່ມານີ້ຢູ່ທະເລຕາເວັນອອກ, ນັ້ນແມ່ນບັນດາພະຍານຫຼັກຖານພິສູດຢ່າງຈະແຈ້ງກ່ຽວກັບສິ່ງນີ້”
ອາຊຽນພວມກ້າວໄປເຖິງຈຸດເວລາສ້າງຕັ້ງປະຊາຄົມ. ດ້ວຍກຳລັງແຮງສາມັກຄີ ພ້ອມກັບຄວາມມານະພະຍາຍາມ ແລະ ຄວາມຕັດສິນໃຈຂອງບັນດາປະເທດສະມາຊິກ, ປະຊາຄົມອາຊຽນຈະສືບຕໍ່ກ້າວໄປເຖິງບັນດາເປົ້າໝາຍຮ່ວມສຳພັນສູງກວ່າ. ໂດຍແມ່ນພາກສ່ວນທີ່ຜູກພັນຢ່າງສະໜິດແໜ້ນ, ເປັນສະມາຊິກທີ່ມີຄວາມຮັບຜິດຊອບໃນອາຊຽນ, ອະນາຄົດແຫ່ງການພັດທະນາຂອງຫວຽດນາມຈະສືບຕໍ່ຕິດແໜ້ນກັບອາຊຽນບົນເສັ້ນທາງຮ່ວມສຳພັນ ແລະ ເຊື່ອມໂຍງພາກພື້ນ.