(vovworld)- ປະທານໂຮ່ຈິມີນ, ຜູ້ນຳທີ່ຍິ່ງໃຫຍ່ຂອງຊາດຫວຽດນາມ, ເມື່ອເຖິງແກ່ມໍລະນະກຳກ່ອນນີ້ 45 ປີ ເພີ່ນໄດ້ປະໄວ້ມໍລະດົກແນວຄິດອັນລຳ້ຄ່າໃຫ້ແກ່ປະເທດຊາດ. ໃນນັ້ນ ພິໄນກຳຂອງເພີ່ນ ບໍ່ພຽງແຕ່ແມ່ນເອກະສານມີຄຸນຄ່າປະຫວັດສາດເທົ່ານັ້ນ ຫາກຍັງມີຄວາມໝາຍຍຸກສະໄຫມທີ່ເລິກເຊິ່ງໃນພາລະກິດສ້າງສາ ແລະ ປົກປັກຮັກສາປະເທດຊາດປະຈຸບັນ. ບົດຂຽນຂອງເລ້ຮັ່ງທີ່ມີຫົວຂໍ້ວ່າ: ພິໃນກຳຂອງປະທານໂຮ່ຈິມີນ-ແສງສະຫວ່າງຂອງພູມປັນຍາແລະ ຄວາມເຊື່ອໝັ້ນ.
ໃນພິໄນກຳ, ທ່ານປະທານໂຮ່ຈິມີນ ຢືນຢັນ: ການຕໍ່ຕ້ານຕ້ານຈັກກະພັດອາເມລິກາກູ້ຊາດ ຂອງປະຊາຊົນ ຫວຽດນາມ ເຖິງວ່າປະສົບກັບຄວາມຫຍຸ້ງຍາກລຳບາກ, ຖືກເສຍສະຫລະຫລາຍຢ່າງກໍຕາມ ແຕ່ ໄດ້ຮັບໄຊຊະນະຢ່າງແນ່ນອນ; ຢືນຢັນ: ຄວາມສາມັກຄີແມ່ນມູນເຊື້ອອັນລຳ້ຄ່າຂອງພັກກອມມູນິດຫວຽດນາມ, ປະທານໂຮ່ຈິມີນ ຕັກເຕືອນໃຫ້ບັນດາສະມາຊີກພັກຈົ່ງຮັກສາຄວາມສາມັກຄີເປັນເອກະພາບຂອງພັກຄືດັ່ງຮັກສາແກ້ວຕາຂອງຕົນ. ຕາມເພີ່ນແລ້ວ, ພັກກອມມູນິດຫວຽດນາມ ຕ້ອງປະຕິບັດປະຊາທິປະໄຕຢ່າງກວ້າງຂວາງ, ເປັນປະຈຳ ແລະ ຕ້ອງປະຕິບັດການຕຳນິຕົນເອງ ແລະ ຕຳນິເພື່ອນສະຫາຍຢ່າງເຂັ້ມງວດ, ສະມາຊິກພັກ ແລະ ພະນັກງານແຕ່ລະຄົນ ຕ້ອງເຊື່ອມຊືມຄຸນສົມບັດປະຕິວັດ, ຮັກສາພັກໃຫ້ປອດໃສ, ສົມກັບການນຳ, ຜູ້ຮັບໃຊ້ປະຊາຊົນຈົ່ງຮັກພັກດີ. ປະທານໂຮ່ຈິມີນ ກໍປະໄວ້ບັນດາຄຳຕັກເຕືອນອັນລຳ້ຄ່າໃຫ້ແກ່ຊາວຫນຸ່ມ, ປະຊາຊົນຊາວຜູ້ອອກແຮງງານ ແລະ ທົ່ວປວງຊົນຫວຽດນາມ.
ບົດພິໄນກຳຂອງປະທານໂຮ່ຈິມີນ ຖືກນຳວາງສະແດງຢູ່
ຫໍພິພິດທະພັນປະທານໂຮ່ຈິມີນ ທີ່ຮ່າໂນ້ຍ
ພາບ:dantri.com
|
ບັນຫາກໍ່ສ້າງພັກມີຄວາມໝາຍດ້ານທິດສະດີອັນເລິກເຊິ່ງ
ພິໄນກຳຂອງປະທານໂຮ່ຈິມີນບໍ່ແມ່ນພິໄນກຳທຳມະດາ, ມັນບໍ່ພຽງແຕ່ແມ່ນເຂັມຊີ້ທິດການເຄື່ອນໄຫວເພື່ອໃຫ້ພັກກອມມູນິດຫວຽດນາມ ຊີ້ນຳນຳພາປະຊາຊົນຍາດເອົາໄຊຊະນະໃນການຕໍ່ຕ້ານຕ້ານຈັກກະພັດອາເມລິກາ ເທົ່ານັ້ນ ຫາກຍັງແມ່ນການແນະນຳວິທະຍາສາດໃຫ້ແກ່ວຽກງານກໍ່ສ້າງ ແລະ ປັບປຸງພັກ. ປະທານໂຮ່ຈິມີນ ແມ່ນຜູ້ນຳທີ່ສະຫລາດສະຫລຽວໃນການຄາດຄະເນບັນດາຄວາມຫຍຸ້ງຍາກເມື່ອປະເທດຊາດໂຮມເຂົ້າເປັນເອກະພາບ. ເພີ່ນເຊີດຊຸຄຸນຄ່າຊື່ງພັກກອມມູນິດຫວຽດນາມ ຄວນເອົາໃຈໃສ່ເປັນພິເສດໃນວຽກງານຕຳນິເພື່ອນສະຫາຍ ແລະ ຕຳນິຕົນເອງ. ບັນດາການແນະນຳນີ້ມີຄວາມໝາຍ ແລະ ຄຸນຄ່າຢ່າງແທດຈິງໃນວຽກງານກໍ່ສ້າງ ແລະ ປັບປຸງພັກໃນຫລາຍປີຜ່ານມາ, ເປັນຕົ້ນເມື່ອພັກກອມມູນິດ ຫວຽດນາມ ພວມຜັນຂະຫຍາຍປະຕິບັດມະຕິສູນກາງຄັ້ງທີ 4 ກ່ຽວກັບບາງບັນຫາຮີບດ່ວນໃນການກໍ່ສ້າງພັກປະຈຸບັນ. ສາດສະດາຈານ, ດຣ ຮ່ວາງຈີບ໋າວ, ສະມາຊິກສະພາທິດສະດີສູນກາງໃຫ້ຮູ້ວ່າ:
“ພັກຕ້ອງເອົາການຕຳນິເພື່ອນສະຫາຍ ແລະ ຕຳນິຕົນເອງເພື່ອຊ່ວຍເຫລືອກັນກ້າວຫນ້າ. ລຸງໂຮ່ຖືວ່າ ນີ້ແມ່ນວິທີດີທີ່ສຸດເພື່ອກໍ່ສ້າງພັກ, ພັດທະນາພັກ. ທຳອິດຕ້ອງຕຳນິຕົນເອງ ຫລັງຈາກນັ້ນຈຶ່ງຕຳນິເພື່ອນສະຫາຍ. ຕ້ອງອີງໃສ່ຄວາມຮັກແພງລະຫວ່າງເພື່ອນສະຫາຍ. ຂ້າພະເຈົ້າຖືວ່າ ບັນຫານີ້ຄວນໝູນໃຊ້.”
ພຽງໃນຕອນຫນຶ່ງຂອງພິໄນກຳ, ປະທານໂຮ່ຈິມີນ ຢືນຢັນ ພັກກຳອຳນາດ ຢາກສົມກັບຊາດ ແລະ ກັບປະຊາຊົນ ສະມາຊິກພັກແຕ່ລະຄົນຕອ້ງເປັນແບບຢ່າງກ່ຽວກັບຄຸນສົມບັດປະຕິວັດ ແລະ ຄວາມສາມັກຄີ. ກ່ຽວກັບຄວາມສາມັກຄີໃນພັກ, ເພີ່ນຂຽນວ່າ “ຄວາມສາມັກຄີແມ່ນມູນເຊື້ອອັນລ້ຳຄ່າຂອງພັກ ແລະ ຂອງປະຊາຊົນ. ບັນດາສະຫາຍ ຈາກສູນກາງຕະຫລອດຮອດຫນ່ວຍພັກ ຄວນຮັກສາຄວາມສາມັກຄີຂອງພັກ ຄືດັ່ງຮັກສາແກ້ວຕາຂອງຕົນ”. ຄວາມສາມັກຄີ, ເປັນເອກພາບໃນພັກມີຄວາມໝາຍສຳຄັນໃນທຸກໄລຍະທາງແຫ່ງການພັດທະນາຂອງປະເທດຊາດ. ດຣ ຫງວຽນແບກຄວາ, ເລຂາຄະນະພັກເມືອງ ລອງໂຮ່ ແຂວງ ຫວີງລອງ ຍົກຄຳເຫັນວ່າ:
“ບັນດາຄຳສັ່ງສອນຂອງປະທານໂຮ່ຈິມີນ ນັບມື້ນັບມີຄວາມຈຳເປັນກວ່າ, ເປັນຕົ້ນໃນບັນຫາທະເລຕາເວັນອອກຜ່ານມາ. ບັນຫານັ້ນແມ່ນ ພວກເຮົາຄວນສ້າງຄວາມສາມັກຄີ, ເປັນເອກະພາບໃນພັ ກ, ໃນປະຊາຊົນ. ຄວາມສາມັກຄີນັ້ນຕ້ອງທະວີຄູນຕາມແນວຄິດຂອງປະທານໂຮ່ຈີມີນໃນຍຸກປະຈຸບັນ.”
ລັກສະນະວິທະຍາສາດ,ວັດທະນະທຳມະນຸດ ແລະ ລັກສະນະກຳນົດທິດ
ພິໄນກຳຂອງປະທານໂຮ່ຈິມີນ ເກືອບຄືວ່າ ແມ່ນໂຄງການການເມືອງ ແຕ່ເພີ່ນມີຄວາມຄ່ຽມຄົມທີ່ເອີ້ນວ່າ ນັ້ນແມ່ນຈົດໝາຍສະບັບຫນຶ່ງ, ເພີ່ນຂຽນວ່າ :ຂ້າພະເຈົ້າປະໄວ້ໃຫ້ປະຊາຊົນ ແລະ ບັນດາສະຫາຍ ບາງຄຳເທົ່ານັ້ນ. ສິ່ງດັ່ງກ່າວຍິ່ງສະແດງໃຫ້ເຫັນຈິດໃຈອັນສູງສົ່ງ, ຍິ່ງໃຫຍ່ຂອງຜູ້ຫນຶ່ງທີ່ໄດ້ອະທິດຕະຫລອດຊີວິດເພື່ອປະເທດຊາດ, ເພື່ອປະຊາຊົນ. ໃນພິໄນກຳທັງໝົດຂອງເພີ່ນ, ປະທານໂຮ່ຈິມີນ ຍາມໃດກໍ່ຖືສິດຜົນປະໂຫຍດຂອງປະຊາຊົນເປັນຕົ້ນຕໍ, ສິດຜົນປະໂຫຍດຂອງຊາດແມ່ນສຸງສຸດ, ຂອງປະເທດຊາດແມ່ນກວ່າໝູ່. ຄຳເວົ້າສຸດທ້າຍຂອງເພີ່ນ ແມ່ນປາດຖະຫນາຢາກທົ່ວພັກ, ທົ່ວປວງຊົນສາມັກຄີສ້າງສາປະເທດຫວຽດນາມ ສັນຕິພາບ, ເອກະພາບ, ເອກະລາດ ແລະ ຮັ່ງມີເຂັ້ມແຂງ. ຮອງສາດສະດາຈານ , ດຣ ຫວູຕີງ, ອະດີດຜູ້ອຳນວຍການສູນທິດສະດີການເມືອງ ມະຫາວິທະຍາໄລແຫ່ງຊາດ ນະຄອນ ໂຮ່ຈິມີນ ຖືວ່າ:
“ໃນພິໄນກຳ, ປະທານໂຮ່ຈິມີນ ສະແດງອາລົມຈິດ, ພູມປັນຍາ, ຄວາມຢືດໝັ້ນກ່ຽວກັບການປະຕິວັດຫວຽດນາມ ແລະ ການຊີ້ນຳນຳພາຂອງພັກ. ປະທານໂຮ່ຈິມີນ ກໍສະແດງໃຫ້ເຫັນນ້ຳໃຈປ່ຽນແປງໃຫມ່. ພິໄນກຳທັງໝົດຂອງປະທານໂຮ່ຈິມີນ ສະແດງໃຫ້ເຫັນລັກສະນະວິທະຍາສາດ, ວັດທະນະທຳມະນຸດ ແລະ ມີລັກສະນະກຳນົດທິດໃຫ້ແກ່ການປະຕິວັດຫວຽດນາມ, ບໍ່ພຽງແຕ່ເມື່ອເພີ່ນຂຽນພິໄນກຳເທົ່ານັ້ນ ຫາກໄລຍະຕໍ່ໄປອີກດ້ວຍ.”
ບັນດາຄຳຕັກເຕືອນຂອງປະທານໂຮ່ຈິມີນ ໃນບົດພິໄນກຳ ຍາມໃດກໍແມ່ນຄຳແນະນຳອັນລ້ຳຄ່າ, ນີ້ແມ່ນບັນດາກຳລັງຫນູນດ້ານຈິດໃຈຊ່ວຍໃຫ້ປະຊາຊົນຫວຽດນາມ ຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ຍາດແຍ່ງກາລະໂອກາດເພື່ອພັດທະນາປະເທດຊາດໃຫ້ໝັ້ນຄົງ ຕາມທິດທັນສະໄຫມ. ປະຊາຊົນຮັ່ງມີ, ປະເທດຊາດເຂັ້ມແຂງ, ເອກະລາດ, ເປັນເຈົ້າ, ນັ້ນແມ່ນສິ່ງທີ່ປະທານໂຮ່ຈິມີນ ໄດ້ອຸທິດຕະຫລອດຊີວິດຂອງຕົນສູ້ຊົນປະຕິບັດໃຫ້ແກ່ປະເທດຊາດຫວຽດນາມ.