(vovworld)- ວັນທີ 9/2, ທ່ານນາຍົກລັດຖະມົນຕີ ຍີ່ປຸ່ນ Shinzo Abe ຈະເລີ່ມຕົ້ນການຢ້ຽມຢາມ ອາເມລິກາ. ນີ້ແມ່ນການນຳທຳອິດຂອງອາຊີ ໄປຢ້ຽມຢາມ ອາເມລິກາ ຢ່າງເປັນທາງການ ພາຍຫລັງທ່ານ Donald Trump ສາບານຕົວຮັບດຳລົງຕຳແຫນ່ງເປັນປະທານາທິບໍດີ ອາເມລິກາ (20/1/2017). ສິ່ງນີ້ແມ່ນສະແດງໃຫ້ເຫັນການເປັນເຈົ້າການຂອງລັດຖະບານ ຍີ່ປຸ່ນ ໃນການປັບປຸງສາຍພົວພັນສຳພັນທະມິດກັບ ອາເມລິກາ ພາຍໃຕ້ອຳນາດການປົກຄອງຂອງປະທານາທິບໍດີ Donald Trump ພ້ອມທັງໃຫ້ໂລກຮູ້ວ່າ ການພົວພັນພັນທະມິດ ຍີ່ປຸ່ນ - ອາເມລິກາ ຍາມໃດກໍ່ໝັ້ນຄົງຫນັກແຫນ້ນ.
ປະທານາທິບໍດີ ອາເມລິກາ Donald Trump
|
ວັນທີ 7/2, ທ່ານ Yoshihide, ຫົວຫນ້າຫ້ອງວ່າການລັດຖະບານ ຍີ່ປຸ່ນ ໃຫ້ຮູ້ວ່າ: ທ່ານ ນາຍົກລັດຖະມົນຕີ ຍີ່ປຸ່ນ Shinzo Abe ຈະເຈລະຈາກັບທ່ານ Donald Trump ຢູ່ ວໍຊີງຕັນ ແລະ ຈະໄປຢ້ຽມຢາມເຂດຜັກພ່ອນບຳລຸງສຸຂະພາບຂອງປະທານາທິບໍດີ ອາເມລິກາ ຢູ່ Florida ກ່ອນທີ່ກັບຄືນເມືອຍີ່ປຸ່ນ ໃນວັນທີ 13/2. ຕາມຫົວຫນ້າຫ້ອງວ່າການລັດຖະບານຍີ່ປຸ່ນ ແລ້ວ, ການຢ້ຽມຢາມຄັ້ງນີ້ແມ່ນກາລະໂອກາດເພື່ອໃຫ້ການນຳສອງປະເທດ ແລກປ່ຽນຢ່າງກົງໄປກົງມາທັດສະນະກ່ຽວກັບການພົວພັນສອງຝ່າຍ ແລະ ເພື່ອໃຫ້ໂລກຮູ້ໄດ້ວ່າ ການພົວພັນສຳພັນທະມິດ ຍີ່ປຸ່ນ - ອາເມລິກາ ຍາມໃດກໍ່ໝັ້ນຄົງຫນັກແຫນ້ນ. ທ່ານ Suga ໃຫ້ຮູ້ຕື່ມອີກວ່າ ການຢ້ຽມຢາມ Floria ເພື່ອເຮັດໃຫ້ການພົວພັນສະເພາະລະຫວ່າງການນຳສອງປະເທດຍິ່ງມີຄວາມໄວ້ເນື້ອເຊື່ອໃຈກວ່າ.
ຢັ້ງຢືນຄວາມໝັ້ນຄົງຂອງພັນທະມິດ
ຄາດວ່າ ເນື້ອໃນປຶກສາຫາລືລະຫວ່າງການນຳ 2 ທ່ານ ແມ່ນກ່ຽວຂ້ອງເຖິງຄຳຕັດສິນຖອນອອກຈາກ ສັນຍາຄູ່ຮ່ວມມືຂ້າມປາຊີຟີກ (TPP) ຂອງທ່ານ Donald Trump, ບັນດາຄວາມເຄັ່ງຕຶງປີນຂັ້ນໄດ ກັບ ສປປ ເກົາຫລີ. ນອກນັ້ນ ບັນດາບັນຫາກ່ຽວກັບພັນທະມິດການທະຫານ, ການເງິນ, ການຄ້າ, ໃນນັ້ນ ອາດຈະມີແນວຄວາມຄິດກ່ຽວກັບສັນຍາການຄ້າສອງຝ່າຍ ຫລືບໍ່ວ່າບັນຫາໃດຊື່ງທັງສອງທ່ານເຫັນວ່າມີຄວາມຈຳເປັນ ກໍໄດ້ເຕື້ອງເຖິງ. ຕາມວົງການນັກໄຈ້ແຍກແລ້ວ, ອຳນາດການປົກຄອງຂອງທ່ານ Donald Trump ມີຄວາມເອົາໃຈໃສ່ເປັນພິເສດເຖິງການຢ້ຽມຢາມອາເມລິກາຂອງນາຍົກລັດຖະມົນຕີ Shinzo Abe, ຫນຶ່ງໃນບັນດາການພົບປະຂັ້ນສຸດຍອດທຳອິດຂອງປະທານາທິບໍດີ ອາເມລິກາ ຜູ້ທີ 45 ກ່ຽວກັບການເລີ່ມຕົ້ນບັນດາການເຈລະຈາການຄ້າສອງຝ່າຍ. ໃນຂະນະນັ້ນ, ຝ່າຍ ຍີ່ປຸ່ນ ກໍໃຫ້ຮູ້ວ່າ ປະເທດນີ້ ກະກຽມໃຫ້ທຸກສະພາວະການໃນການຮ່ວມມືກັບທ່ານ Donald Trump. ໃນການໂອ້ລົມທາງໂທລະສັບກັບທ່ານ Donald Trump ເມື່ອວັນທີ 28/1, ທ່ານນາຍົກລັດຖະມົນຕີ ຍີ່ປຸ່ນ Shinzo Abe ໄດ້ຢັ້ງຢືນວ່າ ທີ່ການພົບປະຄັ້ງຈະມາເຖິງກັບປະທານາທິບໍດີ ອາເມລິກາ, ທ່ານຢາກແລກປ່ຽນບັນດາບັນຫາຄວາມໝັ້ນຄົງ ແລະ ເສດຖະກິດຢ່າງກົງໄປກົງມາ.
ກ່ອນການຢ້ຽມຢາມອາເມລິກາ ຂອງທ່ານນາຍົກລັດຖະມົນຕີ ຍີ່ປຸ່ນ Shinzo Abe, ລັດຖະມົນຕີກະຊວງປ້ອງກັນປະເທດ ອາເມລິກາ James Mattis ກໍໄດ້ໄປຢ້ຽມຢາມຍີ່ປຸ່ນ. ໃນການພົບປະຄັ້ງຕ່າງໆຢູ່ ໂຕກຽວ, ທ່ານ Mattis ໄດ້ຍົກອອກຫລາຍຄຳຖະແຫລງການ ຮັບປະກັນຄວາມສະຫງົບປອດໄພທີ່ສຳຄັນໃຫ້ແກ່ ໂຕກຽວ, ຊື່ງແມ່ນສິ່ງທີ່ ຍີ່ປຸ່ນ ຢາກໄດ້ຮັບຟັງຈາກອຳນາດການປົກຄອງ Donald Trump, ໃນນັ້ນ ມີເລື່ອງຮັກສາຄຳໝັ້ນສັນຍາຂອງ ອາເມລິກາ ໃນການປົກປັກຮັກສາໝູ່ເກາະ Senkaku/ຕ້ຽວອີ ຢູ່ ທະເລຮວາຕູງ. ນອກນັ້ນ, ໃນຄຳວິຈານທີ່ການປະຊຸມຂ່າວເມື່ອວັນທີ 4/2 ຊື່ງໄດ້ຮັບການຕີລາຄາຈາກວົງການການເມືອງຍີ່ປຸ່ນວ່າ “ແປກປະຫລາດໃຈ”, ທ່ານ Mattis ໄດ້ຍ້ອງຍໍ ຍີ່ປຸ່ນ ແມ່ນ “ແບບຢ່າງ” ໃຫ້ແກ່ການແບ່ງເບົາລາຍຈ່າຍທີ່ສະຫງວນໃຫ້ບັນດາກຳລັງຕັ້ງຖັບຂອງ ອາເມລິກາ.
ຂໍ້ຂັດໃຈຍັງຄົງຄ້າງຢູ່
ເຖິງວ່າ ໃນການຢ້ຽມຢາມ ຍີ່ປຸ່ນ , ທ່ານ ລັດຖະມົນຕີກະຊວງປ້ອງກັນປະເທດ ອາເມລິກາ James Mattis ຢືນຢັນກ່ຽວກັບຄວາມໝັ້ນຄົງຂອງສຳພັນທະມິດກໍຕາມ ແຕ່ໂຕກຽວ ບໍ່ທັນມີຄວາມອຸ່ນອ່ຽນໃຈ, ເພາະວ່າ ຄວາມຂາດສະຖຽນລະພາບຫລາຍຢ່າງຍາກທີ່ຄາດຄະເນໄດ້ພວມເກີດຂຶ້ນ ຍ້້ອນນະໂຍບາຍ “ປະເທດອາເມລິການອກເຫນືອສິ່ງໃດໝົດ” ຂອງທ່ານ Donald Trump ກໍຄືບັນດາຄຳວິຈານມີລັກສະນະສູ້ຢັນຂອງທ່ານ ກ່ຽວກັບການພົວພັນສຳພັນທະມິດຢ່າງສະຫນິດສະຫນົມ. ສາດສະດາຈານ Kazuhiro Maeshima ສັງກັດມະຫາວິທະຍາໄລ Shophia, ຜູ້ຊ່ຽວຊານຄົ້ນຄ້ວານະໂຍບາຍການຕ່າງປະເທດ ແລະ ບັນດາບັນຫາກ່ຽວຂ້ອງເຖິງອຳນາດການປົກຄອງ ອາເມລິກາ ຖືວ່າ: “ບັນດາຄວາມວິຕົກກັງວົນຍັງຄົງຕົວຢູ່” ເພາະວ່າ ບັນດາຄຳໝັ້ນສັນຍາອາດຈະຖືກຕ່າວປີ້ນ. ທ່ານ Maeshima ກໍກ່າວເຕືອນວ່າ ຍີ່ປຸ່ນ ຄວນລະມັດລະວັງ ແລະ ຫລີກລ້ຽງເພື່ອໃຫ້ທ່ານ Trump ນຳໃຊ້ຄຳໝັ້ນສັນຍາຮັບປະກັນຄວາມສະຫງົບປອດໄພຢູ່ໝູ່ເກາະ ຊື່ງຝ່າຍຍີ່ປຸ່ນ ເອີ້ນວ່າ Senkaku, ສ່ວນຝ່າຍຈີນ ເອີ້ນວ່າ ຕ້ຽວອີ ແມ່ນແຜນການເພື່ອແລກເອົາບັນດາການຜ່ອນສັ້ນຜ່ອນຍາວຈາກຝ່າຍຍີ່ປຸ່ນ, ເປັນຕົ້ນໃນບັນດາບັນຫາເສດຖະກິດຄື ການລົງທຶນໂດຍກົງຈາກ ອາເມລິກາ. ຮອງສາດສະດາຈານ Ken Jimbo, ສັງກັດມະຫາວິທະຍາໄລ Keio ໄດ້ໃຫ້ຂໍ້ສັງເກດວ່າ ການຢ້ຽມຢາມຍີ່ປຸ່ນ ຂອງທ່ານ Mattis ຄືວ່າ ພຽງສຸມໃສ່ແບ່ງປັນບັນດາຄວາມຮັບຮູ້ລວມໃນສາຍພົວພັນພັນທະມິດ ແລະ ບັນດາສິ່ງທ້າທາຍຄວາມສະຫງົບປອດໄພຂອງພາກພື້ນ, “ເພື່ອຍາດເອົາ”ບັນດາບັນຫາອື່ນໃຫ້ແກ່ການປຶກສາຫາລືຫລັງຈາກນັ້ນ. ກ່ອນຫນ້ານັ້ນ, ເມື່ອຫາສຽງເລືອກຕັ້ງປະທານາທິບໍດີ ອາເມລິກາ, ທ່ານ Donald Trump ເຄີຍຖະແຫລງຄຳຮຽກຮ້ອງບັນດາປະເທດພັນທະມິດຈ່າຍເງິນໃຫ້ອາເມລິກາໄດ້ຮັບຄວາມສະຫງົບປອດໄພ.
ກ່ຽວກັບການພົວພັນດ້ານເສດຖະກິດ, ບັນຫາທີ່ໄດ້ຮັບຄວາມສົນໃຈຫລາຍກວ່າການຮ່ວມມືດ້ານການທະຫານ, ສອງພື້ນຖານເສດຖະກິດໄດ້ມີການພົວພັນໃນລະດັບສູງກວ່າ. ເຖິງຢ່າງໃດກໍຕາມ, ສຳລັບທັດສະນະ TPP ບໍ່ມີຄວາມສະດວກປານໃດໃຫ້ແກ່ຄົນງານ ແລະ ວິສາຫະກິດພາຍໃນປະເທດ, ທ່ານ Donald Trump ໄດ້ຕັດສິນຢາກຖອນອອກຈາກຂໍ້ຕົກລົງນີ້ ພາຍຫລັງຮັບດຳລົງຕຳແຫນ່ງ. ໃນຂະນະນັ້ນ, ທ່ານນາຍົກລັດຖະມົນຕີ Shinzo Abe ພັດແມ່ນຜູ້ທີ່ສຸດຈິດສຸດໃຈກັບ TPP ທີ່ສຸດ. ປະທານາທິບໍດີອາເມລິກາຜູ້ທີ 45 ເຄີຍຕຳຫນິຕິຕຽນເລື່ອງບັນດາບໍລິສັດຜະລິດ ອາເມລິກາ ຂາດກາລະໂອກາດເພື່ອສຳພັດກັບຕະຫລາດລົດໂອໂຕຍີ່ປຸ່ນ ແລະຖືວ່າ ໂຕກຽວ ພວມສວຍໃຊ້ນະໂຍບາຍເງິນຕາເພື່ອຫລຸດຜ່ອນຄ່າສະກຸນເງິນໂດລາສະຫະລັດ.
ກ່ອນທີ່ສາບານຕົວຮັບດຳລົງຕຳແຫນ່ງຂອງທ່ານ ປະທານາທິບໍດີ Donald Trump ພຽງສອງສາມຊົ່ວໂມງ, ທ່ານນາຍົກລັດຖະມົນຕີ ຍີ່ປຸ່ນ Shinzo Abe ໄດ້ເນັ້ນຫນັກວ່າ ພັນທະມິດ ອາເມລິກາ ຍີ່ປຸ່ນ ແມ່ນປະຖົມປັດໄຈຫລັກແຫລ່ງ ແລະ ແມ່ນ “ຫລັກການບໍ່ປ່ຽນແປງໄດ້” ໃນນະໂຍບາຍການປ້ອງກັນຄວາມສະຫງົບ ແລະ ການຕ່າງປະເທດ ຂອງໂຕກຽວ. ສະນັ້ນ ປະຈຸບັນ ທຸກຄວາມສົນໃຈພວມສຸມໃສ່ການພົບປະຂັ້ນສຸດຍອດລະຫວ່າງການນຳ Abe – Trump, ຊື່ງແມ່ນເຫດການອາດຈະກະທົບຫລາຍສົມຄວນເຖິງການພົວພັນສຳພັນທະມິດທີ່ແກ່ຍາວຫລາຍທົດສະວັດຜ່ານມາ.