(vovworld) - ຄວາມເຂັ່ງຕຶງນັບມື້ນັບເພີ່ມຂຶ້ນ ເຊິ່ງກ່ຽວຂ້ອງເຖິງວິກິດການນິວຄະເລຍຂອງອີຮານ ພວມເຮັດໃຫ້ປະຊາຄົມໂລກວິຕົກກັງວົນ. ເພາະວ່າ, ຖ້າຫາກມີການພິພາດກັນເລັກນ້ອຍລະຫວ່າງສອງຝ່າຍ ມັນຈະກໍ່ໃຫ້ເກີດ ”ສົງຄາມໂລກຄັ້ງທີ 3”. ປະຈຸບັນຍັງບໍ່ທັນມີສັນຍານປະເອີບໃຈໃດໆເພື່ອສາມາດແກ້ໄຂວິກິດການດັ່ງກ່າວໄດ້ເທື່ອ.
ການປະກົດຕົວຂອງກ່ຳປັ່ນສູ້ຮົບອາເມລິກາຢູ່ອ່າວເປີເຊຍ
ເຮັດໃຫ້ວິກິດການນິວຄະເລຍຢູ່ອີຮານ ເຄັ່ງຕຶງຂຶ້ນຕື່ມ
(ພາບ: hanoimoi.com.vn)
ຄວາມເຂັ່ງຕຶງນັບມື້ນັບເພີ່ມຂຶ້ນ ທີ່ກ່ຽວຂ້ອງເຖິງວິກິດການນິວຄະເລຍຂອງອີຮານ ໃນຊຸມສັບປະດາຫວ່າງມໍ່ໆມານີ້. ໃນຂະນະທີ່ອຳນາດການປົກຄອງອິດສະຮາແອນຄາດວ່າຈະດຳເນີນການບຸກໂຈມຕີທາງອາກາດໃສ່ບັນດາຮາກຖານນິວຄະເລຍຂອງອີຮານນັ້ນ, ການຊ້ອມຮົບບົນທະເລທີ່ມີຊື່ວ່າ: ”ຮັບມືກັບລະເບີດສາກົນ 12”, ແຕ່ວັນທີ 16-27/9, ໂດຍກອງທັບເຮືອອາເມລິການຳໜ້າຢູ່ເຂດອ່າວເປເຊຍ ກໍ່ຖືກດຳເນີນດ້ວຍການເຂົ້າຮ່ວມຂອງກຳ່ປັ່ນສູ້ຮົບ 12 ລຳ ທີ່ມາຈາກ 30 ປະເທດອັນດັບໜຶ່ງຂອງໂລກກ່ຽວກັບການເດີນທະເລ. ສິ່ງດັ່ງກ່າວແມ່ນສານທີ່ຂັນແຂງຂອງບັນດາປະເທດມະຫາອຳນາດຝ່າຍຕາເວັນຕົກ ເພື່ອແນໃສ່ສະກັດກັ້ນທຸກການກະທຳຂອງປະເທດອິດສະລາມນີ້. ນອກນັ້ນ, ບັນດາປະເທດຝ່າຍຕາເວັນຕົກກໍ່ຮັດແໜ້ນບັນດາມາດຕະການໃໝ່ທາງດ້ານການຕ່າງປະເທດ, ເສດຖະກິດ. ໂດຍລະອຽດແມ່ນບັນດາລັດຖະມົນຕີການຕ່າງປະເທດຂອງສາມປະເທດຄື: ອັງກິດ, ຝລັ່ງ ແລະ ເຢຍລະມັນໄດ້ຮຽກຮ້ອງທ່ານນາງ Catherine Ashton, ຜູ້ຕາງໜ້າຂັ້ນສູງ ຮັບຜິດຊອບນະໂຍບາຍການຕ່າງປະເທດຂອງສະຫະພາບເອີລົບ (EU), ຈົ່ງຈັດວາງບັນດາມາດຕະການທີ່ຂັນແຂງສຳລັບອີຮານ. ກ່ອນນັ້ນ, ເມື່ອກາງເດືອນ 9 ນີ້, ໃນການປະຊຸມຂອງລັດຖະມົນຕີການຕ່າງປະເທດບັນດາປະເທດ ອີຢູຢູ່ເກາະ Sip, 3 ປະເທດນີ້ ກໍ່ໄດ້ຮຽກຮ້ອງໃຫ້ບັນດາປະເທດອື່ນໆໃນ ອີຢູ ເຫັນດີຈັດວາງບັນດາມາດຕະການລົງໂທດໃໝ່ເພື່ອຕ້ານອີຮານ, ພາຍຫຼັງການເຈລະຈາຄັ້ງຕ່າງໆລະຫວ່າງປະເທດນີ້ກັບກຸ່ມ P5+1, ກ່ຽວກັບໂຄງການນິວຄະເລຍທີ່ກໍ່ຄວາມຖົກຖຽງກັນຂອງ ເຕເຮຮານ ບໍ່ນຳມາເຊິ່ງໝາກຜົນກະໂດດຂັ້ນໃດໆ.
ກ່ຽວກັບທາງດ້ານການຕ່າງປະເທດ, ວັນທີ 22/9, ອາເມລິກາໄດ້ປະຕິເສດການອອກວີຊາໃຫ້ແກ່ເຈົ້າໜ້າທີ່ອີຮານ 20 ທ່ານ, ໃນນັ້ນມີລັດຖະມົນຕີ 2 ທ່ານທີ່ຢາກເຂົ້າຮ່ວມກອງປະຊຸມໃຫຍ່ສະມັດຊາສະຫະປະຊາຊາດ, ເຊິ່ງດຳເນີນໃນສັບປະດານີ້ຢູ່ນະຄອນນິວຢອກ ແຫ່ງອາເມລິກາ. ຫາງສຽງຖືວ່າ, ສາຍເຫດຕົ້ນຕໍຂອງເຫດການດັ່ງກ່າວແມ່ນກ່ຽວຂ້ອງເຖິງວິກິດການນິວຄະເລຍຢູ່ອີຮານ. ກ່ອນໜ້ານັ້ນ, ສະພາແຫ່ງຊາດອາເມລິກາ ໄດ້ຮັບຮອງເອົາ, ແລະ ທ່ານປະທານາທິບໍດີອາເມລິກາ Barack Obama ໄດ້ເຊັນອະນຸມັດບັນດາມາດຕະການລົງໂທດຕໍ່ອີຮານ ເພື່ອຈຳກັດເລື່ອງເຂົາເຈົ້າສົ່ງອອກນ້ຳມັນ ແລະ ກີດຂວາງເລື່ອງປະເທດນີ້ພັດທະນາເສດຖະກິດ, ສິ່ງດັ່ງກ່າວໄດ້ເຮັດໃຫ້ ເຕເຮຮານ ປະສົບກັບຄວາມຫຍຸ້ງຍາກໃນການສະໜອງເງິນໃຫ້ແກ່ໂຄງການເສີມທາດ Urani ຂອງຕົນ. ໃນຂະນະນັ້ນ, ວັນທີ 22/9, ຢູ່ວໍຊິງຕັນ, ດ້ວຍ 90 ບັດສະໜັບສະໜູນ, ແລະ 1 ບັດຄັດຄ້ານ. ສະພາສູງອາເມລິກາ ໄດ້ຮັບຮອງເອົາມະຕິໂດຍຢືນຢັນວ່າປະເທດນີ້ຈະເຮັດທຸກສິ່ງທຸກຢ່າງ ເພື່ອສະກັດກັ້ນອີຮານ ພັດທະນາອາວຸດນິວຄະເລຍ.
ໂຮງງານນິວຄະເລຍ Bushehr ຂອງ Iran.
(ພາບ: tinmoi.vn) ກ່ອນໜ້ານັ້ນ, ອຳນາດການປົກຄອງຂອງປະທານາທິບໍດີອີຮານ, ທ່ານ Mahmoud Ahmadinrjad ໄດ້ມີບັນດາບາດກ້າວທີ່ມີໄຫວພິບ. ໃນບົດຕອບສຳພາດຕໍ່ໜັງສືພິມ ວໍຊິງຕັນໂພດ, ເມື່ອວັນທີ 24/9, ທ່ານ Mahmoud Ahmadinrjad ຢືນຢັນພ້ອມແລ້ວທີ່ຈະຍົກອອກຂໍ້ຕົກລົງສະບັບໜຶ່ງ ເພື່ອແນໃສ່ຈຳກັດສາງບັນຈຸທາດ Urani ທີ່ໄດ້ຮັບການເສີມແລ້ວຂອງປະເທດນີ້ໄວ້, ແຕ່ພັດສະແດງຄວາມສົງໄສຕໍ່ເຈດຈຳນົງດຳເນີນການເຈລະຈາຂອງຝ່າຍຕາເວັນຕົກ. ທ່ານ Mahmoud Ahmadinrjad ຍັງຊີ້ແຈງວ່າ, ບັນດາໂຄງການນິວຄະເລຍຂອງອີຮານ ບໍ່ແມ່ນຄວາມວິຕົກກັງວົນຂອງຝ່າຍຕາເວັນຕົກຢ່າງແທ້ຈິງ, ຫາກນັ້ນອາດຈະແມ່ນເຫດຜົນເພື່ອທຳລາຍລັດຖະບານອິດສະລາມຂອງປະເທດນີ້ເທົ່ານັ້ນ. ຢູ່ເວທີປາໄສ ສະຫະປະຊາຊາດເມື່ອວັນທີ 24/9, ທ່ານMahmoud Ahmadinrjad ໄດ້ຕຳນິຕິຕຽນບັນດາປະເທດມະຫາອຳນາດຝ່າຍຕາເວັນຕົກສວຍໃຊ້ສິດຢັບຢັ້ງຢູ່ສະຫະປະຊາຊາດໃນການຖົກຖຽງກັນດ້ານນິວຄະເລຍກັບປະເທດສາທາລະນະລັດອິດສະລາມນີ້ ແລະ ຍັງອະນຸຍາດໃຫ້ ”ແຕະຕ້ອງ” ເຖິງສາສະໜາອິດສະລາມອີກ. ນອກນັ້ນກຳລັງຄວາມສາມາດດ້ານການທະຫານຂອງ ເຕເຮຮານ ກໍ່ໄດ້ຮັບການສະແດງອອກ ເພື່ອໂຕ້ຕອບການກະທຳຕ່າງໆຂອງບັນດາປະເທດຝ່າຍຕາເວັນຕົກ. ວັນທີ 24/9, ເຕເຮຮານ ໄດ້ເປີດຕົວລົດຫຸ້ມເກາະປະເພດເບົາທີ່ສຸດ Hoveyzeh ແລະ ລົດຫຸ້ມເກາະ ຂົນສົ່ງທະຫານ Talaeiyeh, ທີ່ມີຄວາມສາມາດປະກອບອາວຸດຫຼາຍປະເພດ, ດຳເນີນໜ້າທີ່ໃນກາງຄືນ, ສ້ອມແປງງ່າຍ, ແລະ ສາມາດຂົນສົ່ງໄດ້ດ້ວຍເຮືອບິນເອລີກອບແຕ. ກ່ອນໜ້ານັ້ນ, ກ່າວຄວາມເຫັນທາງໂທລະສັບ Al – Alam ພົນຈັດຕະວາ Amir Ali Hajizadeh ທີ່ຂຶ້ນກັບກຳລັງພິທັກປະຕິວັດອີຮານ ໄດ້ເວົ້າວ່າ ອີຮານອາດຈະປຸກລະດົມການບຸກໂຈມຕີ ຖ້າຫາກ ອິດສະຮາແອນກຽມພ້ອມບຸກໂຈມຕີເຂົາເຈົ້າ. ໃນວັນດຽວກັນ, ເຕເຮຮານ ຍັງໃຫ້ຮູ້ວ່າ ກອງທັບອາກາດຂອງປະເທດນີ້ພວມວາງແຜນການດຳເນີນການຊ້ອມຮົບດ້ວຍຂອບຂະໜາດໃຫຍ່ຢູ່ບັນດາເຂດພາກໃຕ້ຂອງປະເທດນີ້ໃນທ້າຍປີ 2012 .
ການຜັນແປເຫຼົ່ານັ້ນ ໄດ້ສະແດງໃຫ້ເຫັນວ່າຍັງບໍ່ທັນມີສັນຍານໃດໆທີ່ສາມາດແກ້ໄຂວິກິດການໃນປະຈຸບັນໄດ້. ເຖິງວ່າລັດເຊຍ, ຈີນ ໄດ້ອອກສຽງຕຳນິຕິຕຽນບັນດາມາດຕະການລົງໂທດຂອງຝ່າຍຕາເວັນຕົກໃສ່ອີຮານຫຼາຍເທື່ອແລ້ວກໍ່ຕາມ, ແຕ່ສຳຫຼັບບັນດາປະເທດຝ່າຍຕາເວັນຕົກແລ້ວ, ອຳນາດການປົກຄອງອີຮານແມ່ນສິ່ງທີ່ກີດຂວາງ, ຄວນໄດ້ຮັບການລົບລ້າງ, ດັ່ງນັ້ນຫາງສຽງຈຶ່ງວິຕົກກັງວົນກ່ຽວກັບໄພເກີດສົງຄາມ, ຮອດເວລານັ້ນວິກິດການທີ່ຮ້າຍແຮງຢູ່ຕາເວັນອອກກາງຈະບໍ່ສາມາດແກ້ໄຂໄດ້.