(vovworld)-ເປັນຄັ້ງທຳອິດໃນຮອບເວລາ 17 ປີຜ່ານມາ, ບັນດາອົງການລັດຖະບານສະຫະລັດອາເມລິກາ ຕ້ອງຢຸດຕິການເຄື່ອນໄຫວຍ້ອນບໍ່ມີງົບປະມານ. ຕອນທ່ຽງວັນທີ 1/10 ຕາມເວລາຫວຽດນາມ, ດ້ວຍບັດຄ້ານ 54 ບັດ ແລະ ບັດເຫັນດີ 46, ບັນດາສະມາຊິກສະພາຂຶ້ນກັບຝ່າຍພັກປະຊາທິປະໄຕກວມເອົາທີ່ນັ່ງສ່ວນຫລາຍໄດ້ປະຕິເສດຂໍ້ສະເຫນີຂອງສະພາຕຳ່ ໂດຍຝ່າຍພັກສາທາລະນະລັດຄວບຄຸມ ກ່ຽວກັບການຕໍ່ກຳນົດເວລາອີກຫນຶ່ງປີສຳລັບຮ່າງປະຕິຮູບສາທາລະນະສຸກ Obamacare ເພື່ອເພີ່ມງົບປະມານໃຫ້ແກ່ລັດຖະບານສະຫະລັດ ຫລັງວັນທີ 30/9. ສິ່ງດັ່ງກ່າວໄດ້ພິສູດໃຫ້ເຫັນການສູ້ຢັນລະຫວ່າງພັກສາທາລະນະລັດທີ່ພວມຄວບຄຸມຢູ່ສະພາຕຳ່ ກັບພັກປະຊາທິປະໄຕກວມເອົາທີ່ນັ່ງສ່ວນຫລາຍຢູ່ສະພາສູງ.
ດ້ວຍຂໍ້ຕົກລົງດັ່ງກ່າວ, ຄາດວ່າມີ ລັດຖະກອນ 800.000 - 1.000.000 ຄົນໃນຍອດຈຳນວນ 2,8 ລ້ານຄົນເຮັດວຽກໃຫ້ແກ່ລັດຖະບານສະຫະລັດ ຕ້ອງພັກການໂດຍບໍ່ມີເງິນເດືອນ, ນາຍທະຫານ 1,4 ລ້ານຄົນສືບຕໍ່ປະຕິບັດຫນ້າທີ່ແຕ່ອາດຈະຮັບເງິນເດືອນຕາມຫລັງ, ອົງການການບິນອາວະກາດອາເມລິກາ (NASA) ຈະໃຫ້ພາລະກອນເກືອບທັງໝົດພັກການ. ບັນດາຂະແຫນງການ ແລະ ອົງການປະຕິບັດຫນ້າທີ່ຈຳເປັນຄື: ຄວບຄຸມກາງຫາວ, ກວດກາຜູ້ໂດຍສານ, ບັນດາສານຂອງສະຫະລັດ, ອົງການໄປສະນີ ແລະ ລັດຖະກອນຂອງກະຊວງຕຳຫລວດພາຍໃນປະເທດ ຈະສືບຕໍ່ເຮັດວຽກ, ສ່ວນບັນດາສະຖາບັນແຫ່ງຊາດ, ຫໍສະມຸດ ແລະ ຫໍພິພິດທະພັນຈະອັດປະຕູ. ໃນຂະນະນັ້ນ ກ່ຽວກັບດ້ານເສດຖະກິດ, ການແບ່ງແຍກຢ່າງເລິກເຊິ່ງທີ່ສະພາແຫ່ງຊາດອາເມລິກາໄດ້ເຮັດໃຫ້ສະກຸນເງິນ USD ຖືກເສຍຄ່າ. ສິ້ນສຸດວາລະຕິດຕໍ່ຄ້າຂາຍໃນວັນທີ 1/10 ຢູ່ ຕະຫລາດໂຕກຽວ, ອັດຕາແລກປ່ຽນເງິນ USD/ເງິນເຢັນຂອງຍີ່ປຸ່ນແມ່ນ ຢູ່ໃນລະດັບ 98,16 ເຢັນ/USD ຫລຸດຜ່ອນລົງເມື່ອທຽບກັບວັນທີ 30/9 ແມ່ນ 98/21 ເຢັນ/USD ທີ່ນິວຢອກ. ແລະໃນການຕິດຕໍ່ຄ້າຂາຍທຳອິດຂອງເດືອນ 10/2013, ຄ່າຂອງ ສະກຸນເງິນ USDຖືກຫລຸດລົງເມື່ອທຽບໃສ່ບັນດາສະກຸນເງິນຕົ້ນຕໍຢູ່ ອາຊີ ປາຊີຟີກຄື: ສະກຸນເງິນເປໂຊຂອງ ຟີລີບປີນ, ໂດລາຂອງສິງກະໂປ, ເງິນບາດຂອງໄທ ແລະ ຣູບີຂອງ ອິນໂດເນເຊຍ…
ສຳນັກງານສະພາແຫ່ງຊາດ ອາເມລິກາ
ພາບ:internet
|
ເປັນທີ່ຈະແຈ້ງແລ້ວວ່າ ບັນດາຜົນກະທົບຈາກລັດຖະບານຂອງປະເທດມີພື້ນຖານເສດຖະກິດໃຫຍ່ກວ່າໝູ່ໃນໂລກຢຸດການເຄື່ອນໄຫວ ໄດ້ກໍ່ຜົນສະທ້ອນເຖິງຫລາຍດ້ານໃນຊີວິດການເປັນຢູ່ຂອງປະຊາຊົນບັນດາປະເທດໂລກ. ບໍລິສັດຄົ້ນຄ້ວາ HIS ຄາດຄະເນວ່າ, ອາເມລິກາ ຈະຖືກເສຍຫາຍຢ່າງຫນ້ອຍສຸດ 300 ລ້ານ USD ໃນແຕ່ລະມື້ ຍ້ອນປະລິມານການຜະລິດດ້ານເສດຖະກິດຫລຸດລົງ. ລະດັບຜົນສະທ້ອນດັ່ງກ່າວຈະເພີ່ມຂຶ້ນຖ້າຫາກສະພາບອັດປະຕູແກ່ຍາວ ເຮັດໃຫ້ຄວາມໄວ້ເນື້ອເຊື່ອໃຈ ແລະ ການໃຊ້ຈ່າຍຂອງບັນດາວິສາຫະກິດ, ຜູ້ໃຊ້ສອຍຫລຸດລົງ. ຄາດຄະເນວ່າ ລັດຖະບານອາເມລິກາ ອັດປະຕູໃນເວລາ 2 ອາທິດ ຈະເຮັດໃຫ້ການເຕີບໂຕ GDP ຂອງໄຕມາດທີ 4 ຫລຸດລົງ 0,5%, ອັດປະຕູທັງເດືອນ 10/2013 ຈະເຮັດໃຫ້ GDP ຫລຸດລົງ 2%.
ແຕ່ສິ່ງທີ່ຖືກຜົນສະທ້ອນຫລາຍກວ່າໝູ່ໃນການສູ້ຢັນດັ່ງກ່າວ ແມ່ນກົດໝາຍວ່າດ້ວຍການປະຕິຮູບສາທາລະນະສຸກຂອງລັດຖະບານ Obama(Obamacare). ຕາມນັ້ນແລ້ວ, ກົດໝາຍສະບັບດັ່ງກ່າວໄດ້ກຳນົດຊາວອາເມລິກາທັງໝົດ ລ້ວນແຕ່ມີປະກັນສຸຂະພາບກ່ອນປີ 2014. ຖ້າບໍ່ມີ ເຂົາເຈົ້າຖືກປັບໄຫມດ້ານເສດຖະກິດ. ປະຈຸບັນ ປະເທດອາເມລິກາ ມີປະມານ 50 ລ້ານຄົນ, ກວມເອົາ 16% ຈຳນວນພົນລະເມືອງແມ່ນບໍ່ມີບັດປະກັນສຸຈະພາບ. ກົດໝາຍສະບັບດັ່ງກ່າວ ຫວັງວ່າຈະຊ່ວຍປະຊາຊົນ 32 ລ້ານຄົນໄດ້ຮັບບັນດາບໍລິການສາທາລະນະສຸກຜ່ານການປະກັນສຸຂະພາບ. ຕາມໝາກຜົນສຳຫລວດຈາກຫາງສຽງຂອງ ບໍລິສັດ CNBC ມີ 44% ຈຳນວນຜູ້ຖືກຖາມແມ່ນສະຫນັບສະຫນູນເລື່ອງສະຫງວນງົບປະມານໃຫ້ແກ່ໂຄງການປະຕິຮູບສາທາລະນະສຸກ ໃນຂະນະທີ່ຜູ້ຄັດຄ້ານກວມພຽງ 38%.
ສ່ວນຊັ້ນຄົນຮັ່ງມີ ແລະ ບັນດາສະມາຊິກສະພາ ທີ່ຂຶ້ນກັບພັກສາທາລະນະລັດໄດ້ຄັດຄ້ານ Obamacare ດ້ວຍເຫດຜົນຈະເພີ່ມອາກອນປະມານ 500 ຕື້ USD ສຳລັບຊາວອາເມລິກາ.
ປະຈຸບັນ ປະເທດອາເມລິກາ ພວມລໍຖ້າການກຳນົດເວລາໃຫມ່. ຕາມນັ້ນແລ້ວ, ວັນທີ 17/10 ຈະມາເຖິງ ແມ່ນກຳນົດເວລາສຸດທ້າຍໃຫ້ແກ່ການເພີ່ມບ້ວງຫນີ້ສິນຂອງລັດຖະບານທີ່ພວມຢູ່ໃນລະດັບ 16.700 ຕື້ USD. ຖ້າຫາກປະເທດນີ້ ບໍ່ຮັບຮອງເອົາເລື່ອງເພີ່ມບ້ວງຫນີ້ສິນ, ປະເທດອາເມລິກາ ຈະເປັນຄັ້ງທຳອິດໃນປະຫວັດສາດ ບໍ່ສາມາດຊຳລະໄດ້. ຫາງສຽງຖືວ່າ ພ້ອມກັບບັນຫາບລະດັບເພດານຂອງບ້ວງຫນີ້ສິນສູຂອງສະຫະລັດ, ບັນຫາງົບປະມານໃນປະຈຸບັນ ໄດ້ ແລະ ພວມນາບຂູ່ເຖິງຄວາມເປັນປົກກະຕິຂອງພື້ນຖານເສດຖະກິດໃຫຍ່ກວ່າໝູ່ຢູ່ໃນໂລກ