(vovworld)- ປີ 2016 ແມ່ນປີທຳອິດສະພາແຫ່ງຊາດຊຸດທີ XIV ໄດ້ຮັບການບູລະນະກົງຈັກ ແລະ ນຳເຂົ້າເຄື່ອນໄຫວພາຍຫລັງຜູ້ມີສິດເລືອກຕັ້ງໃນທົ່ວປະເທດ ໄດ້ເລືອກຕັ້ງເມື່ອວັນທີ 22/5/2016. ເປັນປີທຳອິດຂອງອາຍຸການຊຸດທີ XIV, ສະພາແຫ່ງຊາດຫວຽດນາມ ໄດ້ສ້າງຂີດໝາຍການປ່ຽນໃຫມ່ດ້ານເນື້ອໃນ ແລະ ຮູບການເຄື່ອນໄຫວໃນໄລຍະ 70 ປີແຫ່ງການການພັດທະນາ.
ປີ 2016, ສະພາແຫ່ງຊາດຊຸດທີ XIV ດຳເນີນກອງປະຊຸມສະໄຫມສາມັນ ເປັນ 2 ຄັ້ງ. ສະພາແຫ່ງຊາດໄດ້ສຳເລັດຫນ້າທີ່ສຳຄັນຍິ່ງ ນັ້ນແມ່ນບູລະນະບຸກຄະລາກອນຂັ້ນສູງຂອງບັນດາອົງການລັດ. ສະພາແຫ່ງຊາດກໍໄດ້ຕັດສິນບັນດາຄາດໝາຍພັດທະນາເສດຖະກິດສັງຄົມໃຫ້ແກ່ປີ 2017, ປະກາດໃຊ້ກົດໝາຍສຳຄັນບາງສະບັບ ໄດ້ສົ່ງຜົນກະທົບອັນໃຫຍ່ຫລວງເຖິງຊີວິດສັງຄົມ.
ກອງປະຊຸມຄັ້ງປະຖົມມະເລີກສະພາແຫ່ງຊາດຊຸດທີ 14
|
ສະແດງບົດບາດຂອງອົງການມີສິດອຳນາດສູງສຸດຢ່າງຈະແຈ້ງ
ທີ່ກອງປະຊຸມຄັ້ງປະຖົມມະເລິກ ສະພາແຫ່ງຊາດຊຸດທີ XIV (ເດືອນ 7/2016), ສະພາແຫ່ງຊາດໄດ້ກຳນົດຫນ້າທີ່ສຳຄັນທຳອິດນັ້ນແມ່ນ ສ້າງ ລະບົບກົດໝາຍໃຫ້ສົມບູນແບບ ແລະ ຄົບຊຸດ, ເປັນເອກະພາບ, ມີຄວາມເປັນໄປໄດ້. ບົນພື້ນຖານນັ້ນ, ບັນດາຮ່າງກົດໝາຍໄດ້ຮັບການຮັບຮອງເອົາໃນປີ 2016 ໄດ້ສຸມໃສ່ເຂົ້າໃນບັນດາຂົງເຂດສ້າງລັດແຫ່ງກົດໝາຍ, ຮັບປະກັນສິດທິມະນຸດ, ສິດພົນລະເມືອງຄື: ກົດໝາຍວ່າດ້ວຍການເຫລື້ອມໃສສາສະຫນາ. ສະພາແຫ່ງຊາດກໍຖືການສ້າງລະບົບກົດໝາຍດ້ານການເງິນ, ເງິນຕາ, ການລົງທຶນດຳເນີນທຸລະກິດເປັນສຳຄັນເມື່ອຮັບຮອງເອົາກົດໝາຍວ່າດ້ວຍການປະມູນຂາຍຊັບສິນ, ກົດໝາຍວ່າດ້ວຍການປັບປຸງ, ເພີ່ມເຕີມມາດຕາ 6 ແລະ ເອກະສານຊ້ອນທ້າຍ 4 ກ່ຽວກັບບັນຊີລາຍຊື່ຂະແຫນງ, ອາຊີບລົງທຶນດຳເນີນທຸລະກິດມີເງື່ອນໄຂຂອງກົດໝາຍວ່າດ້ວຍການລົງທຶນ, ມະຕິປັບປຸງເພີ່ມເຕີມກ່ຽວກັບການຍົກເວັ້ນ, ຫລຸດຜ່ອນພາສີນຳໃຊ້ທີ່ດິນກະສິກຳ. ເປັນຫນ້າສົນໃຈ, ເປັນຄັ້ງທຳອິດທີ່ສະພາແຫ່ງຊາດຕັດສິນລະບົບບັນດາແຜນການໄລຍະກາງທີ່ມີລັກສະນະສັງລວມກ່ຽວກັບດ້ານການເງິນ ແລະ ການລົງທຶນ, ມີການຕິດພັນຢ່າງສະຫນິດແຫນ້ນທັງໃນໄລຍະສັ້ນ, ໄລຍະກາງ ແລະ ໄລຍະຍາວ ເມື່ອຮັບຮອງເອົາບັນດາມະຕິກ່ຽວກັບແຜນການສ້າງໂຄງປະກອບພື້ນຖານເສດຖະກິດຄືນໃຫມ່ ໄລຍະ 2016-2020, ແຜນການການເງິນໄລຍະ 5 ປີ, ແຜນການລົງທຶນຂອງລັດໄລຍະກາງ ແຕ່ປີ 2016-2020, ແຜນການພັດທະນາເສດຖະກິດສັງຄົມປີ 2017, ຕັດສິນແຜນງົບປະມານແຫ່ງລັດ ແລະ ຈັດແບ່ງງົບປະມານສູນກາງປີ 2017.
ໃນຂະນະນັ້ນ, ການເຄື່ອນໄຫວຕິດຕາມກວດກາຂອງສະພາແຫ່ງຊາດປີ 2016 ໄດ້ສຸມໃສ່ເຂົ້າໃນບັນດາບັນຫາສຳຄັນ, ຮ້ອນເຮັ່ງຊື່ງປະຊາຊົນ ແລະ ຜູ້ມີສິດເລືອກຕັ້ງມີຄວາມສົນໃຈ; ເພີ່ມທະວີບົດບາດຕິດຕາມກວດກາຂອງບັນດາຄະນະສະມາຊິກສະພາແຫ່ງຊາດ, ບັນດາກຳມາທິການຂອງສະພາແຫ່ງຊາດ. ການເຄື່ອນໄຫວຊັກຖາມ ແລະ ຕອບຄຳຊັກຖາມເປັນຮັບປະກັນການເສີມຂະຫຍາຍປະຊາທິປະໄຕ, ເພີ່ມລັກສະນະໂຕ້ວາທີ.
ສະພາແຫ່ງຊາດຊຸດທີ XIV ໃນເຄື່ອນໄຫວປີທຳອິດກໍ່ຍົກສູງຄວາມຮັບຜິດຊອບກວ່າອີກ ແລະ ຍົກສູງຄຸນນະພາບຕັດສິນບັນດາບັນຫາສຳຄັນຂອງປະເທດຊາດ, ເປັນຕົ້ນແມ່ນບັນດາບັນຫາເສດຖະກິດສັງຄົມ, ງົບປະມານແຫ່ງລັດ, ກ່ຽວກັບບັນດາໂຄງການລົງທຶນສຳຄັນທີ່ສະດຸ້ງໄວ ໄດ້ສົ່ງຜົນກະທົບເຖິງສະຖຽນລະພາບເສດຖະກິດມະຫາພາກ, ຜົນສະທ້ອນເຖິງສິດຜົນປະໂຫຍດຂອງຜູ້ມີສິດເລືອກຕັ້ງ, ການປ້ອງກັນຊາດປ້ອງກັນຄວາມສະຫງົບຢ່າງເລິກເຊິ່ງ,ກວ້າງຂວາງ, ຮັບປະກັນຜົນປະໂຫຍດລວມຂອງຊາດ. ດ້ວຍການພິຈາລະນາຢ່າງລະມັດລະວັງ, ການຄິດໄລ່ຊັ່ງຊາຢ່າງລະອຽດ, ສະພາແຫ່ງຊາດໄດ້ຕົກລົງຢຸດຕິການປະຕິບັດໂຄງການສ້າງໂຮງງານໄຟຟ້ານິວເຄຼຍ ນີງທ້ວນ.
ພິເສດ, ທີ່ກອງປະຊຸມຄັ້ງປະຖົມມະເລິກ, ສະພາແຫ່ງຊາດຊຸດທີ XIV ໄດ້ເລືອກຕັ້ງ ແລະ ໃຫ້ສັດຕະຍາບັນບັນດາຖານະຕຳແຫນ່ງການນຳຫລັກແຫລ່ງໃນບັນດາອົງການລັດ ອາຍຸການ 2016-2021. ບັນດາສະມາຊິກສະພາແຫ່ງຊາດ ໄດ້ປຶກສາຫາລືຢ່າງມີປະຊາທິປະໄຕ, ມີຄວາມສະຫລາດສ່ອງໃສໃນການຄັດເລືອກຜູ້ທີ່ເໝາະສົມເຂົ້າດຳລົງຕຳແຫນ່ງການນຳຫລັກແຫລ່ງຂອງບັນດາອົງການລັດ. ທ່ານ ບູ່ຍວັນເກືອງ, ສະມາຊິກສະພາແຫ່ງຊາດແຂວງ ຢາລາຍ ຖືວ່າ:
“ບັນດາສະມາຊິກສະພາແຫ່ງຊາດໄດ້ສຸມພູມປັນຍາເພື່ອປະກອບສ່ວນບັນດາຄຳເຫັນໃສ່ບັນດາເນື້ອໃນຂອງກອງປະຊຸມ. ກອງປະຊຸມໄດ້ປະສົບຜົນສຳເລັດ, ແມ່ນການເປີດສາກຢ່າງສະດວກໃຫ້ແກ່ອາຍຸການ ສະພາແຫ່ງຊາດຊຸດທີ XIV. ຂ້າພະເຈົ້າມີຄວາມເຊື່ອໝັ້ນວ່າ ອາຍຸການສະພາແຫ່ງຊາດຄັ້ງນີ້ ຈະປະຕິບັດຫລາຍວຽກງານກວ່າເມື່ອທຽບໃສ່ສະພາແຫ່ງຊາດຊຸດຜ່ານມາ.”
ປ່ຽນໃຫມ່ຮູບການເຄື່ອນໄຫວ
ປີ 2016, ສະພາແຫ່ງຊາດໄດ້ດຳເນີນວາລະຊັກຖາມ ແລະ ຕອບຄຳຊັກຖາມທຳອິດຂອງອາຍຸການຊຸດທີ XIV ສຳລັບສະມາຊິກຈຳນວນຫນຶ່ງໃນຄະນະລັດຖະບານ. ນີ້ກໍແມ່ນເນື້ອໃນສະແດງໃຫ້ເຫັນການປ່ຽນໃຫມ່ໃນການເຄື່ອນໄຫວຂອງສະພາແຫ່ງຊາດຢ່າງຈະແຈ້ງເມື່ອທຽບໃສ່ກ່ອນນີ້. ເລື່ອງ ສະມາຊິກສະພາແຫ່ງຊາດ ມີສິດໂຕ້ວາທີທີ່ວາລະປຶກສາຫາລື ຫລື ທີ່ບັນດາວາລະຊັກຖາມບັນດາສະມາຊິກໃນຄະນະລັດຖະບານ ໄດ້ຊ່ວຍເຮັດແຈ້ງຫລາຍບັນຫາ, ຍົກອອກບັນດາຂໍ້ສະຫລຸບສັງລວມ, ມີລັກສະນະວິທະຍາສາດ, ເໝາະສົມກັບພຶດຕິກຳຕົວຈິງ. ຮ່າງກົດໝາຍວ່າດ້ວຍສະມາຄົມ ແລະ ຮ່າງກົດໝາຍປັບປຸງ, ເພີ່ມເຕີມ ບາງຂໍ້ມາດຕາຂອງປະມວນກົດໝາຍອາຍາ ແມ່ນການພິສູດຢ່າງເຫັນໄດ້ຊັດກ່ຽວກັບການກະທົບຈາກການໂຕ້ວາທີ. ນອກຈາກການຕິດຕາມກວດກາດ້ວຍການຊັກຖາມແມ່ນມີຄວາມແຕກຕ່າງກັບກອງປະຊຸມຄັ້ງກ່ອນຢູ່ບ່ອນວ່າ ສະພາແຫ່ງຊາດບໍ່ພຽງແຕ່ເລືອກເຟັ້ນລັດຖະມົນຕີ, ຫົວໜ້າຂະແຫນງຄົນຫນຶ່ງເທົ່ານັ້ນ ຫາກສະພາແຫ່ງຊາດໄດ້ເລືອກເຟັ້ນໝວດບັນຫາເພື່ອຊັກຖາມ. ເປັນອັນວ່າ ການປະສານສົມທົບຄວາມຮັບຜິດຊອບໃນການແກ້ໄຂວຽກງານ ແລະ ການປະສານສົມທົບໃນການຕອບຄຳຊັກຖາມລະຫວ່າງບັນດາສະມາຊິກໃນລັດຖະບານ. ທ່ານ ຫວູໝາວ, ອະດີດ ຫົວຫນ້າກຳມາທິການການຕ່າງປະເທດສະພາແຫ່ງຊາດ ຕີລາຄາວ່າ:
“ຈຸດໃຫມ່ອ່ຽມ ນັ້ນແມ່ນ ສະພາແຫ່ງຊາດໄດ້ສ້າງບັນຍາກາດແລກປ່ຽນ, ໂຕ້ວາທີໂດຍກົງລະຫວ່າງສະມາຊິກສະພາແຫ່ງຊາດ ແລະ ການນຳບັນດາກະຊວງ, ຂະແຫນງການ. ສິ່ງດັ່ງກ່າວໄດ້ເຮັດໃຫ້ສະມາຊິກສະພາແຫ່ງຊາດມີຄວາມເພິ່ງພໍໃຈຕໍ່ການຊັກຖາມຂອງຕົນ. ນີ້ແມ່ນສິ່ງທີ່ເປັນຫນ້າສົ່ງເສີມ. ເຖິງຢ່າງໃດກໍຕາມ ຍັງມີຫລາຍບັນຫາຊື່ງສະພາແຫ່ງຊາດຕ້ອງເຮັດ. ການເຄື່ອນໄຫວຂອງສະພາແຫ່ງຊາດຕ້ອງແຂງແຮງກວ່າອີກເພື່ອຕອບສະຫນອງຄວາມຮຽກຮ້ອງຕ້ອງການຂອງປະເທດຊາດສຳລັບສະພາແຫ່ງຊາດ.”
ສະພາແຫ່ງຊາດຊຸດທີ XIV ຫາກໍສິ້ນສຸດປີເຄື່ອນໄຫວທຳອິດໃນອາຍຸການ 5 ປີ. ເຖິງຢ່າງໃດກໍຕາມ, ບັນດາການເຄື່ອນໄຫວທຳອິດຂອງ ສະພາແຫ່ງຊາດຊຸດທີ XIV ແມ່ນປະຖົມປັດໄຈສຳຄັນ, ສືບຕໍ່ສ້າງຂີດໝາຍໃຫມ່ໃນປະຫວັດສາດອັນສະຫງ່າລາສີ ແລະ ວິວັດການພັດທະນາ 70 ປີຂອງສະພາແຫ່ງຊາດຫວຽດນາມ.