(vovworld)- ປະເທດຫວຽດນາມ ຫາກໍຜ່ານຜ່າປີມະເມຍ ດ້ວຍຄວາມຫຍຸ້ງຍາກ ແລະ ສິ່ງທ້າທາຍຫລາຍຢ່າງໃນສະພາບການພາກພື້ນ ແລະ ໂລກມີການຜັນແປຫລາຍຢ່າງ. ກ້າວເຂົ້າສູ່ປີໃຫມ່ປີມະແມ, ແມ່ນປີມີຫລາຍເຫດການສຳຄັນຂອງຊາດ ແລະ ກໍແມ່ນປີມີຫລາຍກາລະໂອກາດພັດທະນາ. ເມື່ອຕອບສຳພາດຕໍ່ນັກຂ່າວຂ່າວສານຫວຽດນາມ ຫວ່າງແລ້ວນີ້, ທ່ານປະທານປະເທດ ເຈືອງເຕີນຊາງ ຢືນຢັນວ່າ: ໃນປີ 2015 ນີ້, ຫວຽດນາມ ຄວນ “ສ້າງກຳລັງຫນູນໃຫມ່ເພື່ອໃຫ້ແກ່ປະເທດຊາດພັດທະນາ.” ບັນນາທິການວິທະຍຸກະຈາຍສຽງຫວຽດນາມ ຄັດສະເຫນີເນື້ອໃນບົດຕອບສຳພາດຂອງທ່ານປະທານປະເທດ ເຈືອງເຕີນຊາງ.
ທ່ານປະທານປະເທດເຈືອງເຕີນຊາງ ຊີ້ແຈ້ງ ບັນດາຄວາມຫຍຸ້ງຍາກ, ຄວາມອ່ອຍດ້ອຍຂອງປະເທດຊາດໃນປີ 2014. ນັ້ນແມ່ນປະສິດທິຜົນການລົງທຶນບໍ່ທັນສູງ, ພື້ນຖານໂຄງລ່າງເຖິງວ່າດີຂຶ້ນຫລາຍແລ້ວກໍຕາມ ແຕ່ຍັງຕ່ຳກວ່າເມື່ອທຽບໃສ່ບັນດາປະເທດກ້າວຫນ້າໃນພາກພື້ນ. ຄຽງຄູ່ກັນນັ້ນ, ຍັງປະສົບກັບຄວາມຫຍຸ້ງຍາກຫລາຍຢ່າງໃນຂົງເຂດການເງິນ, ທະນາຄານ, ພັດທະນາການສຶກສາ, ວິທະຍາສາດເຕັກໂນໂລຊີ. ທ່ານປະທານປະເທດ ເຈືອງເຕີນຊາງ ເນັ້ນຫນັກວ່າ: ທົ່ວລະບົບການເມືອງຕ້ອງຖືການແກ້ໄຂບັນດາຂໍ້ຈຳກັດ, ຄວາມຫຍຸ້ງຍາກ ແມ່ນບັນຫາສຳຄັນຕ້ອງຜ່ານຜ່າ, ແກ້ໄຂທຸກການກີດຂວາງໃນເສັ້ນທາງພັດທະນາປະເທດຊາດຢ່າງວ່ອງໄວ.
ທ່ານປະທານປະເທດເຈືອງເຕີນຊາງ
ພາບ:dantri.com
|
ເສີມຂະຫຍາຍຄວາມສາມາດບົ່ມຊ້ອນ,ທ່າໄດ້ປຽບເພື່ອພັດທະນາ
ທ່າໄດ້ປຽບໃຫຍ່ສຸດໂດຍທ່ານປະທານປະເທດ ເຈືອງເຕີນຊາງ ເຕື້ອງເຖິງນັ້ນແມ່ນ ຫວຽດນາມໄດ້ຮັບການຮັບຮູ້ຈາກສາກົນວ່າ ແມ່ນປະເທດມີສະຖຽນລະພາບດ້ານການເມືອງ. ພ້ອມກັນນັ້ນ, ຫວຽດນາມ ມີຄວາມສະດວກທີ່ສຸດ ຍ້ອນຖືກຕັ້ງໃນພາກພື້ນ ອາຊີ ປາຊີຟີກ, ຊື່ງແມ່ນກຳລັງຫນູນພັດທະນາເສດຖະກິດຂອງໂລກ. ການສະຫນັບສະຫນູນ, ການແບ່ງປັນຊື່ງບັນດາປະເທດສະຫງວນໃຫ້ແກ່ຫວຽດນາມ ໃນບັນດາບັນຫາຂອງພາກພື້ນ ແລະ ສາກົນ ແມ່ນການພິສູດໃຫ້ເຫັນຢ່າງຈະແຈ້ງປະສິດທິຜົນຂອງແນວທາງການຕ່າງປະເທດເອກະລາດ, ເປັນເຈົ້າ, ສັນຕິພາບ, ຮ່ວມມື ແລະ ພັດທະນາ, ການພົວພັນເປັນຫລາຍຮູບຫລາຍແບບ, ເປັນເຈົ້າການ ແລະ ຕັ້ງຫນ້າໃນການເຊື່ອມໂຍງເຂົ້າກັບສາກົນ, ແມ່ນເພື່ອນມິດ, ຄູ່ຮ່ວມມືທີ່ໄວ້ເນື້ອເຊື່ອໃຈ ແລະ ແມ່ນສະມາຊິກມີຄວາມຮັບຜິດຊອບຂອງປະຊາຄົມໂລກ ຊື່ງຫວຽດນາມ ໄດ້ ແລະ ພວມຢັ້ງຢືນ.
ບໍ່ພຽງແຕ່ຢັ້ງຢືນສຽງເວົ້າສະເພາະບົນເວທີການເມືອງເທົ່ານັ້ນ, ເລື່ອງເຊື່ອມໂຍງເຂົ້າກັບເສດຖະກິດສາກົນກໍ່ແມ່ນປັດໄຈສຳຄັນເພື່ອນຳ ຫວຽດນາມ ພັດທະນາ. ທ່ານປະທານປະເທດ ຢັ້ງຢືນວ່າ: ໃນສະພາບການເຊື່ອມໂຍງໃນປະຈຸບັນ, ການເຕີບໂຕໄວ ແມ່ນຈຳເປັນທີ່ສຸດ, ແຕ່ຕ້ອງມີປະສິດທິຜົນ ແລະ ໝັ້ນຄົງ. ທ້າຍປີ 2015, ການຫັນການຄ້າເປັນເສລີຢ່າງຄົບຖ້ວນຈະໄດ້ຮັບການປະຕິບັດໃນ ອາຊຽນ ກໍ່ຄື ອາຊຽນ ກັບ ຈີນ. ຮອດປີ 2018, ຫວຽດນາມ ຕ້ອງປະຕິບັດໂຄງການຫລຸດຜ່ອນອັດຕາພາສີຕາມຄຳໝັ້ນສັນຍາກັບ WTO, ກໍ່ຄືບັນດາຄຳໝັ້ນສັນຍາການຄ້າເສລີອື່ນ. ສັນຍາຄູ່ຮ່ວມມືເສດຖະກິດຂ້າມປາຊີຟິກ (TPP), ສັນຍາການຄ້າເສລີ ຫວຽດນາມ - ອີຢູ, ຫວຽດນາມ ກັບສຳພັນທະມິດພາສີ ລັດເຊຍ, ເບລາຣຸດ, ກາຢັກສະຖານ, ຫວຽດນາມ - ສ. ເກົາຫຼີ … ເຊິ່ງປະຈຸບັນ, ຫວຽດນາມ ພວມເຈລະຈານັ້ນກໍ່ຈະສິ້ນສຸດໃນໄລຍະຈະມາເຖິງ. ນີ້ທັງແມ່ນກາລະໂອກາດ, ທັງເປັນສິ່ງທ້າທາຍສຳລັບ ຫວຽດນາມ ໃນຊຸມປີຈະມາເຖິງ.
ສ້າງບັນດາກຳລັງໜູນໃໝ່ເພື່ອໃຫ້ປະເທດຊາດເຊື່ອມໂຍງ ແລະ ພັດທະນາ
ທ່ານປະທານປະເທດ ຫວຽດນາມ ເຈືອງເຕີນຊາງ ຊີ້ແຈ້ງວ່າ: ເພື່ອຜັນຂະຫຍາຍຄວາມສາມາດບົ່ມຊ້ອນ, ທ່າແຮງ, ບັນຫາສຳຄັນແມ່ນຕ້ອງຍູ້ແຮງການປະຕິຮູບ, ປ່ຽນໃໝ່ຮູບແບບການເຕີບໂຕ, ສ້າງໂຄງປະກອບພື້ນຖານເສດຖະກິດຄືນໃໝ່, ເຮັດໃຫ້ພື້ນຖານເສດຖະກິດມີກຳລັງຄວາມແກ້ງແຍ້ງສູງ, ມີປະສິດທິຜົນ, ເຕີບໂຕໄວ ແລະ ໝັ້ນຄົງ. ຄຽງຄູ່ກັນນັ້ນແມ່ນປະຕິບັດການຫັນເປັນປະເທດ ອຸດສາຫະກຳ, ທັນສະໄໝ, ໃນສະພາບການເຊື່ອມໂຍງເຂົ້າກັບສາກົນຢ່າງເລິກເຊິ່ງ, ກ້ວາງຂວາງ. ຕາມທ່ານປະທານປະເທດ ແລ້ວ, ຕ້ອງມານະພະຍາຍາມຈົນສຸດຄວາມສາມາດຂອງຕົນເພື່ອປະຕິບັດບັນດາຂອດບຸກທະລຸຍຸດທະສາດຢ່າງມີປະສິດທິຜົນ, ສ້າງໂຄງປະກອບພື້ນຖານເສດຖະກິດຄືນໃໝ່ຕິດພັນກັບການຫັນປ່ຽນຮູບແບບການເຕີບໂຕ, ສືບຕໍ່ປະຕິຮູບຢ່າງເລິກເຊິ່ງ ແລະ ປັບປຸງລະບອບເສດຖະກິດການຕະຫຼາດຕາມກຳນົດທິດສັງຄົມນິຍົມ. ຢາກໃຫ້ ຫວຽດນາມ ເຊື່ອມໂຍງເຂົ້າກັບສາກົນຢ່າງເລິກເຊິ່ງ, ກ້ວາງຂວາງ ແລະ ມີປະສິດທິຜົນນັ້ນ, ຕ້ອງຄິດໄລ່ຊັ່ງຊາຢ່າງລະອຽດ, ຜັນຂະຫຍາຍບັນດານະໂຍບາຍ ແລະ ມາດຕະການເພື່ອແນໃສ່ເພີ່ມກຳລັງແກ້ງແຍ້ງຂອງຜະລິດຕະພັນແຕ່ລະປະເພດ,ວິສາຫະກິດແຕ່ລະແຫ່ງ ແລະ ນັບທັງພື້ນຖານເສດຖະກິດ. ຄວນສືບຕໍ່ປະຕິບັດການປະຕິຮູບຢ່າງເລິກເຊິ່ງ ແລະ ສ້າງບັນດາລະບອບນະໂຍບາຍເສດຖະກິດການຕະຫລາດຕາມການກຳນົດທິດສັງຄົມນິຍົມໃຫ້ສົມບູນແບບ ແລະ ເບິ່ງແຍງການສຶກສາແຫລ່ງຊັບພະຍາກອນມະນຸດເປັນຢ່າງດີ, ຈະປຸກລຸກຄວາມສາມາດບົ່ມຊ້ອນ, ປັບປຸງທີ່ຕັ້ງບົດບາດຂອງຫວຽດນາມໃນແຜນທີ່ເສດຖະກິດໂລກໂດຍໄວ. ທ່ານປະທານປະເທດ ຢືນຢັນວ່າ: ລັດ ມີບົດບາດຍຸດທະສາດໃນການກຳນົດທິດພັດທະນາ, ວາງແຜນນະໂຍບາຍ, ສ້າງລະບອບນະໂຍບາຍດ້ານເສດຖະກິດ.. ແຕ່ບໍ່ອາດຂາດຄວາມຕັດສິນໃຈສູງຂອງປະຊາຊົນ ແລະ ປະຊາຄົມວິສາຫະກິດໄດ້.
ປີ 2015 ແມ່ນປີດຳເນີນຫລາຍເຫດການສຳຄັນຂອງປະເທດຊາດ, ໃນນັ້ນ ມີກອງປະຊຸມໃຫຍ່ຂອງພັກທຸກຂັ້ນ ກ້າວໄປເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ. ທ່ານປະທານປະເທດ ເຈືອງເຕີນຊາງ ຢືນຢັນວ່າ: ປະຊາຊົນໃນທົ່ວປະເທດ ແມ່ນເຈົ້າຂອງ ແລະ ກໍແມ່ນຈຸດປະສົງຂອງການປ່ຽນໃຫມ່, ມີສິດຕັ້ງຄວາມຫວັງຕໍ່ການປ່ຽນໃຫມ່ຕໍ່ໄປ ແລະ ຮຽກຮ້ອງໃຫ້ພັກ, ລັດ ສືບຕໍ່ປ່ຽນໃຫມ່ຮອບດ້ານເພື່ອກ້າວຂຶ້ນ. ຢາກຄືແນວນັ້ນ, ປະຊາຊົນ, ພັກ, ລັດ ແລະ ລັດຖະບານ ຄວນຮ່ວມແຮງຮ່ວມໃຈສ້າງກຳລັງຫນູນໃຫມ່, ລົບລ້າງບັນດາສິ່ງກີດຂວາງເພື່ອໃຫ້ພື້ນຖານເສດຖະກິດພັດທະນາຢ່າງລຽນຕິດ, ປັບປຸງຊີວິດການເປັນຢູ່ຂອງປະຊາຊົນ, ປະຕິບັດສຳເລັດກິດຈະກຳຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ.
ເນື່ອງໃນໂອກາດບຸນເຕັດປີມະແມ, ທ່ານປະທານປະເທດ ເຈືອງເຕີນຊາງ ອວຍພອນໃຫ້ແຕ່ລະຄອບຄົວ, ວິສາຫະກິດແຕ່ລະແຫ່ງ ກ້າວເຂົ້າສູ່ປີໃຫມ່ຈະຜ່ານຜ່າທຸກຄວາມຫຍຸ້ງຍາກ, ມີຄວາມກ້າວຫນ້າ, ເຊື່ອມໂຍງເຂົ້າກັບສາກົນຢ່າງມີໄຊ. ທ່ານປະທານປະເທດ ປາດຖະຫນາຢາກປະຊາຊົນທຸກຄົນ ສາມັກຄີ, ມານະພະຍາຍາມສູ້ຊົນເພ່ືອໃຫ້ປະເທດຊາດຈະເລີນຮຸ່ງເຮືອງ, ປະຊາຊົນມີຊີວິດອັນດີງາມກວ່າ, ຮັກສາເອກະລາດ, ອະທິປະໄຕຂອງປະເທດຊາດ, ເພື່ອໃຫ້ປະເທດຫວຽດນາມ ສາມາດທັດທຽມກັບບັນດາປະເທດມະຫາອຳນາດໃນ 5 ທະວີບ, ກັບເພື່ອນມິດສາກົນ.