(vovworld)- ສານສະຫະລັດສຸດທ້າຍໃນຖານະເປັນປະທານາທິບໍດີ ຂອງທ່ານ Barack Obama ໃນວັນທີ 12/1 (ຕາມເວລາອາເມລິກາ) ໄດ້ເນັ້ນຫນັກຢ່າງແຮງເຖິງບັນດາຜົນງານໃນສອງອາຍຸການຜ່ານມາ, ຍົກອອກບັນດາສິ່ງທ້າທາຍ ຊື່ງປະເທດ ອາເມລິກາ ຕ້ອງປະເຊີນຫນ້າ. ເຖິງຢ່າງໃດກໍຕາມ ປະທານາທິບໍດີຜູ້ທີ 44 ຂອງ ອາເມລິກາ ກໍໄດ້ນຳໃຊ້ສານສະຫະລັດຢ່າງສຸດຂີດເພື່ອສ້າງທ່າໄດ້ປຽບໃຫ້ພັກປະຊາທິປະໄຕໃນການຊ່ວງເສັງເຂົ້າທຳນຽບຂາວຈະມາເຖິງ.
ປະທານາທິບໍດີ Barack Obama ອ່ານສານສະຫະລັດ
ພາບ:dantri.com.vn
|
ສານສະຫະລັດປີ 2016 ຂອງປະທານາທິບໍດີ Barack Obama ໄດ້ຮັບຖືວ່າແມ່ນຈຸດສຸມຂອງຊີວິດການເມືອງປະເທດອາເມລິກາ ໃນຕົ້ນປີ 2016 ແລະ ກຳນົດໂຄງການດຳເນີນງານຂອງອຳນາດການປົກຄອງ ແລະ ພັກປະຊາທິປະໄຕ ນັບແຕ່ນີ້ຈົນເຖິງການເລືອກຕັ້ງປະທານາທິບໍດີ ອາເມລິກາ ປີ 2016.
ເມື່ອເນັ້ນຫນັກເຖິງບັນດາຜົນງານໃນ 2 ອາຍຸການຜ່ານມາ ແລະ ວາງອອກບັນດາຄຳຖາມໃຫຍ່ ຊື່ງປະເທດ ອາເມລິກາ ຕ້ອງມີຄຳຕອບ, ສານສະຫະລັດສຸດທ້າຍຂອງທ່ານ Barack Obama ໃນຖານະເປັນປະທານາທິບໍດີ ໄດ້ດຶງດູດຄວາມສົນໃຈຈາກປະຊາຊົນ ອາເມລິກາ ກໍຄືຫລາຍປະເທດໃນໂລກ.
ຢ້ຳຄືນຄຳຂວັນໃນບັ້ນຫາສຽງເລືອກຕັ້ງເມື່ອປີ 2008
ໃນສານສະຫະລັດປີ 2016, ປະທານາທິບໍດີ Barack Obama ອີກຄັ້ງຫນຶ່ງໄດ້ຢ້ຳຄືນຄຳຂວັນ “ປ່ຽນແປງ” ຊື່ງທ່ານໄດ້ນຳໃຊ້ໃນບັ້ນຫາສຽງເລືອກຕັ້ງເມື່ອປີ 2008. ທ່ານເນັ້ນຫນັກຢ່າງແຮງວ່າ: ໃນກວ່າ 7 ປີຜ່ານມາ, ປະເທດອາເມລິກາ ໄດ້ມີການປ່ຽນແປງຫລາຍດ້ານ. ກ່ຽວກັບດ້ານເສດຖະກິດ, ອາເມລິກາ ໄດ້ຜ່ານຜ່າວິກິດການເສດຖະກິດໄລຍະ 2007- 2009. ມາຮອດປະຈຸບັນ, GDP ໃນ ປີ 2015 ໄດ້ເພີ່ມຂຶ້ນ 2%. ນີ້ອາດຈະແມ່ນຜົນງານສຳຄັນທີ່ສຸດຂອງທ່ານປະທານາທິບໍດີ Barack Obama. ການເຕີບໂຕນີ້ໄດ້ຊ່ວຍໃຫ້ອາເມລິກາມີຄວາມເຊື່ອໝັ້ນດ້ວຍຕົນເອງເພື່ອເພີ່ມອັດຕາດອກເບ້ຍ ພາຍຫລັງເກືອບ 7 ປີຮັກສາຢູ່ໃນລະດັບເກືອບຄືວ່າແມ່ນ 0. ແລະ ສ້າງວຽກເຮັດງານທຳໃຫມ່ໃຫ້ແກ່ຄົນງານ 14 ລ້ານຄົນ, ອັດຕາຫວ່າງງານຫລຸດລົງແຕ່ 10% ເມື່ອປີ 2009 ລົງເຫລືອພຽງເກືອບ 5% ຄືປະຈຸບັນ ແລະ ນັບມື້ນັບມີປະຊາຊົນ ອາເມລິກາ ຫລາຍຄົນໄດ້ຊົມໃຊ້ປະກັນສຸຂະພາບ, ຈຳນວນເດັກນ້ອຍໄດ້ສຳຜັດກັບກາລະໂອກາດການສຶກສາກໍເພີ່ມຂຶ້ນ.
ສານສະຫະລັດກໍໄດ້ເຕື້ອງເຖິງບັນດາຜົນງານທີ່ບັນລຸໄດ້ໃນໄລຍະກຳອຳນາດ ແຕ່ການສຳຜັດຂອງທ່ານ Barack Obama ແມ່ນມີຄວາມຄ່ອງແຄ້ວດ້ວຍການຍົກອອກບັນດາຄາດໝາຍໃນໄລຍະຈະມາເຖິງ. ບັນດາຄາດໝາຍນີ້ກໍແມ່ນຈຸດປະສົງ ຊື່ງຜູ້ອອກສະໝັກຮັບເລືອກຕັ້ງປະທານາທິບໍດີຈຳນວນຫນຶ່ງຂອງພັກປະຊາທິປະໄຕມຸ້ງໄປເຖິງ. ໃນບັນຫາການເມືອງ, ການເລືອກຕັ້ງ, ປະທານາທິບໍດີ Barack Obama ໄດ້ເນັ້ນຫນັກວ່າ: ອາເມລິກາ ຄວນຫລຸດຜ່ອນຄວາມຜົນສະທ້ອນຂອງເງິນຕາຕໍ່ການເມືອງ ພ້ອມທັງ ກ່າວປະນາມສະພາບລະບົບການເມືອງ ພວມສ້າງເງື່ອນໄຂໃຫ້ບັນດາຜູ້ຮັ່ງມີ ແລະ ຜູ້ມີສິດອຳນາດ. ທ່ານ Barack Obama ກໍຢືນຢັນວ່າ: ຖ້າມີການຮ່ວມມືນຳກັນ, ອະນາຄົດຂອງປະເທດ ອາເມລິກາ ອາດຈະບັນລຸໄດ້ຄືດັ່ງຄວາມຫວັງ. ປະທານາທິບໍດີ Barack Obama ຮຽກຮ້ອງສະພາແຫ່ງຊາດ ຮ່ວມມືນຳກັນ ເພື່ອໃຫ້ສັດຕະຍາບັນສັນຍາຄູ່ຮ່ວມມືຂ້າມປາຊີຟີກ TPP, ປິດປະຕູຄຸກການທະຫານຂອງອາເມລິກາ ຢູ່ ອ່າວ Guantanamo ຫລື ຍົກເລີກການຂວຳ້ບາດຕໍ່ກູບາ, ຊຸກຍູ້ຂໍ້ຕົກລົງການເມືອງໃຫ້ແກ່ບັນຫາ ຊີຣີ, ປະຕິບັດຂໍ້ຕົກລົງ ປາຣີ ກ່ຽວກັບການປ່ຽນແປງຂອງດິນຟ້າອາກາດ, ປະຕິບັດຂໍ້ຕົກລົງກ່ຽວກັບບັນຫານິວເຄຼຍຂອງ ອີຣານ ທີ່ບັນລຸໄດ້ເມື່ອເດືອນ 7/2015.
ຕຳຫນິຕິຕຽນທາງອ້ອມຜູ້ອອກສະໝັກຮັບເລືອກຕັ້ງຂອງພັກສາທາລະນະ
ປະທານາທິບໍດີ ອາເມລິກາ Barack Obama ບໍ່ສະແດງການສະຫນັບສະຫນູນໂດຍກົງຕໍ່ບັ້ນຫາສຽງເລືອກຕັ້ງປະທານາທິບໍດີ ຂອງພັກປະຊາທິປະໄຕໃນສານສະຫະລັດ ແຕ່ທ່ານພັດສະແດງການຄັດຄ້ານຢ່າງແຮງ ເພື່ອເລັ່ງໃສ່ບັນດາຜູ້ອອກສະຫມັກຮັບເລືອກຕັ້ງຂອງພັກສາທາລະນະ. ຜູ້ອອກສະຫມັກຮັບເລືອກຕັ້ງ 2 ທ່ານ ຂອງພັກສາທາລະນະ ຊື່ງທ່ານ Barack Obama ໄດ້ກ່າວປະນາມຫລາຍສຸດນັ້ນແມ່ນ ສະມາຊິກສະພາສູງ Ted Cruz ແລະ ເສດຖີເງິນຕຶ້ Donald Trump. ເຖິງວ່າບໍ່ຍົກຊື່ຂອງຜູ້ຖືກຕຳຫນິຕິຕຽນກໍຕາມ ແຕ່ໃນສານສະຫະລັດ ທ່ານປະທານາທິບໍດີ Barack Obama ໄດ້ຕຳຫນິຕິຕຽນໂດຍທາງອ້ອມແກ່ບັນດາຖະແຫລງການທີ່ກໍ່ຄວາມຖົກຖຽງກັນກ່ຽວກັບຊາວອົບພະຍົບ ແລະ ອິດສະລາມ ຂອງຜູ້ອອກສະໝັກຮັບເລືອກຕັ້ງແຖວຫນ້າຂອງພັກສາທາລະນະ Donald Trump. ຕາມທ່ານ Barack Obama ແລ້ວ, ເມື່ອບັນດານັກການເມືອງ ໄດ້ແຕະຕ້ອງ ຊາວມຸດສະລີມ, ເມື່ອໂບດອິດສະລາມແຫ່ງຫນຶ່ງຖືກທຳລາຍ ສິ່ງນັ້ນບໍ່ເຮັດໃຫ້ອາເມລິກາ ມີຄວາມປອດໄພກວ່າ. ທ່ານ Barack Obama ຢືນຢັນ “ນັ້ນແມ່ນການກະທຳທີ່ຜິດພາດ, ມັນເຮັດໃຫ້ພວກເຮົາອ່ອນນ້ອຍລົງໃນແວວຕາຂອງປະຊາຄົມສາກົນ. ມັນເຮັດໃຫ້ພວກເຮົາຍາກທີ່ຈະປະຕິບັດບັນດາຄາດໝາຍໄດ້ກໍຄືສົ່ງຜົນສະທ້ອນເຖິງຄຸນຄ່າຂອງປະເທດອາເມລິກາ”. ທ່ານ Barack Obama ເນັ້ນຫນັກຢ່າງກົງໄປກົງມາວ່າ: “ພວກເຮົາຈຳເປັນຕ້ອງປະຕິເສດບັນຫາການເມືອງທີ່ເລັ່ງໃສ່ຜູ້ອື່ນ ເພື່ອເຊື້ອຊາດຜິວພັນ ຫລື ສາສະຫນາ”.
ສຳລັບຄຳຮຽກຮ້ອງເພີ່ມທະວີການບຸກໂຈມຕີຂອງອົງການລັດອິດສະລາມຂະຫນານນາມເອງ IS ຂອງສະມາຊິກສະພາສູງ Ted Cruz, ໂດຍບໍ່ຫົວຊາຕໍ່ຊີວິດອີນຊີຂອງສາມັນຊົນ, ປະທານາທິບໍດີ Barack Obama ຕຳຫນິຕິຕຽນວ່າ ບໍ່ຄວນເວົ້າແບບແຂງກະດ້າງ ຫລື ຮຽກຮ້ອງການຖີ້ມລະເບີດ IS ໂດຍບໍ່ຫົວຊາຕໍ່ສາມັນຊົນຊີຣີ ທາງໂທລະພາບ ເພາະວ່າ ບັນດາຄຳເວົ້ານີ້ພຽງແຕ່ສ້າງຄວາມປະທັບໃຈນັ້ນ ຫາກບໍ່ມີຄວາມໝາຍໃນເວທີສາກົນ.
ທ່ານ Barack Obama ກໍໄດ້ປະຕິເສດທັດສະນະຂອງນັກການເມືອງພັກ ສາທາລະນະ ຫລາຍທ່ານໂດຍຖືວ່າ ຊາວອົບພະຍົບໄດ້ເຮັດໃຫ້ ອາເມລິກາ ປະສົບກັບຄວາມຫຍຸ້ງຍາກກ່ຽວກັບດ້ານເສດຖະກິດ.
ສ້າງຜົນສະທ້ອນທີ່ດີຕໍ່ຫາງສຽງ
ຕາມໝາກຜົນຈາກການຢັ່ງຫາງສຽງໂດຍ ສຳນັກຂ່າວ ອາເມລິກາ CNN/ORC ປະກາດໃນຕອນເຊົ້າວັນທີ 13/1, ສານສະຫະລັດສຸດທ້າຍຂອງປະທານາທິບໍດີ Barack Obamaໄດ້ຮັບການຕີລາຄາສູງຈາກຫາງສຽງເມື່ອປຽບທຽບກັບບັນດາຄຳກ່າວປາໄສກ່ອນນັ້ນ. ມີ 53% ຈຳນວນຜູ້ຖືກຖາມໄດ້ຕີລາຄາຢ່າງຕັ້ງຫນ້າຕໍ່ສານສະຫະລັດສະບັບນີ້. ຜູ້ຖືກຖາມສ່ວນຫລາຍຢືນຢັນວ່າ: ບັນດານະໂຍບາຍ ຊື່ງທ່ານ Obama ສະເຫນີ ຈະນຳປະເທດ ອາເມລິກາ ໄປຖືກທິດ. ສິ່ງດັ່ງກ່າວແມ່ນກົງກັບຂ້າມກັບການຕຳຫນິຕິຕຽນຢ່າງແຮງຈາກພັກສາທາລະນະ ເມື່ອຖືວ່າ ບົດກ່າວປາໄສຂອງທ່ານບໍ່ມີຈຸດສຸມ ດ້ວຍເນື້ອໃນເກົ່າບໍ່ກຽມພ້ອມ ແລະ ບໍ່ສາມາດຍົກອອກມາດຕະການລະອຽດໃຫ້ບັນຫາທີ່ຍັງຄົງຂ້າງຂອງປະເທດອາເມລິກາ.
ສານສະຫະລັດ ໄດ້ຮັບຖືວ່າ ແມ່ນຈຸດສຸມຂອງຊີວິດດ້ານການເມືອງ ອາເມລິກາ ຕົ້ນປີ 2016. ປະທານາທິບໍດີ Obama ໄດ້ຍາດແຍ່ງຄວາມສົນໃຈຈາກຫາງສຽງຕໍ່ສານສະບັບນີ້ເພື່ອໂຄສະນາໂຄງການດຳເນີນງານຂອງອຳນາດການປົກຄອງ ແລະ ພັກປະຊາທິປະໄຕ ນັບແຕ່ນີ້ຈົນເຖິງການເລືອກຕັ້ງປະທານາທິບໍດີ 2016, ສ້າງທ່າໄດ້ປຽບໂດຍທາງອ້ອມໃຫ້ບັ້ນຫາສຽງເລືອກຕັ້ງປະທານາທິບໍດີ ຂອງພັກປະຊາທິປະໄຕ.