(vovworld) - ຫວຽດນາມ ພວມແມ່ນຫນຶ່ງໃນບັນດາປະເທດຖືກຜົນສະທ້ອນຢ່າງຫນັກຫນ່ວງຈາກສະພາບປ່ຽນແປງຂອງດິນຟ້າອາກາດ. ເພື່ອປະຕິບັດຈຸດໝາຍຮ່ວມແຮງຮ່ວມໃຈພ້ອມກັບໂລກປົກປັກຮັກສາສິ່ງແວດລ້ອມ, ຫວຽດນາມ ໄດ້ເປັນເຈົ້າການໃນການສ້າງ “ຍຸດທະສາດການເຕີບໂຕຂຽວ” ເພື່ອແກ້ໄຂສະພາບມົນລະພິດສິ່ງແວດລ້ອມ, ຫລຸດຜ່ອນການປ່ອຍອາຍພິດເຮືອນແກ້ວ, ຮັບມືກັບລະດັບນ້ຳທະເລເພີ່ມຂຶ້ນສູງ ເພື່ອພັດທະນາເສດຖະກິດແບບຍືນຍົງໃນຮອບເວລາ 10 ປີຈະມາເຖິງ.
ຍຸດທະສາດການເຕີບໂຕຂຽວຂອງ ຫວຽດນາມ ໂດຍກະຊວງແຜນການ ແລະ ການລົງທຶນ ຫວຽດນາມ ສ້າງຂຶ້ນ. ຈຸດໝາຍສັງລວມຂອງຍຸດທະສາດນີ້ ແມ່ນເພື່ອແນໃສ່ປ່ຽນແປງຮູບແບບການເຕີບໂຕຂອງ ຫວຽດນາມ ກາຍເປັນຮູບແບບທີ່ອີງໃສ່ການປ່ອຍອາຍກາກບອນຕ່ຳ, ຜະລິດ ແລະ ນຳໃຊ້ຂຽວ ພ້ອມກັບການສ້າງໂຄງປະກອບເສດຖະກິດຄືນໃຫ່ມ ເພື່ອການເຕີບໂຕເສດຖະກິດຕິດພັນກັບຄວາມກ້າວຫນ້າ ແລະ ຄວາມຍຸຕິທຳທາງສັງຄົມ ແລະ ປົກປັກຮັກສາສິ່ງແວດລ້ອມຢ່າງມີປະສິດທິຜົນກວ່າ. ຕາມການຕີລາຄາຂອງບັນດານັກຄຸ້ມຄອງແລ້ວ, ຍຸດທະສາດການເຕີບໂຕຂຽວ ຈະແມ່ນມາດຕະການທີ່ມີປະສິດທິຜົນ ບໍ່ພຽງຕ້ານການປ່ຽນແປງຂອງດິນຟ້າອາກາດ, ປົວແປງສິ່ງແວດລ້ອມເທົ່ານັ້ນ ຫາກຍັງສ້າງວຽກເຮັດງານທຳໃຫ້ແກ່ຄົນງານອີກດ້ວຍ. ທ່ານ Pham Hoang Mai ຫົວຫນ້າກົມວິທະຍາສາດສຶກສາ ແລະ ຊັບພະຍາກອນສິ່ງແວດລ້ອມ, ສັງກັດກະຊວງແຜນການ ແລະ ການລົງທຶນຫວຽດນາມ ໃຫ້ຮູ້ວ່າ:
“ສຳລັບຍຸດທະສາດການເຕີບໂຕຂຽວຂອງຫວຽດນາມ, ພວກຂ້າພະເຈົ້າສຸມໃສ່ເຂົ້າໃນ 3 ຈຸດໝາຍຕົ້ນຕໍ. ນັ້ນແມ່ນ ສົ່ງເສີມບັນດາຂະແຫນງອຸດສາຫະກຳ, ບັນດາຂະແຫນງເສດຖະກິດນຳໃຊ້ຊັບພະຍາກອນທຳມະຊາດຢ່າງມີປະສິດທິຜົນ ດ້ວຍມູນຄ່າເພີ່ມສູງ, ຈຳກັດ, ກ້າວໄປເຖິງການລົບລ້າງບັນດາຂະແຫນງ, ອາຊີບນຳໃຊ້ຊັບພະຍາກອນທຳມະຊາດຢ່າງຟຸມເຟືອຍ, ກໍ່ມົນລະພິດເຖິງສິ່ງແວດລ້ອມ. ທີສອງແມ່ນນຳໃຊ້ ແລະ ພັດທະນາບັນດາເຕັກໂນໂລຊີທັນສະໄຫມ ແນໃສ່ນຳໃຊ້ຊັບພະຍາກອນທຳມະຊາດ, ຫລຸດຜ່ອນການປ່ອຍອາຍພິດເຮືອນແກ້ວ ເພື່ອຮັບມືກັບການປ່ຽນແປງຂອງດິນຟ້າອາກາດ ແລະ ຈຸດໝາຍທີສາມ ແມ່ນຍົກສູງຊີວິດການເປັນຢູ່ຂອງປະຊາຊົນ, ໂດຍຜ່ານເລື່ອງສ້າງວຽກເຮັດງານທຳຈາກບັນດາຂະແຫນງອຸດສາຫະກຳຂຽວ ແລະ ປັບປຸງຄຸນນະພາບຊີວິດການເປັນຢູ່ຜ່ານການສ້າງແບບແຜນດຳລົງຊີວິດບໍ່ສົ່ງຜົນກະທົບຕໍ່ສິ່ງແວດລ້ອມ.”
ມູ້ງໄປເຖິງການເຕີບໂຕຂຽວ
ພາບປະກອບ: internet
|
ຕາມຮ່າງຍຸດທະສາດການເຕີບໂຕຂຽວແລ້ວ, ບໍ່ສະເພາະອົງການຄຸ້ມຄອງທຸກຂັ້ນ, ບັນດາວິສາຫະກິດເທົ່ານັ້ນ ຫາກທັງລະບົບການເມືອງ ແລະ ທົ່ວສັງຄົມລ້ວນແຕ່ຕ້ອງເຂົ້າຮ່ວມການປົກປັກຮັກສາສິ່ງແວດລ້ອມ. ຕາມທ່ານ Pham Hoang Mai ແລ້ວ, ປັດໄຈນີ້ ຈະເຮັດໃຫ້ຮູບແບບການເຕີບໂຕຢູ່ ຫວຽດນາມ ໃນປະຈຸບັນປ່ຽນແປງເທື່ອລະກ້າວ.
“ການເຕີບໂຕຂຽວຢູ່ ຫວຽດນາມ ແມ່ນການເຕີບໂຕທີ່ອີງໃສ່ຮູບແບບການເຕີບໂຕສ້າງໂຄງປະກອບພື້ນຖານເສດຖະກິດຄືນໃຫມ່ ເພື່ອນຳໃຊ້ທ່າໄດ້ປຽບ, ຍົກສູງປະສິດທິຜົນ ແລະ ກຳລັງແກ້ງແຍ້ງຂອງພື້ນຖານເສດຖະກິດ ໂດຍຜ່ານການຄົ້ນຄ້ວາ ແລະ ນຳໃຊ້ເຕັກໂນໂລຊີກ້າວຫນ້າ, ພັດທະນາລະບົບພື້ນຖານໂຄງລ່າງທັນສະໄຫມ ເພື່ອນຳໃຊ້ຊັບພະຍາກອນທຳມະຊາດ, ຫລຸດຜ່ອນການປ່ອຍອາຍພິດເຮືອນແກ້ວ, ຮັບມືກັບການປ່ຽນແປງຂອງດິນຟ້າອາກາດ, ປະກອບສ່ວນລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ ແລະ ສ້າງກຳລັງຫນູນເພື່ອການເຕີບໂຕເສດຖະກິດຢ່າງໝັ້ນຄົງ.”
ເຖິງວ່າພຽງແຕ່ແມ່ນແຜນຮ່າງເທົ່ານັ້ນ ແຕ່ຍຸດທະສາດການເຕີບໂຕຂຽວໄດ້ຮັບຄວາມເຫັນດີເຫັນພ້ອມ, ການສະຫນັບສະຫນູນຈາກຫລາຍກະຊວງ, ຂະແຫນງການ ແລະ ອົງການຈັດຕັ້ງສັງຄົມ. ທ່ານ Mai Duc Chinh ຮອງຫົວຫນ້າສະຫະພັນໃຫຍ່ແຮງງານຫວຽດນາມ ໃຫ້ຮູ້ວ່າ:
“ພວກຂ້າພະເຈົ້າຮັບຮູ້ ແລະ ກຳນົດຢ່າງຈະແຈ້ງວ່າ ເສດຖະກິດຂຽວແມ່ນພື້ນຖານເສດຖະກິດຈຳເປັນທີ່ສຸດໃນໄລຍະວິກິດການເສດຖະກິດ, ວິກິດການຊີວະພາບຂອງ ຫວຽດນາມ. ບົນພື້ນຖານນັ້ນ ພວກຂ້າພະເຈົ້າຈະສ້າງຍຸດທະສາດອັນລະອຽດ ຂອງກຳມະບານ ຫວຽດນາມ ເພື່ອເຂົ້າຮ່ວມຢ່າງແທດຈິງ ແລະ ມີປະສິດທິຜົນກັບລັດຖະບານໃນວິວັດການຫັນປ່ຽນ ແລະ ປະຕິບັດພື້ນຖານເສດຖະກິດຂຽວ ເພື່ອເພີ່ມທະວີກຳລັງແຮງຂອງພື້ນຖານເສດຖະກິດ ທັງຮັບປະກັນຊີວິດສັງຄົມ.”
ດ້ວຍບົດບາດໜ້າທີ່ຄຸ້ມຄອງລັດກ່ຽວກັບອຸດສາຫະກຳ ແລະ ການຄ້າ, ກະຊວງອຸດສາຫະກຳການຄ້າ ຫວຽດນາມ ກໍພວມສ້າງຍຸດທະສາດສະເພາະ ເພື່ອແນໃສ່ປະກອບສ່ວນສ້າງສັງຄົມພັດທະນາຕາມທິດຂຽວ. ທີ່ກອງປະຊຸມສຳມະນາກ່ຽວກັບຍຸດທະສາດການເຕີບໂຕຂຽວ ຊຶ່ງຖືກຈັດຂຶ້ນຫວ່າງແລ້ວນີ້ຢູ່ ຮ່າໂນ້ຍ, ທ່ານ Huynh Dac Thang ຮອງຫົວຫນ້າກົມແຜນການ ສັງກັດກະຊວງອຸດສາຫະກຳ ການຄ້າໃຫ້ຮູ້ວ່າ ກະຊວງອຸດສາຫະກຳ ການຄ້າ ຈະຊອກວິທີສົ່ງເສີມສັງຄົມນຳໃຊ້ພະລັງງານຜະລິດຄືນໃຫມ່.
“ຄວາມຈິງຊີ້ໃຫ້ເຫັນວ່າ ພ້ອມກັບການເຕີບໂຕຢ່າງແຂງແຮງກ່ຽວກັບເສດຖະກິດໃນໄລຍະຜ່ານມາ, ຄວາມຕ້ອງການນຳໃຊ້ພະລັງງານກໍໄດ້ເພີ່ມຂຶ້ນຢ່າງວ່ອງໄວ. ເລື່ອງໂຄສະນາ, ສົ່ງເສີມການນຳໃຊ້ພະລັງງານທີ່ຜະລິດຄືນໃຫມ່ນັ້ນ ບໍ່ພຽງແຕ່ສົ່ງຜົນກະທົບເຖິງພື້ນຖານເສດຖະກິດຂຽວເທົ່ານັ້ນ ຫາກຍັງເປີດກວ້າງການຟຶ້ນຟູຕະຫລາດແຮງງານອີກດ້ວຍ. ບັນດາວຽກງານໄດ້ຮັບການສ້າງຂຶ້ນ ຫລື ຮັກສາຜ່ານວິວັດການລົງທຶນດ້ານເຕັກນິກ, ວິວັດການຜະລິດພະລັງງານຄືນໃຫມ່ຈະສ້າງໃຫ້ມີບັນດາວຽກງານໃຫມ່.”
ຕາມແຜນການແລ້ວ, ຍຸດທະສາດການເຕີບໂຕຂຽວພາຍຫລັງໄດ້ຮັບການຮັບຮອງເອົາຈາກລັດຖະບານໃນເດືອນ 6 ຈະມາເຖິງ ຈະໄດ້ຮັບການປະຕິບັດນັບແຕ່ນີ້ຮອດປີ 2020. ຄາດວ່າ ພາຍຫລັງ 10 ປີ ອີກ, ໃນແຕ່ລະປີ ລະດັບນຳໃຊ້ພະລັງງານທີ່ຄິດໄລ່ຕາມ GDP ຂອງຫວຽດນາມ ຈະຫລຸດຜ່ອນປະມານ 3%, ລະດັບປ່ອຍອາຍພິດເຮືອນແກ້ວຂອງຫວຽດນາມ ຈະຫລຸດຜ່ອນ 5 % ເມື່ອທຽບໃສ່ປະຈຸບັນ. ຍຸດທະສາດການເຕີບໂຕຂຽວຢູ່ ຫວຽດນາມ ໄດ້ຮັບຄວາມຫວັງວ່າ ແມ່ນເຄື່ອງມືຊຸກຍູ້ວິວັດການປ່ຽນແປງຮູບແບບການເຕີບໂຕ, ສ້າງໂຄງປະກອບເສດຖະກິດຄືນໃຫມ່ ເພື່ອນຳໃຊ້ທ່າໄດ້ປຽບ, ຍົກສູງປະສິດທິຜົນ ແລະ ກຳລັງແກ້ງແຍ້ງຂອງພື້ນຖານເສດຖະກິດຜ່ານການຄົ້ນຄ້ວາ ແລະ ນຳໃຊ້ເຕັກໂນໂລຊີທັນສະໄໝ, ພັດທະນາລະບົບພື້ນຖານໂຄງລ່າງ ເພື່ອຍົກສູງປະສິດທິຜົນຂອງພື້ນຖານເສດຖະກິດ ພ້ອມທັງຮັບມືກັບການປ່ຽນແປງຂອງດິນຟ້າອາກາດ, ປະກອບສ່ວນໃນການລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ ແລະ ສ້າງກຳລັງຫນູນຊຸກຍູ້ການເຕີບໂຄເສດຖະກິດແບບຍືນຍົງ.
ນັກຂ່າວ Thu Hoa