(vovworld)- ວັນທີ 7/4, ພິທີຕ້ອນຮັບທ່ານນາຍົກລັດຖະມົນຕີ ບຸນກາຣີ Plamen Oresharski ດຳເນີນໄປຢ່າງສົມກຽດຢູ່ ຮ່າໂນ້ຍ ເປັນການເປີດສາກໃຫ້ແກ່ບັນດາການເຄື່ອນໄຫວໃນການຢ້ຽມຢາມຫວຽດນາມ ຢ່າງເປັນທາງການຂອງທ່ານນາຍົກລັດຖະມົນຕີ Plamen Oresharski. ການຢ້ຽມຢາມແມ່ນໂອກາດເພື່ອໃຫ້ສອງປະເທດຊຸກຍູ້ບັນດາລາຍການ,ໂຄງການ ລະອຽດ, ນຳການພົວພັນເພື່ອນມິດທີ່ໝັ້ນຄົງໃຫ້ມີປະສິດທິຜົນ ແລະ ນຳມາເຊິ່ງຜົນປະໂຫຍດຢ່າງແທ້ຈິງໃຫ້ແກ່ປະຊາຊົນສອງປະເທດ.
ທ່ານນາຍົກລັດຖະມົນຕີ ບຸນກາຣີ Plamen Oresharski
photo:qdnd.vn
|
ບຸນກາຣີ ແມ່ນຫນຶ່ງໃນຈຳນວນ 10 ປະເທດທຳອິດໃນໂລກ ຮັບຮູ້ ແລະ ສ້າງຕັ້ງການພົວພັນດ້ານການທູດກັບຫວຽດນາມ (ເມື່ອວັນທີ 8/2/1950), ເລີ່ມຕົ້ນໃຫ້ແກ່ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຍາວນານລະຫວ່າງສອງປະເທດ. ຍາມໃດຫວຽດນາມ ກໍຈົດຈຳ່ບັນດາການຊ່ວຍເຫລືອອັນລຳ້ຄ່າຂອງ ບຸນກາຣີ ທີ່ສະຫງວນໃຫ້ແກ່ຫວຽດນາມ ນັບທັງທາງດ້ານວັດຖຸ ແລະ ຈິດໃຈ ໃນພາລະກິດຕໍ່ສູ້ປົດປ່ອຍຊາດ ແລະ ປົກປັກຮັກສາປະເທດຊາດ. ໄລຍະມໍ່ໆມານີ້, ໃນນະໂຍບາຍເປີດກວ້າງ ແລະ ເພີ່ມທະວີການພົວພັນກັບບັນດາປະເທດຢູ່ພາກພື້ນ ອາຊີ, ບຸນກາຣີ ເອົາໃຈໃສ່ເປັນພິເສດເຖິງການເພີ່ມທະວີການພົວພັນກັບຫວຽດນາມ. ການຮ່ວມມືດ້ານການເມືອງລະຫວ່າງສອງປະເທດເພື່ອນມິດໃນໄລຍະກວ່າ 64 ປີ ຜ່ານມາ, ຍາມໃດກໍໄດ້ຮັບຄວາມເອົາໃຈໃສ່ ແລະ ຮັກສາຢູ່ໃນລະດັບສູງ, ດ້ວຍການຢ້ຽມຢາມສອງຝ່າຍເຊິ່ງກັນ ແລະ ກັນ ແລະ ການປະສານສົມທົບຢ່າງແຫນ້ນແຟ້ນທີ່ບັນດາເວທີປາໄສພາກພື້ນ ແລະ ສາກົນ.
ພື້ນຖານອັນໝັ້ນແກ່ນໃຫ້ແກ່ການພົວພັນລະຫວ່າງ ຫວຽດນາມ - ບຸນກາຣີ
ຕາມທ່ານເລດືກລືວ, ເອກອັກຄະລັດຖະທູດ ຫວຽດນາມ ປະຈຳບຸນກາຣີ ແລ້ວ, ມີ 3 ຈຸດທີ່ຄ້າຍຄືກັນໄດ້ສ້າງເປັນພື້ນຖານອັນໝັ້ນແກ່ນໃຫ້ແກ່ການພົວພັນລະຫວ່າງຫວຽດນາມ - ບຸນກາຣີ ໃນອະດີດຕະການ, ໃນປະຈຸບັນ ແລະ ໃນອະນາຄົດ. ທ່ານເອກອັກຄະລັດຖະທູດ ເລດືກລືວ ໃຫ້ຮູ້ວ່າ:
“ກ່ອນອື່ນໝົດ, ສອງປະເທດ ຫວຽດນາມ ແລະ ບຸນກາຣີ ລ້ວນແຕ່ມີທີ່ຕັ້ງພູມສາດການເມືອງສຳຄັນຢູ່ ອາຊີຕາເວັນອອກສຽງໃຕ້ ແລະ ເອີລົບຕາເວັນອອກສຽງໃຕ້. ທີ່ຕັ້ງນັ້ນເຮັດໃຫ້ຫວຽດນາມ ກາຍເປັນປະຕູເພື່ອບຸກກາຣີ ຊຸກຍູ້ການພົວພັນກັບອາຊີ. ສ່ວນ ບຸນກາຣີ ສາມາດເປີດປະຕູເພື່ອໃຫ້ຫວຽດນາມ ແຊກຊືມເຂົ້າຕະຫລາດເອີລົບ, ພິເສດ ບັນດາປະເທດ Balkan. ທີສອງ, ລັດຖະບານສອງປະເທດ ໄດ້ຜ່ານຜ່າໄລຍະປະຫວັດສາດ ລ້ວນແຕ່ຢາກຊຸກຍູ້ການພົວພັນຮ່ວມມື ແລະ ຊຸກຍູ້ສັນຕິພາບ, ສະຖຽນລະພາບເພື່ອການພັດທະນາ. ລັດຖະບານບຸນກາຣີ ຢາກຊຸກຍູ້ການຮ່ວມມືກັບຫວຽດນາມ ແລະ ຖືຫວຽດນາມ ແມ່ນຄູ່ຮ່ວມມືສຳຄັນ. ທີສາມ, ສອງປະເທດລ້ວນແຕ່ປາດຖະຫນາຢາກເປັນເຈົ້າການຕັ້ງຫນ້າ ແລະ ເຊື່ອມໂຍງເຂົ້າກັບສາກົນ, ລ້ວນແຕ່ປາດຖະຫນາຢາກມີສັນຕິພາບ, ສະຖຽນລະພາບ ເພື່ອພັດທະນາ. ”
ເຖິງຢ່າງໃດກໍຕາມ, ຄຽງຄູ່ກັບການຮ່ວມມືດ້ານການເມືອງອັນດີງາມ, ການຮ່ວມມືດ້ານເສດຖະກິດຍັງຄົງໄດ້ຮັບຖືວ່າບໍ່ທັນສົມກັບຄວາມສາມາດບົ່ມຊ້ອນຂອງແຕ່ລະປະເທດ ແລະ ບໍ່ທັນຂຸດຄົ້ນໝົດເທື່ອ. ເມື່ອຕອບສຳພາດຕໍ່ນັກຂ່າວວິທະຍຸກະຈາຍສຽງຫວຽດນາມ ປະຈຳ ເອີລົບ ກ່ອນການໄປຢ້ຽມຢາມຫວຽດນາມ ຄັ້ງນີ້, ທ່ານນາຍົກລັດຖະມົນຕີ Plamen Oresharski ຢືນຢັນ: ບຸນກາຣີ ຫວັງວ່າ ການຢ້ຽມຢາມຫວຽດນາມ ຄັ້ງນີ້ ເພື່ອນຳການພົວພັນສອງຝ່າຍ ຫວຽດນາມ ແລະ ບຸນກາຣີ ຈະມີປະສິດທິຜົນ ແລະ ແທດຈິງກວ່າ ແລະ ຫວຽດນາມ ແມ່ນຫນຶ່ງໃນບັນດາບຸລິມະສິດສຳຄັນໃນນະໂຍບາຍການຕ່າງປະເທດຂອງລັດຖະບານ ບຸນກາຣີ ປະຈຸບັນ. ທ່ານນາຍົກລັດຖະມົນຕີ Plamen Oresharski ໃຫ້ຮູ້ວ່າ:
“ຮ່ວມເດີນທາງພ້ອມກັບຂ້າພະເຈົ້າ ມີທ່ານລັດຖະມົນຕີ ກະຊວງກະສິກຳ, ລັດຖະມົນຕີ ກະຊວງວັດທະນະທຳ, ລັດຖະມົນຕີ ກະຊວງຄົມມະນາຄົມຂົນສົ່ງ ແລະ ຮອງລັດຖະມົນຕີກະຊວງເສດຖະກິດ. ລັດຖະມົນຕີບາງທ່ານ ຈະລົງນາມໃນບັນດາເອກະສານສຳຄັນກັບບັນດາກະຊວງກ່ຽວຂ້ອງຂອງຫວຽດນາມ. ນອກນັ້ນ ເຂົ້າຮ່ວມຄະນະຜູ້ແທນ ບຸນກາຣີ ຄັ້ງນີ້ ຍັງມີຜູ້ຕາງຫນ້າຂອງວິສາຫະກິດ ບຸນກາຣີ ຫລາຍແຫ່ງມີຄວາມສົນໃຈເຖິງການຮ່ວມມືດຳເນີນທຸລະກິດກັບບັນດາຄູ່ຮ່ວມມື ຫວຽດນາມ. ຫວັງວ່າ ການຢ້ຽມຢາມຫວຽດນາມ ຂອງຂ້າພະເຈົ້າບໍ່ພຽງແຕ່ເພື່ອຈຸດປະສົງເຮັດໃຫ້ການພົວພັນດ້ານການເມືອງລະຫວ່າງສອງປະເທດໃຫ້ເລິກເຊິ່ງຂຶ້ນຕື່ມເທົ່ານັ້ນ ຫາກຍັງປະກອບສ່ວນສ້າງການພົວພັນດ້ານເສດຖະກິດລະຫວ່າງສອງປະເທດ ພວກເຮົາ ອີກດ້ວຍ.”
ຊຸກຍູ້ການພົວພັນຮ່ວມມືດ້ານເສດຖະກິດຢ່າງມີປະສິດທິຜົນກວ່າ
ປະຈຸບັນ, ວົງເງິນການຄ້າສອງສົ້ນ ລະຫວ່າງຫວຽດນາມ - ບຸນກາຣີ ບັນລຸ 70-80 ລ້ານ USD/ປີ. ສອງປະເທດພວມຕັ້ງຫນ້າຄົ້ນຄ້ວາຜັນຂະຫຍາຍ “ຮູບແບບຮ່ວມມືເສດຖະກິດໃຫມ່” ບົນພື້ນຖານຍາດແຍ່ງທ່າແຮງຂອງແຕ່ລະປະເທດ.
ບຸນກາຣີ ມີທ່າແຮງໃນຂະແຫນງຈຳນວນຫນຶ່ງຄື: ປະດິດສ້າງ, ສະຫນອງ ແລະ ອອກແບບລະບົບຫົດນຳ້ ແລະ ບັນດາຜະລິດຕະພັນເຕັກນິກກະສິກຳ, ປຸງແຕ່ງອາຫານ, ອຸດສາຫະກຳເຄມີ, ຜະລິດກົນຈັກ, ການຢາ. ເປັນຫນ້າສົນໃຈ, ໃນຂົງເຂດທ່ອງທ່ຽວ, ແຕ່ລະປີ ບຸນກາຣີ ຕ້ອນຮັບນັກທ່ອງທ່ຽວຕ່າງປະເທດ ຈາກ 8- 10 ລ້ານເທື່ອຄົນ. ບຸນກາຣີ ສາມາດຊ່ວຍບຳລຸງສ້າງພະນັກງານທ່ອງທ່ຽວບັນລຸມາດຕະການ ເອີລົບຫລາຍຄົນໃຫ້ແກ່ ຫວຽດນາມ. ນອກນັ້ນ, ໃນຂົງເຂດການສຶກສາ, ຫວຽດນາມ ສາມາດໝຸນໃຊ້ລະບົບການສຶກສາຄຸນນະພາບສູງ, ບັນລຸມາດຖານ ເອີລົບ ຢູ່ ບຸນກາຣີ ເພື່ອສ່ົງພະນັກງານໄປຮຳ່ຮຽນ ຫລື ຊຸກຍູ້ບັນດາລາຍການຮຳ່ຮຽນຢູ່ ບຸນກາຣີ.
ເຮັດແນວໃດເພື່ອໃຫ້ການພົວພັນເພື່ອນມິດທີ່ເປັນມູນເຊື້ອ ບັນລຸປະສິດທິຜົນ ແລະ ແທດຈິງກວ່າ ນັ້ນແມ່ນຄຳຖາມຊື່ງການນຳສອງປະເທດ ພວມຕັ້ງມາ ແລະ ມານະພະຍາຍາມຊອກຄຳຕອບ. ເລື່ອງທ່ານນາຍົກລັດຖະມົນຕີ ບຸນກາຣີ Plamen Oresharski ມາຢ້ຽມຢາມຫວຽດນາມຢ່າງເປັນທາງການ ສະແດງໃຫ້ເຫັນ ຄວາມຕັດສິນໃຈ ແລະ ຄວາມປາດຖະຫນາຂອງສອງປະເທດ ແມ່ນຢາກຊຸກຍູ້ ການພົວພັນມິດຕະພາບເພື່ອນມິດທີ່ເປັນມູນເຊື້ອກວ່າອີກ.