ກອງປະຊຸມສຸດຍອດຂອງ ສປຊ ກ່ຽວກັບການປ່ຽນແປງຂອງດິນຟ້າອາກາດຄັ້ງທີ 17 (ກອງປະຊຸມ COP 17) ໄດ້ຖືກຈັດຂຶ້ນໃນຕົ້ນອາທິດຜ່ານມາ ຢູ່ ນະຄອນທະເລ Durban ປະເທດ ອາຟຼິກາໃຕ້ ແລະ ສືບຕໍ່ແກ່ຍາວຮອດທ້າຍອາທິດນີ້. ພ້ອມກັບ ປະມານ 15.000 ຜູ້ແທນມາຈາກ 194 ປະເທດ ແລະ ເຂດແຄ້ວນໃນທົ່ວໂລກ, ຄະນະຜູ້ແທນຫວຽດນາມ ເຂົ້າຮ່ວມກອງປະຊຸມ COP 17 ສືບຕໍ່ຢັ້ງຢືນຄວາມຕັດສິນໃຈພ້ອມກັນເຄື່ອນໄຫວ ເພື່ອຮັບມືກັບການປ່ຽນແປງຂອງດິນຟ້າອາກາດ. ກອງປະຊຸມ ກໍແມ່ນໂອກາດເພື່ອໃຫ້ ຫວຽດນາມ ແນະນຳ, ສະເຫນີນະໂຍບາຍຂອງຕົນທ່ີກ່ຽວຂ້ອງເຖິງການປ່ຽນແປງຂອງດິນຟ້າອາກາດ, ຢູ່ທັງລະດັບສອງຝ່າຍ ແລະ ຫລາຍຝ່າຍ.
ກອງປະຊຸມ COP 17 ຄັ້ງນີ້ ດຳເນີນໄປໃນສະພາບພື້ນຖານເສດຖະກິດທົ່ວໂລກ ພວມຕົກໃນທ່າຊຸດໂຊມ. ບັນດາປະເທດ, ພິເສດ ແມ່ນບັນດາປະເທດໃຫຍ່ ລ້ວນແຕ່ພວມຕ້ອງສຸມໃສ່ບັນຫາເສດຖະກິດຂອງຕົນ, ຄວາມຂັດແຍ່ງກ່ຽວກັບຜົນປະໂຫຍດລະຫວ່າງບັນດາປະເທດ, ກຸ່ມປະເທດພັດທະນາ ແລະ ພວມພັດທະນາ ໄດ້ສົ່ງຜົນກະທົບເຖິງການເຈລະຈາຄັ້ງຕ່າງໆຢູ່ Durban. ດ້ວຍບົດບາດ, ທີ່ຕັ້ງຂອງປະເທດສະມາຊິກຫນຶ່ງທີ່ເຂົ້າຮ່ວມສົນທິສັນຍາແມ່ຂອງ ສປຊ ກ່ຽວກັບການປ່ຽນແປງຂອງດິນຟ້າອາກາດ, ກໍຄືຄວາມຮັບຜິດຊອບຂອງປະເທດຫນຶ່ງທີ່ຖືກຜົນສະທ້ອນຢ່າງຫນັກຫນ່ວງທີ່ສຸດ ຈາກການປ່ຽນແປງຂອງດິນຟ້າອາກາດ, ຫວຽດນາມ ເຂົ້າຮ່ວມກອງປະຊຸມຄັ້ງນີ້ ດ້ວຍຈິດໃຈອັນຕັ້ງຫນ້າ, ປະກອບສ່ວນເຂົ້າໃນບັນຫາລວມ. ຫວຽດນາມ ໄດ້ປຶກສາຫາລື ແລະ ຮັບຮອງເອົາຫລາຍບັນຫາພື້ນຖານ ແລະ ມາດຕະການຮັບມືກັບການປ່ຽນແປງຂອງດິນຟ້າອາກາດທົ່ວໂລກ, ສືບຕໍ່ສະແດງສຽງເວົ້າລວມຂອງກຸ່ມບັນດາປະເທດພວມພັດທະນາ, ປະກອບທັດສະນະເຂົ້າໃນການສ້າງໃຫ້ສົມບູນແບບເນື້ອໃນບັນດາເອກະສານກ່ຽວຂ້ອງເຖິງການປ່ຽນແປງຂອງດິນຟ້າອາກາດທົ່ວໂລກ ພ້ອມກັນນັ້ນຢັ້ງຢືນຄວາມສຳຄັນຂອງສົນທິສັນຍາກ່ຽວກັບການປ່ຽນແປງຂອງດິນຟ້າອາກາດ ກໍຄື ອະນຸສັນຍາ Kyoto. ທ່ານ ຫງວຽນຄັກຮ໋ຽວ ຮອງຫົວຫນ້າກົມອຸຕຸນິຍົມອຸທົກກະສາດ ແລະ ການປ່ຽນແປງຂອງດິນຟ້າອາກາດ, ສັງກັດກະຊວງຊັບພະຍາກອນ ແລະ ສິ່ງແວດລ້ອມ ຫວຽດນາມ ໃຫ້ຮູ້ວ່າ:
“ທັດສະນະຂອງຄະນະຜູ້ແທນຫວຽດນາມໃນກອງປະຊຸມຄັ້ງນີ້ນັ້ນແມ່ນ ພວກເຮົາຢັ້ງຢືນຄືນອະນຸສັນຍາ Kyoto ຍັງຄົງສືບຕໍ່ຮັກສາ ແລະ ແມ່ນພື້ນຖານໃນການຕ້ານການປ່ຽນແປງຂອງດິນຟ້າອາກາດທົ່ວໂລກ. ຕ້ອງເສຍເວລາ 8 ປີ, ອະນຸສັນຍາ Kyoto ຈຶ່ງໄດ້ຮັບການຮັບຮູ້ຈາກປະຊາຄົມໂລກ ແລະ ມີຜົນສັກສິດຢ່າງເປັນທາງການ, ເປັນອັນວ່າບໍ່ມີເຫດຜົນຫຍັງຢູ່ຈຸດເວລານີ້ ທີ່ອະນຸສັນຍາດັ່ງກ່າວຖືກປ່ຽນແທນ. ມາຮອດປະຈຸບັນ, ອະນຸສັນຍາ Kyoto ແມ່ນນິຕິກຳຫນຶ່ງດຽວ ກ່ຽວກັບການປ່ຽນແປງຂອງດິນຟ້າອາກາດ. ອະນຸສັນຍາກໍກ່ຽວຂ້ອງເຖິງຫລາຍບັນຫາຄື: ຖ່າຍທອດເທັກໂນໂລຊີ, ໃຫ້ຄຳໝັ້ນສັນຍາຂອງບັນດາຝ່າຍ, ການຫນູນຊ່ວຍດ້ານການເງິນ.“
5 ບັນຫາຕົ້ນຕໍໂດຍແມ່ນປະທານາທິບໍດີປະເທດເຈົ້າພາບ ອາຟຼິກາໃຕ້ ຍົກອອກທີ່ວາລະໄຂກອງປະຊຸມ ກໍ່ແມ່ນຄວາມສົນໃຈຂອງຫວຽດນາມ. ນັ້ນແມ່ນການສ້າງເອກະສານນິຕິກຳໃຫມ່ ແທນທີ່ໄລຍະ 1 ຂອງອະນຸສັນຍາ Kyoto ຊຶ່ງໝົດກຳນົດເວລາໃນປີ 2012, ກຳນົດຢ່າງຈະແຈ້ງຄວາມຮັບຜິດຊອບດ້ານການເງິນ ແລະ ພັນທະຫລຸດຜ່ອຍການປ່ອຍອາຍພິດຂອງບັນດາປະເທດພັດທະນາ ແລະ ທັງປະເທດຫາກໍ່ພົ້ນເດັ່ນຂຶ້ນ ມີປະລິມານອາຍພິດຢ່າງຫລວງຫລາຍ, ຊອກຫາກົນໄກການປະສານສົມທົບປະຕິບັດບັນດາມາດຕະການຮັບມືກັບການປ່ຽນແປງຂອງດິນຟ້າອາກາດທົ່ວໂລກ ແລະ ຮັບປະກັນການຜູກຮັດຂອງບັນດາຂໍ້ຕົກລົງດ້ວຍຫລັກການຜົນປະໂຫຍດລວມຂອງບັນດາຝ່າຍ ແລະ ປະຊາຄົມໂລກ. ທ່ານ ຫງວຽນຄັກຮ໋ຽວ ຍັງໃຫ້ຮູ້ຕື່ມອີກວ່າ: ນີ້ກໍແມ່ນບັນດາເນື້ອໃນ ຊຶ່ງທ່ານຮອງລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມ ເຈີນຮົ່ງຮ່າ, ຫົວຫນ້າຄະນະເຈລະຈາຂອງຫວຽດນາມ ທີ່ ກອງປະຊຸມ COP 17 ໄດ້ສະເຫນີໃນບົດປາໃສຂອງຕົນທີ່ກອງປະຊຸມຄັ້ງນີ້, ຜ່ານນັນ ໄດ້ຢັ້ງຢືນທັດສະນະຂອງຫວຽດນາມວ່າ:
“ເລື່ອງຫລຸດຜ່ອນປະລິມານອາຍພິດເຮືອນແກ້ວຂອງບັນດາປະເທດພັດທະນາ ແລະ ພວມພັດທະນາ ແມ່ນແຕກຕ່າງກັນ. ທີ່ກອງປະຊຸມຄັ້ງນີ້, ຫວຽດນາມ ໄດ້ ສະເຫນີວ່າ ຕ້ອງຈຳແນກການເຄື່ອນໄຫວຫລຸດຜ່ອນການປ່ອຍອາຍພິດລະຫວ່າງບັນດາ ປະເທດພັດທະນາ ແລະ ບັນດາປະເທດພວມພັດທະນາ. ບັນດາປະເທດພັດທະນາຕ້ອງມີຄຳໝັ້ນສັນຍາຫລຸດຜ່ອນການປ່ອຍອາຍພິດເຮືອນແກ້ວແບບບັງຄັບ, ໃນຂະນະນັ້ນ ບັນດາປະເທດພວມພັດທະນາ ຈະປະຕິບັດບັນດາມາດຕະການຫລຸດຜ່ອຍອາຍພິດເຮືອນແກ້ວທີ່ມີລັກສະນະສະໝັກໃຈ ແລະ ການເຄື່ອນໄຫວນີ້ຄວນມີການຫນູນຊ່ວຍຂອງບັນດາປະເທດພັດທະນາ ເພື່ອເຮັດແນວໃດໃຫ້ບັນດາປະເທດພວມພັດທະນາ ປະຕິບັດໃນສະພາບຄວນເພີ່ມທະວີການເຕີບໂຕເສດຖະກິດ, ພັດທະນາແບບຍື່ນຍົງ ແລະ ການລົບລ້າງຄວາມອຶດຫິວຫລຸດຜ່ອນຄວາມທຸກຍາກ.“
ຄວາມຈິງກ່ຽວກັບການປ່ຽນແປງຂອງດິນຟ້າອາກາດຢູ່ ຫວຽດນາມ ເປັນສິ່ງທີ່ຈະແຈ້ງ ແລະ ການຮັບມືກັບການປ່ຽນແປງຂອງດິນຟ້າອາກາດ ໄດ້ກາຍເປັນບັນຫາທີ່ມີຄວາມໝາຍເປັນຕາຍ.ໂດຍຮັບຮູ້ຢ່າງຈະແຈ້ງຈາກການປ່ຽນແປງຂອງດິນຟ້າອາກາດ, ຫວຽດນາມ ໄດ້ເຂົ້າຮ່ວມສົນທິສັນຍາແມ່ກ່ຽວກັບການປ່ຽນແປງຂອງດິນຟ້າອາກາດນັບແຕ່ປີ 1994 ແລະໃຫ້ສັດຕະຍາບັນອະນຸສັນຍາ Kyoto ປີ 2002. ໃນຫລາຍປີຜ່ານມາ, ຫວຽດນາມ ຍາມໃດກໍແມ່ນສະມາຊິກຕັ້ງຫນ້າໃນການເຄື່ອນໄຫວລວມຂອງປະຊາຄົມໂລກ, ຮ່ວມແຮງຮ່ວມໃຈຮັບມືກັບການປ່ຽນແປງຂອງດິນຟ້າອາກາດ ເພື່ອຫນ່ວຍພິພົບສີຂຽວ. ຫລຸດຜ່ອນການປ່ອຍອາຍພິດເຮືອນແກ້ວ, ສຳພັດກັບພື້ນຖານເສດຖະກິດ ຂຽວ, ຫັນປ່ຽນສູ່ຮູບແບບເສດຖະກິດຈຳກັດດີໂອຊິດ carbon ແມ່ນທິດກ້າວເດີນຂອງຫວຽດນາມປະຈຸບັນ ແລະ ໃນໄລຍະຈະມາເຖິງ. ທ່ານ ເຈີນຮົ່ງຮ່າ ຮອງລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມ ໄດ້ຢືນຢັນວ່າ:
“ທັດສະນະຂອງຫວຽດນາມ ນັ້ນແມ່ນ ຈະໃຫ້ຄຳໝັ້ນໝາຍຈະເດີນຕາມເສັ້ນທາງພັດທະນາພື້ນຖານເສດຖະກິດຂຽວ. ເພ່ືອປະຕິບັດໄດ້ ໃນໄລຍະຈະມາເຖິງ ສິ່ງນີ້ບໍ່ສາມາດປະຕິບັດພຽງຢູ່ປະເທດໃດຫນຶ່ງ ພາກພື້ນໃດຫນຶ່ງ ຫລືທະວີບໃດຫນຶ່ງໄດ້ ຫາກຄວນມີການປະສານສົມທົບ ແລະ ການຮ່ວມມືຢ່າງແຫນ້ນແຟ້ນລະຫວ່ງບັນດາ ປະຊາຊາດ. ຄຽງຂ້າງນັ້ນ ຫວຽດນາມ ຖືວ່າ ຄວນຜັນຂະຫຍາຍບັນດາກົນໄກທີ່ມີຢູ່ແລ້ວໃນປະຈຸບັນ. ນີ້ແມ່ນບັນດາບັນຫາສຳຄັນທີ່ສຸດ ຊຶ່ງກອງປະຊຸມຄັ້ງນີ້ໄດ້ເຕື້ອງເຖິງ.“
ປະຈຸບັນ, ຫວຽດນາມ ໄດ້ສ້າງໂຄງການຈຸດໝາຍແຫ່ງຊາດກ່ຽວກັບການປ່ຽນແປງຂອງດິນຟ້າອາກາດຮອດປີ 2020 ແລະ ວິໄສທັດປີ 2050, ສ້າງມາດຕະຖານກ່ຽວກັບການຮັບມືກັບການປ່ຽນແປງຂອງດິນຟ້າອາກາດ ແລະ ນ້ຳທະເລຂຶ້ນສູງ. ເພາະສະນັ້ນ, ເມື່ອເຂົ້າຮ່ວມກອງປະຊຸມຄັ້ງນີ້ ນອກຈາກບັນດາການປຶກສາຫາລືບັນຫາລວມທີ່ມີລັກສະນະຍຸດທະສາດ ແລະ ການກຳນົດທິດ, ຄະນະຜູ້ແທນຫວຽດນາມ ຍັງເຂົ້າຮ່ວມບັນດາການເຈລະຈາສອງຝ່າຍກັບຫລາຍປະເທດ ແລະ ຄູ່ຮ່ວມມື. ຜ່ານບັນດາການພົບປະສອງຝ່າຍຄັ້ງຕ່າງໆ, ຫວຽດນາມ ແລະ ບັນດາຄູ່ຮ່ວມມືຊອກໄດ້ທັດສະນະລວມ, ເພີ່ມທະວີການຮ່ວມມື ແລະ ເປັນຕົ້ນແມ່ນຊອກຫາການຫນູນຊ່ວຍເພື່ອໃຫ້ຫວຽດນາມຮັບມືກັບການປ່ຽນແປງຂອງດິນຟ້າອາກາດຢ່າງມີປະສິດທິຜົນ, ຫັນປ່ຽນສູ່ຮູບແບບ ເສດຖະເກິດຈຳກັດດິໂອຊິດ carbon, ການເຕີບໂຕຂຽວ ເພື່ອການພັດທະນາແບບຍື່ນຍົງ./.
ແອນຮ່ວຽນ