ຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ພວມໄດ້ຮັບຄວາມສົນໃຈ, ປະກອບຄຳເຫັນຈາກປະຊາຊົນ, ຖັນແຖວນັກປັນຍາຊົນ ແລະ ບັນດານັກວິທະຍາສາດຢ່າງຫຼວງຫຼາຍ. ພ້ອມກັບບັນດາເນື້ອໃນສຳຄັນກ່ຽວກັບຍຸດທະສາດພັດທະນາປະເທດຊາດ, ບັນດາແຜນນະໂຍບາຍ, ນະໂຍບາຍ, ມາດຕະການປ່ຽນແປງໃໝ່, ພັດທະນາເສດຖະກິດໄດ້ຮັບຄວາມສົນໃຈເປັນພິເສດຈາກປະຊາຊົນທຸກຊັ້ນວັນນະ.
(ພາບປະກອບ) |
ຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ບໍ່ພຽງແຕ່ຕີລາຄາອາຍຸການຂອງຄະນະບໍລິຫານສູນກາງພັກກອມມູນິດຫວຽດນາມຄັ້ງທີ 12 ໃນ 5 ປີ 2011-2015 ເທົ່ານັ້ນ, ຫາກຍັງທົບທວນຄືນ 30 ປີແຫ່ງການປ່ຽນແປງໃໝ່, ພັດທະນາເສດຖະກິດຂອງປະເທດຊາດອີກດ້ວຍ. ຫົວເລື່ອງຂອງຮ່າງເອກະສານກອງປະຊຸມໃຫຍ່ແມ່ນ “ເພີ່ມທະວີການກໍ່ສ້າງພັກໃຫ້ໂປ່ງໃສ, ໝັ້ນຄົງເຂັ້ມແຂງ; ເສີມຂະຫຍາຍກຳລັງແຮງທົ່ວປວງຊົນທັງຊາດ ແລະ ປະຊາທິປະໄຕສັງຄົມນິຍົມ; ຍູ້ແຮງກິດຈະການປ່ຽນແປງໃໝ໋ຢ່າງຮອບດ້ານ ແລະ ຄົບຊຸດ, ປົກປັກຮັກສາປະເທດໃຫ້ໝັ້ນແກ່ນ, ຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ; ກໍ່ສ້າງພື້ນຖານນຳປະເທດຊາດກາຍເປັນປະເທດອຸດສາຫະກຳຕາມທິດທັນສະໄໝໂດຍພື້ນຖານ” ໄດ້ຮັບການຕີລາຄາສູງຈາກຫາງສຽງ.
ປ່ຽນແປງໃໝ່ຮູບແບບ, ລະບອບເສດຖະກິດ
ພ້ອມກັບການຕີລາຄາບັນດາຜົນງານ ກໍຄືຍົກໃຫ້ເຫັນຄວາມຈຳກັດ, ອ່ອນດ້ອຍຂອງພື້ນຖານເສດຖະກິດ, ສັງຄົມຂອງຫວຽດນາມໃນໄລຍະ 5 ປີຜ່ານມາ, ຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມໄດ້ຊີ້ແຈ້ງເຖິງ ບັນດາວິທີການແກ້ໄຂເພື່ອພັດທະນາເສດຖະກິດຫວຽດນາມໃນໄລຍະທີ່ຈະມາເຖິງ, ພິເສດແມ່ນກຳນົດການປ່ຽນໃໝ່ຮູບແບບການເຕີບໂຕເສດຖະກິດ. ນີ້ແມ່ນເນື້ອໃນທີ່ສຳຄັນຂອງຮ່າງເອກະສານ. ກ່ຽວກັບສິ່ງນີ້, ທ່ານ ດຣ ຫງວຽນກ໋ວກຢຸງ ຜູ້ອຳນວຍການສະຖາບັນການເມືອງເຂດ 4, ສະຖາບັນການເມືອງແຫ່ງຊາດໂຮ່ຈິມິນ ໃຫ້ຮູ້ວ່າ ໃນຊຸມປີທີ່ຜ່ານມາ, ຫວຽດນາມໄດ້ນຳໃຊ້ຮູບແບບການເຕີບໂຕຕາມລວງກ້ວາງ ໂດຍອີງໃສ່ແຫຼ່ງທຶນ, ອີງໃສ່ການຂຸດຄົ້ນຊັບພະຍາກອນ ແລະ ກຳລັງແຮງງານສາມັນດ້ວຍຄ່າແຮງງານຖືກ. ຮູບແບບການເຕີບໂຕນີ້ ໄດ້ຮອດກຳນົດເວລາ, ເຮັດໃຫ້ກຳລັງໜູນຂອງການເຕີບໂຕສູນຫາຍໄປ. ເພາະສະນັ້ນ, ການກຳນົດ, ຕັ້ງບັນຫາ ແລະ ຍົກອອກວິທີການແກ້ໄຂ ກຳນົດການປ່ຽນແປງໃໝ່ຮູບແບບການເຕີບໂຕເສດຖະກິດຄືໃນຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມແມ່ນຖືກຕ້ອງຢ່າງສິ້ນເຊິ່ງ. ທ່ານ ດຣ ຫງວຽນກ໋ວກຢຸງ ຜູ້ອຳນວຍການສະຖາບັນການເມືອງເຂດ 4, ສະຖາບັນການເມືອງແຫ່ງຊາດໂຮ່ຈິມິນ ໃຫ້ຮູ້ວ່າ :
“ຮູບແບບການເຕີບໂຕເສດຖະກິດໄລຍະທີ່ຈະມາເຖິງ ແມ່ນ ຮູບແບບການເຕີບໂຕຕາມລວງເລິກ. ຂ້າພະເຈົ້າຖືວ່າ ນີ້ແມ່ນວິທີຕັ້ງບັນຫາຢ່າງຖືກຕ້ອງໃນໄລຍະນີ້ ແລະ ໄລຍະທີ່ຈະມາເຖິງ. ຮູບແບບການເຕີບໂຕຕາມລວງເລິກແມ່ນຕ້ອງສຸມໃສ່ແຮງງານທີ່ໄດ້ຮັບການບຳລຸງສ້າງ, ທາງດ້ານທັກສະ ແລະ ອຸດສາຫະກຳການຜະລິດ ແມ່ນຕ້ອງກວມອັດຕາສ່ວນໃຫຍ່ໃນການພັດທະນາຂອງປະເທດຊາດ. ເລື່ອງທີ 2 ທີ່ຂ້າພະເຈົ້າເຫັນດີເຫັນພ້ອມ ແມ່ນການຕັ້ງບັນຫາກໍ່ສ້າງ ແລະ ພັດທະນາລະບອບເສດຖະກິດຕະຫຼາດຕາມກຳນົດທິດສັງຄົມນິຍົມ. ລະບອບເສດຖະກິດນີ້, ຖ້າຫາກພວກເຮົາກໍ່ສ້າງຢ່າງຖືກຕ້ອງ, ເສີມຂະຫຍາຍຢ່າງເຕັມສ່ວນນັ້ນ, ມັນຈະກາຍເປັນກຳລັງໜູນຂອງການເຕີບໂຕ ”
ທ່ານ ດຣ ຫງວຽນກ໋ວກຢຸງ ຍັງຕີລາຄາສູງເລື່ອງ ຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ໄດ້ຕັ້ງບັນຫາກ່ຽວກັບການສ້າງເງື່ອນໄຂໃຫ້ແກ່ບັນດາເຈົ້າຂອງພື້ນຖານເສດຖະກິດເຂົ້າຮ່ວມການເຄື່ອນໄຫວໃນພື້ນຖານເສດຖະກິດຕະຫຼາດຕາມກຳນົດທິດສັງຄົມນິຍົມ. ຕາມທ່ານແລ້ວ, ສິ່ງນີ້ຈະສ້າງກຳລັງໜູນໃຫ້ແກ່ການພັດທະນາເສດຖະກິດຂອງປະເທດຊາດ.
ບັນດາມາດຕະການສ້າງບາດກ້າວບຸກທະລຸ
ຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມໄດ້ມີການສັງເກດຕີລາຄາໂດຍລະອຽດ ແຕ່ສັງເຂບກ່ຽວກັບສະພາບການເສດຖະກິດຫວຽດນາມໃນ 5 ປີ 2011-2015. ໃນສະພາບເສດຖະກິດໂລກບໍ່ສະດວກ, ການເຕີບໂຕ GDP ເຖິງວ່າບໍ່ບັນລຸຕາມຄາດໝາຍກໍຕາມ, ແຕ່ກໍມີບາດກ້າວປົວແປງດີພໍສົມຄວນໃນຊຸມປີທີ່ຜ່ານມາ. ຜົນສຳເລັດອີກອັນໜຶ່ງ, ນັ້ນແມ່ນເສດຖະກິດມະຫາພາກຂອງຫວຽດນາມເປັນປົກກະຕິກວ່າເມື່ອທຽບໃສ່ຊຸມປີກ່ອນໆ. ເລືືື່ອງຍົກອອກບັນດາເປົ້າໝາຍພັດທະນາເສດຖະກິດ, ໃນນັ້ນມີ ການເຕີບໂຕ GDP ໃຫ້ບັນລຸລະດັບ 6,5%-7%, ຄາດໝາຍລາຍຈາຍງົບປະມານເກີນດຸນ 4% ກໍແມ່ນບັນດາຕົວເລກຄາດໝາຍທີ່ແທດເໝາະກັບສະພາບຕົວຈິງຂອງພື້ນຖານເສດຖະກິດຫວຽດນາມ ແລະ ເສດຖະກິດໂລກ. ກ່ຽວກັບບັນດາວິທີການແກ້ໄຂເພື່ອສ້າງບາດກ້າວບຸກທະລຸໃນການພັດທະນາເສດຖະກິດຂອງຫວຽດນາມໃນ 5 ປີທີ່ຈະມາເຖິງ, ທ່ານຮອງສາດສະດາຈານ, ດຣ ເຈີນຮ່ວາງເງິນ ອະທິການບໍດີມະຫາວິທະຍາໄລການເງິນ - Marketing ນະຄອນໂຮ່ຈິມິນ ມີຄຳເຫັນດັ່ງນີ້:
“ ໃນຮ່າງເອກະສານ ໄດ້ຍົກອອກ 6 ເປົ້າໝາຍຈຸດສຸມ, ໃນນັ້ນໜ້າທີ່ທີ 3 ແມ່ນສຸມໃສ່ບັນດາວິທີການແກ້ໄຂເພື່ອຍົກສູງຄຸນນະພາບການເຕີບໂຕ, ສະມັດຕະພາບການອອກແຮງງານ. ຂ້າພະເຈົ້າໃສ່ໃຈກ່ຽວກັບບັນຫານີ້ໃນຮ່າງເອກະສານ, ແທນທີ່ກ່ອນນີ້ ເຄີຍມຸ່ງໄປສູ່ການສົ່ງອອກ, ກຳລັງພາຍນອກຫຼາຍກວ່ານັ້ນ, ປະຈຸບັນ ໄດ້ມີຄວາມກົມກ່ຽວລະຫວ່າງການໃຫ້ບຸລິມະສິດແກ່ຕະຫຼາດສົ່ງອອກກັບຕະຫຼາດພາຍໃນ ແລະ ການລະດົມແຫຼ່ງກຳລັງຈາກພາຍນອກ. ພວກເຮົາເອົາໃຈໃສ່ກ່ຽວກັບຕະຫຼາດພາຍໃນຫຼາຍກວ່າ. ພວກເຮົາມີຄວາມລະມັດລະວັງກວ່າໃນການສຸມກຳລັງໃຫ້ຕະຫຼາດສົ່ງອອກຫຼາຍເກີນໄປ”
ບັນດາຄຳເຫັນປະກອບ ກໍໄດ້ຕີລາຄາສູງເລື່ອງ ຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ໄດ້ຕັ້ງບັນຫາກ່ຽວກັບການຍົກສູງຄຸນະພາບແຫຼ່ງຊັບພະຍາກອນມະນຸດ ແລະ ເພີ່ມທະວີກຳລັງບົ່ມຊ້ອນດ້ານວິທະຍາສາດ, ເຕັກໂນໂລຢີ, ມີກົນໄກພິເສດສະເພາະເພື່ອພັດທະນາວິທະຍາສາດ, ເຕັກໂນໂລຢີ ແລະ ຜັນຂະຫຍາຍບັນດາໂຄງການວິທະຍາສາດ, ເຕັກໂນໂລຢີທີ່ສຳຄັນເພື່ອກໍ່ສ້າງ ແລະ ພັດທະນາເສດຖະກິດຂອງປະເທດຊາດ .