(vovworld)- ຄືດັ່ງຄຳກ່າວເຕືອນຂອງບັນດານັກໄຈ້ແຍກດ້ານການເມືອງທີ່ຍົກອອກມາກ່ອນນີ້, ບໍ່ວ່າຄຳຕັດສິນໃດຂອງສານເຮັດໃຫ້ທ່ານນາງນາຍົກລັດຖະມົນຕີໄທ ຍີ່ງຣັກ ຊີນະວັດ ຕ້ອງລາອອກຈາກຕຳແຫນ່ງ ກໍ່ຈະເກີດຄວາມເຄັ່ງຕຶງ ແລະ ຄວາມຂາດສະຖຽນລະພາບດ້ານເມືອງຢູ່ໄທ . ຄວາມຈິງ ໃນຊຸມມື້ມໍ່ໆມານີ້, ສະພາບການຢູ່ ໄທໄດ້ສະແດງໃຫ້ເຫັນສິ່ງດັ່ງກ່າວ. ການປະທະກັນເກີດຂຶ້ນພວມເຮັດໃຫ້ສະພາບການເມືອງໄທສັບສົນ, ນາບຂູ່ທຳລາຍການເລືອກຕັ້ງໃນທົ່ວປະເທດ ຊື່ງຄາດວ່າຈະຈັດຂຶ້ນໃນວັນທີ 20/7 ຈະມາເຖິງ.
ສະພາບການເຄັ່ງຕຶງຢູ່ໄທ
ພາບ: internet
|
ການປະທະກັນເກີດຂຶ້ນ
ການກະທຳທີ່ໄດ້ຮັບຖືວ່າ“ເຮັດໃຫ້ຄວາມເຄັ່ງຕຶງຂຶ້ນຕື່ມ”, ວັນທີ15/5, ສານລັດຖະທຳມະນູນໄທ ໄດ້ໃຫ້ສັດຕະຍາບັນໝາຍຈັບການນຳ ຕື່ມອີກ 30 ຄົນ ທີ່ຂຶ້ນກັບກຳລັງແຫ່ຂະບວນປະທ້ວງຕ້ານລັດຖະບານ ຫລືເອີ້ນວ່າ ຄະນະກຳມະການປະຕິຮູບປະຊາທິປະໄຕປະຊາຊົນ(PDRC) ຍ້ອນຖືກກ່າວຫາວ່າ ປຸກປັ່ນຍຸ້ແຍ່ປະຊາຊົນກໍ່ຄວາມວຸ້ນວາຍ. ໃນທັນທີ່, ການນຳ PDRC ສຸເທບ ເທືອກສຸບັນ ໄດ້ຖະແຫລງວ່າ ໃນວັນທີ 16/5, ຖ້າຫາກສະພາສູງ ໄທ ບໍ່ແຕ່ງຕັ້ງລັດຖະບານຊົ່ວຄາວແທນໃຫ້ອຳນາດການປົກຄອງປະຈຸບັນ, ກຳລັງ PDRC ຈະຍາດສິດອຳນາດ ແລະ ສ້າງຕັ້ງສະພາປະຊາຊົນ ເພື່ອບໍລິຫານປະເທດຊາດ.
ກ່ອນຫນ້ານັ້ນ, ຜູ້ແຫ່ຂະບວນປະທ້ວງນັບຮອ້ຍໆຄົນ ໄດ້ປິດລ້ອມຖານທີ່ໝັ້ນກອງທັບອາກາດແຫ່ງຫນຶ່ງຊື່ງແມ່ນບ່ອນທ່ານ ນີວັດທຳຣົງ ບຸນຊົງໄພສານ, ຜູ້ຮັກສາການນາຍົກລັດຖະມົນຕີ ພວມປະຊຸມ, ເຮັດໃຫ້ທ່ານຕ້ອງອອກຈາກກອງປະຊຸມ. ເຫດການບຸກໂຈມຕີດ້ວຍປືນ ແລະ ໝາກແຕກໄດ້ເກີດຂຶ້ນລະຫວ່າງກຳລັງສະຫນັບສະຫນູນ ແລະ ກຳລັງຄັດຄ້ານລັດຖະບານ ຊື່ງເຮັດໃຫ້ 3 ຄົນເສຍຊີວິດ ແລະ 22 ຄົນຖືກບາດເຈັບ. ຕໍ່ຫນ້າສະພາບການດັ່ງກ່າວ, ທ່ານພຸຈົງ ນຸຈາວົງ, ເລຂາທິການໃຫຍ່ຄະນະກຳມະການເລືອກຕັ້ງໄທ (EC) ໄດ້ຮຽກຮ້ອງໂຈະການເລືອກຕັ້ງໃນທ່ົວປະເທດໃນວັນທີ 20/7 ຈະມາເຖິງ.
ຄວາມບໍ່ລົງລອຍກັນ ແລະ ການແບ່ງແຍກ
ເນື້ອແທ້ຂອງບັນຫານັ້ນແມ່ນ ໃນຂະນະທີ່ລັດຖະບານຊົ່ວຄາວ ຖະແຫລງວ່າ ການເລືອກຕັ້ງທົ່ວປະເທດ ຈະແມ່ນວິທີດີສຸດເພື່ອແກ້ໄຂວິກິດການ, ຫລິກລ້ຽງເສີກກາງເມືອງ, ກຳລັງ PDRC ໂດຍ ອະດີດຮອງນາຍົກລັດຖະມົນຕີ ສຸເທບ ເທືອກສຸບັນ ນຳຫນ້າ ພັດເດັດດ່ຽວຮຽກຮ້ອງຕ້ອງປົດຕຳແຫນ່ງສະມາຊິກລັດຖະບານທັງໝົດ ແລະ ຖືວ່າ: ອຳນາດການປົກຄອງຂອງພັກເພື່ອໄທ ຂາດຄວາມຖືກຕ້ອງກັບກົດໝາຍ ແລະ ຮຽກຮ້ອງແຕ່ງຕັ້ງນາຍົກລັດຖະມົນຕີຄົນໃຫມ່ ບໍ່ຜ່ານການເລືອກຕັ້ງ.
ເຖິງວ່າ ໄດ້ຍອມຮັບເລື່ອງນາຍົກລັດຖະມົນຕີຊົ່ວຄາວ ທ່ານນາງ ຍີ່ງຣັກ ຊີນະວັດ ຖືກສານລັດຖະທຳມະນູນ ພົ້ນຕຳແຫນ່ງ ແມ່ນບາດກ້າວໄຊຊະນະນທຳອິດ ໃນແຜນການລົບລ້າງອັນທີ່ເອີ້ນວ່າ“ລະບອບ ທັກສິນ” ໃນເວທີການເມືອງໄທ ກໍຕາມ, ແຕ່ສຳລັບກຳລັງແຫ່ຂະບວນປະທ້ວງຄັດຄ້ານລັດຖະບານ ສິ່ງນັ້ນບໍ່ທັນພຽງພໍ, ຍ້ອນພັກເພື່ອໄທ ຂອງທ່ານນາງ ຍິ່ງຣັກ ຊີນະວັດ ປະຈຸບັນພວມບໍລິຫານລັດຖະບານຊົ່ວຄາວ ແລະ ສືບຕໍ່ຜັນຂະຫຍາຍແຜນການຈັດຕັ້ງການເລືອກຕັ້ງໃນວັນທີ 20/7 ຈະມາເຖິງ.
ໃນຂະນະນັ້ນ, ບັນດາຜູ້ສະຫນັບສະຫນູນ ລັດຖະບານ ໄດ້ກ່າວຫາວ່າ: ປະຈຸບັນ ກຳລັງຕ້ານລັດຖະບານ ໂດຍອະດີດຮອງນາຍົກລັດຖະມົນຕີ ສຸເທບ ເທືອກສຸບັນ ນຳຫນ້າ ພ້ອມດ້ວຍພັກການເມືອງອື່ນຈຳນວນຫນຶ່ງແລະ ອົງການຈັດຕັ້ງເອກະລາດ ພວມມີກົນອຸບາຍລົບລ້າງລະບອບປະຊາທິປະໄຕ, ຕ້ານ, ທຳລາຍການເລືອກຕັ້ງ. ພັກເພື່ອໄທ ໄດ້ກ່າວຫາວິທີ ຊື່ງກຳລັງນີ້ດຳເນີນໃນຫລາຍປີມານີ້ ແມ່ນໃຊ້ທຸກເລລ່ຽມເພື່ອລົບລ້າງບັນດາພັກການເມືອງກ່ອນນີ້ ຄືພັກໄທຣັກໄທ, ພະລັງປະຊາຊົນ ແລະ ປະຈຸບັນແມ່ນພັກເພື່ອໄທ ດ້ວຍຈຸດສຸມແນໃສ່ບັນດານາຍົກລັດຖະມົນຕີຂອງ 3 ພັກນີ້. ຈຸດໝາຍສຸດທ້າຍ ແມ່ນສະກັດກັ້ນບັນດາການເລືອກຕັ້ງ ແນໃສ່ຊອກຫາກາລະໂອກາດເພື່ອແຕ່ງຕັ້ງນາຍົກລັດຖະມົນຄີ ຄົນໃຫມ່ ໂດຍບໍ່ຜ່ານການເລືອກຕັ້ງ.
ບັນດາຄຳກ່າວຫາຂອງພັກເພື່ອໄທ ໄດ້ຮັບການສະຫນັບສະຫນູນຂອງແນວມໂຮມປະຊາທິປະໄຕຕ້ານພະເດັດການ(UDD ຫລືເອີ້ນວ່າຝ່າຍເສື້ອແດງ), ຜູ້ສະຫນັບສະຫນູນທ່ານທັກສິນ ໃນເວລາເກືອບ 10 ປີຜ່ານມາ. ພາຍຫລັງທ່ານນາງ ຍິ່ງຣັກ ຊີນະວັດ ຖືກພົ້ນຕຳແຫນ່ງ, ກຳລັງນີ້ໄດ້ຖະແຫລງບໍ່ປະຕິບັດຕາມຄຳຕັດສິນຂອງສານລັດຖະທຳມະນູນ ແລະ ພາກັນໄປເຖິງ ບາງກອກ ເພື່ອຄັດຄ້ານ. ເປັນຫນ້າວິຕົກກັງວົນ, ມີອົງການຈັດຕັ້ງສັງຄົມຈຳນວນຫນຶ່ງ ຢູ່ ພາກອີສານຂອງໄທ, ຊື່ງແມ່ນສະຖານທີ່ໄດ້ຂະຫນານນາມວ່າ ແມ່ນຖານທີ່ໝັ້ນ ຂອງຝ່າຍເສື້ອແດງ ກໍສະແດງທ່າທີ່ແຂງກະດ້າງ ແລະ ນາບຂູ່ ສົ່ງກຳລັງເຖິງ ບາງກອກ ເພື່ອດຳເນີນການສູ້ຮົບສຸດທ້າຍ.
ວິກິດການໃຫມ່, ແຜນການເກົ່າ
ການເລືອກຕັ້ງທົ່ວປະເທດ ເຖິງວ່າຖືກຈັດຂຶ້ນໃນວັນທີ 20/7 ຈະມາເຖິງ ຫລືໃນຈຸດເວລາໃດກໍຕາມ ຍາກທີ່ຈະດຳເນີນໄດ້ ເມື່ອກຳລັງແຫ່ຂະບວນປະທ້ວງຕ້ານລັດຖະບານ ໄດ້ຖະແຫລງວ່າ ຈະສະກັດກັ້ນບໍ່ວ່າການເລືອກຕັ້ງຄັ້ງໃດ.
ຈາກການຜັນແປໃນປະຈຸບັນໄດ້ສະແດງໃຫ້ເຫັນວ່າ ສະພາບການຢູ່ໄທ ສືບຕໍ່ເກີດຄວາມສັບສົນ, ຍາກທີ່ຄາດຄະເນໄດ້ ແລະ ເພີ່ມຄວາມເຄັ່ງຕຶງ ຖ້າຫາກບັນດາຝ່າຍບໍ່ລະງັບໃຈຢ່າງສູງສຸດ. ຄວາມເຄ່ັງຕຶງເພີ່ມຂຶ້ນ ອາດຈະເກີດມາຈາກການປະທະກັນລະຫວ່າງ 2 ກຳລັງແຫ່ຂະບວນປະທ້ວງທີ່ມີທັດສະນະບໍ່ຄືກັນພາໃຫ້ເກີດການປະທະກັນ, ແລະ ອາດຈະເກີດເສີກກາງເມືອງ. ຈຸດເວລານີ້ ບໍ່ທັນເຜີຍມາດຕະການໃດເພື່ອແກ້ໄຂສະພາບຄວາມເຄັ່ງຕຶງຢູ່ໄທ. ວົງການນັກໄຈ້ແຍກມີຄວາມວິຕົກກັງວົນວ່າ: ກອງທັບອາດຈະເຂົ້າຮ່ວມ ເມື່ອວັນທີ 15/5, ຜູ້ບັນຊາການທະຫານບົກໄທ ໄດ້ກ່າວເຕືອນວ່າ: ຖ້າຫາກການໃຊ້ຄວາມຮຸນແຮງສືບຕໍ່ເກີດຂຶ້ນ, ກອງທັບອາດຈະເຂົ້າຮ່ວມ ເພື່ອຟື້ນຟຸູສັນຕິພາບ ແລະ ຄວາມເປັນລະບຽບຮຽບຮ້ອຍ. ກອງທັບອາດຈະນຳໃຊ້ກຳລັງອາວຸດ ເພື່ອແກ້ໄຂສະພາບການ. ຖ້າຫາກຄືແນວນັ້ນ, ພື້ນຖານດ້ານການເມືອງໄທ ຄາດວ່າຈະຖືກປະເຊີນຫນ້າກັບສະພາບຂາດສະຖຽນລະພາບຢ່າງເລິກເຊິ່ງ, ສົ່ງຜົນກະທົບຢ່າງຫຍໍ້ທໍ້ເຖິງການພັດທະນາເສດຖະກິດສັງຄົມຢູ່ໄທ.