(vovworld)- ປີ 2016, ສືບຕໍ່ປະຕິບັດແຜນນະໂຍບາຍເຊື່ອມໂຍງຢ່າງຮອບດ້ານ, ຂະແໜງການທູດຫວຽດນາມ ໄດ້ເສີມຂະຫຍາຍບັນດາຜົນງານທີ່ບັນລຸໄດ້, ພ້ອມກັບປະເທດຊາດ, ຍົກສູງທີ່ຕັ້ງບົດບາດຂອງຊາດໃນເວທີສາກົນ, ຊຸກຍູ້ ແລະ ຮັກສາສັນຕິພາບ, ສະຖຽນລະພາບເພື່ອຮັບໃຊ້ຈຸດໝາຍພັດທະນາເສດຖະກິດປະເທດຊາດ. ປີ 2016 ໝັ້ນໝາຍຈະສ້າງໄດ້ບັນດາຂີດໝາຍໃຫມ່ໃຫ້ແກ່ຂະແໜງການທູດຫວຽດນາມ.
ທ່ານເລຂາທິການໃຫຍ່ຫງວຽນຟູຈ້ອງ ພົບປະກັບ ທ່ານປະທານາທິບໍດີ
ອາເມລິກາ Brack Obamaໃນໂອກາດໄປຢ້ຽມຢາມອາເມລິກາ
ພາບ: TTXVN
|
ສະພາບການໂລກ ແລະ ພາກພື້ນພວມຜັນແປໄປຢ່າງບໍ່ຢຸດຢັ້ງ, ນຳມາເຊິ່ງກາລະໂອກາດ ແລະ ສິ່ງທ້າທາຍຫລາຍຢ່າງໃຫ້ແກ່ຫວຽດນາມ. 3 ຫນ້າທີ່ການທູດສຳຄັນທີ່ສຸດໃນໄລຍະປະຈຸບັນ ນັ້ນແມ່ນຮັກສາສະພາບແວດລ້ອມສັນຕິພາບ, ສະຖຽນລະພາບ, ປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດ, ປົກປັກຮັກສາລະບອບ. ເພື່ອປະຕິບັດຫນ້າທີ່ອັນໃຫຍ່ຫລວງນັ້ນ, ປີ 2016, ຂະແໜງການທູດມານະພະຍາຍາມປ່ຽນໃຫມ່, ຮັບມືກັບສະພາບການໂລກທີ່ພວມມີການປ່ຽນແປງຢ່າງບໍ່ຢຸດຢັ້ງ.
ປີ 2015 ແມ່ນປີສຳເລັດຜົນຂອງຂະແໜງການທູດຫວຽດນາມ
ປີ 2015, ບັນດາການເຄື່ອນໄຫວດ້ານການທູດມີຄວາມຟົດຟື້ນ ແລະ ມີປະສິດທິຜົນໃນທຸກດ້ານ ເຊິ່ງໄດ້ປະກອບສ່ວນປັບປຸງການພົວພັນສອງຝ່າຍລະຫວ່າງຫວຽດນາມ ກັບປະເທດຕ່າງໆ, ຊຸກຍູ້ການເຊື່ອມໂຍງເຂົ້າກັບສາກົນຢ່າງເລິກເຊິ່ງ ແລະ ກວ້າງຂວາງໃນທຸກຂົງເຂດ, ປະກອບສ່ວນຍົກສູງທີ່ຕັ້ງຂອງຫວຽດນາມໃນພາກພື້ນ ແລະ ໃນເວທີສາກົນ. ປີ 2015, ການພົວພັນການຕ່າງປະເທດຂອງພັກໄດ້ສ້າງຂີດໝາຍດ້ວຍການຢ້ຽມຢາມບັນດາປະເທດຄື ອາເມລິກາ, ຈີນ ແລະ ຍີ່ປຸ່ນ ຂອງທ່ານເລຂາທິການໃຫຍ່ ຫງວຽນຟູຈ້ອງ. ພ້ອມກັນນັ້ນ ຫວຽດນາມ ກໍໄດ້ຕ້ອນຮັບການນຳຫລາຍປະເທດໃຫຍ່ອີກ. ປີ 2015 ກໍແມ່ນປີທີ່ເສດຖະກິດການຕ່າງປະເທດຂອງຫວຽດນາມບັນລະຜົນສຳເລັດ, ເມື່ອຫວຽດນາມລົງນາມຫລືສິ້ນສຸດການເຈລະຈາ 15 ສັນຍາການຄ້າເສລີ, ໃນນັ້ນ ມີ 2 ສັນຍາສຳຄັນ ນັ້ນແມ່ນ ສັນຍາຄູ່ຮ່ວມມື, ຮ່ວມມືເສດຖະກິດຂ້າມປາຊີຟີກ TPP ແລະ ສັນຍາການຄ້າເສລີ FTA ກັບສະຫະພາບເອີລົບ. ພ້ອມກັນນັ້ນ ການພົວພັນການຕ່າງປະເທດດ້ານວັດທະນະທຳປີ 2015 ໄດ້ປະກອບສ່ວນໂຄສະນາພາບພົດ ແລະ ມູນເຊື້ອວັດທະນະທຳ ຫວຽດນາມ, ຍົກສູງຄວາມເຂົ້າໃຈ, ຄວາມຮັກແພງຂອງເພື່ອນມິດສາກົນ.
ກຳແຫນ້ນກາລະໂອກາດ, ແກ້ໄຂສິ່ງທ້າທາຍ
ປີ 2016 ແມ່ນປີທຳອິດທີ່ປະຊາຄົມເສດຖະກິດອາຊຽນໄດ້ຮັບການສ້າງຕັ້ງ ແລະ ເຂົ້າສູ່ຊີວິດຕົວຈິງ, ທັງແມ່ນປີທີ່ສັນຍາການຄ້າເສລີສອງຝ່າຍຫລາຍສະບັບ ທີ່ຫວຽດນາມ ໄດ້ລົງນາມ ມີຜົນສັກສິດ. ສິ່ງທ້າທາຍ ແລະ ກາລະໂອກາດ ຍາມໃດກໍຊ້ອນແຝງກັນ. ເຮັດແນວໃດເພື່ອໃຫ້ປະເທດຊາດມີຜົນປະໂຫຍດທີ່ສຸດໃນຍຸດທະສາດຢູ່ພາກພື້ນ ແລະ ບົນເວທີສາກົນ ນັ້ນແມ່ນສິ່ງທີ່ບັນດາຜູ້ເຮັດວຽກງານການທູດຍາມໃດກໍເປັນຫ່ວງກັງວົນ. ທ່ານຮອງນາຍົກລັດຖະມົນຕີ, ທັງເປັນລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມບິ່ງມິງ, ເນັ້ນຫນັກວ່າ:
“ພວກເຮົາສືບຕໍ່ແຜນນະໂຍບາຍເພີ່ມທະວີ, ຊຸກຍູ້ການພົວພັນດ້ານການເມືອງ ສ້າງພື້ນຖານເພື່ອຊຸກຍູ້ການພັດທະນາເສດຖະກິດ, ການຄ້າ, ສົ່ງເສີມການລົງທຶນຕ່າງປະເທດເຂົ້າຫວຽດນາມ. ຂົນຂວາຍບັນດາແຫລ່ງທຶນ ODA ເຂົ້າຫວຽດນາມ ກໍຄືຊຸກຍູ້ບັນດາປະເທດເປີດກວ້າງຕະຫລາດເພື່ອໃຫ້ບັນດາວິສາຫະກິດຫວຽດນາມສົ່ງອອກສິນຄ້າ. ຄຽງຄູ່ກັນນັ້ນ ການທູດກໍໄດ້ຫນູນຊ່ວຍບັນດາວິສາຫະກິດເປີດກວ້າງກາລະໂອກາດກັບບັນດາຄູ່ຮ່ວມມື, ເພື່ອໃຫ້ວິສາຫະກິດ ແລະ ປະຊາຊົນສະຜັດກັບປະຊາຄົມເສດຖະກິດ ອາຊຽໃນປີນີ້.”
ອາດຈະເຫັນໄດ້ວ່າ ພວກເຮົາພວມດຳລົງຊີວິດໃນໂລກມີສັນຕິພາບ ແຕ່ບໍ່ມີຄວາມສະຫງົບສຸກ. ສັນຕິພາບ ແລະ ການຮ່ວມມື ຍັງຄົງແມ່ນທ່າອ່ຽງຕົ້ນຕໍ, ແຕ່ບັນດາປັດໄຈຂາດສະຖຽນລະພາບ, ຊ້ຳບໍ່ຫນຳຄວາມສ່ຽງເກີດການປະທະກັນພາຍໃນນັບມື້ນັບຫລາຍ. ພິເສດ ສະພາບການຢູ່ທະເລຕາເວັນອອກພວມ ຜັນແປໄປຢ່າງສັບສົນ, ບັນດາໄພນາບຂູ່ເຖິງຄວາມສະຫງົບປອດໄພ, ອະທິປະໄຕຢູ່ເຂດທະເລໝູ່ເກາະຂອງປະເທດຊາດນັບມື້ນັບຂ່ຽວຂາດ. ໃນສະພາບການນັ້ນ ການຕ່າງປະເທດສືບຕໍ່ແມ່ນກຳລັງປະຈັນບານໃນແນວຮົບຕໍ່ສູ້ປົກປັກຮັກສາອະທິປະໄຕ, ໃນນັ້ນ ການຕ່າງປະເທດປະຊາຊົນເສີມຂະຫຍານທ່າໄດ້ປຽບຂອງຕົນ. ທ່ານ ຫວູຊວນຮົ່ງ ປະທານສະຫະພັນບັນດາອົງການຈັດຕັ້ງມິດຕະພາບ ຖືວ່າ:
ທ່ານນາຍົກລັດຖະມົນຕີຫງວຽນເຕີນຢູງ ແລະ ນາຍົກລັດຖະມົນຕີ ຍີ່ປຸ່ນ Shinzo Abe
|
“ໃນສະພາບການໃຫມ່ ຕໍ່ຫນ້າໜ້າທີ່ປົກປັກຮັກສາປະເທດຊາດ ແລະ ຕໍ່ສູ້ປົກປັກຮັກສາອະທິປະໄຕເຂດທະເລໝູ່ເກາະ, ພວກເຮົາໄດ້ຂົນຂວາຍສາກົນດ້ວຍການແບ່ງປັນຂໍ້ມູນຂ່າວກັບເພື່ອນມິດສາກົນ. ໃນບໍ່ວ່າເຫດການຢູ່ທະເລຕາເວັນອອກໃດ, ພວກເຮົາກໍ່ລ້ວນແຕ່ໄດ້ຮັບການສະຫນັບສະຫນູນຢ່າງຕັ້ງຫນ້າ, ແລະທັດສະນະຢ່າງແຮງຈາກຫລາຍອົງການ, ສ່ວນບຸກຄົນ ສິ່ງດັ່ງກາວໄດ້ກາຍເປັນກຳລັງດັນຕໍ່ສາກົນ. ຍາມໃດກໍຖືຜົນປະໂຫຍດແຫ່ງຊາດ, ຜົນປະໂຫຍດຂອງຊາດເປັນສິ່ງສຳຄັນກວ່າໝູ່. ເອກະລາດ, ເສລິພາບ, ອະທິປະໄຕ ຜືນແຜ່ນດິນ ແມ່ນຜົນປະໂຫຍດທີ່ມີລັກສະນະເປັນຕາຍຂອງປະເທດຊາດ.”
ຄວາມມີໄຫວພິກ, ຫົວຄິດປະດິດສ້າງ, ຍົກສູງທີ່ຕັ້ງບົດບາດຂອງປະເທດຊາດ
ພາຍຫລັງ ທີ່ຫວຽດນາມເຂົ້າເປັນສະມາຊິກອາຊຽນ20 ປີ, ພ້ອມກັບ 9 ປະເທດສະມາຊິກອາຊຽນອື່ນ, ຫວຽດນາມ ໄດ້ລົງນາມໃນເອກະສານປະຫວັດສາດ ນັ້ນແມ່ນຖະແຫລງການສ້າງຕັ້ງປະຊາຄົມອາຊຽນ ເມື່ອວັນທີ 31/12/2015. ນີ້ແມ່ນໄຊຊະນະໃຫຍ່ຂອງປະຊາຊົນບັນດາປະເທດ ອາຊີຕາເວັນອອກສ່ຽງໃຕ້, ຕັດສິນໃຈຮຽງບ່າຮຽງໄລ່ນຳກັນ ເພື່ອອະນາຄົດອັນສົດໃສຂອງພົນລະເມືອງກວ່າ 600 ລ້ານຄົນຢູ່ພາກພື້ນນີ້. ສຳລັບຫວຽດນາມ, ອາຊຽນ ຍາມໃດກໍມີທີ່ຕັ້ງສຳຄັນອັນດັບຫນຶ່ງໃນນະໂຍບາຍການຕ່າງປະເທດ. ຫວຽດນາມ ຍາມໃດກໍສະແດງໃຫ້ເຫັນເຈດຕະນາດີ ແລະ ປາດຖະຫນາຢາກປະກອບສ່ວນຫລາຍກວ່າໃນອາຊຽນ, ເພື່ອພາກພື້ນ ອາຊີຕາເວັນອອກສ່ຽງໃຕ້ແຫ່ງສັນຕິພາບ ແລະ ວັດທະນາຖາວອນ. ທ່ານ ຫວູຊວນຮົ່ງ ປະທານສະຫະພັນບັນດາອົງການຈັດຕັ້ງມິດຕະພາບ ຢືນຢັນວ່າ:
“ການຕ່າງປະເທດສືບຕໍ່ມີບັນດາການປະກອບສ່ວນສຳຄັນໃນເລື່ອງ ຫວຽດນາມເຂົ້າຮ່ວມ, ກໍ່ສ້າງ, ພັດທະນາພ້ອມກັບປະຊາຄົມອາຊຽນ. ທັງຕັ້ງຫນ້າເຂົ້າຮ່ວມພ້ອມກັບບັນດາອົງການຈັດຕັ້ງມະຫາຊົນໃໃນວິວັດແຫ່ງການພັດທະນາຂອງປະຊາຄົມນີ້, ຕໍ່ສູ້ກັບບັນດາທັດສະນະ, ຈຸດປະສົງ, ກົນອຸບາຍແບ່ງແຍກບັນດາປະເທດ ອາຊຽນ, ແບ່ງແຍກປະຊາຊົນບັນດາປະເທດໃນພາກພື້ນຂອງບັນດາກຳລັງທີ່ດເປັນປໍລະປັກ. ດ້ານອື່ນ ໂຄສະນາເຜີຍແຜ່ຂໍ້ມູນຂ່າວກ່ຽວກັບປະຊາຄົມເຖິງປະຊາຊົນພາຍໃນປະເທດ, ວິສາຫະກິດ, ປະຊາຊົນທຸກຊັ້ນວັນນະ, ບັນດາວົງການ, ເພື່ອໃຫ້ແຕ່ລະກະຊວງ, ຂະແຫນງການ, ແຕ່ລະຄົນກະກຽມຈິດໃຈເຂົ້າຮ່ວມຢ່າງເໝາະສົມທີ່ສຸດໃນປະຊາຄົມ ອາຊຽນ.”
ປີ 2016 ຂະແໜງການທູດຫວຽດນາມ ສືບຕໍ່ຜັນຂະຫຍາຍແນວທາງການຕ່າງປະເທດຂອງກອງປະຊຸມໃຫຍ່ຄັ້ງທີ 12 ຂອງພັກ, ສືບຕໍ່ເຊື່ອມໂຍງເຂົ້າກັບສາກົນຢ່າງຮອບດ້ານ. ການຕ່າງປະເທດບໍ່ພຽງແຕ່ປະກອບສ່ວນສ້າງສະພາບແວດລ້ອມສັນຕິພາບ, ສະຖຽນລະພາບ ເພື່ອສ້າງສາ ແລະ ພັດທະນາປະເທດຊາດເທົ່ານັ້ນ, ຫາກຍັງຕັດສິນໃຈຢັ້ງຢືນວ່າຫວຽດນາມ ມີບົດບາດໃຫຍ່ກວ່າໃນບັນດາບັນຫາທົ່ວໂລກ.