(vovworld)- ວັນທີ 26/12, ທ່ານນາຍົກລັດຖະມົນຕີລາຊະອານາຈັກກຳປູເຈຍ Samdech Hunsen ແລະ ພັນລະຍາໄດ້ເລີ່ມເດີນທາງມາຢ້ຽມຢາມຫວຽດນາມ ຢ່າງເປັນທາງການໃນເວລາ 3 ວັນຕາມຄຳເຊີນຂອງທ່ານນາຍົກລັດຖະມົນຕີຫງວຽນເຕິນຢຸງ. ເລື່ອງເລືອກຫວຽດນາມ ເປັນປະເທດທຳອິດໃນການຢ້ຽມຢາມຕ່າງປະເທດພາຍຫຼັງໄດ້ຮັບການເລືອກຕັ້ງເປັນທ່ານ ນາຍົກລັດຖະມົນຕີລາຊະອານາຈັກກຳປູເຈຍ ຄືນໃໝ່ນັ້ນສະແດງໃຫ້ເຫັນວ່າ: ລັດຖະບານກຳປູເຈຍ ຖືການພົວພັນກັບຫວຽດນາມ ເປັນສຳຄັນ. ການຢ້ຽມຢາມກໍ່ຢັ້ງຢືນຄວາມຕັດສິນໃຈຂອງການນຳສອງປະເທດແມ່ນເພີ່ມທະວີ ແລະ ເປີກດ້ວາງການພົວພັນຖານບ້ານໃກ້ເຮືອນຄຽງອັນດີງາມ, ນ້ຳໃຈມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງຫວຽດນາມ-ກຳປູເຈຍ.
ທ່ານນາຍົກລັດຖະມົນຕີກຳປູເຈຍ Samdech Hunsen
(ພາບ: tienphong.vn )
ການພົວພັນຫວຽດນາມ-ກຳປູເຈຍ ໄດ້ມີມາແຕ່ດົນນານ, ຄວານໃກ້ຊິດຕິດພັນດ້ານພູມສາດພ້ອມກັບຈຸດຄ້າຍຄືກັນດ້ານວັດທະນະທຳ ແລະ ຜົນປະໂຫຍດລວມ ແມ່ນປັດໄຈສ້າງເປັນສາຍພົວພັນຮ່ວມມືອັນເລິກເຊິ່ງກ້ວາງຂວາງລະຫວ່າງສອງປະເທດ. ໃນໄລຍະປະຈຸບັນ, ຫວຽດນາມ ແລະ ກຳປູເຈຍ ລ້ວນແຕ່ປະຕິບັດນະໂຍບາຍການຕ່າງປະເທດເປີດກ້ວາງ, ຫັນບັນດາການພົວພັນກັບສາກົນເປັນຫຼາຍຮູບຫຼາຍແບບ, ຫຼາຍຝ່າຍ, ແລະ ຖືການປັບປຸງ, ເພີ່ມທະວີການພົວພັນສາມັກຄີມິດຕະພາບ, ການຮ່ວມມືຮອບດ້ານລະຫວ່າງສອງປະເທດເປັນສຳຄັນທີ່ສຸດ.
ຊຸກຍູ້ການພົວພັນຄູ່ຮ່ວມມືຮອບດ້ານ
ໃນຊຸມປີຜ່ານມາ, ການພົວພັນສາມັກຄີມິດຕະພາບ, ການຮ່ວມມືຮອບດ້ານລະຫວ່າງສອງປະເທດ ຫວຽດນາມ-ກຳປູເຈຍ ມີບາດກ້າວພັດທະນາອັນຈົບງາມທັງລວງກ້ວາງ ແລະ ລວງເລິກ, ກາຍເປັນປັດໄຈສຳຄັນ, ປະກອບສ່ວນສ້າງສະພາບແວດລ້ອມແຫ່ງສັນຕິພາບ, ສະຖຽນລະພາບຍາວນານເພື່ອຍູ້ແຮງການພັດທະນາເສດຖະກິດ-ສັງຄົມ, ຮັບປະກັນຄວາມເປັນເອກະລາດ, ອະທິປະໄຕຂອງແຕ່ລະປະເທດ. ມາຮອດປະຈຸບັນ, ສອງປະເທດໄດ້ກຳນົດຂອບເຂດການພົວພັນຮ່ວມມື “ບ້ານໃກ້ເຮືອນຄຽງອັນດີງາມ, ນ້ຳໃຈມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງຍາວນານ“, ໄດ້ເຊັນເອກະສານນິຕິກຳກ່ວາ 80 ສະບັບກ່ຽວກັບການຮ່ວມມືສອງຝ່າຍໃນຂົງເຂດຕ່າງໆເກືອບທັງໝົດ, ພ້ອມກັນນັ້ນໄດ້ສ້າງບັນດາກົນໄກສົມທົບກັນທີ່ຈຳເປັນ, ສອດຄ່ອງກັບຄວາມຮຽກຮ້ອງພັດທະນາຂອງການພົວພັນສາມັກຄີມິດຕະພາບ, ການຮ່ວມມືຮອບດ້ານລະຫວ່າງສອງປະເທດ. ທ່ານຟ້າມບິງມິງ, ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ໃຫ້ຂໍ້ສອງເກດວ່າ:
“ຍາມໃດສາຍພົວພັນມິດຕະພາບຖານບ້ານໃກ້ເຮືອນຄຽງລະຫວ່າງສອງປະເທດກໍ່ໄດ້ຮັບການພັດທະນາຢ່າງແຮງ ຊື່ງສະແດງໃຫ້ເຫັນຜ່ານການແລກປ່ຽນການນຳຂັ້ນສູງສອງປະເທດເປັນປະຈຳ, ສ້າງປະຖົມປັດໄຈໃຫ້ແກ່ການພັດທະນາລະຫວ່າງບັນດາທ້ອງຖິ່ນ, ບັນດາກະຊວງ, ຂະແໜງການ. ພິເສດແມ່ນການພົບປະແລກປ່ຽນ ປຊຊ, ຄວາມຮັກແພງຊ່ວຍເຫຼືອຊື່ງກັນ ແລະ ກັນລະຫວ່າງ ປຊຊ ຢູ່ລຽບຕາມເຂດຊາຍແດນໄດ້ດຳເນີນເປັນປະຈຳ ແລະ ສະໜິດຕິດພັນຍິ່ງກ່ວາເວລາໃດໝົດ“
(ພາບປະກອບ: anninhthudo.vn)
ການຮ່ວມມືດ້ານເສດຖະກິດ, ການຄ້າ ແລະ ການລົງທຶນລະຫວ່າງ ຫວຽດນາມ-ກຳປູເຈຍ ສືບຕໍ່ພັດທະນາຢ່າງໄວວາ. ປີ 2012, ວົງເງິນການຄ້າສອງສົ້ນບັນລຸ 3,3 ຕື້ໂດລາສະຫະລັດ (ເພີ່ມ 18% ເມື່ອທຽບກັບປີ 2011) ແລະ 10 ເດືອນຂອງປີ 2013 ບັນລຸ 2,94 ຕື້ໂດລາສະຫະລັດ (ເພີ່ມ 8% ເມື່ອທຽບກັບໄລຍະດຽວກັນຂອງປີ 2012). ການພົວພັນແລກປ່ຽນການຮ່ວມມືລະຫວ່າງບັນດາທ້ອງຖິ່ນສອງປະເທດສືບຕໍ່ໄດ້ຮັບການເພີ່ມທະວີ. ສອງຝ່າຍສືບຕໍ່ສົມທົບກັນຜັນຂະຫຍາຍວຽກງານຂີດເສັ້ນຊາຍແດນ, ປັກຫລັກໝາຍຊາຍແດນ. ການພົວພັນລະຫວ່າງລະຫວ່າງບັນດາອົງການຈັດຕັ້ງ ການເມືອງສັງຄົມລະຫວ່າງ ຫວຽດນາມ-ກຳປູເຈຍ ນັບມື້ນັບໄດ້ຮັບການເພີ່ມທະວີ. ທ່ານຫວູ້ມ້າວ, ປະທານສະມາຄົມມິດຕະພາບ ຫວຽດນາມ-ກຳປູເຈຍ ຖືວ່າ:
“ການພົວພັນລະຫວ່າງ ຫວຽດນາມ-ກຳປູເຈຍ ມີຈຸດພິເສດສະເພາະ. ດ່ັງນັ້ນ, ພວກເຮົາຕ້ອງເພີ່ມພູນຄູນສ້າງໃຫ້ນ້ຳໃຈມິດຕະພາບລະຫວ່າງສອງປະເທດ. ນີ້ແມ່ນສິ່ງສຳຄັນທີ່ສຸດ. ດ້ວຍອິດທິພົນຊື່ງສຽງຂອງຕົນ, ສະມາຄົມມິດຕະພາບ ຫວຽດນາມ-ກຳປູເຈຍ ຈະຂົນຂວາຍທົ່ວສັງຄົມປະກອບສ່ວນ, ຈັດຕັ້ງບັນດາການເຄື່ອນໄຫວ, ພົບປະແລກປ່ຽນເພື່ອໃຫ້ ປຊຊ ສອງປະເທດສາມາດຊອກຮູ້ກ່ຽວກັບປະຫວັດແຫ່ງການພັດທະນາລະຫວ່າງສອງຊາດ“.
ສົມທົບກັນຢ່າງແໜ້ນແຟ້ນບົນເວທີປາໄສຫຼາຍຟ່າຍ
ບໍ່ພຽງແຕ່ໃນຂອບເຂດສອງຝ່າຍເທົ່ານັ້ນ, ສອງປະເທດນັບມື້ນັບໄດ້ຮ່ວມມືກັນ, ສະໜິດຕິດພັນ ແລະ ສະໜັບສະໜູນຊື່ງກັນ ແລະ ກັນໃນບັນດາເວທີປາໄສສາກົນ ແລະ ພາກພື້ນອີກດ້ວຍ, ກ່າວຄື: ການຮ່ວມມືສາມປະເທດຫວຽດນາມ-ກຳປູເຈຍ-ລາວ, ຮ່ວມມືສີ່ປະເທດຫວຽດນາມ-ກຳປູເຈຍ-ລາວ-ມຽນມາ; ຮ່ວມມືໃນອະນຸພາກພື້ນແມ່ນ້ຳຂອງເປີດກ້ວາງ, ສະຫະສະມາຄົມປະຊາຊາດອາຊີຕາເວັນອອກສ່ຽງໃຕ້, ອາແຊມ, ສປຊ….
ບົນພື້ນຖານສາຍພົວພັນອີດີງາມນັ້ນ, ການຢ້ຽມຢາມຫວຽດນາມ ຄັ້ງນີ້ຂອງທ່ານນາຍົກລັດຖະມົນຕີລາຊະອານາຈັກກຳປູເຈຍ Samdech Hunsen ເພື່ອແນໃສ່ເພີ່ມທະວີ ແລະ ພັດທະນາການພົວພັນຖານບ້ານໃກເຮືອນຄຽງອັນຈົບງາມ, ນ້ຳໃຈມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງສອງປະເທດຫວຽດນາມ-ກຳປູເຈຍ. ນີ້ກໍ່ແມ່ນໂອກາດເພື່ອໃຫ້ບັນດາການນຳ ຫວຽດນາມ-ກຳປູເຈຍ ແຈ້ງໃຫ້ກັນຊາບ ກ່ຽວກັບສະພາບການຂອງແຕ່ລະປະເທດ, ແລກປ່ຽນບາງບັນຫາໃນການພົວພັນສອງຝ່າຍ. ການຢ້ຽມຢາມຈະນຳສາຍພົວພັນ ຫວຽດນາມ-ກຳປູເຈຍ ນັບມື້ນັບໄດ້ຮັບການພັດທະນາຍິ່ງຂຶ້ນ./.