(vovworld) - ການເຊື່ອມໂຍງເຂົ້າກັບສາກົນຂອງ ຫວຽດນາມ ດຳເນີນໄປພ້ອມກັບວິວັດແຫ່ງການປ່ຽນໃໝ່ປະເທດ, ນັບແຕ່ກອງປະຊຸມໃຫຍ່ຜູ້ແທນທົ່ວປະເທດພັກກອມມູນິດ ຫວຽດນາມ ເມື່ອປີ 1986. ໃນສາມທົດສະວັດຜ່ານມາ, ວິວັດແຫ່ງການເຊື່ອມໂຍງກັບສາກົນຂອງຫວຽດນາມໄດ້ຜ່ານຫຼາຍໄລຍະ. ໃນເບື້ອງຕົ້ນແມ່ນ “ເປີດກວ້າງການຮ່ວມມື”, ແລ້ວຫັນເປັນ “ເຊື່ອມໂຍງເສດຖະກິດກັບສາກົນ”, ກ້າວໄປເຖິງ “ເປັນເຈົ້າການເຊື່ອມໂຍງເຂົ້າກັບເສດຖະກິດສາກົນ”, “ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບເສດຖະກິດ” ແລະ ປະຈຸບັນແມ່ນ “ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ”.
"ກ່ຽວກັບລະດັບ, ຫວຽດນາມຈາກການເຊື່ອມໂຍງເຂົ້າກັບເສດຖະກິດພາກພື້ນຍົກລະດັບເປັນການເຊື່ອມໂຍງເຂົ້າກັບເສດຖະກິດທົ່ວໂລກ, ເໝາະສົມກັບຄວາມສາມາດຂອງປະເທດ ແລະ ທ່າອ່ຽງພັດທະນາຂອງເສດຖະກິດພາກພື້ນ ແລະ ໂລກ. ການຫັນປ່ຽນໃຫຍ່ສາມຢ່າງຂອງວິວັດແຫ່ງການເຊື່ອມໂຍງຂອງຫວຽດນາມແມ່ນຈາກຝ່າຍດຽວເຖິງຫຼາຍຝ່າຍ, ຈາກເສດຖະກິດຫັນໄປສູ່ຮອບດ້ານ, ຈາກການຄ້າລົງທຶນໄປສູ່ຂົງເຂດອື່ນໆ."
ເພື່ອນມິດສາກົນມີຄວາມປະທັບໃຈພິເສດຕໍ່ການເຂົ້າຮ່ວມບັນດາອົງການ, ກົນໄກສາກົນ ແລະ ບັນດາສາຍພົວພັນດ້ານການທູດຫຼາຍຝ່າຍ, ສອງຝ່າຍຂອງຫວຽດນາມໃນວິວັດແຫ່ງການເຊື່ອມໂຍງເຂົ້າກັບສາກົນ. ເຊີນທ່ານຮັບຟັງບົດຂຽນ: “ຍົກລະດັບທ່ວງທ່າ, ຢືນຢັນທີ່ຕັ້ງຂອງ ຫວຽດນາມຢູ່ໂລກ” ຂອງນັກຂ່າວ ແອ໋ງຮ່ວຽນ.
ຍ້ອນມີແນວທາງ, ນະໂຍບາຍເຊື່ອມໂຍງຢ່າງຖືກຕ້ອງໃນ 30 ປີຜ່ານມາ, ທີ່ຕັ້ງທ່ວງທ່າຂອງ ຫວຽດນາມໃນເວທີສາກົນໄດ້ຮັບການຍົກສູງຂຶ້ນພໍສົມຄວນ. ຈາກບ່ອນຖືກປິດລ້ອມ, ຕົກຢູ່ໂດດດ່ຽວ, ປະຈຸບັນ ຫວຽດນາມໄດ້ສ້າງຕັ້ງການພົວພັນທາງການທູດກັບ 187/193 ປະເທດພາຄີຂອງສະຫະປະຊາຊາດ, ໄດ້ສ້າງການພົວພັນຄູ່ຮ່ວມມືຍຸດທະສາດກັບ 15 ປະເທດ, ມີການພົວພັນຄູ່ຮ່ວມມືຮອບດ້ານກັບ 10 ປະເທດ, ອັນໄດ້ປະກອບສ່ວນເຮັດໃຫ້ ຫວຽດນາມມີຄວາມໝັ້ນຄົງກວ່າໃນຍຸດທະສາດຢູ່ພາກພື້ນ ແລະ ຢູ່ໃນໂລກ. ກ່ຽວກັບສິ່ງດັ່ງກ່າວ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ, ເນັ້ນໜັກວ່າ:
“ພວກເຮົາໄດ້ສ້າງຂອບເຂດແຫ່ງການພົວພັນກັບຫຼາຍປະເທດ. ໃນ 15 ປີຜ່ານມາ, ພວກເຮົາໄດ້ດຳເນີນການກໍ່ສ້າງຂອບເຂດແຫ່ງການພົວພັນຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານກັບປະເທດຕ່າງໆ. ພາຍໃນເວລາ 5 ປີ ພວກເຮົາໄດ້ເພີ່ມ 8 ຄູ່ຮ່ວມມືຍຸດທະສາດຕື່ມອີກ. ໃນຈຳນວນຄູ່ຮ່ວມມືຍຸດທະສາດ, ພວກເຮົາກໍ່ມີ 10 ຄູ່ຮ່ວມມືຮອບດ້ານ”.
ທ່ານຮອງນາຍົກລັດຖະມົນຕີ, ລັດຖະມົນຕີ
ການຕ່າງປະເທດຫວຽດນາມ ຟ້າມບິ່ງມິງ
ເຫດການ ຫວຽດນາມ ເຂົ້າເປັນສະມາຊິກ ອາຊຽນເມື່ອເດືອນ 7/1995 ໄດ້ຮັບຖືວ່າແມ່ນບາດກ້າວບຸກທະລຸກ່ຽວກັບການກະທຳໃນວິວັດແຫ່ງການເຊື່ອມໂຍງຂອງຫວຽດນາມ. ຮອດປີ 1996, ຫວຽດນາມສືບຕໍ່ເຂົ້າຮ່ວມການກໍ່ຕັ້ງ ແລະ ເປັນສະມາຊິກຕັ້ງໜ້າຂອງເວທີປາໄສຮ່ວມມືອາຊີ - ເອີລົບ (ASEM). ປີ 1998, ຫວຽດນາມ ໄດ້ຮັບເຂົ້າເປັນສະມາຊິກເວທີປາໄສຮ່ວມມື ອາຊີ - ປີຊີຟິກ (APEC). ເລື່ອງ ຫວຽດນາມເຂົ້າເປັນສະມາຊິກອົງການການຄ້າໃຫຍ່ກວ່າໝູ່ຂອງໂລກ WTO ເມື່ອເດືອນ 1/2007 ໄດ້ເປັນຂີດໝາຍການເຊື່ອມໂຍງຢ່າງຮອບດ້ານຂອງ ຫວຽດນາມເຂົ້າບັນດາອົງການສາກົນ. ປີ 2015, ຫວຽດນາມ ພ້ອມກັບບັນດາປະເທດອາຊຽນເຊື່ອມໂຍງຢ່າງຮອບດ້ານເຂົ້າປະຊາຄົມອາຊຽນ. ທີ່ກອງປະຊຸມການທູດຄັ້ງທີ 29, ທ່ານນາງ Pratibha Mehta, ອະດີດຜູ້ປະສານງານສະຫະປະຊາຊາດປະຈຳ ຫວຽດນາມ, ໄດ້ຕີລາຄາວ່າ:
“ວິວັດແຫ່ງການເຊື່ອມໂຍງເຂົ້າກັບສາກົນຂອງຫວຽດນາມ ແມ່ນມີຄວາມປະທັບໃຈທີ່ສຸດ. ຫວຽດນາມເຂົ້າຮ່ວມບັນດາກົນໄກຮ່ວມມືພາກພື້ນ ແລະ ສາກົນເກືອບທັງໝົດຄື: ASEAN, APEC, ASEM, ເຂົ້າຮ່ວມການເຈລະຈາ ແລະ ລົງນາມໃນຂໍ້ຕົກລົງດ້ານການຄ້າທີ່ສຳຄັນຂອງພາກພື້ນ ແລະ ໂລກຫຼາຍສະບັບ. ສິ່ງດັ່ງກ່າວສະແດງໃຫ້ເຫັນບົດບາດ ຄວາມຮັບຜິດຊອບ ນັບມື້ນັບເປັນເຈົ້າການຂອງຫວຽດນາມໃນການປະກອບສ່ວນເຂົ້າວຽກງານລວມຂອງໂລກ”.
ມາຮອດປະຈຸບັນ, ຫວຽດນາມໄດ້ເຂົ້າຮ່ວມການສ້າງ 12 ສັນຍາການຄ້າເສລີ (FTA) ກັບ 56 ປະເທດ ແລະ ພື້ນຖານເສດຖະກິດໃຫຍ່ຢູ່ໃນໂລກ, ໃນນັ້ນມີ 6 FTA ໂດຍ ຫວຽດນາມເປັນເຈົ້າການເຂົ້າຮ່ວມນອກຂອບເຂດກຸ່ມ ອາຊຽນ ຫຼືກັບບັນດາປະເທດຄູ່ຮ່ວມມືຂອງ ອາຊຽນ. ທ່ານນາງເອກອັກຄະລັດຖະທູດ ແດນມາກປະຈຳ ຫວຽດນາມ Charlotte Laursen, ຕີລາຄາວ່າ:
“ໜຶ່ງໃນບັນດາຈຸດທີ່ພົ້ນເດັ່ນໃນວິວັດແຫ່ງການເຊື່ອມໂຍງເຂົ້າກັບສາກົນຂອງຫວຽດນາມນັ້ນແມ່ນ: ເລື່ອງ ຫວຽດນາມ ແລະ EU ສຳເລັດການເຈລະຈາສັນຍາການຄ້າເສລີ FTA. ຄຽງຂ້າງນັ້ນ, ຫວຽດນາມໄດ້ເຂົ້າຮ່ວມຖະແຫຼງການຮ່ວມຢູ່ກອງປະຊຸມ COP 21 ກ່ຽວກັບການປ່ຽນແປງຂອງດິນຟ້າອາກາດ. ນອກນັ້ນຍັງມີເຫດການສຳຄັນໜຶ່ງອີກໄດ້ຈັດຕັ້ງຢູ່ ຫວຽດນາມ ນັ້ນແມ່ນກອງປະຊຸມ IPU. ຈາກສະມາຊິກທີ່ຕັ້ງໜ້າ, ໄດ້ຍົກທີ່ຕັ້ງທ່ວງທ່າຂອງຕົນຂຶ້ນ ດ້ວຍບົດບາດສຳຄັນຢູ່ເວທີປາໄສສາກົນຕ່າງໆ”.
ດ້ວຍຄຳເວົ້າ ແລະ ການກະທຳ, ຫວຽດນາມໄດ້ ແລະ ພວມພິສູດກັບທົ່ວໂລກວ່າ, ຫວຽດນາມເປັນເພື່ອນ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈກັບທຸກປະເທດ ແລະ ເປັນປະເທດສະມາຊິກທີ່ມີຄວາມຮັບຜິດຊອບຂອງປະຊາຄົມສາກົນ.
ໃນວິວັດແຫ່ງການເຊື່ອມໂຍງກັບສາກົນ, ຫວຽດນາມ ໄດ້ເຂົ້າຮ່ວມຢ່າງຕັ້ງໜ້າ ແລະ ນັບມື້ນັບເຊື່ອມໂຍງຢ່າງເລິກເຊິ່ງເຂົ້າບັນດາການເຄື່ອນໄຫວຂອງສະຫະປະຊາຊາດ, ໃນນັ້ນມີເລື່ອງກາຍເປັນສະມາຊິກຂອງສະພາສິດທິມະນຸດ ສະຫະປະຊາຊາດ, ອາຍຸການ 2014-2016, ສະມາຊິກຂອງສະພາເສດຖະກິດສັງຄົມສະຫະປະຊາຊາດ ອາຍຸການ 2014 – 2016. ຫວຽດນາມ ຍັງເຂົ້າຮ່ວມກຳລັງຮັກສາສັນຕິພາບຂອງສະຫະປະຊາຊາດ ແລະ ຄະນະກຳມະການກົດໝາຍສາກົນອີກ.
ເຂົ້າຮ່ວມສະພາສິດທິມະນຸດສະຫະປະຊາຊາດໃນອາຍຸການ 2014 – 2016, ຫວຽດນາມໄດ້ສ້າງໂອກາດພັດທະນາແຫ່ງຊາດ, ເຊື່ອມໂຍງເຂົ້າກັບສາກົນ ເພື່ອຮັບໃຊ້ພາລະກິດຊຸກຍູ້ການປົກປັກຮັກສາສິດທິມະນຸດຢ່າງມີປະສິດທິຜົນທີ່ສຸດ. ທ່ານ ຫງວຽນແທ່ງຈູງ, ເອກອັກຄະລັດຖະທູດ ຫວຽດນາມ ປະຈຳສະຫະປະຊາຊາດ, ຢືນຢັນວ່າ:
“ພວກເຮົາໄດ້ມີການພົວພັນຢ່າງເປັນເຈົ້າການ ແລະ ຕັ້ງໜ້າທີ່ສຸດກັບສະພາສິດທິມະນຸດ ແລະ ກັບທຸກຝ່າຍທີ່ມີສ່ວນກ່ຽວຂ້ອງໃນປະຊາຄົມສາກົນທີ່ມີຄວາມເອົາໃຈໃສ່ເຖິງເລື່ອງຊຸກຍູ້ ແລະ ປົກປັກຮັກສາສິດທິມະນຸດ. ຜ່ານການພົວພັນນີ້, ພວກເຮົາປະກອບສ່ວນໂດຍກົງເຂົ້າບັນດາການພົວພັນສອງຝ່າຍ, ຈາກນັ້ນຊ່ວຍເພີ່ມທະວີຄວາມໄວ້ເນື້ອເຊື່ອໃຈ, ສ້າງຄວາມໄວ້ເນື້ອເຊື່ອໃຈ ແລະ ເພີ່ມທະວີການເຊື່ອມຕໍ່ນຳກັນ”.
ພ້ອມກັບເລື່ອງເປັນສະມາຊິກສະພາສິດທິມະນຸດສະຫະປະຊາຊາດ, ວັນທີ 27/5/2004, ກະຊວງປ້ອງກັນປະເທດ ຫວຽດນາມ ໄດ້ຈັດຕັ້ງພິທີສ້າງຕັ້ງສູນປົກປັກຮັກສາສັນຕິພາບ ຫວຽດນາມ ແລະ ແຕ່ງຕັ້ງທ່ານພົນຕີ ໝາກດຶກຈ້ອງ ແລະ ເຈິ່ນນາມງ້ານ, ເປັນນາຍທະຫານຕິດຕໍ່ພົວພັນໃນຄະນະຮັກສາສັນຕິພາບຂອງສະຫະປະຊາຊາດຢູ່ Sudan. ວັນທີ 18/8/2016, ເມື່ອຕີລາຄາ 2 ປີ ທີ່ຫວຽດນາມເຂົ້າຮ່ວມການເຄື່ອນໄຫວຮັກສາສັນຕິພາບຂອງສະຫະປະຊາຊາດ, ພົນໂທ, ຫວໍວັນຕ໋ວນ, ຮອງເສນາທິການໃຫຍ່ ກອງທັບປະຊາຊົນ ຫວຽດນາມ, ຮອງຫົວໜ້າຄະນະຊີ້ນຳ ກະຊວງປ້ອງກັນປະເທດ ກ່ຽວກັບກອງທັບເຂົ້າຮ່ວມການຮັກສາສັນຕິພາບ ສະຫະປະຊາຊາດ, ໃຫ້ຮູ້ວ່າ:
“ຫວຽດນາມໄດ້ແຕ່ງຕັ້ງພະນັກງານ 12 ຄົນ, ໃນນັ້ນມີພະນັກງານ 7 ຄົນໄດ້ປະຕິບັດສຳເລັດໜ້າທີ່ແລະກັບເມືອປະເທດຢ່າງປອດໄພ. ປະຈຸບັນຍັງມີ 5 ຄົນພວມສືບຕໍ່ປະຕິບັດໜ້າທີ່. ຫວຽດນາມພວມຕັ້ງໜ້າຜັນຂະຫຍາຍວຽກງານແຕ່ງຕັ້ງກົມກອງທຸກຂັ້ນ, ຊອກຫາບັນດາຮູບການບົນຫຼັກການຂອງສະຫະປະຊາຊາດເພື່ອຜັນຂະຫຍາຍໃນຂັ້ນກົມກອງ”.
ທ່ານເອກອັກຄະລັດຖະທູດ ຫວຽດນາມ ປະຈຳ Kuwait ຫງວຽນຮົ່ງທາວ, ຊາວ ຫວຽດນາມຜູ້ທຳອິດທີ່ຮັບເລືອກຕັ້ງເຂົ້າເປັນກຳມາທິການກົດໝາຍສາກົນຂອງສະຫະປະຊາຊາດເມື່ອເດືອນ 11/2016 ໄດ້ຕີລາຄາສູງເລື່ອງ ຫວຽດນາມມີການເຊື່ອມໂຍງອັນລະອຽດເຂົ້າປະຊາຄົມສາກົນ, ພິເສດແມ່ນອົງການຂອງສະຫະປະຊາຊາດ. ທ່ານເອກອັກຄະລັດຖະທູດ ຫງວຽນຮົ່ງທາວ, ແບ່ງປັນວ່າ:
“ໃນຈຸດເວລານີ້, ຫວຽດນາມຕັດສິນສະໝັກຮັບເລືອກຕັ້ງເປັນກຳມາທິການກົດໝາຍສາກົນ ເພາະວ່ານີ້ແມ່ນຈຸດເວລາເປີດສາກອາຍຸການໃໝ່ຂອງກຳມາທິການ, ພ້ອມທັງເໝາະສົມກັບແນວທາງການຕ່າງປະເທດຂອງພັກ, ລັດ ຫວຽດນາມ ແມ່ນດຳເນີນການເຊື່ອມໂຍງຢ່າງຮອບດ້ານ. ສິ່ງດັ່ງກ່າວສະແດງໃຫ້ເຫັນວ່າ, ພວກເຮົານັບມື້ນັບແຂງກ້າ, ມີຄວາມເຊື່ອໝັ້ນຕົນເອງ, ມີກຳລັງ, ຄວາມສາມາດຢ່າງພຽງພໍເພື່ອປະຕິບັດໜ້າທີ່ສຳຄັນບໍ່ພຽງແຕ່ສຳລັບປະເທດເທົ່ານັ້ນ, ຫາກທັງໃຫ້ສາກົນອີກດ້ວຍ“.
ເລື່ອງເປັນຄັ້ງທຳອິດທີ່ມີພົນລະເມືອງຜູ້ໜຶ່ງ, ນັກການທູດ ຫວຽດນາມຜູ້ໜຶ່ງໄດ້ຮັບເລືອກຕັ້ງເຂົ້າໃນອົງການສຳຄັນຂອງ ສະຫະປະຊາຊາດ ໄດ້ເປັນການສະແດງໃຫ້ເຫັນບາດກ້າວທີ່ສຳຄັນໃນວິວັດແຫ່ງການເຊື່ອມໂຍງເຂົ້າກັບສາກົນຂອງ ຫວຽດນາມ. ມັນກໍ່ສະແດງໃຫ້ເຫັນການເຂົ້າຮ່ວມຢ່າງຕັ້ງໜ້າຂອງ ຫວຽດນາມຢູ່ບັນດາເວທີປາໄສດ້ານກົດໝາຍຂອງສະຫະປະຊາຊາດ ກໍ່ຄືຢູ່ຂັ້ນພາກພື້ນຄື: ASEAN, APEC…
ໃນໄລຍະ 30 ປີແຫ່ງການເຊື່ອມໂຍງເຂົ້າກັບໂລກເທື່ອລະກ້າວ, ຫວຽດນາມ ບໍ່ພຽງແຕ່ມີບັນດາຜົນງານໃນການເຊື່ອມໂຍງກ່ຽວກັບດ້ານການທູດ, ການເມືອງເທົ່ານັ້ນ. ສິ່ງທີ່ໄດ້ຮັບຫຼາຍກວ່າໝູ່ແມ່ນບັນດາຜົນງານດ້ານເສດຖະກິດ.
ພາຍຫຼັງ 30 ປີແຫ່ງການປະຕິບັດແນວທາງການປ່ຽນແປງໃໝ່ກ່ຽວກັບການເຊື່ອມໂຍງເຂົ້າກັບສາກົນ, ຫວຽດນາມ ໄດ້ເປີດກວ້າງການພົວພັນດ້ານການຄ້າກັບກວ່າ 155 ປະເທດ, ດຶງດູດການລົງທຶນໂດຍກົງຂອງບັນດາກຸ່ມບໍລິສັດ ແລະ ບໍລິສັດຂອງ 70 ປະເທດ ແລະ ເຂດແຄ້ວນໃນໂລກ.
ຫວຽດນາມ ກໍໄດ້ລົງນາມໃນສັນຍາການຄ້າ 2 ຝ່າຍ 88 ສະບັບ, ເປີດກວ້າງການພົວພັນດ້ານການຄ້າ, ການສົ່ງອອກສິນຄ້າເຖິງກວ່າ 220 ຕະຫຼາດຢູ່ບັນດາປະເທດ ແລະ ເຂດແຄ້ວນ. ໄລ່ຮອດປີ 2016 ນີ້, ຫວຽດນາມ ໄດ້ລົງນາມໃນສັນຍາການຄ້າ FTA ຫວຽດນາມ - ສ.ເກົາຫຼີ, FTA ຫວຽດນາມ - ອີຢູ ແລະ FTA ກັບສະຫະພັນພາສີ ເບລາຣຸດ - ກາຊັກສະຖານ - ລັດເຊຍ. ຫວຽດນາມ ກໍໄດ້ລົງນາມໃນສັນຍາຄູ່ຮ່ວມມືຍຸດທະສາດຂ້າມປາຊີຟິກ ກັບ 12 ຄູ່ຮ່ວມມືໃນພາກພື້ຶ້ນ.
ດ້ວຍການຜັນຂະຫຍາຍ ແລະ ສຳເລັດການລົງນາມໃນສັນຍາ FTA 15 ສະບັບຮອດປີ 2020, ຫວຽດນາມ ຈະກາຍເປັນພາກສ່ວນສຳຄັນໃນເຄືອຂ່າຍການເຊື່ອມຕໍ່ ກວ້າງກວ່າ ກັບ 56 ພື້ນຖານເສດຖະກິດ, ໃນນັ້ນມີ 18 ປະເທດສະມາຊິກຂອງ APEC ແລະ ສູນກາງເສດຖະກິດໂລກເກືອບໝົດ, ຜ່ານນັ້ນ ຍົກສູງພາບພົດປະເທດຊາດ, ທີ່ຕັ້ງສາກົນຂອງຫວຽດນາມ. ຕະຫຼາດສົ່ງອອກຂອງຫວຽດນາມ ໄດ້ຮັບການເປີດກວ້າງເຖິງ 230 ປະເທດ ແລະ ເຂດແຄ້ວນ, ວົງເງິນການສົ່ງອອກເພີ່ມຂຶ້ນຢ່າງວ່ອງໄວ, ສະເລ່ຍ 22,58% ໃນໄລຍະ 2011 – 2013.
ຫວຽດນາມ ຍັງໄດ້ຖືກຈັດເຂົ້າກຸ່ມ 30 ພື້ນຖານເສດຖະກິດສົ່ງອອກສິນຄ້າແຖວໜ້າໃນໂລກ. ປະຈຸບັນ, ຫວຽດນາມ ໄດ້ເຂົ້າຮ່ວມ 3 ລະບົບມູນຄ່າທີ່ມີບົດບາດນັບມື້ນັບສຳຄັນສຳລັບພື້ນຖານເສດຖະກິດທົ່ວໂລກ, ພົ້ນເດັ່ນແມ່ນລະບົບມູນຄ່າທັນຍາຫານ ແລະ ການຄ້ຳປະກັນດ້ານສະບຽນອາຫານ, ຕໍ່ຈາກນັ້ນແມ່ນລະບົບມູນຄ່າພະລັງງານ ແລະ ລະບົບມູນຄ່າເຄື່ອງຕ່ຳແຜ່ນຕັດຫຍິບ ແລະ ເກີບໜັງ. ມີບາງຜະລິດຕະພັນຂອງຫວຽດນາມ ໄດ້ສ້າງເຄື່ອງໝາຍການຄ້າ ແລະ ມີຄວາມສາມາດແກ່ງແຍ້ງໃນຕະຫຼາດໂລກຄື: ນ້ຳມັນອາຍແກັສ, ໂທລະຄົມມະນາຄົມ, ເຄື່ອງຕ່ຳແຜ່ນຕັດຫຍິບ, ບັນດາຜະລິດຕະພັນກະເສດຄື: ເຂົ້າສານ, ກາເຟ, ໝາກພິກໄທ.
ການເຊື່ອມໂຍງນັບມື້ນັບເລິກເຊິ່ງ, ກວ້າງຂວາງໄດ້ປະກອບສ່ວນປັບປຸງ ແລະ ເພີ່ມອິດທິພົນຊື່ສຽງ, ພາບພົດ, ກຳລັງແກ່ງແຍ້ງຂອງພື້ນຖານເສດຖະກິດຫວຽດນາມ ບົນເວທີສາກົນ. ໜຶ່ງໃນບັນດາໝາກຜົນພົ້ນເດັ່ນຂອງວິວັດການນີ້ແມ່ນ ໃນເບື້ອງຕົ້ນ ພວກເຮົາຕ້ອງກຳນົດໄດ້ເຄື່ອງໝາຍການຄ້າຫວຽດນາມ ໃນພື້ນຖານເສດຖະກິດທົ່ວໂລກ. ເຊີນທ່ານຜູ້ຟັງຮັບຟັງບົດຂຽນຂອງບັນນາທິການທູຮວາ. ທີ່ພາກຫົວຂໍ້ວ່າ: ກຳນົດທິດເຄື່ອງໝາຍການຄ້າຫວຽດນາມໃນພື້ນຖານເສດຖະກິດທົ່ວໂລກ.
ເລື່ອງນຳເຄື່ອງໝາຍການຄ້າ Vinamilk ອອກສູ້ຕ່າງປະເທດ, ໄດ້ເລີ່ມຕົ້ນເກືອບ 20 ປີກ່ອນນີ້, ເມື່ອຜູ້ອຳນວຍການໃຫຍ່ບໍລິສັດ Vinamilk, ທ່ານນາງ ມາຍກ່ຽວລຽນ, ໄດ້ໄປຈ່າວຂາຍສິນຄ້າຢູ່ປະເທດອີຣັກ. ສິນຄ້າ 300 ໂຕ່ນແມ່ນນົມຟຸ່ນ ແລະ 2000 ໂຕ່ນນົມຂຸ້ນສົ່ງເຂົ້າອີຣັກ ເມື່ອປີ 1998 ສຳເລັດຜົນໄດ້ເປີດຊ່ອງທາງໃຫ້ບັນດາຜະລິດຕະພັນຂອງ Vinamilk, ປະຈຸບັນໄດ້ມີໜ້າຢູ່ 43 ປະເທດ ແລະ ເຂດແຄ້ວນໃນໂລກ. ທ່ານນາງ ມາຍກ່ຽວລຽນ ໃຫ້ຮູ້ວ່າ.
“ທຳອິດຂ້າພະເຈົ້າບໍ່ມີຄວາມໝັ້ນໃຈປານໃດ. ນັບແຕ່ກ່ອນມາຮອດປະຈຸບັນ ບໍ່ມີຜູ້ໃດຄິດວ່າ”ຫວຽດນາມ ຈະສົ່ງອອກນົມຟຸ່ນໃຫ້ເດັກ ຍ້ອນພວກເຮົາຍັງນຳເຂົ້ານົມ 100%. ຕົ້ນປີ 1997, ພວກຂ້າພະເຈົ້າສະໜັບສະໜູນນົມຟຸ່ນສຳລັບເດັກໃຫ້ເພື່ອນ 2 ຕູກອນເທັນເນີ ຍ້ອນຕົນເອງກໍ່ຢາກໃຫ້ເພື່ອຮູ້ວ່າ ຫວຽດນາມ ກໍ່ຜະລິດນົມຝຸ່ນສຳລັບເດັກ. ພາຍຫຼັງເພື່ອນກວດກາຄຸນນະພາບ, ທົດລອງສົ່ງນົມ 300 ໂຕ່ນໃນເວລາ 3 ເດືອນ. ທຸກຄົນມີຄວາມປິຕິຊົມຊື່ນທີ່ສຸດ, ເຮັດທັງເວັນ ແລະ ຄືນ, ເຮັດວຽກ 24/24 ຊົ່ວໂມງ, ແລ້ວສົ່ງນົມ 300 ໂຕ່ນຖືກຕາມກຳນົດເວລາ, ຮັບປະກັນຄຸນນະພາບ. ນັບແຕ່ນັ້ນ, ພວກເຮົາໄດ້ຖືກຈັດເຂົ້າບັນຊີລາຍຊື່ເພື່ອເຂົ້າຮ່ວມການປະມູນຢ່າງເປັນທາງການ.”
Vinamilk ບໍ່ພຽງແຕ່ຢຸດຢູ່ໃນການສົ່ງອອກເທົ່ານັ້ນ, ຫາກຍັງກາຍເປັນຜູ້ຖືຫຸ້ນໃນຫຼາຍບໍລິສັດນົມຢູ່ຫຼາຍທະວີບອີກດ້ວຍ. ນິວຊີແລນ ແມ່ນປະເທດທຳອິດໃນການເດີນທາງແຊກແຊງເຂົ້າຕະຫຼາດໂລກຂອງ Vinamilk. ເພື່ອໃຫ້ມີໜ້າຢູ່ປະເທດນີ້, ປີ 2010, Vinamilk ໄດ້ປະກອບຫຸ້ນ 19,3% ເພື່ອກໍ່ສ້າງໂຮງງານຜະລິດນົມຟຸ່ນ Miraka ຜະລິດນົມຟຸ່ນສະເພາະຢູ່ນິວຊີແລນ. ພາຍຫຼັງ 3 ປີ, ຍີຫໍ້ນົມສົດ Twin Cows ຂອງ Vinamilk ທີ່ຜະລິດຢູ່ ນິວຊີແລນ ໄດ້ມີໜ້າຢູ່ຕະຫຼາດຫວຽດນາມ. ຮອດປີ 2015, Vinamilk ໄດ້ເພີ່ມເງິນຖືຫຸ້ນຂຶ້ນເຖິງ 22,81% ເພື່ອຜະລິດຜະລິດຕະພັນທີ່ມີຄຸນນະພາບສູງ ທີ່ສົ່ງອອກໄປຍັງຫຼາຍປະເທດໃນໂລກ. ກໍໃນປີ 2013, Vinamilk ໄດ້ຊື້ຫຸ້ນ Driftwood 70%, ໝາຍຄວາມວ່າໄດ້ກາຍເປັນຜູ້ຖືຫຸ້ນທີ່ເຄື່ອນໄຫວຢ່າງມີປະສິດທິຜົນຂອງນັກສະໜອງນົມໃຫ້ໂຮງຮຽນໃຫຍ່ກວ່າໝູ່ຢູ່ພາກໃຕ້ California, ປະເທດອາເມລິກາ. ຄວາມຫວັງຢາກຄຸ້ມຄອງວິສາຫະກິດໃຫ້ສຳເລັດຢ່າງວ່ອງໄວໃນໄລຍະສັ້ນ, ເມື່ອ Vinamilk ຍົກຈຳນວນເງິນລົງທຶນຂຶ້ນເຖິງ 10 ລ້ານ USD, ບັນລຸອັດຕາສ່ວນການເປັນເຈົ້າຂອງກຳມະສິດ Driftwood 100% ໃນປີ 2016. ພຽງໃນໄລຍະອັນສັ້ນໆ, ບໍລິສັດ Vinamilk ຂອງຫວຽດນາມ ໄດ້ສຳເລັດການຄຸ້ມຄອງຫຸ້ນຂອງເຄື່ອງໝາຍການຄ້າມີປະຫວັດ 90 ປີຢູ່ລັດ California. ພາຍຫຼັງໄດ້ຄອງຕະຫຼາດເອີລົບ, ອາເມລິກາ, Vinamilk ໄດ້ເປີດສະໜອງໂຮງງານຜະລິດນົມ Angkor Milk ຢູ່ພະນົມເປັນ, ປະເທດກຳປູເຈຍ ເມື່ອເດືອນ 05 ຜ່ານມາ. ປະຈຸບັນ, Vinamilk ພວມຜັນຂະຫຍາຍໂຄງການຢູ່ໂປໂລຍ ເພື່ອແນໃສ່ຂຸດຄົ້ນຕະຫຼາດເອີລົບ, ປະຕິບັດຄວາມໃຝ່ຝັນນຳເຄື່ອງໝາຍການຄ້າ Vinamilk ໄປທົ່ວໂລກ.
Viettel ກໍແມ່ນວິສາຫະກິດແຫ່ງຫນຶ່ງມີລະດັບການພັດທະນາບຸກທະລຸ, ສາມາດຢັ້ງຢືນເຄື່ອງໝາຍການຄ້າໃນພື້ນຖານເສດຖະກິດທົ່ວໂລກ. ພາຍຫລັງພຽງ 10 ປີທີ່ເຂົ້າຮ່ວມການເຄື່ອນໄຫວລົງທຶນສາກົນ, ກຸ່ມບໍລິສັດໂທລະຄົມມະນາຄົມກອງທັບ Viettel ມີຫນ້າຢູ່ 9 ປະເທດ ດ້ວຍບັນດາເຄື່ອງໝາຍການຄ້າຕ່າງກັນ, ລວມມີ: Halotel ຢູ່ ຕານຢານີ, Movitel ຢູ່ໂມຊຳບີກ, Telemor ຢູ່ຕີມໍຕາເວັນອອກ, Lumitel ຢູ່ບຣູດີ, Bitel ຢູ່ ເປຣູ, Nexttel ຢູ່ແກເມີຣຸນ, Unitel ຢູ່ລາວ, Merfone ຢູ່ກຳປູເຈຍ, Natcom ຢູ່ ຮາອີຕີ. ປີ 2016 ຄາດວ່າ ລາຍຮັບ ຂອງ Viettel ທີ່ລົງທຶນຢູ່ຕ່າງປະເທດແມ່ນເກືອບ 1,4 ຕື້ ໂດລາສະຫະລັດ. ປະຈຸບັນ Viettel ມີລູກຄ້າ 100 ລ້ານຄົນ, ໃນນັ້ນມີລູກຄ້າກວ່າ 35 ລ້ານຄົນແມ່ນຢູ່ 11 ປະເທດ, ຂຶ້ນກັບ 30 ກຸ່ມບໍລິສັດໂທລະຄົມມະນາຄົມມີຈຳນວນລູກຄ້າຫລາຍກວ່າໝູ່ໃນໂລກ. ກ່າວຄຳເຫັນໃນພິທີສະເຫລີມສະຫລອງ 10 ປີແຫ່ງການເຄື່ອນໄຫວລົງທຶນຢູ່ຕ່າງປະເທດຂອງ Viettel ເມື່ອວັນທີ 17/12/2016 ຢູ່ ຮ່າໂນ້ຍ, ທ່ານນາຍົກລັດຖະມົນຕີ ຫງວຽນຊວນຟຸກ ຕີລາຄາວ່າ:
“Viettel ໄດ້ກາຍເປັນເຄື່ອງໝາຍການຄ້າມີຊື່ສຽງ, ບໍ່ພຽງແຕ່ມີຂອບຂະຫນາດໃຫຍ່ເທົ່ານັ້ນ ຫາກແມ່ນວິສາຫະກິດລົງທຶນຢ່າງແທດຈິງ, ມີກຳລັງຄວາມສາມາດແກ້ໄຂບັນດາບັນຫາສັງຄົມ, ສ້າງການພັດທະນາແບບຍືນຍົງໃຫ້ແກ່ຂະແຫນງໂທລະຄົມມະນາຄົມຂອງບັນດາປະເທດທີ່ Viettel ລົງທຶນ. ເຄື່ອງໝາຍການຄ້າຫນຶ່ງມີຊື່ສຽງບໍ່ພຽງແຕ່ແມ່ນຊັບສົມບັດຂອງວິສາຫະກິດເທົ່ານັ້ນ ຫາກຍັງແມ່ນຊັບສົມບັດຂອງຊາດອີກດ້ວຍ.”
ປີ 2016 ໄດ້ຢັ້ງຢືນບັນດາຜົນງານເຊື່ອມໂຍງໃນຮອບເວລາ 30 ປີ ແລະ ເປີດໄລຍະທາງໃຫມ່, ໄລຍະທາງຊື່ງປະຊາຊົນຫວຽດນາມ ຈະສືບຕໍ່ກ້າວເດີນ.
ການເຊື່ອມໂຍງແມ່ນພາລະກິດຂອງທົ່ວປວງຊົນ. ລັດຖະບານ, ປະຊາຄົມວິສາຫະກິດ ແລະ ປະຊາຊົນໃນທົ່ວປະເທດພວມມີເຈດຈຳນົງລວມ, ການກະທຳລວມເພື່ອນຳປະເທດຊາດເຊື່ອມໂຍງເຂົ້າກັບສາກົນ ຕາມເນື້ອໃນຈິດໃຈຂອງກອງປະຊຸມໃຫຍ່ຄັ້ງທີ 12 ຂອງພັກ ແລະ ເຄົາລົບຄວາມເປັນລະບຽບຮຽບຮ້ອຍ, ກົດໝາຍສາກົນ.
ເພື່ອປະຕິບັດບັນດາຄາດໝາຍເຊື່ອມໂຍງ, ປະຊາຄົມວິສາຫະກິດ ມີບົດບາດສຳຄັນ. ປະຊາຄົມນັກທຸລະກິດຫນຸ່ມຈະເຮັດຫຍັງແດ່. ບົດຂຽນທີ່ມີຫົວຂໍ້ວ່າ: “ບັນດາ Start up ສືບຕໍ່ເດີນຕາມເສັ້ນທາງເຊື່ອມໂຍງ “ ຂອງນັກຂ່າວ ບູ່ຍຮັ່ງ
ພຽງ 2 ປີຈຳຫນ່າຍຜະລິດຕະພັນຢູ່ຕະຫລາດພາຍໃນ ແລະ ເລີ່ມທິດອອກສູ່ໂລກ, ຟ້າມວັນຕາມ ແລະ ເຄື່ອງໝາຍການຄ້າເອເລັກໂຕນິກ Asanzo ໄດ້ພິສູດໃຫ້ເຫັນຄວາມມຸ້ງມາດປາດຖະຫນາສ້າງເຄື່ອງໝາຍຫວຽດນາມໃນແຜນທີ່ເອເລັກໂຕນິກໂລກ ດ້ວຍຄຸນນະທາດແຕກຕ່າງກັນຂອງຕົນ ແລະ ໄດ້ກາຍເປັນຄວາມຈິງ. ປີ 2014, ເຄື່ອງໝາຍການຄ້າເອເລັກໂຕນິກ Asanzo ຈຳຫນ່າຍ ໂທລະທັດໄດ້ກວ່າ 100.000 ຫນ່ວຍ ພາຍຫລັງສ້າງຕັ້ງພຽງ 1 ປີ. ປີ 2016 ຈຳຫນ່າຍໄດ້ປະມານ 500.000 ຫນ່ວຍ, ເທົ່າທຽມກັບບັນດາຊື່ສຽງເອເລັກໂຕນິກແຖວຫນ້າຂອງໂລກ. ຕໍ່ຫນ້າກຳລັງດັນຂອງເຄື່ອງໝາຍການຄ້າເອເລັກໂຕນິກສາກົນ, ນີ້ແມ່ນຜົນງານດີສົມຄວນຂອງນັກທຸລະກິດ ຟ້າມວັນຕາມ ມີອາຍຸພຽງກວ່າ 30 ປີ. ນອກນັ້ນ ຟ້າມວັນຕາມ ຍັງປະກອບສ່ວນຢັ້ງຢືນຊື່ສຽງຂະແຫນງເອເລັກໂຕນິກ ຫວຽດນາມໃນຕະຫລາດສາກົນ ເມື່ອສົ່ງອອກໄປຍັງລາວ, ກູບາ, ພິເສດແມ່ນກຳປູເຈຍ. ກຳລັງຈຳຫນ່າຍຢູ່ຕະຫລາດນີ້ຍັງຄົງສືບຕໍ່ເພີ່ມຂຶ້ນຢ່າງແຮງ ແລະ ກາຍເປັນແຫລ່ງຈຳຫນ່າຍໃຫຍ່ ເມື່ອ Asanzo ໄດ້ກໍ່ສ້າງໂຮງງານຜະລິດເຄື່ອງໃຊ້ໄຟຟ້າ ໃນຄອບຄົວ ແຫ່ງທີ 2 ໃນປີ 2017.
“ປະຈຸບັນ ມີວິສາຫະກິດ ສເກົາຫລີ ໄດ້ປຶກສາຫາລືກັບ Asanzo ກ່ຽວກັບເລື່ອງເປັນຕົວແທນໃຫ້ເຄື່ອງໝາຍການຄ້າ Asanzo ຢູ່ ສເກົາຫລີ. ຂ້າພະເຈົ້າຄິດວ່າ ເມື່ອເວົ້າເຖິງເຄື່ອງເອເລັກໂຕນິກຢູ່ຕະຫລາດໂລກ ຫວຽດນາມ ຕ້ອງມີທ່າແຮງ ຫາກບໍ່ພຽງແຕ່ມີຜະລິດຕະພັນກະເສດ, ຊັບພະຍາກອນໂລຫະເທົ່ານັ້ນ. ຂ້າພະເຈົ້າປາດຖະຫນາວ່າ ບັນດາວິສາຫະກິດຫວຽດນາມ ລ້ວນແຕ່ມີຄວາມຄິດຄືແນວນັ້ນ.”
ໃນຂະນະນັ້ນ, ສຳລັບປະຊາຄົມວິສາຫະກິດພາຍໃນປະເທດ, ຫງວຽນຕວນກີງ ແມ່ນນັກທຸລະກິດທີ່ມີຫລາຍຄົນຮູ້ຈັກເຖິງ ຍ້ອນອ້າຍເຄີຍມີຕຳແຫນ່ງຫລັກແຫລ່ງຢູ່ກຸ່ມບໍລິສັດໃຫຍ່ຫລາຍແຫ່ງ ແລະ ບັນລຸຜົນງານພົ້ນເດັ່ນຫລາຍຢ່າງ. ປີ 2015, ຫງວນຕວນກີງ ທົດລອງກຳລັງຄວາມສາມາດຂອງຕົນໃນຂົງເຂດໃຫມ່ ດ້ວຍໂຄງການເລີ່ມປະກອບອາຊີບ ໃນອາຍຸ 44 ປີ ດ້ວຍຕຳແຫນ່ງເປັນຜູ້ອຳນວຍການໃຫຍ່ ບໍລິສັດຫຸ້ນສ່ວນປື້ມ Alpha Books. ແບ່ງປັນກ່ຽວກັບເລື່ອງລາວເລີ່ມປະກອບອາຊີບ ແລະ ເຊື່ອມໂຍງຂອງບັນດານັກທຸລະກິດຫນຸ່ມ, ຫງວຽນຕວນກີງ ເນັ້ນຫນັກວ່າ:
“ເລື່ອງລາວກ່ຽວກັບການເຊື່ອມໂຍງ, ນຳເຄື່ອງໝາຍການຄ້າຫວຽດນາມ ອອກສູ່ທົ່ວໂລກ ບໍ່ພຽງແຕ່ແມ່ນການເພີ່ມທະວີສິນຄ້າຫວຽດນາມ ສົ່ງອອກຕ່າງປະເທດເທົ່ານັ້ນ ຫາກຍັງແມ່ນການສະຫນິດຕິດພັນຂອງບັນດາເຄື່ອງໝາຍການຄ້າຫວຽດນາມ ໃນລະບົບມູນຄ່າທົ່ວໂລກອີກດ້ວຍ.”
ສຳລັບ ຫງວຽນຕວນກີງ ແລ້ວ, ປະຈຸບັນ ຫວຽດນາມ ຍັງບໍ່ມັນມີຫລາຍເຄື່ອງໝາຍການຄ້າມີທີ່ຕັ້ງໝັ້ນຄົງໃນຕະຫລາດໂລກ, ກາຍເປັນເຄື່ອງໝາຍການຄ້າທົ່ວໂລກ. ເລື່ອງສ້າງບັນດາເຄື່ອງໝາຍການຄ້າຫວຽດນາມ ສາມາດພັດທະນາແບບຍືນຍົງ ແລະ ແຂງແຮງໃນໂລກ, ຍັງພວມຢູ່ໃນວິວັດການກະກຽມ ແລະ ຮຽກຮ້ອງການລົງທຶນໃຫຍ່. ເພາະສະນັ້ນ ກ່ອນອື່ນໝົດ ບັນດາວິສາຫະກິດຫວຽດນາມ ຕ້ອງເຄື່ອນໄຫວຢ່າງມີປະສິດທິຜົນ ແລະ ພັດທະນາແບບຍືນຍົງນັບແຕ່ເມື່ອເລີ່ມປະກອບອາຊີບ.
ເພື່ອສືບຕໍ່ເສັ້ນທາງເຊື່ອມໂຍງ, ບັນດາ start up ໄດ້ເລືອກເຟັ້ນວິທີເຄື່ອນໄຫວຢ່າງມີປະສິດທິຜົນ ແລະ ພັດທະນາແບບຍືນຍົງນັບແຕ່ເມື່ອເລີ່ມປະກອບອາຊີບ. ການເຊື່ອມໂຍງແມ່ນພາລະກິດຂອງທົ່ວປວງຊົນ. ປະຊາຊົນ ຫວຽດນາມ ໄດ້ຕັດສິນໃຈກ້າວຂຶ້ນເສັ້ນທາງເຊື່ອມໂຍງກ່ອນນີ້ 30 ປີ.
ບັນດາຜົນງານຊື່ງຫວຽດນາມບັນລຸໄດ້ໃນວິວັດການເຊື່ອມໂຍງເຂົ້າກັບເສດຖະກິດສາກົນໃນໄລຍະ 30 ປີຜ່ານມາ ໄດ້ປະກອບສ່ວນສຳຄັນເຂົ້າໃນການພັດທະນາດ້ານເສດຖະກິດ ສັງຄົມຂອງປະເທດຊາດ, ຍົກສູງທີ່ຕັ້ງບົດບາດຂອງຫວຽດນາມ ໃນເວທີສາກົນ. ນີ້ແມ່ນກຳລັງຫນູນເພື່ອໃຫ້ຫວຽດນາມ ສືບຕໍ່ເສັ້ນທາງເຊື່ອມໂຍງນັບແຕ່ນີ້.