(vovworld) – ໃນຊຸມວັນນີ້, ຢູ່ບັນດາແຂວງ, ນະຄອນຂອງ ຫວຽດນາມ ຖືກດຳເນີນການເຄື່ອນໄຫວຫລາຍຢ່າງ ເນື່ອງໃນໂອກາດເດືອນກຳມະກອນ 2017, ສະເຫຼີມສະຫຼອງ 131 ປີແຫ່ງວັນກຳມະກອນສາກົນ 01/05. ກ່ອນໜ້ານັ້ນ, ວັນທີ 22/04, ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ມີການພົບປະເຈລະຈາກັບກຳມະກອນຜູ້ອອກແຮງງານເຂດເສດຖະກິດຈຸດສຸມບັນດາແຂວງພາກກາງເປັນຈຳນວນຫລວງຫລາຍ. ບັນດາການເຄື່ອນໄຫວດັ່ງກ່າວ ເປັນການຢັ້ງຢືນເຖິງແຫຼ່ງກຳລັງ, ການປະກອບສ່ວນຂອງກຳມະກອນຜູ້ອອກແຮງງານສຳລັບການພັດທະນາເສດຖະກິດຂອງປະເທດຊາດ ພ້ອມທັງໃຫ້ເຫັນວ່າ ຄວາມເອົາໃຈໃສ່ຂອງລັດຖະບານ, ທຸກຂັ້ນ, ທຸກຂະແໜງການເຖິງຊົນຊັ້ນກຳມະກອນໃນໄລຍະພັດທະນາໃໝ່. ບົດຂຽນຂອງນັກຂ່າວ ຫວູຢຸງ.
(ພາບປະກອບ)
ກຳລັງກຳມະກອນ ຫວຽດນາມ ໄດ້ ແລະ ພວມມີບັນດາບາດກ້າວເຕີບໃຫຍ່ເຂັ້ມແຂງທັງຂອບຂະໜາດ ແລະ ຄຸນນະພາບຢ່າງບໍ່ຢຸດຢັ້ງ, ສຳພັດກັບວິທະຍາສາດຢ່າງວ່ອງໄວ, ເຕັກໂນໂລຢີກ້າວໜ້າ, ຮັບປະກັນເທື່ອລະກ້າວ, ເປັນເຈົ້າການດ້ານເຕັກນິກ ແລະ ເຕັກໂນໂລຢີສູງ. ນີ້ແມ່ນກຳລັງສຳຄັນ ປະກອບສ່ວນໂດຍກົງເຂົ້າໃນການພັດທະນາເສດຖະກິດ - ສັງຄົມຂອງປະເທດຊາດ.
ປະກາດໃຊ້ບັນດານະໂຍບາຍທີ່ກ່ຽວຂ້ອງເຖິງຊາວຜູ້ອອກແຮງງານ
ປະເທດຊາດພວມຢູ່ໃນໄລຍະພັດທະນາໃໝ່ ດ້ວຍຄວາມຮຽກຮ້ອງຕ້ອງການສ້າງລັດຖະບານສ້າງສັນພັດທະນາ, ຊື່ສັດບໍລິສຸດ, ມີການກະທຳຢ່າງຂ້ຽວຂາດ, ຮັບໃຊ້ປະຊາຊົນ. ບົນຈິດໃຈນັ້ນ, ລັດຖະບານໄດ້ ແລະ ສືບຕໍ່ມີບັນດານະໂຍບາຍພັດທະນາແຮງຮູບແບບວິສາຫະກິດຕ່າງໆ, ສະໜິດຕິດພັນຢ່າງແໜ້ນແຟ້ນລະຫວ່າງການພັດທະນາເສດຖະກິດກັບການປະຕິບັດຄວາມກ້າວໜ້າ, ຍຸຕິທຳທາງສັງຄົມ, ຍົກສູງຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງກຳມະກອນ. ລັດຖະບານໄດ້ ແລະ ພວມມີການກະທຳຢ່າງຂ້ຽວຂາດ ເພື່ອແກ້ໄຂບັນດາຄວາມມຸ່ງມາດປາດຖະໜາອັນຊອບທຳຂອງກຳມະກອນ. ລັດຖະບານສືບຕໍ່ມີຂໍ້ກຳນົດກ່ຽວກັບການດັດປັບເງິນເດືອນພື້ນຖານ, ເພີ່ມລະດັບເງິນເດືອນພື້ນຖານປີ 2017; ຮຽກຮ້ອງບັນດາທ້ອງຖິ່ນຍູ້ແຮງການພັດທະນາເຮືອນຢູ່ສັງຄົມ, ເຮືອນຢູ່ກຳມະກອນ; ຍົກລະດັບການປັບໃໝສຳລັບບັນດາກໍລະນີໜີ້ຄ້າງຈ່າຍ, ຈ່າຍຄ່າປະກັນໄພສັງຄົມໃຫ້ຊາວຜູ້ອອກແຮງງານຊ້າກ່ວາກຳນົດ. ພິເສດໃນໄລຍະມໍ່ໆມານີ້, ທ່ານນາຍົກລັດຖະມົນຕີໄດ້ເຊັນອະນຸມັດຜ່ານແຜນຮ່າງ “ການລົງທຶນສ້າງບັນດາລະບອບລະບຽບການຂອງກຳມະບານຢູ່ບັນດາເຂດອຸສາຫະກຳ, ເຂດຜະລິດປຸງແຕ່ງສົ່ງອອກ”…ທ່ານນາຍົກລັດຖະມົນຕີ ຫງວຽນຊວນຟຸກ ໃຫ້ຮູ້ວ່າ:
“ໃນທົ່ວປະເທດມີກຳມະກອນ 2,7 ລ້ານຄົນ ແຕ່ກ່ວາ 1,2 ລ້ານຄົນຍັງບໍ່ທັນມີເຮືອນຢູ່. ນີ້ແມ່ນບັນຫາເຄັ່ງຮ້ອນ. ດັ່ງນັ້ນ ພວກຂ້າພະເຈົ້າໄດ້ພິຈາລະນາຂໍ້ສະເໜີແນະຂອງສະຫະພັນແຮງງານ ຫວຽດນາມ ໄດ້ຕົກລົງອະນຸມັດແຜນຮ່າງລະບອບລະບຽບກຳມະບານ ຫວຽດນາມ, ລວມມີລະບອບລະບຽບການກ່ຽວກັບເຮືອນຢູ່ (ໜູນຊ່ວຍສ່ວນໃດສ່ວນໜຶ່ງ); ທີ 2 ແມ່ນລະບອບລະບຽບການກ່ຽວກັບຫໍວັດທະນະທຳ, ຫໍສະໝຸດ, ເຮືອນລ້ຽງເດັກ, ພິເສດແມ່ນມີລະບອບລະບຽບການກ່ຽວກັບສູນໜູນຊ່ວຍດ້ານນິຕິທຳ, ປຶກສາດ້ານກົດໝາຍໃຫ້ແກ່ກຳມະກອນ, ປົກປ້ອງສິດຜົນປະໂຫຍດອັນຊອບທຳໃຫ້ກຳມະກອນ”.
(ພາບປະກອບ)
ຕາມນັ້ນແລ້ວ, ສະຫະພັນໃຫຍ່ແຮງງານຫວຽດນາມຈະເປັນປະທານສົມທົບກັບບັນດາກະຊວງ, ຂະແໜງການທີ່ກ່ຽວຂ້ອງເພື່ອສ້າງບັນດາເຂດຮັບໃຊ້ກຳມະກອນ ຜູ້ອອກແຮງງານ ແລະ ສະມາຊິກກຳມະການຢູ່ບັນດາເຂດອຸດສາຫະກຳ-ເຂດຜະລິດສົ່ງອອກ. ບັນດາລັດຖະນະໂຍບາຍຢ່າງທັນການຄືດັ່ງກ່າວຂອງລັດຖະບານ ກໍ ເປັນກຳລັງໜູນເພື່ອໃຫ້ກຳມະກອນຫວຽດນາມສືບຕໍ່ຢັ້ງຢືນເປັນກຳລັງຜະລິດໂດຍພື້ນຖານ, ປະກອບສ່ວນຢ່າງໃຫຍ່ຫຼວງເຂົ້າໃນພາລະກິດພັດທະນາຂອງປະເທດຊາດ.
ເອົາໃຈໃສ່ເຖິງຜູ້ອອກແຮງງານດ້ວຍດ້ວຍມາດຕະການແກ້ໄຂລະອຽດໃນໄລຍະທີ່ຈະມາເຖິງ.
ບັນຫາພັດທະນາໃນໄລຍະປະຈຸບັນ ໄດ້ຮຽກຮ້ອງໃຫ້ກຳລັງແຮງງານຕ້ອງມີທັກສະ, ລະດັບສີມືແຮງງານສູງ. ຜູ້ອອກແຮງງານແຕ່ລະຄົນຕ້ອງສູ້ຊົນ, ມານະພະຍາຍາມຮ່ຳຮຽນ, ຝຶກຝັນຫຼໍ່ຫຼອມຢ່າງບໍ່ຢຸດຢັ້ງເພື່ອກາຍເປັນບັນດານາຍຊ່າງເກັ່ງ, ກຳມະກອນເຕັກນິກທີ່ດີເດັ່ນ. ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ຖືວ່າ : (ເທບ)
“ ຖ້າຫາກປະກອບອາຊີບໃດກໍຢາ, ກໍຕ້ອງບັນລຸລະດັບຍອດສູງ ຈຶ່ງປະສົບຜົນສຳເລັດ. ກຳມະກອນຕ້ອງຮຽນເອງ, ຝຶກຝົນສີມືແຮງງານດ້ວຍຕົນເອງໃຫ້ດີເພື່ອສາມາດຕອບສະໜອງຕໍ່ການແກ່ງແຍ້ງທາງດ້ານແຮງງານໃນປະຈຸບັນ. ກຳມະກອນ, ຊາວຜູ້ອອກແຮງງານທັງໝົດ ກໍລ້ວນແຕ່ພະຍາຍາມຮຽນໃຫ້ເກັ່ງ, ເຮັດວຽກຢ່າງຕັ້ງໜ້າກ່ວາ, ຕ້ອງຄົ້ນຄ້ວາຈາກທິດສະດີຕະຫຼອດຮອດການລົງເຮັດຕົວຈິງ ແລະ ເຄື່ອນໄຫວຢ່າງແທດຈິງ ແລະ ມີຜົນປະໂຫຍດດີກ່ວາ ”
ທາງຝ່າຍອົງການສຳນັກງານທີ່ມີຄວາມຮັບຜິດຊອບນັ້ນ, ອົງການກຳມະບານຂັ້ນຕ່າງໆຕ້ອງຍູ້ແຮງໂຄງການ “ຍົກສູງລະດັບທັກສະ, ວິຊາຊີບຂອງສະມາຊິກກຳມະບານ ແລະ ຜູ້ອອກແຮງງານ” ຕິດພັນກັບແຜນຮ່າງ “ຍູ້ແຮງບັນດາການເຄື່ອນໄຫວຮ່ຳຮຽນຕະຫຼອດຊີວິດໃນໝູ່ກຳມະກອນຜູ້ອອກແຮງງານຢູ່ບັນດາວິສາຫະກິດເຖິງປີ 2020”. ບັນດາວິສາຫະກິດກໍຕ້ອງມີນະໂຍບາຍບຳລຸງສ້າງສະເພາະຂອງຕົນ, ສົມທົບກັບບັນດາອົງການສຳນັກງານຂັ້ນຕ່າງໆເພື່ອອາດຈະຜັນຂະຫຍາຍບັນດາໂຄງການທຶນສຶກສາທີ່ສະຫງວນໃຫ້ກຳມະກອນເພື່ອຍົກສູງວິຊາຊີບ, ສີມືແຮງງານ. ເພື່ອໃຫ້ກຳມະກອນຜູ້ອອກແຮງງານມີວຽກເຮັດງານທຳແບບຍືນຍົງ, ລັດຖະບານຍັງຈະພິຈາລະນາສະຫງວນສ່ວນໜຶ່ງຂອງກອງທຶນປະກັນໄພວາ່ງງານທີ່ຈ່າຍໃຫ້ການບຳລຸງສ້າງໄລຍະຍາວ. ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ຖືວ່າ : (ເທບ)
“ ລັດຖະບານຈະຊີ້ນຳສະຫງວນສ່ວນໜຶ່ງຂອງກອງທຶນປະກັນໄພວາ່ງງານທີ່ຈ່າຍໃຫ້ການບຳລຸງສ້າງເພື່ອຍົກສູງຄຸນນະພາບແຫຼ່ງຊັບພະຍາກອນມະນຸດໃນປະຈຸບັນ. ຫວຽດນາມກໍພວມຢູ່ໃນໄລຍະທີ່ດີທີ່ສຸດສຳລັບປະຊາກອນ. ຜູ້ອອກແຮງງານຫວຽດນາມມີຄວາມດຸໝັ້ນຂະຫຍັນພຽນ, ມີຄວາມມານະອົດທົນ, ມີຫົວຄິດປະດິດສ້າງ ໃນຂະນະທີ່ຄວາມຕ້ອງການພັດທະນາອຸດສາຫະກຳ, ຫັນອຸດສາຫະກຳ ກະສີກຳເປັນທັນສະໄໝ, ແກ້ໄຂວຽກເຮັດງານທຳຢ່າງຫຼວງຫຼາຍ. ດັ່ງນັ້ນ, ກອງທຶນປະກັນໄພວາ່ງງານຖືກນຳໃຊ້ເພື່ອແກ້ໄຂວຽກງານບຳລຸງສ້າງ, ຍົກສູງສີມືແຮງງານແມ່ນຈຳເປັນທີ່ສຸດ”
ໃນໄລຍະທີ່ຈະມາເຖິງນີ້, ລັດຖະບານຍັງສືບຕໍ່ຄົ້ນຄ້ວາ, ເພີ່ມເຕີມແກ່ການປົກປ້ອງສິດຜົນປະໂຫຍດຂອງກຳມະກອນຜູ້ອອກແຮງງານເພດຍິງ. ບັນດາອົງການກຳມະບານຄວນສືບຕໍ່ຄົ້ນຄ້ວາເພື່ອຍື່ນສະເໜີຕໍ່ນາຍົກລັດຖະມົນຕີ ແລະ ສະພາແຫ່ງຊາດເພື່ອເພີ່ມເຕີມບັນດາເນື້ອໃນທີ່ຍັງບໍ່ຄົບຖ້ວນ, ພ້ອມກັນເຂົ້າຮ່ວມການສ້າງ ແລະ ຜັນຂະຫຍາຍປະຕິບັດນະໂຍບາຍແຮງງານຍິງ.
ເພື່ອບັນລຸເປົ້າໝາຍການເຕີບໂຕເສດຖະກິດໄວ ແລະ ຍືນຍົງ, ບົດບາດຂອງຊົນຊັ້ນກຳມະກອນແມ່ນສຳຄັນທີ່ສຸດ. ເພາະສະນັ້ນ, ການເອົາໃຈໃສ່ລົງທຶນໃຫ້ແກ່ຜູ້ອອກແຮງງານເພື່ອໃຫ້ເຂົາເຈົ້າສາມາດປັບຕົວໃຫ້ແທດເໝາະກັບວິວັດທະນາການເຊື່ອມໂຍງເຂົ້າກັບເສດຖະກິດສາກົນ ຈະປະກອບສ່ວນເຂົ້າໃນການເຮັດສຳເລັດບັນດາເປົ້າໝາຍເສດຖະກິດ-ສັງຄົມ./.