( vovworld ) – ວັນທີ 27/6, ຢູ່ Brussel ປະເທດແບນຊິກ, ທ່ານ Pham Binh Minh ລັດຖະມົນຕີການຕ່າງປະເທດຫວຽດນາມ ແລະ ທ່ານນາງ Catherine Ashton ກຳມະການຂັ້ນສູງ ຮັບຜິດຊອບນະໂຍບາຍຄວາມໝັ້ນຄົງ ແລະ ການຕ່າງປະເທດຂອງສະຫະພາບເອີລົບ (EU) ໄດ້ລົງນາມໃນສັນຍາຄູ່ຮ່ວມມື ແລະ ຮ່ວມມືຮອບດ້ານລະຫວ່າງຫວຽດນາມ-EU (PCA) ແລະ ເປີດສາກວິວັດທະນາການເຈລະຈາສັນຍາການຄ້າເສລີສອງຝ່າຍ (FTA). ເຫດການນີ້ໄດ້ເປີດສາກໃຫ້ໄລຍະໃໝ່ ໃນການພົວພັນລະຫວ່າງຫວຽດນາມ-EU, ແມ່ນປະຖົມປັດໄຈສຳຄັນເພື່ອໃຫ້ຫວຽດນາມ ແລະ EU ສ້າງກົນໄກຮ່ວມມືລະອຽດ, ປະກອບສ່ວນເພີ່ມທະວີການພົວພັນຄູ່ຮ່ວມມື ແລະ ການຮ່ວມມືສອງຝ່າຍໃນຊຸມປີຕໍ່ໄປ.
ບາດກ້າວເດີນໃໝ່ໃນການພົວພັນລະຫວ່າງຫວຽດນາມ- EU
(ພາບ:vietbao.vn)
PCA ລະຫວ່າງຫວຽດນາມ-EU ລວມມີ 8 ພາກ, 65 ມາດຕາ, ໃນນັ້ນໄດ້ຢັ້ງຢືນບັນດາຫຼັກການອັນເປັນພື້ນຖານຂອງການພົວພັນສອງຝ່າຍ, ກຳນົດຂອບເຂດການຮ່ວມມືຮອບດ້ານໃນທຸກຂົງເຂດ ຈາກການຮ່ວມມືພັດທະນາ, ການຄ້າ-ການລົງທຶນ ຕະຫຼອດຮອດການຮ່ວມມືດ້ານຕຸລາການ; ຮັກສາສັນຕິພາບ, ຄວາມສະຫງົບປອດໄພສາກົນ…. ຕາມທ່ານ Franz Jessen, ເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າຄະນະກຳມະການເອີລົບ (EC) ປະຈຳຫວຽດນາມ ແລ້ວ, ເມື່ອທຽບກັບສັນຍາແມ່ກ່ຽວກັບການຮ່ວມມືລະຫວ່າງຫວຽດນາມ-EC ທີ່ໄດ້ລົງນາມເມື່ອປີ 1995, PCA ຫວຽດນາມ-EU ທີ່ໄດ້ຮັບການລົງນາມຄັ້ງນີ້ ສະແດງໃຫ້ເຫັນບາດກ້າວພັດທະນາທີ່ໃຫ່ຍຫຼວງ, ເລິກເຊີ່ງ, ກ້ວາງຂວາງໃນການພົວພັນລະຫວ່າງຫວຽດນາມ-EU ພາຍຫຼັງຳລຍະເວລາ 20 ປີ, ນຳການພົວພັນສອງຝ່າຍກ້າວເຂົ້າສູ່ໄລຍະພັດທະນາໃໝ່ດ້ວຍຂອບເຂດກ້ວາງຂວາງ ແລະ ເລິກເຊິ່ງກ່ວາ, ສົມກັບຂອບຂະໜາດຂອງ EU ກໍ່ຄື ທີ່ຕັ້ງບົດບາດທີ່ນັບມື້ນັບເພີ່ມຂຶ້ນຂອງຫວຽດນາມ ໃນເວທີສາກົນ. ບັນດາເນື້ອໃນຂໍ້ຕົກລົງໃນ PCA ແມ່ນຮອບດ້ານທີ່ສຸດ, ສ່ອງແສງຜົນປະໂຫຍດ ແລະ ການໃຫ້ບຸລິມະສິດຂອງສອງຝ່າຍຢ່າງກົມກຽວ. ທ່ານເອກອັກຄະລັດຖະທູດ Franz Jessen ເວົ້າວ່າ:
“ການພົວພັນລະຫວ່າງຫວຽດນາມ-EU ໄດ້ມີການຫັນປ່ຽນຫຼາຍພໍສົມຄວນ, ນັບແຕ່ເລີ່ມສ້າງຕັ້ງການພົວພັນໃນ 20 ປີກ່ອນ, ການພົວພັນລະຫວ່າງຫວຽດນາມ-EU ພຽງແຕ່ອີງຕາມການຮ່ວມມືພັດທະນາ, ເສດຖະກິດ, ການລົງທຶນເທົ່ານັ້ນ ແລະ ມາຮອດປະຈຸບັນ, ສາຍພົວພັນດັ່ງກ່າວໄດ້ຮັບການເປີດກ້ວາງທັງທາງດ້ານການເມືອງອີກດ້ວຍ. ດ້ວຍເລື່ອງລົງນາມໃນ PCA ຫວຽດນາມ-EU ຈະມີບັນດາກົນໄກຮ່ວມມືຢ່າງແໜ້ນແຟ້ນກ່ວາອີກກ່ຽວກັບການເຈລະຈາສິດທິມະນຸດ, ຮ່ວມມືດ້ານການປ້ອງກັນຄວາມສະຫງົບ…. “.
ຫວຽດນາມ- EU ການຮ່ວມມືຮອບດ້ານ
(ພາບ: baodientu.chinhphu.vn)
ການເຊັນ PCA ໄດ້ສ້າງບັນດາປະຖົມປັດໄຈ ເພື່ອໃຫ້ສອງຝ່າຍເຈລະຈາສັນຍາການຄ້າເສລີສອງຝ່າຍ, ສ້າງບັນດາກົນໄກໜູນຊ່ວຍຂະແໜງການ, ວິສາຫະກິດຕ່າງໆ ໃນການສຳພັດ, ຂຸດຄົ້ນຕະຫຼາດ ແລະ ບັນດາທ່າໄດ້ປຽບດ້ານທຶນຮອນ, ເຕັກໂນໂລຊີ, ເຕັກນິກຄຸ້ມຄອງກ້າວໜ້າຂອງ EU ຢ່າງສະດວກສະບາຍກ່ວາໃນໄລຍະທີ່ຈະມາເຖິງ. PCA ກໍ່ສ້າງປະຖົມປັດໄຈສຳຄັນ ເພື່ອໃຫ້ສອງຝ່າຍກ້າວເຂົ້າສູ່ການເຈລະຈາສັນຍາການຄ້າເສລີສອງຝ່າຍ (FTA). ເລື່ອງເຈລະຈາ ແລະ ເຊັນ FTA ລະຫວ່າງ ຫວຽດນາມ-EU ຈະເປີດບັນດາກາລະໂອກາດ, ລົບລ້າງຮົ້ວກີດຂວາງດ້ານພາສີ, ສ້າງເງື່ອນໄຂອຳນວຍຄວາມສະດວກໃຫ້ແກ່ການເຕີບໂຕໃນການສົ່ງອອກເວົ້າສະເພາະ ແລະ ການເຕີບໂຕດ້ານເສດຖະກິດເວົ້າລວມ.
ກ່ຽວກັບການຮ່ວມືພັດທະນາ, EU ໃຫ້ຄຳໝັ້ນສັນຍາກ່ຽວກັບຫຼັກການໃນ PCA ວ່າຈະສືບຕໍ່ຊ່ວຍເຫຼືອພັດທະນາໃຫ້ແກ່ຫວຽດນາມ ໃນໄລຍະໃໝ່ ຫຼັງປີ 2013, ສອດຄ່ອງກັບບັນດາຍຸດທະສາດ ແລະ ໂຄງການພັດທະນາເສດຖະກິດ-ສັງຄົມຂອງຫວຽດນາມ. ຈຸດພົ້ນເດັ່ນອີກອັນໜື່ງຂອງ PCA ແມ່ນສອງຝ່າຍບັນລຸໄດ້ຂໍ້ຕົກລົງກ່ຽວກັບເນື້ອໃນການຮ່ວມມືໃນບັນດາຂົງເຂດໃໝ່ຄື: ການສຶກສາບຳລຸງສ້າງ, ວິທະຍາສາດເຕັກໂນໂລຊີ, ກະສິກຳ, ປ່າໄມ້, ສະກັດກັ້ນ ແລະ ຫລຸດຜ່ອນໄພທຳມະຊາດ, ວັດທະນະທຳ, ການທ່ອງທ່ຽວ….ກ່ຽວກັບດ້ານການເມືອງ, ສັນຍາ PCA ຈະປະກອບສ່ວນເຮັດໃຫ້ການພົວພັນດ້ານການເມືອງທີ່ຈົບງາມລະຫວ່າງຫວຽດນາມ-EU ເລິກເຊີ່ງຂຶ້ນຕື່ມ. ບັນດາຂໍ້ຕົກລົງທີ່ບັນລຸໄດ້ໃນ PCA ກ່ຽວກັບດ້ານການເມືອງ, ສັນຕິພາບ ແລະ ມີຄວາມໝັ້ນຄົງ ແມ່ນພື້ນຖານເພື່ອໃຫ້ສອງຝ່າຍເພີ່ມທະວີການເຈລະຈາ ແລະ ຮ່ວມມືໃນການແກ້ໄຂບັນດາບັນຫາຊື່ງຕ່າງຝ່າຍຕ່າງມີຄວາມສົນໃຈ ໃນການພົວພັນສອງຝ່າຍ ແລະ ບັນດາເວທີປາໄສຫຼາຍຝ່າຍຄື: ສະຫະປະຊາຊາດ, ASEM ແລະ ພິເສດແມ່ນ ASEAN-EU ຂະນະທີ່ຫວຽດນາມ ຈະແມ່ນປະເທດປະສານງານການພົວພັນລະຫວ່າງ ASEAN-EU ໃນເດືອນ 7/2012. ທ່ານ Franz Jessen, ເອກອັກຄະລັດຖະທູດ, ຫົວໜ້າຄະນະ ຜູ້ຕາງໜ້າຄະນະກຳມະການເອີລົບ (EC) ປະຈຳຫວຽດນາມ ຢືນຢັນວ່າ:
“ຂ້າພະເຈົ້າມີຄວາມຫວັງຢ່າງແນ່ນອນວ່າ ເລື່ອງເຊັນ PCA ລະຫວ່າງຫວຽດນາມ-EU ຈະເປີດໜ້າໃໝ່ໃຫ້ແກ່ການພົວພັນລະຫວ່າງຫວຽດນາມ-EU. ອາດເວົ້າໄດ້ວ່າ, ພວກເຮົາໄດ້ນຳສາຍພົວພັນນີ້ກາຍເປັນສາຍພົວພັນເປີດກ້ວາງ ແລະ ຫຼາຍຮູບຫຼາຍແບບ. ປະຈຸບັນ,ການພົວພັນລະຫວ່າງຫວຽດນາມ-EU ແມ່ນການພົວພັນທີ່ເຕັມໄປດ້ວຍສີສັນ ແລະ ມີຊີວິດຊີວາທີ່ສຸດ “
(ພາບ:vietnamplus.vn)
ດ້ວຍການພັດທະນາຢ່າງແຂງແຮງ ແລະ ຕັ້ງໜ້າຂອງການພົວພັນລະຫວ່າງຫວຽດນາມ-EU ແລະ ບັນດາປະເທດສະມາຊິກໃນຕະຫຼອດ 20 ປີຜ່ານມາ, ເລື່ອງເຊັນ PCA ຢ່າງເປັນທາງການ ແລະ ເປີດສາກການເຈລະຈາ FTA ລະຫວ່າງຫວຽດນາມ-EU ຈະເປີດໜ້າໃໝ່ໃນການພົວພັນລະຫວ່າງຫວຽດນາມ-EU. ການພົວພັນລະຫວ່າງສອງຝ່າຍພວມໃນຂອບເຂດ ແລະ ລະດັບການຮ່ວມມືທີ່ກ້ວາງຂວາງ ແລະ ເລິກເຊີ່ງກ່ວາ, ປະກອບສ່ວນຮັບໃຊ້ໃຫ້ແກ່ພາລະກິດປ່ຽນແປງໃໝ່, ຫັນປະເທດຊາດເປັນອຸດສາຫະກຳ ແລະ ທັນສະໄໝ ແລະ ການເຊື່ອມໂຍງເຂົ້າກັບເສດຖະກິດໂລກຂອງຫວຽດນາມ ໃນໄລຍະທີ່ຈະມາເຖິງ.