ທ່ານລັດຖະມົນຕີວ່າການກະຊວງປ້ອງກັນປະເທດອາເມລິກາ Ash Carter ພວມເດີນທາງຢ້ຽມຢາມ 2 ປະເທດພັນທະມິດທີ່ສຳຄັນຢູ່ອາຊີ, ນັ້ນແມ່ນຍີປຸ່ນ ແລະ ສ.ເກົາຫຼີ. ການຢ້ຽມຢາມເປັນຄັ້ງທຳອິດຂອງທ່ານ A. Carter ໃນຖານະເປັນຜູ້ນຳທຳນຽບ 5 ແຈ ແມ່ນໄດ້ຖືກວົງການນັກສັງເກດການຖືວ່າ ແມ່ນເພື່ອແນໃສ່ຢືນຢັນຄືນກ່ຽວກັບການພົວພັນດ້ານການ ປ້ອງກັນປະເທດກັບບັນດາປະເທດພັນທະມິດ ແລະ ໝັ້ນໝາຍຫັນໄປສູ່ພາກພື້ນອາຊີ-ປາຊີຟິກຂອງອຳນາດການປົກຄອງປະທານາທິບໍດີ Barak Obama.
ໃນສະພາວະທີ່ລັດທິອິດສະລາມຫົວຮຸນແຮງພວມພົ້ນເດັ່ນຂຶ້ນຢູ່ອີຣັກ ແລະ ຊີຣີ, ເຢແມນໄດ້ຖືກຕົກເຂົ້າສູ່ສົງຄາມພົນລະເຮືອນ, ມີການແຊກແຊງຂອງລັດເຊຍໃນການປະທະກັນຢູ່ພາກຕາເວັນອອກຢູແກຼນນັ້ນ, ອາເມລິກາສາມາດຮັບຮູ້ໄດ້ວ່າ ຈຳເປັນຕ້ອງຢືນຢັນຄືນທີ່ຕັ້ງບົດບາດຂອງຕົນຢູ່ອາ-ຊີປາຊີຟິກ. ການຢ້ຽມຢາມຍີປຸ່ນ ແລະ ສ.ເກົາຫຼີຂອງທ່ານລັດຖະມົນຕີວ່າການກະຊວງປ້ອງກັນປະເທດອາເມລິກາ Ash Carter ຄັ້ງນີ້ ກໍບໍ່ນອນນອກເໜືອຈາກຈຸດປະສົງສຸມທຸກຄວາມເອົາໃຈໃສ່ເຖິງອາຊີ.
ນັບແຕ່ຄາວເປັນລັດຖະມົນຕີຊ່ວຍວ່າການກະຊວງປ້ອງກັນປະເທດອາເມລິກາແຕ່ປີ 2011-2013, ທ່ານ Ash Carter ໄດ້ສະໜັບສະໜູນຢ່າງແຂງແຮງຕໍ່ເລື່ອງອາເມລິກາຫັນທິດຫຼາຍກ່ວາເຖິງອາຊີ ແລະ ເຊີດຊູຄວາມສຳຄັນຂອງອາຊີທີ່ມີຕໍ່ອະນາຄົດຂອງອາເມລິກາ. ຍ້ອນເຫດນີ້ເອງ, ໃນບົດກ່າວປາໄສທີ່ສຳຄັນບົດທຳອິດ ກ່ອນດຳເນີນການຢ້ຽມຢາມຄັ້ງນີ້, ທ່ານ Ash Carter ໄດ້ຊີ້ແຈ້ງເຖິງບັນດາເຫດການໂລກທີ່ຮ້ອນເຮັ່ງໃນປີ 2014 ແມ່ນຈະບໍ່ສາມາດກີດຂວາງທ່ານສືບຕໍ່ຍຸດທະສາດຫັນໄປສູ່ອາຊີ ແລະ ຖືວ່າ ອາຊີ-ປາຊີຟິກຈະແມ່ນພາກພື້ນເປັນຈຸດສຸມຂອງອາເມລິກາໃນອະນາຄົດ.
ທ່ານລັດຖະມົນຕີວ່າການກະຊວງປ້ອງກັນປະເທດອາເມລິກາ Ash Carter ແລະ ຄູ່ຕຳແໜ່ງຂອງຍີປຸ່ນ ທ່ານ Gen Nakatani ຢູ່ໂຕກຽວ ເມື່ອ ວັນທີ 8/4. (ພາບ: AFP) |
ເພີ່ມທະວີ ແລະ ຫັນການພົວພັນແບບພັນທະມິດເປັນທັນສະໄໝ
ຢູ່ຍີປຸ່ນ, ໜຶ່ງໃນບັນດາເນື້ອໃນຕົ້ນຕໍ່ຊຶ່ງ 2 ຝ່າຍໄດ້ນຳມາປຶກສາຫາລື, ນັ້ນແມ່ນການປັບປຸງເອກະສານແນະນຳການຮ່ວມມືດ້ານການປ້ອງກັນປະເທດອາເມລິກາ-ຍີປຸ່ນ, ຕາມທິດມອບບົດບາດເປັນເຈົ້າການຫຼາຍກ່ວາໃນບັນຫາປ້ອງກັນຄວາມສະຫງົບອາຊີໃຫ້ແກ່ກຳລັງປ້ອງກັນຕົວຍີປຸ່ນ. ເອກະສານແນະນຳການປ້ອງກັນຕົວຮ່ວມ ໄດ້ຮັບການປັບປຸງເປັນຄັ້ງທຳອິດນັບແຕ່ປີ 1997, ຖືກຖືວ່າ ຈະເປີດກວ້າງຂອບເຂດໜູນຊ່ວຍຊຶ່ງກັນ ແລະ ກັນລະຫວ່າງ 2 ປະເທດພັນທະມິດ, ສອດຄ່ອງກັບຄວາມມານະພະຍາຍາມຂອງທ່ານນາຍົກລັດຖະມົນຕີຍີປຸ່ນ Shinzo Abe ແນໃສ່ຫຼຸດຜ່ອນຄວາມຈຳກັດຂອງລັດຖະທຳມະນູນຍີປຸ່ນທີ່ມີຕໍ່ນະໂຍບາຍການທະຫານຂອງປະເທດຊາດ. ເອກະສານແນະນຳການຮ່ວມມືດ້ານການປ້ອງກັນປະເທດສະບັບໃໝ່ນີ້ ຈະຖືກນຳມາປຶກສາຫາລືທີ່ການເຈລະຈາລະຫວ່າງ ທ່ານນາຍົກລັດຖະມົນຕີຍີປຸ່ນ Shinzo Abe ແລະ ປະທານາທິບໍດີອາເມລິກາ Barak Obama ຊຶ່ງຄາດວ່າຈະຖືກຈັດຂຶ້ນຢູ່ວໍຊິງຕັນໃນທ້າຍເດືອນ 4 ນີ້.
ສ່ວນຢູ່ເຊີອຸນ, ບັນດາເຈົ້າໜ້າທີ່ຂັ້ນສູງຂອງລັດຖະບານ ສ.ເກົາຫຼີຈະໄດ້ຮັບຄຳຢືນຢັນອີກຄັ້ງໜຶ່ງກ່ຽວກັບຄຳໝັ້ນສັນຍາຂອງອາເມລິກາທີ່ມີຕໍ່ບັນຫາຄວາມສະຫງົບຂອງ ສ.ເກົາຫຼີ. ນອກຈາກນັ້ນ, 2 ຝ່າຍຍັງປຶກສາຫາລືວິທີການແກ້ໄຂບັນຫາ ສ.ປ.ປ.ເກົາຫຼີ, ພ້ອມກັນນັ້ນກໍໄດ້ພົບປະ ແລະ ຢ້ຽມຢາມຖາມຂ່າວກອງບັນຊາການພາກພື້ນປາຊີຟິກຢູ່ ຮາວາຍ. ກອງປະຊຸມກ່ຽວກັບການປ້ອງກັນຄວາມຫງົບ Shangri – La ຊຶ່ງ ທ່ານ Ash Carter ຈະມີໜ້າໃນເດືອນ 5 ໜ້ານີ້ຢູ່ສິງກະໂປ ກໍແມ່ນກາລະໂອກາດທີ່ດີເພື່ອໃຫ້ອາເມລິກາຜູກຮັດກັບສິງກະໂປ ແລະ ບັນດາຄູ່ຮ່ວມມືອື່ນໃນພາກພື້ນອາຊີ-ປາຊີຟິກ.
ສ້າງທ່າສົມດູນຍຸດທະສາດຂອງອາເມລິກາ.
ອົງການລັດອິດສະລາມ IS ໂດຍຂະໜານນາມເອງ ພວມເຄື່ອນໄຫວຢ່າງໂຫດຮ້າຍຢູ່ອີຣັກ ແລະ ຊີຣີ. ເຢແມນຖືກຕົກເລິກໃນສະຖານະການສົງຄາມກາງເມືອງ. ໂຄງການນິວເຄຼຍຂອງອີຣານໄດ້ເຮັດໃຫ້ການພົວພັນອາເມລິກາ-ອິດສະຣາແອນເກີດການຂັດແຍ້ງ. ສະຖານະການຢູ່ຢູແກຼນໄດ້ພາໃຫ້ວໍຊິງຕັນ ແລະ ມົດສະກູນັບມື້ນັບເຫີນຫ່າງຈາກກັນ. ວິກິດການພວມປີນຂັ້ນໄດຢູ່ຕາເວັນອອກກາງ, ອາຟະລິກາ ແລະ ເອີລົບໄດ້ເຮັດໃຫ້ທຳນຽບຂາວຕ້ອງສັງເກດຄືນຍຸດທະສາດການປ້ອງກັນຄວາມສະຫງົບຂອງຕົນ.
ໃນສະພາວະທີ່ທະຫານອາເມລິກາຢູ່ອີຣັກໄດ້ຄ່ອຍຖອນກຳລັງນັບແຕ່ປີ 2011, ສ່ວນກຳລັງທະຫານຢູ່ອາບການິສະຖານ ຈະຖອນທັງໝົດອອກຈາກປະເທດນີ້ໃນປີນີ້, ອາເມລິກາພວມຊອກຫາວິທີຍົກຍ້າຍແຫຼ່ງກຳລັງທະຫານໄປຍັງອາຊີ-ປາຊີຟິກ. ແຕ່ອາເມລິກາກໍປະສົບກັບບັນດາຄວາມຫຍຸ້ງຍາກສະເພາະຂອງຕົນ ຂະນະທີ່ຕ້ອງປະເຊີນໜ້າກັບຄວາມຫຍຸ້ງຍາກກ່ຽວກັບງົບປະມານດ້ານປ້ອງກັນຊາດຖືກຫຼຸດລົງ ແລະ ການເພີ່ມທະວີການໃຊ້ຄວາມຮຸນແຮງຢູ່ຕາເວັນອອກກາງ ແລະ ອາຟະລິກາເໜືອ, ເຮັດໃຫ້ບັນດາຄວາມມານະພະຍາຍາມຂອງປະເທດນີ້ສຳລັບບັນດາບັນຫາອາຊີຖືກຊັກຊ້າລົງ. ແຕ່ຕໍ່ໜ້າຄວາມວິຕົກກັ່ງວົນທີ່ນັບມື້ນັບເພີ່ມຂຶ້ນສຳລັບຈີນ ແລະ ບັນດາສິ່ງທ້າທາຍດ້ານຄວາມສະຫງົບໃນພາກພື້ນນັ້ນ, ເຖິງເວລາແລ້ວ, ທີ່ອາເມລິກາເຫັນວ່າ ບໍ່ອາດຈະໂຈະໄວ້ອີກແລ້ວ. ໃນການຢ້ຽມຢາມຄັ້ງນີ້, ຜູ້ນຳທຽບ 5 ແຈ ກໍໄດ້ເປີດເຜີຍແຜນການສົ່ງ 60% ແມ່ທັບເຮືອອາເມລິກາໄປປະຈຳເປັນຢູ່ອາຊີ-ປາຊີຟິກໃນຮອບເວລາ 5-10 ປີທີ່ຈະມາເຖິງ. ກອງທັບເຮືອອາເມລິກາ ຈະຖືກຜັນຂະຫຍາຍຈາກຟີລິບປິນ ເຖິງອົດສະຕາລີ, ສເກົາຫຼີ, ຍີປຸ່ນ ແລະ ອິນເດຍ… ແຕ່ເພື່ອປະຕິບັດຄວາມມັກໃຫຍ່ໃຝ່ສູງນີ້, ອາເມລິກາຕ້ອງຊອກຫາຂໍ້ກຸນແຈເພື່ອແກ້ໄຂສິ່ງກີດຂວາງທຸກຢ່າງ. ທຳອິດ, ນັ້ນແມ່ນການປັບປຸງການພົວພັນແບບພັນທະມິດທີ່ຍາວນານໃນພາກພື້ນ. ໜຶ່ງໃນບັນດາບາດກ້າວເດີນທີ່ສຳຄັນທຳອິດ ແມ່ນອາເມລິກາຈະລົງທຶນຜະລິດອາວຸດທີ່ທັນສະໄໝທີ່ສຸດ. ໃນສະພາວະທີ່ຈີນພວມຍາດເອົາທ່າແຮງໃນການຢຶດຄອງຕະຫຼາດເສດຖະກິດ-ການເງິນ ແລະ ເພີ່ມທະວີການສົ່ງຜົນສະທ້ອນຢູ່ພາກພື້ນນີ້ ຂະນະທີ່ມີເຖິງ 35 ປະເທດ, ຊຶ່ງລວມທັງຫຼາຍປະເທດພັນທະມິດຍຸດທະສາດຂອງອາເມລິກາຖະແຫຼງປະກາດເຂົ້າເປັນສະມາຊິກທະນາຄານລົງທຶນກໍ່ສ້າງໂຄງລ່າງອາຊີ ໂດຍປະເທດນີ້ລິເລີ່ມ, ເປັນທີ່ຈະແຈ້ງແລ້ວວ່າ ອາເມລິກາບໍ່ຢາກຊັກຊ້າໃນການແຂ່ງຂັນເປີດກ້ວາງການພົວພັນຄູ່ຮ່ວມມືດ້ານການຄ້າ.
ດ້ວຍການຢ້ຽມຢາມ 2 ປະເທດພັນທະມິດອາຊີຄັ້ງນີ້, ອາດຈະຢືນຢັນໄດ້ວ່າ ອຳນາດການປົກຄອງປະທານາທິບໍດີ Barak Obama ພວມເລີ່ມຕົ້ນໄລຍະໃໝ່ໃນຍຸດທະສາດສ້າງຄວາມສົມດູນຄືນຢູ່ອາຊີ-ປາຊີຟິກ. ການປ່ຽນແປງການກຳນົດທິດໃນການຮ່ວມມືດ້ານປ້ອງກັນຊາດລະຫວ່າງທຳນຽບຂາວກັບບັນດາຄູ່ຮ່ວມມືພັນທະມິດ, ໄປຄຽງຄູ່ກັບການຊຸກຍູ້ການຮ່ວມມືດ້ານການຄ້າ, ຈະຊ່ວຍໃຫ້ອາເມລິກາຜູກຮັດຫຼາຍກວ່າກັບພາກພື້ນຊຶ່ງຄາດຄະເນວ່າ ຈະມີບັນດາເຫດການເຮັດໃຫ້ປ່ຽນແປງດ້ານຄວາມສະຫງົບຂອງໂລກໃນອະນາຄົດ.