(vovworld)- ງານວາງສະແດງພາບຖ່າຍ “ຮ່າໂນ້ຍໃນໝາກຫົວໃຈຂອງຂ້າພະເຈົ້າ” ຄັ້ງທີ 11 ດ້ວຍ ຫົວຂໍ້: “ຂີດໝາຍມໍລະດົກສະຖາປັດຕະຍະກຳ ຮ່າໂນ້ຍ” ຫາກໍດຳເນີນໄປຢູ່ສູນມໍລະດົກພະລາດຊະວັງ ທັງລອງ. ງານວາງສະແດງໂດຍຫນັງສືພິມເສດຖະກິດ ແລະ ຕົວເມືອງ ສົມທົບກັບສະໂມສອນຖ່າຍຮູບຂອງຜູ້ອາຍຸສູງຮ່າໂນ້ຍ ຈັດຕັ້ງ ເພື່ອແນໃສ່ເຊີດຊູ ແລະ ປະກອບສ່ວນໂຄສະນາມໍລະດົກຂອງເຂດດິນແດນແຫ່ງອະລິຍະທຳນັບພັນປີ.
ງານວາງສະແດງພາບຖ່າຍກ່ຽວກັບຮ່າໂນ້ຍ
|
ງານວາງສະແດງຮູບພາບ “ຮ່າໂນ້ຍໃນໝາກຫົວໃຈຂອງຂ້າພະະເຈົ້າ” ໄດ້ແນະນຳໃຫ້ສາທາລະນະຊົນ ພາບຖ່າຍທີ່ພົ້ນເດັ່ນກວ່າ 80 ແຜ່ນກ່ຽວກັບຄຸນຄ່າປະຫວັດສາດ, ວັດທະນະທຳ ແລະ ສະຖາປັດຕະຍະກຳຂອງນະຄອນຫລວງ ຮ່າໂນ້ຍ. ໃນນັ້ນ ມີບັນດາຄຸນຄ່າທີ່ໄດ້ຮັບການຮັບຮອງຈາກ UNESCO ວ່າແມ່ນມໍລະດົກວັດທະນທຳໂລກຄື: ພະລາດຊະວັງ ທັງລອງ ຮ່າໂນ້ຍ, ວັນມຽບກວາຕືຢາມ, ວັນບຸນຢອງ ຫລືບັນດາມໍລະດົກທີ່ເປັນສັນຍາລັກຕິດພັນກັບຮ່າໂນ້ຍຄື: ວັດເສົາດຽວ, ຫນອງໂຮ່ເກືອມ, ຂົວເທຮຸກ, ຂົວລອງບຽນ, ໂຮງລະຄອນໃຫຍ່…ກໍ່ຄືຮູບພາບຂອງວັດວາອາຮາມບູຮານຫລາຍແຫ່ງທີ່ຕິດພັນກັບຊີວິດດ້ານຈິດວິນຍານທີ່ສັກກະລະບູຊາ ແລະ ສະເພາະຂອງຊາວຫວຽດນາມ. ດ້ວຍ 3 ເນື້ອໃນຕົ້ນຕໍ ນັ້ນແມ່ນ: “ຂີດໝາຍສະຖາປັດຕະຍະກຳ ທັງລອງ - ຮ່າໂນ້ຍ”, “ສະຖາປັດຕະຍະກຳນະຄອນຫລວງໃນໄລຍະເຊື່ອມໂຍງ” ແລະ “ວຽກງານອະນຸລັກຮັກສາ, ປະຕິສັງຂອນ ຮັບປະກັນຄວາມເປັນຫລາຍຮູບຫລາຍແບບຂອງວັດທະນະທຳສະຖາປັດຕະຍະກຳ”, ງານວາງສະແດງຄືດັ່ງເລື່ອງລາວກ່ຽວກັບການຄົງຕົວຕາມການເວລາຂອງບັນດາມໍລະດົກ, ດ້ວຍຄວາມເອກອ້າງທະນົງໃຈ ແລະ ຮ່ວມແຮງຮ່ວມໃຈເພື່ອຮັກສາ ແລະ ເສີມຂະຫຍາຍຄຸນຄ່າມໍລະດົກຂອງຊາວຮ່າໂນ້ຍ ລຸ້ນຕ່າງໆ. ງານວາງສະແດງພາບຖ່າຍ ໄດ້ປະກອບສ່ວນໂຄສະນາພາບພົດນະຄອນຫລວງ ຮ່າໂນ້ຍ ເຂັ້ມຂົ້ນໄປດ້ວຍສີສັນວັດທະນະທຳ, ສະຖາປັດຕະຍະກຳ, ເຊື່ອມຕົວກັບວັດທະນະທຳສັງຄົມຂອງວົງຄະນາຍາດ, ສະຖານທີ່ທ່ອງທ່ຽວອັນດູດດື່ມ ໃຫ້ແກ່ສາທາລະນະຊົນຢູ່ພາຍໃນປະເທດ ແລະ ເພື່ອນມິດສາກົນ. ນີ້ເປັນການພິສູດໃຫ້ເຫັນວ່າ ເປັນຫຍັງຮ່າໂນ້ຍໄດ້ຮັບການຕີລາຄາວ່າ ແມ່ນຫນຶ່ງໃນສະຖານທີ່ທ່ອງທ່ຽວ 10 ແຫ່ງທີ່ດູດດື່ມກວ່າໝູ່ໃນໂລກ. ທ່ານ ດັ້ງລີງ, ສະໂມສອນຖ່າຍຮູບຂອງຜູ້ອາຍຸສູງ, ຫນັງສືພິມເສດຖະກິດ ແລະ ຕົວເມືອງ ແບ່ງປັນວ່າ:
“ຂ້າພະເຈົ້າພາບຖ່າຍ 2 ແຜ່ນກ່ຽວກັບຫໍພິພິດທະພັນປະຫວັດສາດ ແລະ ໂຮງລະຄອນໃຫຍ່ ຮ່າໂນ້ຍ. ຂ້າພະເຈົ້າຢາກຮັກສາໄວ້ບັນດາຄວາມງາມດ້ານສະຖາປັດຕະຍະກຳຂອງຫໍພິພິດທະພັນປະຫວັດສາດ ແລະ ໂຮງລະຄອນໃຫຍ່ ຮ່າໂນ້ຍ. ຂ້າພະເຈົ້າມີຄວາມປະທັບໃຈທີ່ສຸດຕໍ່ສະຖາປັດຕະຍະກຳຂອງ ຝລັ່ງ. ສະນັ້ນ ພວກຂ້າພະເຈົ້າຈັດຕັ້ງງານວາງສະແດງເພື່ອແນະນຳໃຫ້ປະຊາຊົນບັນດາຄວາມງາມດ້ານສະຖາປັດຕະຍະກຳຂອງຮ່າໂນ້ຍ.”
ຊາວຮ່າໂນ້ຍມາຊົມພາບຖ່າຍທີ່ງານວາງສະແດງ
|
ບັນດາພາບຖ່າຍຢູ່ງານວາງສະແດງຄັ້ງນີ້ ໂດຍ ນັກຖ່າຍຮູບຂອງສະໂມສອນຖ່າຍຮູບຂອງຜູ້ອາຍຸສູງ ຮ່າໂນ້ຍ, ບັນດານັກຂ່າວ, ຜູ້ຮ່ວມງານຂອງຫນັງສືພິມເສດຖະກິດ ແລະ ຕົວເມືອງ ປະຕິບັດ ແລະຮັກສາໄວ້ໃນຊຸມປີເຮັດອາຊີບ. ນອກຈາກສະແດງໃຫ້ເຫັນຄວາມເອກອ້າງທະນົງໃຈກ່ຽວກັບຄວາມຮັກທີ່ມີຕໍ່ຮ່າໂນ້ຍ, ນະຄອນຫລວງ ວິລະຊົນ, ນະຄອນເພື່ອສັນຕິພາບ, ບັນດາພາບຖ່າຍຍັງສະແດງໃຫ້ເຫັນຢ່າງຈະແຈ້ງຄວາມຮັກຕໍ່ນະຄອນ ຮ່າໂນ້ຍ ຂອງບັນດານັກຖ່າຍຮູບ, ຊື່ງແມ່ນຜູ້ທີ່ດຳລົງຊີວິດ, ເຮັດວຽກ ແລະ ສະຫນິດຕິດພັນກັບຮ່າໂນ້ຍໃນສີບໆປີຜ່ານມາ. ມີພາບຖ່າຍກວ່າ 80 ແຜ່ນໄດ້ຮັບການຄັດເລືອກຈາກພາບຖ່າຍທີ່ພົ້ນເດັ່ນກ່ຽວກັບມໍລະດົກສະຖາປັດຕະຍະກຳຂອງຮ່າໂນ້ຍ ນັບຮ້ອຍໆ ແຜ່ນ, ເໝາະສົມກັບຫົວເລື່ອງຂອງງານວາງສະແດງ ພ້ອມທັງຮັບປະກັນລັກສະນະສິລະປະຂອງການຖ່າຍຮູບ. ນັກຖ່າຍຮູບ ວັນຟຸກ, ສັງກັດ ສະໂມສອນຖ່າຍຮູບຂອງຜູ້ອາຍຸສູງຮ່າໂນ້ຍໃຫ້ຮູ້ວ່າ:
“ ປູຊະນີຍະສະຖານປະຫວັດສາດ, ທັດສະນີຍະພາບຢູ່ ຮ່າໂນ້ຍ ແມ່ນມີຫລວງຫລາຍ ແຕ່ພວກຂ້າພະເຈົ້າໄດ້ຄັດເລືອກບັນດາຄວາມງາມດ້ານສະຖາປັດຕະຍະກຳພົ້ນເດັ່ນ ແລະ ເປັນເອກະລັກສະເພາະທີ່ສຸດເພື່ອວາງສະແດງຢູ່ງານວາງສະແດງຄັ້ງນີ້. ຜ່ານນັ້ນ ເພື່ອໃຫ້ສາທາລະນະຊົນ ແລະ ນັກທ່ອງທ່ຽວ ມີຄວາມເຂົ້າໃຈກ່ຽວກັບນະຄອນຫລວງກວ່າ ແລະ ເຫັນໄດ້ຄຸນຄ່າ, ຄວາມງາມດ້ານສະຖາປັດຕະຍະກຳຂອງບັນດາປູຊະນີຍະສະຖານ, ທັດສະນີຍະພາບ ຮ່າໂນ້ຍ.”
ມາຢ້ຽມຊົມງານວາງສະແດງພາບຖ່າຍ, ເອື້ອຍ ຫງວຽນທູງາ ຢູ່ ເມືອງ ເກົາໄຢ ຮ່າໂນ້ຍ ແບ່ງປັນວ່າ:
“ບັນດາພາບຖ່າຍທີ່ງານວາງສະແດງແມ່ນບັນດາຮູບພາບທີ່ພົ້ນເດັ່ນກ່ຽວກັບມໍລະດົກແຫ່ງຕ່າງຢູ່ຮ່າໂນ້ຍ. ຂ້າພະເຈົ້າຫວັງວ່າ ງານວາງສະແດງຈະຊ່ວຍໃຫ້ລຸ້ນຫນຸ່ມມີຄວາມເຂົ້າໃຈກວ່າກ່ຽວກັບບັນດາຄຸນຄ່າດ້ານປະຫວັດສາດຂອງນະຄອນຫລວງ ຮ່າໂນ້ຍ ແຫ່ງອະລິຍະທຳນັບພັນປີ.”
ພາບຖ່າຍກ່ຽວກັບຂົວລອງບຽນ
ພາບ:dantri.com
|
“ຮ່າໂນ້ຍໃນໝາກຫົວໃຈຂອງຂ້າພະເຈົ້າ” ແມ່ນງານວາງສະແດງປະຈຳປີ ໂດຍຫນັງສືພິມເສດຖະກິດ ແລະ ຕົວເມືອງ ສົມທົບກັບ ສະໂມສອນຖ່າຍຮູບຂອງຜູ້ອາຍຸສູງ ປະຕິບັດ. ຜ່ານໄລຍະ 10 ປີ ດ້ວຍງານວາງສະແດງເປັນ 10 ຄັ້ງ, “ຮ່າໂນ້ຍໃນໝາກຫົວໃຈຂອງຂ້າພະເຈົ້າ” ໄດ້ກາຍເປັນຈຸດນັດພົບຂອງຜູ້ນິຍົມຖ່າຍຮູບ, ມີຄວາມຮັກຕໍ່ນະຄອນຫລວງຮ່າໂນ້ຍ ໃນຕົ້ນເດືອນ 10 ປະຈຳປີ. ງານວາງສະແດງໄດ້ສ້າງຂີດໝາຍໃນດວງໃຈຂອງສາທາລະນະຊົນ ຍ້ອນມີຄວາມຮັກຕໍ່ນະຄອນຫລວງ ຮ່າໂນ້ຍ ຢ່າງຈິງໃຈ ແລະ ສະຫນິດແຫນ້ນ ພ້ອມດ້ວຍວິໄສທັດໃນອາຊີບທີ່ເຕັມໄປດ້ວຍວັດທະນະທຳມະນຸດ ແລະ ປະສົບການໃນຊີວິດຂອງບັນດານັກຖ່າຍຮູບ.