(vovworld)- ເຖິງວ່າມີອາຍຸພຽງ 14 ປີ, ແຕ່ນ້ອງ ໂດທິງອກເກີມ ຢູ່ ບ້ານເມີຍ ຕາແສງ ລອກຮືງ, ເມືອງ ໝີຕູ ແຂວງ ຊອກຈັງ ພັດຍາດໄດ້ລາງວັນທີ 2 ທີ່ງານປະກວດຂັບເດີນກາຕາຍຕື (ປະເພດເພງພື້ນເມືອງຢູ່ພາກໃຕ້ຫວຽດນາມ) ສຳລັບເດັກນ້ອຍ ໂດຍ ວິທະຍຸໂທລະພາບ ແຂວງ ບາກລຽວ ຈັດຕັ້ງ. ພາຍຫລັງເຂົ້າຮ່ວມງານປະກວດ, ນ້ອງໄດ້ຮັບຄວາມນິຍົມຈາກຜູ້ຊົມຫລາຍຄົນຍ້ອນສຽງຂັບຮ້ອງມ່ວນອ່ອນຊອນ, ດຶງດູດໃຈ.
ງານປະກວດ “ຂັບເດີນກາຕາຍຕື ສຳລັບເດັກນ້ອຍ” ໂດຍ ວິທະຍຸ ໂທລະພາບ ບາກລຽວ ຈັດຕັ້ງ ແມ່ນງານປະກວດຄັ້ງໃຫຍ່ທຳອິດ ຊື່ງນ້ອງ ໂດ໋ທິງອກເກີມ ເຂົ້າຮ່ວມ. ໂດຍໄດ້ກຳເນີດໃນຄອບຄົວທຸກຍາກ ເຖິງວ່າ ໄດ້ຮັບການເບິ່ງແຍງດູແລຈາກຄອບຄົວກໍຕາມ ແຕ່ ງອກເກີມເອງ ພັດຕ້ອງກະກຽມເອງໃຫ້ການປະກວດຂອງຕົນ. ທີ່ການປະກວດຮອບທຳອິດ, ເມື່ອ ງອກເກີມ ຂັບຮ້ອງບັນດາບົດເພງ ດ້ວຍສຽງມ່ວນອ່ອນຊອນ ແລະ ດຶງດູດໃຈ, ນ້ອງໄດ້ຮັບການຊົມເຊີຍຈາກຜູ້ຊົມ ແລະ ຜູ້ນິຍົມດົນຕີ ເດີນກາຕາຍຕືເປັນຈຳນວນຫລວງຫລາຍ. ເຖິງວ່າ ງອກເກີມ ພຽງຍາດໄດ້ລາງວັນທີ 2 ໃນງານປະກວດດັ່ງກ່າວກໍຕາມ, ແຕ່ຊື່ສຽງຂອງນ້ອງເຮັດໃຫ້ຫລາຍຄົນຮູ້ຈັກເຖິງ. ມາຢ້ຽມຢາມ ຊອກຈັງ, ຊື່ງແມ່ນບ້ານເກີດເມືອງນອນຂອງງອກເກີມ, ພວກຂ້າພະເຈົ້າໄດ້ຮັບຂ່າວຈາກນັກສິລະປິນດີເດັ່ນ ດົງຮ່ວາງນາມ, ອະດີດຫົວຫນ້າກອງຂັບກາຍເລືອງ ຈວງວາງ, ກອງຂັບກາຍເລືອງ ຊົງເຫົ້າ ວ່າ: ງອກເກີມ ຫາກໍ່ຮຽນຂັບເດີນກາຕາຍຕື ໃນເວລາພຽງກວ່າ 2 ປີ ເທົ່ານັ້ນ ແຕ່ຄວາມເກັ່ງກ້າສາມາດຂອງນ້ອງເຮັດໃຫ້ທ່ານຕົກສະເຫງີ້.ນັກສິລະປິນດົງຮ່ວາງນາມໃຫ້ຮູ້ວ່າ:
“ນັບແຕ່ເມື່ອຂ້າພະເຈົ້າສິດສອນໃຫ້ຫລາຍຄົນກາຍເປັນນັກສິລະປິນ, ສິປະປິນປະຊາຊົນແລ້ວ, ພຽງ ແຕ່ມີ ນ້ອງ ງອກເກີມ ແມ່ນຜູ້ມີອາຍຸຫນ້ອຍສຸດ. ງອກເກີມ ມີຄວາມເມົາມົວໃນການຮ້ອງລຳທຳເພງ ແລະ ມີຫົວຄິດປະດິດສ້າງໃນການຂັບເດີນກາຕາຕື.”
ໂດ໋ທິງອກເກີມ
|
ເມື່ອມີອາຍຸ 6 ປີ, ງອກເກີມ ໄດ້ນິຍົມຂັບເດີນກາຕາຍຕືແລ້ວ. ແລະຮອດອາຍຸ 11 ປີ ນ້ອງໄດ້ຮັບການສິດສອນຂັບເດີນກາຕາຍຕືຈາກນັກສິລະປິນດີເດັ່ນ ດົງຮ່ວາງນາມ. ເມື່ອຮຽນຂັບ ເດີນກາຕາຍຕື ງອກເກີມມີຄວາມເຂົ້າໃຈໄວ ແລະ ກໍແມ່ນຜູ້ດຸໝັ່ນຂະຫຍັນພຽນໃນການຮຽນ. ສະນັ້ນ ເມື່ອເຂົ້າຮ່ວມງານປະກວດ ຂັບ ເດີນກາຕາຍຕື ຂັ້ນຕ່າງໆ ງອກເກີມ ລ້ວນແຕ່ຍາດໄດ້ລາງວັນ. ງອກເກີມ ໃຫ້ຮູ້ວ່າ: ຜົນສຳເລັດຄືແນວນີ້ຂອງ ງອກເກີມ ແມ່ນຍ້ອນໄດ້ຮ້ອງໄດ້ຮັບການສະຫນັບສະຫນູນຢ່າງຫລວງຫລາຍຈາກທຸກຄົນໃນຄອບຄົວ.
“ຍາມໃດທຸກຄົນໃນຄອບຄົວກໍສະຫນັບສະຫນູນນ້ອງ. ເມື່ອເຮັດບົດຝືກຫັດສຳເລັດແລ້ວ, ນ້ອງພ້ອມກັບພໍ່ເຖົ້າ ແອບຂັບເດີນກາຕາຍຕື. ນ້ອງມັກເຂົ້າຮ່ວມການປະກວດ ຂັບ ເດີນກາຕາຍຕື ທີ່ສຸດ.”
ງອກເກີມ ຫາກໍ່ສຳເລັດການເສັງຈົບ ມໍ 4 ດ້ວຍນາມມະຍົດເປັນນັກຮຽນເກັ່ງ. ປະຈຸບັນ ອາຈານ ດົງຮ່ວາງນາມ, ຄອບຄົວ ແລະ ງອກເກີມ ເອງ ຫວັງວ່າຈ້ອງຈະໄດ້ສືບຕໍ່ຝືກຝົນຫລໍ່ຫລອມຄວາມເກັ່ງກ້າສາມາດພອນສະຫວັນທີ່ມີຢູ່ແລ້ວຂອງນ້ອງ ເພື່ອມີເງື່ອນໄຂຮຽນສິລະປະສະແດງຂັບກ໋າຍເລືອງ ອາຊີບ. ນັກສິລະປິນ ດົງຮວ່າງນາມ ໃຫ້ຮູ້ວ່າ:
“ພວກຂ້າພະເຈົ້າຢາກບຳລຸງສ້າງໃຫ້ງອກເກີມເປັນຜູ້ສືບທອດ ອາຊີບ ຂັບ ຂັບ ເດີນກາຕາຍຕື. ເມື່ອຮຽນ ຈົບ ມ 7, ພວກຂ້າພະເຈົ້າຈະສົ່ງ ງອກເກີມ ໄປຮຽນມະຫາວິທະຍາໄລເວທີສະແດງ ຢູ່ ໄຊງ່ອນ”
ງອກເກີມໃນງານປະກວດຂັບກາຍເລືອງ
ພາບ:vtv
|
ດ້ວຍສຽງຂັບຮ້ອງມ່ວນອ່ອນຊອນ, ມີຄວາມເຊື້ອໝັ້ນຕົນເອງ, ມີຄວາມຊຳນານງານໃນການສະແດງ, ງອກເກີມ ໄດ້ຜ່ານຜ່າງານປະກວດຫລາຍຄັ້ງ ແລະ ຍາດໄດ້ຄະແນນສູງ. ສຽງຂັບຮ້ອງຂອງນ້ອງໄດ້ດຶງດູດ ຄະນະກວດສອບ, ຊື່ງແມ່ນບັນດາຄູອາຈານກ່ຽວກັບ ຂັບ ເດີນກາຕາຍຕື ແລະ ໄດ້ສ້າງຄວາມປະທັບໃຈອັນດີງາມໃຫ້ແກ່ຜູ້ຊົມທີ່ນິຍົມ ຂັບ ເດີນກາຕາຍຕື ຫວຽດນາມ. ລາງວັນທີ່ໄດ້ຮັບໃນງານປະກວດດັ່ງກ່າວ ແມ່ນການເປີດສາກ ເພື່ອໃຫ້ງອກເກີມ ສືບຕໍ່ເສັ້ນທາງຮ້ອງລຳທຳເພງພື້ນເມືອງ, ປະກອບສ່ວນເຂົ້າໃນການອະນຸລັກຮັກສາ, ສືບທອດ ແລະ ພັດທະນາປະເພດສິລະປະ ເດີນກາຕາຍຕື ຢູ່ພາກໃຕ້ຫວຽດນາມ - ມໍລະດົກວັດທະນະທຳບໍ່ມີຮູບຮ່າງຂອງມວນມະນຸດ.