(vovworld) - ນັກຮຽນ, ນັກສຶກສາແມ່ນກຳລັງຕົ້ນຕໍພ້ອມກັບປະຊາຊົນໃນທົ່ວປະເທດເຂົ້າຮ່ວມເຫດການໃຫຍ່, ບໍ່ພຽງແຕ່ຢູ່ຫວຽດນາມເທົ່ານັ້ນ, ຫາກນັບທັງຢູ່ທົ່ວໂລກອີກດ້ວຍ, ນັ້ນແມ່ນເຫດການມອດໄຟ 1 ຊົ່ວໂມງເພື່ອໜ່ວຍໂລກປີ 2016, ເຊິ່ງດຳເນີນໃນວັນທີ 19/3. ດ້ວຍຫົວຂໍ້ວ່າ “ການກະທຳນ້ອຍ, ແຕ່ຄວາມໝາຍໃຫຍ່“, ເຫດການມອດໄຟ 1 ຊົ່ວໂມງເພື່ອໜ່ວຍໂລກປີນີ້ ໄດ້ຮັບການສະໜັບສະໜູນຈາກນັກຮຽນ, ນັກສຶກສານັບແຕ່ເວລາເລີ່ມດຳເນີນເຖິງສິ້ນສຸດເຫດການ.
(ພາບປະກອບ)
ມີນັກອາສາສະໝັກເກືອບ 3.000 ຄົນຢູ່ນະຄອນ ຮ່າໂນ້ຍ ໄດ້ພ້ອມກັນລຽນແຖວເປັນສັນຍາລັກ 60+ ໃນພິທີເລີ່ມດຳເນີນເຫດແຕ່ວັນທີ 5/3, ຢູ່ມະຫາວິທະຍາໄລຊັບພະວິຊາ ຮ່າໂນ້ຍ. ຫຼັງຈາກນັ້ນ, ບັນດານັກອາສາສະໝັກສືບຕໍ່ເຂົ້າຮ່ວມການແລ່ນ ແລະ ຖີບລົດຢູ່ສວນສາທາລະນະ ເກົ່າໄຢ໋ ໃນວັນທີ 12/3 ຜ່ານມາ. ພ້ອມກັນນັ້ນ, ບັນດານັກຮຽນ, ນັກສຶກສາຍັງເຂົ້າຮ່ວມການເສັງອອກແບບຖົງແພ ບໍ່ສົ່ງມົນລະພິດເຖິງສິ່ງແວດລ້ອມ, ປູກຕົ້ນໄມ້, ຮັບເອົາຄຳໝັ້ນສັນຍາຈາກປະຊາຊົນ, ຫົວໜ່ວຍດຳເນີນທຸລະກິດ, ບັນດາອົງການ, ສຳນັກງານກ່ຽວກັບການຕອບສະໜອງເຫດມອດໄຟ1 ຊົ່ວໂມງເພື່ອໜ່ວຍໂລກໃນມື້ນີ້. ເມື່ອແບ່ງປັນກ່ຽວກັບເຫດການນີ້, ອ້າຍ ຫງວຽນແຄ໋ງແທ່ງ, ຫົວໜ້າສະໂມສອນ Green4 Life, ຫົວໜ້າຄະນະປະສານງານ ນັກອາສາສະໝັກໃນເຫດການມອດໄຟ 1 ຊົ່ວໂມງເພື່ອໜ່ວຍໂລກ ປີ 2016 ຢູ່ ຮ່າໂນ້ຍ, ໃຫ້ຮູ້ວ່າ:
“ສານຂອງເຫດການປີນີ້ແມ່ນ “ການກະທຳນ້ອຍ, ແຕ່ຄວາມໝາຍໃຫຍ່“, ຜ່ານນັ້ນພວກຂ້າພະເຈົ້າຢາກສົ່ງຄຳຕັກເຕືອນເຖິງປະຊາຄົມທີ່ວ່າ, ພວກເຮົາບໍ່ພຽງແຕ່ປະຢັດແຫຼ່ງໄຟຟ້າເທົ່ານັ້ນ, ຫາກຍັງປະຢັດບັນດາຊັບພະຍາກອນອື່ນໆເຊັ່ນ: ນຳ້, ອາຫານອີກດ້ວຍ, ຫຼືທຳຄວາມຊິນເຄີຍກັບເລື່ອງບໍ່ປ່ອຍສິ່ງເສດເຫຼືອກໍ່ມົນລະພິດເຖິງສິ່ງແວດລ້ອມ. ຂ້າພະເຈົ້າເຊື່ອໝັ້ນວ່າ, ຈາກການກະທຳນ້ອຍໆຄືແນວນີ້, ຖ້າພວກເຮົາທຸກຄົນຮ່ວມແຮງຮ່ວມໃຈພ້ອມກັນເຮັດ, ປະເທດຊາດ ແລະ ສິ່ງແວດລ້ອມຂອງພວກເຮົານັບມື້ນັບປອດໄສ, ແລະ ຂຽວສົດງົດງາມກວ່າ“.
ບໍ່ພຽງແຕ່ຢູ່ ຮ່າໂນ້ຍ, ຫາກຢູ່ບັນດາທ້ອງຖີ່ນອື່ນໆ, ບັນດານັກຮຽນ, ນັກສຶກສາ, ເຊິ່ງແມ່ນນັກອາສາສະໝັກກໍ່ໄດ້ເຂົ້າຮ່ວມເຫດການມອດໄຟ 1 ຊົ່ວໂມງເພື່ອໜ່ວຍໂລກປີນີ້ຢ່າງສຸດຈິດສຸດໃຈ. ເມື່ອຮອດຍາມແລງທຸກວັນ, ຢູ່ເຂດອະນຸສາວະລີ ຫງວຽນວັນກື່, ນະຄອນ ບັກນິງ, ມີນັກຮຽນ, ນັກສຶກສາໃນບໍລິເວນນະຄອນ 300 ກວ່າຄົນໄດ້ເຂົ້າຮ່ວມການເຕັ້ນ Flashmob ເພື່ອສົ່ງສານກ່ຽວກັບການປົກປັກຮັກສາສິ່ງແວດລ້ອມ.
ເທບສຽງປະກອບ
ສຳລັບນັກຮຽນ, ນັກສຶກສາແລ້ວ, ເລື່ອງເຂົ້າຮ່ວມ ເຫດການມອດໄຟ 1 ຊົ່ວໂມງເພື່ອໜ່ວຍໂລກ ແມ່ນການເຄື່ອນໄຫວທີ່ໃໝ່ອ່ຽມ ແລະ ຈັບອົກຈັບໃຈ. ນີ້ກໍ່ແມ່ນໂອກາດເພື່ອໃຫ້ພວກເພື່ອນແລກປ່ຽນ, ແບ່ງປັນບົດຮຽນໃນການປົກປັກຮັກສາສິ່ງແວດລ້ອມ. ແບ່ງປັນຄວາມຮູ້ສຶກຂອງຕົນເມື່ອເຂົ້າຮ່ວມ ເຫດການມອດໄຟ 1 ຊົ່ວໂມງເພື່ອໜ່ວຍໂລກ, ເພື່ອນ ຫງວຽນທິລານ, ຫົວໜ້າສະໂມສອນ ຫາຍເອົາ, ໂຮງຮຽນລົງເລິກ ບັກນິງ, ໃຫ້ຮູ້ວ່າ:
“ຂ້າພະເຈົ້າເອງເຂົ້າໃຈໄດ້ກ່ຽວກັບເລື່ອງນຳໃຊ້ພະລັງງານປະຈຳວັນແມ່ນຄືແນວໃດ ແລະ ເຫດການມອດໄຟ 1 ຊົ່ວໂມງເພື່ອໜ່ວຍໂລກນີ້ມີປະໂຫຍດໃຫ້ສິ່ງແວດລ້ອມຄືແນວໃດ. ຍ້ອນເຫດນັ້ນນ້ອງຈຶ່ງເຂົ້າຮ່ວມເພື່ອຮຽກຮ້ອງທຸກຄົນພ້ອມກັນປະຢັດພະລັງງານໄຟຟ້າ, ເພື່ອປົກປັກຮັກສາແຫຼ່ງຊັບພະຍາກອນ, ທັງເປັນການປົກປັກຮັກສາປະເທດຫວຽດນາມ“
(ພາບປະກອບ)
ນີ້ແມ່ນປີທີ 8 ທີ່ຫວຽດນາມເຂົ້າຮ່ວມເຫດການມອດໄຟ 1 ຊົ່ວໂມງເພື່ອໜ່ວຍໂລກ. ເລື່ອງທີ່ນັບມື້ນັບມີນັກຮຽນ, ນັກສຶກສາເຂົ້າຮ່ວມ, ຕອບສະໜອງເຫດການນີ້ ໄດ້ປະກອບສ່ວນສຳຄັນໃນການປົກປັກຮັກສາສິ່ງແວດລ້ອມ ກໍ່ຄືຍົກສູງສະຕິຄວາມຮັບຜິດຊອບຂອງປະຊາຊົນແຕ່ລະຄົນໃນການປະຢັດພະລັງງານ.