(vovworld)-ຫວ່າງແລ້ວນີ້, ສະຫະພັນນັກຮົບເກົ່ານະຄອນຫຼວງວຽງຈັນ ແລະ ສະມາຄົມນັກຮົບເກົ່ານະຄອນໂຮ່ຈິມິນ ສົມທົບກັບໂຮງໝໍຕານະຄອນໂຮ່ຈິມິນ ແລະ ທະນາຄານ ຫວຽດຕິນແບງ ຈັດຕັ້ງການກວດ, ປິ່ນປົວ ແລະ ຜ່າຕັດຕາໂດຍບໍ່ເກັບຄ່າໃຫ້ແກ່ບັນດານັກຮົບເກົ່າ ແລະ ຍາດຕິພີນ້ອງຂອງເຂົາເຈົ້າ ແລະ ຜູ້ທຸກຍາກຢູ່ນະຄອນຫຼວງວຽງຈັນ. ນີ້ແມ່ນເທື່ອທີ 4 ໃນຮອບ 8 ປີທີ່ຜ່ານມາ, ໂຮງໝໍຕານະຄອນໂຮ່ຈິມິນ ໄດ້ແຕ່ງຕັ້ງທິມງານແພດໝໍທີ່ຊຳນານງານໄປກວດ, ປິ່ນປົວ ແລະ ຜ່າຕັດປ່ຽນແກ່ນຕາຂຸ້ນໂດຍບໍ່ເກັບຄ່າໃຫ້ຄົນທຸກຍາກຢູ່ທ້ອງຖິ່ນຕ່າງໆຂອງລາວ.
ທິມງານແພດໝໍຂອງໂຮງໝໍຕານະຄອນໂຮ່ຈິມິນ ພວມກວດຕາໃຫ້ຄົນເຈັບຫຼັງການຜ່າຕັດ |
ທ່ານນູສຸອຳ ແສງສຸລິດ ສັງກັດສະມາຄົມນັກຮົບເກົ່າເມືອງສີສັດຕະນາກ, ນະຄອນຫຼວງວຽງຈັນ, ອະດີດນັກຮົບຊ່າງແສງ, ປີນີ້ອາຍຸ 75 ປີ, ແມ່ນໜຶ່ງໃນຈຳນວນ 70 ຄົນທຳອິດ ໄດ້ຮັບການຜ່າຕັດປ່ຽນແກ່ນຕາຂຸ້ນໂດຍບໍ່ເກັບຄ່າຈາກທິມງານແພດໝໍຂອງ ໂຮງໝໍຕານະຄອນໂຮ່ຈິມິນ. ທ່ານນູສຸອຳ ແສງສຸລິດ ໃຫ້ຮູ້ວ່າ :
“ ຕາຂອງຂ້າພະເຈົ້າບໍ່ເຫັນຮຸ່ງແຕ່ກ່ອນນີ້ 7 ປີ, ປະຈຸບັນໄດ້ຮັບການຜ່າຕັດປ່ຽນແກ່ນຕາຂຸ້ນໂດຍບໍ່ເກັບຄ່າຈາກແພດໝໍຫວຽດນາມ.ຂ້າພະເຈົ້າດີໃຈຫຼາຍ ”
ທິມງານແພດໝໍຂອງ ໂຮງໝໍຕານະຄອນໂຮ່ຈິມິນໂດຍສາດສະດາຈານ, ດຣ, ທ່ານໝໍ ເຈີນແອງຕ້ວນ ຜູ້ອຳນວຍການ ໂຮງໝໍຕານະຄອນໂຮ່ຈິມິນ ພ້ອມກັບທ່ານໝໍຂະແໜງຕາກວ່າ 20 ຄົນ ໄດ້ດຳເນີນການກວດ, ປິ່ນປົວ ແລະ ຜ່າຕັດຕາໂດຍບໍ່ເກັບຄ່າໃຫ້ແກ່ບັນດານັກຮົບເກົ່າ ແລະ ຍາດຕິພີນ້ອງຂອງເຂົາເຈົ້າ ແລະ ຜູ້ທຸກຍາກ. ມີຄົນເຈັບປະມານ 200 ຄົນໄດ້ຮັບການຜ່າຕັດຕາໃນຄັ້ງນີ້. ສາດສະດາຈານ, ດຣ, ທ່ານໝໍ ເຈີນແອງຕ້ວນ ຜູ້ອຳນວຍການໂຮງໝໍຕານະຄອນໂຮ່ຈິມິນໃຫ້ຮູ້ວ່າ :
“ ພວກຂ້າພະເຈົ້າມານີ້ ກໍນຳພາຫະນະອຸປະກອນທີ່ທັນສະໄໝ, ແກ່ນຕາທຽມ, ວັດຖຸການແພດທີ່ຈຳເປັນເພື່ອຮັບໃຊ້ຄົນເຈັບ. ນອກຈາກຈຸດປະສົງຜ່າຕັດໃຫ້ຄົນທຸກຍາກແລ້ວ, ພວກຂ້າພະເຈົ້າຍັງຢາກແລກປ່ຽນກັບເພື່ອນຮ່ວມອາຊີບລາວຢູ່ໂຮງໝໍຕາສູນກາງກ່ຽວກັບເຕັກນິກການຜ່າຕັດ, ກໍຄືການຮ່ວມມືບຳລຸງສ້າງໃຫ້ແພດໝໍລາວ ”
ທ່ານອະນຸສອນ ພັນນະວົງ ກຳມະກອນ ເມືອງສີຄົດຕະບອງ ດີໃຈທີ່ສຸດເມື່ອໄດ້ຮັບການຜ່າຕັດຕາໂດຍບໍ່ເກັບຄ່າ ແລະ ໄດ້ເຫັນຮຸ່ງແລ້ວ. ທ່ານອະນຸສອນ ພັນນະວົງ ເວົ້າວ່າ :
“ ຂ້າພະເຈົ້າດີໃຈຫຼາຍເພາະໄດ້ຮັບການຊ່ວຍເຫຼືອຈາກສະມາຄົມນົກຮົບເກົ່າ. ຄອບຄົວຂ້າພະເຈົ້າປະສົບຄວາມຫຍຸ້ງຍາກ, ບໍ່ມີເງິນເພື່ອຜ່າຕັດ. ຂ້າພະເຈົ້າ ແລະ ຄອບຄົວຂອບໃຈນຳທ່ານໝໍຫວຽດນາມຫຼາຍໆ ”
ສ່ວນທ່ານຄຳພູ ສຸດທິສົມບັດ ຜູ້ອຳນວຍການສູນປິ່ນປົວ ແລະ ຮັກສາຕາ, ກະຊວງສາທາລະນະສຸກລາວໃຫ້ຮູ້ວ່າ :
“ ໂຄງການຜ່າຕັດປ່ຽນແກ່ນຕາຂຸ້ນ, ພວກຂ້າພະເຈົ້າປະຕິບັດມາຫຼາຍຄັ້ງແລ້ວ. ໂຄງການນີ້ ໄດ້ນຳມາເຊິ່ງຜົນປະໂຫຍດໃຫ້ຄົນທຸກຍາກ, ຊ່ວຍນຳແສງສະຫວ່າງມາສູ່ຄົນພິການຕາ. ໂຄງການນີ້ແມ່ນມີຄວາມໝາຍອັນໃຫຍ່ຫຼວງເພາະໄດ້ສ້າງໂອກາດໃຫ້ຄົນທຸກຍາກເຂົ້າເຖິງການບໍລິການທີ່ດີທີ່ສຸດ, ຊ່ວຍໃຫ້ເຂົາເຈົ້າເຫັນຮຸ່ງ ແລະ ກັບຄືນສູ່ການເຄື່ອນໄຫວໃນການດຳລົງຊີວິດເປັນປົກກະຕິ, ສ້າງຊີວິດຄອບຄົວ… ”