(vovworld) - ບັນດາບົດເພງຂຽນກ່ຽວກັບປະທານ ໂຮ່ຈີມິນ ຍາມໃດກໍ່ແມ່ນບົດເພງໄດ້ຮັບຄວາມນິຍົມ ແລະ ໄດ້ຮັບການເຜີນແຜ່ຢ່າງກວ້າງຂວາງໃນໝູ່ປະຊາຊົນ. ເມື່ອພັນລະນາກ່ຽວກັບເພິ່ນ, ບັນດານັກປະພັນດົນຕີຍາມໃດກໍ່ຮູ້ສຶກສະເທືອນໃຈທີ່ສຸດ, ຍ້ອນເຫດນັ້ນບັນດາບົດເພງຂອງນັກດົນຕີທຸກຄົນ ລ້ວນແຕ່ສະແດງໃຫ້ເຫັນອາລົມຈິດ, ຄວາມນັບຖື, ກໍ່ຄືຄວາມຮູ້ບຸນຄູນຕໍ່ປະທານ ໂຮ່ຈີມິນ, ຜູ້ນຳທີ່ແສນເຄົາລົບຮັກຂອງຫວຽດນາມ ທີ່ສຸດ.
ພາບປະກອບ |
ສຳລັບຊາວຫວຽດນາມ, ປະທານໂຮ່ຈີມິນ ບໍ່ພຽງແຕ່ເປັນຜູ້ສ້າງພື້ນຖານ ແລະ ຊີ້ນຳ, ນຳພາການຕໍ່ສູ້ຍາດເອົາເອກະລາດໃຫ້ແກ່ປະເທດຊາດເທົ່ານັ້ນ, ຫາກຍັງແມ່ນຜູ້ທີ່ມີຄວາມຮັກເພງ ແລະ ສຸດຈິດສຸດໃຈຕໍ່ປະຊາຊົນ ແລະ ມວນມະນຸດອີກດ້ວຍ, ຍ້ອນເຫດນັ້ນ, ປະທານ ໂຮ່ຈີມິນ ຍາມໃດກໍ່ເປັນແຫຼ່ງສະອອນໃຈຢ່າງລົ້ນເຫຼືອຂອງບັນດານັກປະພັນດົນຕີໃນທົ່ວປະເທດຕະຫຼອດໄປ. ມີຫຼາຍບົດເພງຍ້ອງຍໍສັນລະເສີນປະທານ ໂຮ່ຈີມິນ ໄດ້ກາຍເປັນອາຫານດ້ານຈິດໃຈທີ່ຂາດບໍ່ໄດ້ຂອງຊາວຫວຽດນາມ.
ພາຍຫຼັງໄຊຊະນະບວນມາທວດ, ເຫວ໋, ດ່ານັ້ງ ມື້ໜຶ່ງ, ນັກຂ່າວ ດັງຈູງ ໄດ້ຂຽນບົດພິເສດກ່ຽວກັບນະຄອນໄຊງ່ອນເພື່ອຕ້ອນຮັບວັນໄຊຊະນະ, ນັ້ນແມ່ນບົດກະວີ “ຈາກນະຄອນນີ້ປະທານໂຮ່ຈີມິນໄດ້ອອກໄປ“. ເມື່ອບົດກະວີນີ້ຂຽນສຳເລັດ, ນັກດົນຕີ ກາວຫວຽດແບກ ກໍ່ປະສານດົນຕີເປັນບົດເພງ “ສຽງເພງຈາກນະຄອນທີ່ໃສ່ຊື່ປະທານ ໂຮ່ຈີມິນ“
“ສຽງເພງຈາກນະຄອນທີ່ໃສ່ຊື່ປະທານ ໂຮ່ຈີມິນ"
ເຖິງວ່າບົດເພງຖືກແຕ່ງຂຶ້ນເມື່ອປະທານ ໂຮ່ຈີມິນ ໄດ້ລວງລັບໄປແລ້ວກໍ່ຕາມ, ແຕ່ຮູບພາບຂອງເພິ່ນຍັງຄົງຝັງເລິກໃນດວງໃຈຂອງຊາວຫວຽດນາມ ແຕ່ລະຄົນຢູ່. ເມື່ອເວົ້າເຖິງຄວາມຮູ້ສຶກຕໍ່ບົດເພງນີ້, ທ່ານ ຫງວຽນຫື້ວເຈົາ , ອະດີດນັກຂ່າວວິທະຍຸກະຈາຍສຽງປົດປ່ອຍ, ໃຫ້ຮູ້ວ່າ:
“ອາດເວົ້າໄດ້ວ່າ, ບົດເພງນີ້ສະຫງ່າອົງອາດ ແລະ ຟົດຟື້ນທີ່ສຸດ, ແຕ່ຕອນທີ່ຂ້າພະເຈົ້ານິຍົມທີ່ສຸດນັ້ນແມ່ນ: ຮູບພາບປະທານ ໂຮ່ຈີມິນ ຍາມໃດກໍ່ຝັງເລິກໃນດວງໃຈ, ໃນຄວາມໄຝ່ຝັນ, ໃນຊີວິດຂອງແຕ່ລະຄົນ, ສິ່ງດັ່ງກ່າວສະແດງໃຫ້ເຫັນຄວາມມະຫາສາມັກຄີຂອງຊາດ, ເຊິ່ງລຸງໂຮ່ເປັນສັນຍາລັກ“.
ບັນດາບົດເພງກ່ຽວກັບປະທານ ໂຮ່ຈີມິນ ຈະຍືນຍົງຄົງຕົວໃນດວງໃຈຂອງຊາວຫວຽດນາມ ທຸກຄົນ ແລະ ຮູບພາບຂອງເພິ່ນກໍ່ຍືນຍົງຄົງຕົວກັບການເວລາ. ນີ້ກໍ່ແມ່ນເນື້ອໃນບົດເພງຍ້ອງຍໍປະທານ ໂຮ່ຈີມິນ ຂອງນັກປະພັນດົນຕີ ວັນກາວ. ບັນດາບົດເພງກ່ຽວກັບປະທານ ໂຮ່ຈີມິນ ບໍ່ພຽງແຕ່ນັກດົນຕີທີ່ມີຊື່ສຽງລຸ້ນກ່ອນສະແດງສຳເລັດຜົນເທົ່ານັ້ນ, ຫາກນັກຮ້ອງໜຸ່ມຫຼາຍຄົນກໍ່ສະແດງໄດ້ດີອີກດ້ວຍ.
ບົດເພງຍ້ອງຍໍປະທານ ໂຮ່ຈີມິນ
ພາບປະກອບ
|
ນັກຮ້ອງໜຸ່ມ ຕຸ່ງເຢືອງ ແມ່ນໜຶ່ງໃນບັນດາຜູ້ສະແດງບົດເພງຍ້ອງຍໍປະທານ ໂຮ່ຈີມິນສຳເລັດຜົນ, ໄດ້ເວົ້າເຖິງຄວາມຮູ້ສຶກຂອງຕົນເມື່ອຂັບຮ້ອງບົດເພງນີ້ວ່າ:
“ນີ້ແມ່ນບົດເພງທີ່ນັກສິລະປິນຜູ້ມີຊື່ສຽງຫຼາຍຄົນໄດ້ສະແດງ. ສຳລັບຂ້າພະເຈົ້າແລ້ວ, ແຕ່ລະເທື່ອເມື່ອສະແດງບົດເພງນີ້, ກໍ່ຮູ້ສຶກເອກອ້າງທະນົງໃຈ ແລະ ສະເທືອນໃຈທີ່ສຸດ“.
ແຕ່ລະບົດເພງໄດ້ສະແດງໃຫ້ເຫັນຄວາມຮູ້ສຶກສະເພາະຂອງນັກດົນຕີ, ແຕ່ທັງໝົດລ້ວນແຕ່ວາດພາບຮູບພາບຜູ້ທີ່ເປັນຕົວແທນໃຫ້ປັນຍາ ແລະ ຈິດໃຈຂອງຫວຽດນາມ. ຮອງສາສະດາຈານ, ດຣ ຫງວຽນມິງທ໋າຍ, ແບ່ງປັນວ່າ:
“ບັນດາບົດເພງຍ້ອງຍໍປະທານ ໂຮ່ຈີມິນ ມີລັກສະນະການເມືອງສູງ. ການຍ້ອງຍໍສັນລະເສີນປະທານ ໂຮ່ຈີມິນ ກໍ່ແມ່ນຄວາມແສນສະຫງ່າຂອງປະຊາຊົນຫວຽດນາມ. ພວກເຮົາຮູ້ສຶກເອກອ້າງທະນົງໃຈທີ່ມີລຸງໂຮ່ ແລະ ມີບັນດານັກດົນຕີທີ່ໄດ້ຂຽນບັນດາບົດເພງກ່ຽວກັບລຸງໂຮ່ມ່ວນຄືແນວນັ້ນ“.
ບັນດາບົດເພງກ່ຽວກັບປະທານ ໂຮ່ຈີມິນ ສ່ວນຫຼາຍ ລ້ວນແຕ່ວາດພາບຮູບພາບຜູ້ນຳທີ່ຍິ່ງໃຫຍ່ ແຕ່ສຸດທີ່ລຽບງ່າຍ ແລະ ແສນຮັກ. ນີ້ກໍ່ແມ່ນສາຍເຫດທີ່ພາໃຫ້ບັນດາບົດເພງກ່ຽວກັບລຸງໂຮ່ ຍາມໃດກໍ່ສ້າງຄວາມປະທັບໃຈໃຫ້ແກ່ຜູ້ນິຍົມດົນຕີຫວຽດນາມ.