(ເທດສະບານ ເຈື່ອງຊາ)
(vovworld) - ລະດູບານໃໝ່ໄດ້ວຽນມາໃນທົ່ວປະເທດຫວຽດນາມ, ຈາກເຂດພູດອຍເຖິງເຂດໝູ່ເກາະຫ່າງໄກ. ຢູ່ໝູ່ເກາະ ເຈື່ອງຊາ, ບັນຍາກາດຕ້ອນຮັບບຸນເຕັດປີວອກໄດ້ປະກົດຢູ່ເກາະຕ່າງໆໃນໝູ່ເກາະນີ້. ຄວາມເບີກບານມ່ວນຊື່ນໄດ້ສະແດງອອກໃນໜ້າຕາຂອງພະນັກງານ, ນັກຮົບ ແລະ ປະຊາຊົນເມືອງເກາະ. ຢູ່ເທດສະບານ ເຈື່ອງຊາ, ແຫ່ງທີ່ຖືວ່າເປັນ “ນະຄອນຫຼວງ“ ຂອງເມືອງ ເຈື່ອງຊາ, ແຂວງ ແຄ໋ງຮ່ວາ, ພະນັກງານ, ນັກຮົບ ແລະ ປະຊາຊົນຢູ່ທີ່ນີ້ພວມເຈືອຈານໃນການເຄື່ອນໄຫວສິລະປະ ວັດທະນະທຳຄຳນັບຮັບຕ້ອນບຸນເຕັດປີວອກ.
ບຸນເຕັດຢູ່ເມືອງເກາະ ເຈື່ອງຊາ ແລະ ເທດສະບານ ເຈື່ອງຊາ, ເລີ່ມຕົ້ນນັບແຕ່ບັນດາຖ້ຽວກໍ່າປັ່ນທີ່ນຳເອົາສິນຄ້າ, ເຄື່ອງຂອງຮັບໃຊ້ບຸນເຕັດຈາກດິນຕໍ່ແຜ່ນມາຢ້ຽມຢາມ ແລະ ອວຍພອນບຸນເຕັດຢູ່ເກາະຕ່າງໆ. ນັບແຕ່ວັນທີ່ກໍ່າປັ່ນເຂົ້າທຽບທ່າ, ບັນດາພະນັກງານ, ນັກຮົບ ແລະ ປະຊາຊົນກໍ່ຟ້າວຟັ່ງກັບວຽກງານກະກຽມຕ້ອນຮັບບຸນເຕັດ. ວຽກງານທຸກຢ່າງເຊັ່ນ: ຫໍ່ເຂົ້າຕົ້ມ, ທາປູນ, ປະດັບປະດາເຮືອນຊານ, ກະກຽມພາໝາກໄມ້ 5 ຊະນິດ ກໍ່ຄືລາຍການສະແດງສິລະປະໃຫ້ຄໍ່າຄືນສົ່ງທ້າຍປີເກົ່າຕ້ອນຮັບປີໃໝ່. ເອື້ອຍ ຫວໍທິທູຊາງ, ຊາວເທດສະບານ ເຈື່ອງຊາ, ແບ່ງປັນວ່າ, ຢູ່ເກາະບັນຍາກາດຕ້ອນຮັບບຸນເຕັດບໍ່ຟົດຟື້ນຄືຢູ່ເຂດດິນຕໍ່ແຜ່ນ, ແຕ່ປະຊາຊົນທຸກຄົນພັດຮັບຮູ້ໄດ້ຄວາມສາມັກຄີຊະນິດຕິດພັນຂອງກອງທັບ ແລະ ປະຊາຊົນໃນທົ່ວປະເທດທີ່ສະຫງວນໃຫ້ແກ່ບັນດານັກຮົບ ແລະ ປະຊາຊົນຢູ່ເທດສະບານ ເຈື່ອງຊາ.
“ພວກຂ້າພະເຈົ້າກະກຽມຕ້ອນຮັບບຸນເຕັດນັບແຕ່ວັນທີ 25 ເດືອນ 12 (ໄລ່ຕາມຈັນທະປະຕິທິນ). ເຖິງວ່າບໍ່ໄດ້ຕ້ອນຮັບບຸນເຕັດພ້ອມກັບຄອບຄົວກໍ່ຕາມ, ແຕ່ພວກເຮົາກໍ່ຮູ້ສຶກອົບອຸ່ນ, ທຸກຄົນອວຍພອນກັນປຽບເໝືອນອ້າຍນ້ອງໃນຄອບຄົວດຽວ. ປີນີ້ບຸນເຕັດມີຄວາມອົບອຸ່ນ ແລະ ຄົບຖ້ວນກວ່າຊຸມປີກ່ອນ“.
ບຸນເຕັດຢູ່ເກາະທີ່ຫ່າງໄກໃນປະຈຸບັນແມ່ນຄົບຖ້ວນທຸກສິ່ງທຸກຢ່າງຄືຢູ່ເຂດດິນຕໍ່ແຜ່ນ. ນອກຈາກສິນຄ້າທີ່ສົ່ງມາຈາກເຂດດິນຕໍ່ແຜ່ນແລ້ວ, ເທດສະບານ ເຈື່ອງຊາຍັງກະກຽມທັນຍາຫານ, ສະບຽງອາຫານເຊັ່ນ: ຊີ້ນເປັດ, ຊີ້ນໄກ່, ຊີ້ໝູ, ປາສົດ, ຜັກ ແລະ ໝາກໄມ້ໃຫ້ຊຸມວັນບຸນເຕັດຢ່າງຄົບຖ້ວນ. ເອື້ອຍ ເລທິຈຸກຮ່າ, ຊາວເທດສະບານ, ໃຫ້ຮູ້ວ່າ:
“ໂດຍໄດ້ຮັບຄວາມເອົາໃຈໃສ່ຈາກເຂດດິນຕໍ່ແຜ່ນ ແລະ ຂອງອຳນາດການປົກຄອງທ້ອງຖີ່ນ, ດັ່ງນັ້ນບຸນເຕັດກໍ່ມີເຂົ້າຕົ້ມ, ຊີ້ນໝູ, ແກງໜໍ່ໄມ້, ໄກ່, ເປັດຢ່າງຄົບຖ້ວນ, ນອກນັ້ນພວກເຮົາຍັງເຮັດເຂົ້າໜົມຫຼາຍປະເພດອີກ“.
ບຸນເຕັດປີນີ້, ເທດສະບານ ເຈື່ອງຊາໄດ້ຕ້ອນຮັບແຂກພິເສດ, ນັ້ນແມ່ນສະມາຊິກຊາວໜຸ່ມ 5 ຄົນຈາກ “ສະໂມສອນໄວໜຸ່ມເພື່ອທະເລໝູ່ເກາະຂອງປະເທດຊາດ“ ທີ່ນຳເອົາເຂົ້າຕົ້ມ 2016 ຫໍ່ ໂດຍບັນດາສະມາຊິກຊາວໜຸ່ມໃນສະໂມສອນຫໍ່ແລະຕົ້ມເອງມາຕ້ອນຮັບບຸນເຕັດພ້ອມກັບທະຫານແລະປະຊາຊົນໃນເກາະ. ເອື້ອຍ ບຸ່ຍທິຮົ່ງຢວຽນ, ຊົນເຜົ່າເມື່ອງ, ເມືອງ ລາກເຊີນ, ແຂວງ ຮ່ວາບິ່ງ, ສະມາຊິກໃນຄະນະປະຕິບັດງານ, ແບ່ງປັນວ່າ:
“ບຸນເຕັດປີນີ້ພິເສດ ແລະ ມີຄວາມໝາຍທີ່ສຸດໃນຊີວິດຂອງຂ້າພະເຈົ້າ, ຍ້ອນໄດ້ຕ້ອນຮັບບຸນເຕັດພ້ອມກັບນັກຮົບ ແລະ ປະຊາຊົນໃນເກາະ“.
ຄໍ່າຄືນສົ່ງທ້າຍປີເກົ່າຕ້ອນຮັບປີໃໝ່, ບັນດາການເຄື່ອນໄຫວສິລະປະ, ວັດທະນະທຳ, ກິລາ… ກໍ່ດຳເນີນຢູ່ເທດສະບານ ເຈື່ອງຊາ. ບັນດາພະນັກງານ, ນັກຮົບ ແລະ ປະຊາຊົນພ້ອມກັນເຂົ້າຮ່ວມງານບຸນ ແລະ ຮັບຟັງຄຳອວຍພອນປີໃໝ່ຂອງປະທານປະເທດ.
(ພິທີເຄົາລົບທຸງຊາດ)
ສິ່ງທີ່ເຄັ່ງຂຶມ ແລະ ສັກສິດທີ່ສຸດໃນຊຸມວັນບຸນເຕັດຢູ່ໝູ່ເກາະ ເຈື່ອງຊາແມ່ນພິທີເຄົາລົບທຸງຊາດໃນຕອນເຊົ້າວັນທຳອິດຂອງປີໃໝ່ປີວອກ, ພະນັກງານ, ນັກຮົບໃນຊຸດເຄື່ອງແບບທະຫານ ພ້ອມກັບປະຊາຊົນ, ເດັກນ້ອຍຢືນເປັນແຖວຢ່າງເຄັ່ງຂຶມໃຕ້ທຸງຊາດສີແດງດາວເຫຼືອງພວມປິວສະບັດໃນແສງຕາເວັນຍາມເຊົ້າຕົ້ນປີເພື່ອຄຳນັບທຸງ. ພັນຕີ ຫງວຽນວັນຕ໋ວນ, ນັກການເມືອງຂອງເກາະ ເຈື່ອງຊາ, ແບ່ງປັນວ່າ:
“ຄຳນັບທຸງຍາມຕົ້ນປີໃໝ່ແມ່ນພິທີທີ່ມີຄວາມໝາຍທີ່ສຸດສຳລັບຊາວ ຫວຽດນາມແຕ່ລະຄົນ, ພິເສດ, ມັນມີຄວາມໝາຍກວ່າເມື່ອດຳເນີນຢູ່ໝູ່ເກາະ ເຈື່ອງຊາ, ເຂດແດນທີ່ສັກກະລະບູຊາຂອງປະເທດຊາດ. ພິທີເຄົາລົບທຸງຊາດຍາມຕົ້ນປີໄດ້ສ້າງຄວາມສະເທືອນໃຈທີ່ສຸດໃຫ້ແກ່ຂ້າພະເຈົ້າ. ຂ້າພະເຈົ້າຮູ້ສຶກເອກອ້າງທະນົງໃຈເມື່ອເປັນກຽດທີ່ໄດ້ຄຳນັບທຸງຊາດພ້ອມກັບພະນັກງານ, ນັກຮົບໃນເກາະເຈື່ອງຊາຍາມຕົ້ນລະດູບານໃໝ່. ເວລານັ້ນຂ້າພະເຈົ້າປາຖະໜາວ່າພະນັກງານ, ນັກຮົບ ແລະ ປະຊາຊົນໃນເກາະຈະມີສຸຂະພາບເຂັ້ມແຂງ, ມີຄວາມສາມັກຄີ, ປີໃໝ່ໄດ້ຮັບໄຊຊະນະໃໝ່ ແລະ ປະຕິບັດສຳເລັດໜ້າທີ່ໃນເກາະ, ທະເລຂອງປະເທດຊາດ“.
ພາຍຫຼັງພິທີຄຳນັບທຸງຊາດ, ພະນັກງານ, ນັກຮົບ ແລະ ປະຊາຊົນເທດສະບານ ເຈື່ອງຊາພ້ອມກັນເຂົ້າວັດຈູດທູບທຽນ ພາວະນາໃຫ້ປີໃໝ່ມີຄວາມຢູ່ເຢັນເປັນສຸກ, ຫຼັງຈາກນັ້ນຖະຫວາຍທູບທຽນຢູ່ອານຸສອນສະຖານປະທານ ໂຮ່ຈີມິນ ແລະ ອະນຸສາວະລີບັນດານັກຮົບທີ່ເສຍສະຫຼະຊີວິດເພື່ອຊາດ.
ຕໍ່ຈາກນັ້ນ, ພະນັກງານ, ນັກຮົບ ແລະ ປະຊາຊົນໃນເກາະພ້ອມກັນມາຢ້ຽມຢາມແຕ່ລະຄອບຄົວປະຊາຊົນ, ແຮກໝານສຳນັກງານ, ອວຍພອນກັນປີໃໝ່ປະສົບແຕ່ຄວາມໂຊກດີ.
(ບັນດານັກຮົບພວມກະກຽມດອກໄມ້)
ໃນຊຸມວັນບຸນເຕັດ, ບັນຍາກາດຢູ່ເທດສະບານ ເຈື່ອງຊາມີຄວາມຟົດຟື້ນດ້ວຍການເຄື່ອນໄຫວກິລາ, ວັດທະນະທຳຄືຢູ່ເຂດດິນຕໍ່ແຜ່ນ, ພະນັກງານ, ນັກຮົບ ແລະ ປະຊາຊົນພ້ອມກັນເຂົ້າຮ່ວມການລະຫຼິ້ນພື້ນເມືອງຕ່າງໆ. ພັນຕີ ໂດຫາຍດັງ, ນັກການເມືອງ, ຮອງຫົວໜ້າເກາະ ເຈື່ອງຊາ, ໃຫ້ຮູ້ວ່າ:
“ໃນບຸນເຕັດພວກຂ້າພະເຈົ້າຈັດຕັ້ງການເຄື່ອນໄຫວກິລາຫຼາຍຢ່າງເຊັ່ນ: ດຶງເຊືອກ, ເຕະບານ, ບານສົ່ງ. ພວກເຮົາຈັດຕັ້ງການເຄື່ອນໄຫວແຂ່ງຂັນລະຫວ່າງບັນດາກົມກອງນຳກັນ, ສ້າງເງື່ອນໄຂໃຫ້ພະນັກງານ, ນັກຮົບ ແລະ ປະຊາຊົນເຂົ້າຮ່ວມເພື່ອອອກກຳລັງກາຍເຮັດໃຫ້ຂຸຂະພາບຂອງອ້າຍນ້ອງເຂັ້ມແຂງກວ່າອີກ“.
ພາຍຫຼັງຊຸມວັນບຸນເຕັດທີ່ອົບອຸ່ນ, ເຕັມໄປດ້ວຍນ້ຳໃຈອັນສະໜິດສະໜົມລະຫວ່າງພະນັກງານ, ນັກຮົບ ແລະ ປະຊາຊົນເທດສະບານ ເຈື່ອງຊາ, ເຂົາເຈົ້າກໍ່ເລີ່ມກ້າວເຂົ້າສູ່ຊຸມວັນເຮັດວຽກດ້ວຍຄວາມປາຖະໜາວ່າປີໃໝ່ມີຄວາມສະຫງົບສຸກ. ເຖິງວ່າຈະຢູ່ໄກຈາກເຂດດິນຕໍ່ແຜ່ນ ແລະ ຍັງປະສົບກັບຄວາມຫຍຸ້ງຍາກຂາດເຂີນບໍ່ແມ່ນໜ້ອຍ, ແຕ່ບັນດາພະນັກງານນັກຮົບໃນເກາະຍາມໃດກໍ່ພ້ອມແລ້ວທີ່ຈະປົກປັກຮັກສາປະເທດຊາດ, ຮັກສາຄວາມໄວ້ເນື້ອເຊື່ອໃຈເຊິ່ງປະຊາຊົນໃນເຂດດິນຕໍ່ແຜ່ນໄດ້ມອບໝາຍໃຫ້.