(vovworld)-ບ້ານຄວກ ຂຶ້ນກັບຕາແສງ ຟອງເຈົາ ເມືອງ ດົງຮືງ ແຂວງ ທາຍບີງ ແມ່ນຫນຶ່ງໃນ ອູ່ຂັບແຈ່ວ 7 ແຫ່ງຂອງຫວຽດນາມ ດ້ວຍກອງຂັບແຈ່ວນັບສີບໆກອງໄປສະແດງຢູ່ທຸກແຖບຖິ່ນຂອງປະເທດຊາດ. ຊາວບ້ານຄວກ ມີຊື່ສຽງດ້ວຍການຂັບແຈ່ວມ່ວນ, ຟ້ອນງາມ. ໃນລາຍການສາລະຄະດີພາກນີ້ ເຊີນທ່ານພ້ອມກັບນັກຂ່າວ ງອກງ່າ ມາຢ້ຽມຢາມບ້ານຄວກ-ໝູ່ບ້ານຂັບແຈ່ວທີ່ມີຊື່ສຽງຢູ່ແຂວງ ທາຍບີງ.
ຊາວບ້ານຄວກ ຜູ້ໃດກໍ່ຮູ້ຈັກຂັບແຈ່ວ
ພາບ:vov
|
ທີ່ທ່ານຫາກໍຮັບຟັງຜ່ານໄປແລ້ວນັ້ນ ແມ່ນສຽງຂັບແຈ່ວຂອງຫລານ ຟ້າມທິຫາຍ, ອາຍຸ 6 ປີ ຢູ່ ບ້ານຄວກ. ກໍເຊັນດຽວກັນກັບປະຊາຊົນທຸກຄົນໃນບ້ານ, ເມື່ອອາຍຸ 2-3 ປີ, ຫລານຫາຍໄດ້ຮູ້ຈັກຂັບແຈ່ວແລ້ວ. ບໍ່ຮູ້ຈັກວ່າຂັບແຈ່ວຢູ່ບ້ານຄວກມີມາແຕ່ເມື່ອໃດ, ພຽງແຕ່ໄດ້ຍິນວ່າ ຂັບແຈ່ວບ້ານຄວກມີຊື່ສຽງມາແຕ່ດົນນານແລ້ວ ແລະ ຂັບແຈ່ວໄດ້ນຳມາເຊິ່ງລາຍຮັບໃຫ້ແກ່ປະຊາຊົນຢູ່ທີ່ນີ້. ສະນັ້ນໃນການໂອ້ລົມນຳກັນ, ບາງເທຶື່ອຊາວບ້ານຄວກກໍນຳໃຊ້ທຳນອງແຈ່ວ. ປ້າ ຫງວຽນທິມີງ, ຊາວບ້ານຄວກ ແບ່ງປັນວ່າ:
“ຂ້າພະເຈົ້າເມົາມົວກັບທຳນອງແຈ່ວມາແຕ່ຄາວຍັງນ້ອຍ ແລະຢູ່ໃນຄອບຄົວຂ້າພະເຈົ້າ ລູກຫລານທຸກຄົນລ້ວນແຕ່ຮູ້ຈັກຂັບແຈ່ວ ແລະ ສາມາດສະແດງບົດລະຄອນແຈ່ວໃດຫນຶ່ງໄດ້. ເມື່ອມີໂອກາດໄດ້ຮັບຟັງການຂັບແຈ່ວ ຮູ້ສຶກວ່າມ່ວນຫລາຍ, ຈິດໃຈສະຫວາດສະເຫວີຍທີ່ສຸດ”
ເດັກນ້ອຍຢູ່ບ້ານຄວກຮຽນຂັບແຈ່ວ
ພາບ:internet
|
ທ່ານ ກວກວັນເຊົາ, ພະນັກງານວັດທະນະທຳ ຕາແສງ ຝອງເຈົາ ເມືອງ ດົງຮືງ ແຂວງ ທາຍບີງ ໃຫ້ຮູ້ວ່າ:
“ປະຊາຊົນທຸກຄົນຢູ່ບ້ານຄວກເມົາມົວກັບການຂັບແຈ່ວ ຍ້ອນວ່າເມື່ອຄາວຍັງນ້ອຍ ຜູ້ໃດກໍລ້ວນແຕ່ໄດ້ຮັບຟັງສຽງຂັບແຈ່ວຈາກແມ່ແລ້ວ. ສະນັ້ນ ສຽງຂັບແຈ່ວໄດ້ຝັງເລິກໃນດວງໃຈຂອງທຸກຄົນ. ການຂັບແຈ່ວຢູ່ບ້ານຄວກແມ່ນການດຳເນີນຊີວິດວັດທະນະທຳ ທີ່ຂາດບໍ່ໄດ້ສຳລັບຊາວບ້ານ.”
ປະຈຸບັນ ໃນກວ່າ 150 ທຳນອງຂັບແຈ່ວ ແລະ ບົດລະຄອນແຈ່ວ, ຊາວບ້ານຄວກ ສາມາດຂັບໄດ້ນັບຮ້ອຍທຳນອງ, ແລະ ບາງທຳນອງແຈ່ວພຽງແຕ່ຊາວບ້ານຄວກຂັບຄື: ຮ່າຫວີ້, ທູຄົງ, ຢວຽນເຟີ້ນ, ຕ໋າຕືເດືອງ ແລະ ບັນດາບົດລະຄອນແຈ່ວຄື: ຟານເຈີນ, ກີມຍານ, ຕົງເຈີນກຸກຮວາ. ບັນດານັກສິລະປະກອນບ້ານຄວກ ຍາມໃດກໍຮັກສາທຳນອງແຈ່ວບູຮານ. ທ່ານ ກວກວັນເຊົາ, ພະນັກງານວັດທະນະທຳ ຕາແສງ ແບ່ງປັນວ່າ:
“ຊາວ ບ້ານຄວກ ຂັບແຈ່ວມ່ວນ ແລະເກັ່ງກວ່າຊາວບ້ານອື່ນ, ລີລາການສະແດງກໍຈັບອົກຈັບໃຈ. ບາງເທື່ອເນື້ອເພງບໍ່ມີໃນບົດລະຄອນແຈ່ວ ແຕ່ເຂົາເຈົ້າສາມາດສ້າງທຳນອງແຈ່ວ ແລະ ຜູ້ຊົມບໍ່ສາມາດຈຳແນກໄດ້.”
ຜ່ານການຜັນແປ ແລະ ປ່ຽນແປງໃນຊີວິດ, ຂັບແຈ່ວບ້ານຄວກ ຍາມໃດກໍຍືນຍົງຄົງຕົວ ແລະ ຝັງເລິກໃນດວງໃຈຂອງຊາວບ້ານໝົດທຸກຄົນ. ການຮ້ອງລຳທຳເພງ, ຂັບແຈ່ວ ໄດ້ກາຍເປັນແບບແຜນການດຳລົງຊີວິດຂອງປະຊາຊົນບ້ານຄວກ, ພິເສດ ເມື່ອລະດູບານໃຫມ່ບຸນເຕັດວຽນມາ, ຜູ້ທີ່ຫ່າງໄກບ້ານເກີດເມືອງນອນກໍລ້ວນແຕ່ກັບເມືອເຕົ້າໂຮມກັນເພື່ອເຂົ້າຮ່ວມການປະກວດຂັບແຈ່ວພ້ອມກັບຊາວບ້ານ. ນີ້ກໍແມ່ນໂອກາດເພື່ອພົບປະກັນ, ຮ່ຳຮຽນເຊິ່ງກັນ ແລະ ກັນ ແລະ ກໍເພື່ອຮັບໃຊ້ປະຊາຊົນໃນບ້ານ.