(vovworld) - ຕຸກກະຕານ້ຳ ແມ່ນຮູບການສິລະປະທີ່ເປັນເອກະລັກສະເພາະ, ເຊິ່ງໄດ້ຮັບການກຳເນີດຈາກພື້ນຖານວັດທະນະທຳເຂົ້ານາທາມ. ພ້ອມກັບລະຄອນຕ່ວງ, ຂັບແຈ່ວ, ການສະແດງຕຸກກະຕານ້ຳໄດ້ຮັບຖືວ່າແມ່ນປະເພດສິລະປະທີ່ມີທີ່ຕັ້ງສູງໃນສິລະປະເວທີພື້ນເມືອງຄວນໄດ້ຮັບການຮັກສາ ແລະ ເສີມຂະຫຍາຍ. ນັກສິລະປິນສະແດງຕຸກກະຕານ້ຳ ຟານແທງລຽມ (Phan Thanh Liem) ແມ່ນຜູ້ນຳໜ້າໃນການສຳພັດກັບຜູ້ຊົມແບບໃໝ່ ດ້ວຍການລົງທຶນກໍ່ສ້າງເວທີສະແດງຕຸກກະຕານ້ຳໃນເຮືອນຫຼັງນ້ອຍຂອງຕົນ.
ພາບປະກອບ
ໂດຍນອນໃນຮ່ອມທາງນ້ອຍໆຢູ່ຖະໜົນ ເຄິມທຽນ (ຮ່າໂນ້ຍ). ນັບແຕ່ສອງ, ສາມປີມານີ້, ເວທີສະແດງຕຸກກະຕານ້ຳ ຂອງນັກສິລະປິນ ຟານແທງລຽມ ໄດ້ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດມາຊົມເປັນຈຳນວນຫຼວງຫຼາຍ. ເຮືອນຂອງອ້າຍມີ 4 ຊັ້ນ, ແຕ່ລະຊັ້ນກວ້າງປະມານ 30 ຕາລາງແມັດເທົ່ານັ້ນ ແລະ ອ້າຍໄດ້ເລືອກເອົາຊັ້ນທີ 4 ໃນເຮືອນຂອງຕົນເພື່ອສ້າງເວທີສະແດງຕຸກະຕານ້ຳ. ໃນບໍລິເວນນ້ອຍໆນີ້ມີທັງຕົ້ນໄຮ, ໄມ້ໄຜ່, ທ່ານ້ຳ… ໃນການສະແດງແຕ່ລະເທື່ອພຽງແຕ່ຮັບໃຊ້ຜູ້ຊົມໄດ້ປະມານ 15 ຄົນເທົ່ານັ້ນ ແລະ ການສະແດງຖືກແກ່ຍາວປະມານ 30 ນາທີ, ໃນນັ້ນມີບັນດາລາຍການຄື: ຟ້ອນມັງກອນ, ຟ້ອນສິງໂຕ, ຊົນຂວາຍ, ເຮັດນາ, ຊ່ວງເຮືອ… ອ້າຍລຽມໃຫ້ຮູ້ວ່າ:
“ຜູ້ຊົມທັງພາຍໃນ ແລະ ຕ່າງປະເທດຢາກຊອກຮູ້ກ່ຽວກັບສິລະປະສະແດງຕຸກກະຕານ້ຳທີ່ເປັນມູນເຊື້ອຂອງຫວຽດນາມທີ່ສຸດ. ຂ້າພະເຈົ້າຢາກຮັກສາ ແລະ ພັດທະນາຢ່າງກວ້າງຂວາງ ເພື່ອໃຫ້ຜູ້ຊົມເຂົ້າໃຈເລິກເຊິ່ງກວ່າກ່ຽວກັບສິລະປະປະເພດນີ້ ແລະ ຂ້າພະເຈົ້າໄດ້ສ້າງເວທີສະແດງໃນຄອບຄົວຂອງຕົນເພື່ອສາມາດສະແດງຮັບໃຊ້ຜູ້ຊົມເປັນປະຈຳ. ຂ້າພະເຈົ້າຢາກຊ່ວຍເຂົາເຈົ້າຂຸດຄົ້ນສິລະປະທີ່ເປັນມູນເຊື້ອນີ້ຈາກນັ້ນຈະສ້າງຄວາມນິຍົມສິລະປະນີ້ໃຫ້ແກ່ເຂົາເຈົ້າ”
ພາບປະກອບ
ຮູບແບບສະແດງທີ່ເປັນເອກະລັກສະເພາະຂອງນັກສິລະປິນ ແທງລຽມ ໄດ້ຮັບຄວາມເອົາໃຈໃສ່, ແລະ ຄວາມຮັກແພງຢ່າງຫຼວງຫຼາຍຈາກຜູ້ຊົມ. ພາຍຫຼັງໄດ້ຮັບຊົມລາຍການສະແດງຕຸກກະຕານ້ຳຂອງທ່ານ ແທງລຽມ. ເອື້ອຍ ມາຍຫາຍຮ່າ, ໄດ້ສະແດງຄວາມຮູ້ສຶກວ່າ:
“ຄວາມປະທັບໃຈທີ່ສຸດນັ້ນແມ່ນ, ໃນບໍລິເວນອັນຄັບແຄບນີ້ຂ້າພະເຈົ້າສາມາດຊົມໄດ້ຫຼາຍເລື່ອງ. ຂ້າພະເຈົ້າບໍ່ມີເວລາເພື່ອໄປຊົມຢູ່ໂຮງລະຄອນຕຸກກະຕານ້ຳ ແລະ ກໍ່ບໍ່ມັກບັນຍາກາດນຶກນັນ ແລະ ຄັບຄາໜາແໜ້ນຢູ່ທີ່ນີ້, ດັ່ງນັ້ນຈຶ່ງໄປຊົມຢູ່ໂຮງລະຄອນນ້ອຍໆຂອງທ່ານລຽມ”.
ຮູບແບບເວທີສະແດງຕຸກກະຕານ້ຳຂອງນັກສິລະປິນ ຟານແທງລຽມ ບໍ່ພຽງແຕ່ສ້າງຄວາມປະທັບໃຈໃຫ້ແກ່ແຂກພາຍໃນປະເທດເທົ່ານັ້ນ, ຫາກຍັງຜູ້ຊົມຊາວຕ່າງປະເທດອີກດ້ວຍ. ເອື້ອຍ Valerie Gardelle, ນັກທ່ອງທ່ຽວຕ່າງປະເທດແບ່ງປັນວ່າ:
“ຂ້າພະເຈົ້າຮູ້ສຶກແປກປະຫຼາດໃຈເມື່ອມາແຫ່ງນີ້. ເພາະວ່າຂ້າພະເຈົ້າໄດ້ຊົມຕຸກກະຕານ້ຳຢູ່ຮ່າໂນ້ຍກໍ່ຄືຢູ່ບັນດາເຂດອ້ອມຂ້າງຫຼາຍລາຍການແລ້ວ, ແຕ່ບໍ່ເຄີຍເຫັນຕຸກກະຕາ ແລະ ເວທີສະແດງຢູ່ແຫ່ງໃດນ້ອຍໆ ແລະ ເປັນຕາຮັກຄືຢູ່ທີ່ນີ້. ຂ້າພະເຈົ້າເຊື່ອໝັ້ນວ່າ, ມີຫຼາຍຄົນນິຍົມ, ເພາະວ່າມັນບໍ່ພຽງແຕ່ສ້າງຄວາມດູດດື່ມເທົ່ານັ້ນ, ຫາກຍັງສະແດງໃຫ້ເຫັນວັດທະນະທຳຂອງຫວຽດນາມ ຢ່າງເລິກເຊິ່ງອີກດ້ວຍ”.
ພາບປະກອບ
ໂດຍໄດ້ຮັບການກຳເນີດໃນຄອບຄົວທີ່ເຮັດອາຊີບສະແດງຕຸກກະຕານ້ຳ ຢູ່ແຂວງ ນາມດິ້ງ, ໃນຈຳນວນອ້າຍນ້ອງໃນຄອບຄົວ, ອ້າຍລຽມແມ່ນຜູ້ເມົາມົວທີ່ສຸດກັບສິລະປະສະແດງຕຸກກະຕານ້ຳ. ອ້າຍສ້າງເວທີສະແດງຕຸກກະຕານ້ຳນ້ອຍໆ ແລະ ໄດ້ໄປສະແດງຜູ້ດຽວຢູ່ຫຼາຍປະເທດໃນໂລກ ເພື່ອໂຄສະນາກ່ຽວກັບຮູບການສິລະປະພິເສດນີ້ຂອງຫວຽດນາມ ເຖິງເພື່ອນມິດສາກົນ. ອ້າຍລຽມໄດ້ແບ່ງປັນວ່າ:
“ໃນການສະແດງຢູ່ຍີ່ປຸ່ນ, ສ.ເກົາຫຼີ, ເອລົບ… ຂ້າພະເຈົ້າເຫັນວ່າຜູ້ຊົມຕ່າງປະເທດມັກຊອກຮູ້ກ່ຽວກັບສິລະປະທີ່ເປັນມູນເຊື້ອຂອງຫວຽດນາມຫຼາຍ, ເພາະວ່ານີ້ແມ່ນຮູບການສິລະປະພິເສດບໍ່ເຄີຍມີຢູ່ໃນໂລກ. ການສະແດງຕຸກກະຕານ້ຳຢູ່ຕ່າງປະເທດ ໄດ້ຊ່ວຍໃຫ້ເຂົາເຈົ້າມີຄວາມເຂົ້າໃຈຕື່ມກ່ຽວກັບວັດທະນະທຳຫວຽດນາມ”
ພາບປະກອບ
ການຊີວິດທີ່ທັນສະໄໝໃນປະຈຸບັນ ພວມເຮັດໃຫ້ຮູບການສິລະປະຕຸກກະຕານ້ຳທີ່ເຂັ້ມຄົ້ນໄປດ້ວຍສີສັນວັດທະນະທຳນັບມື້ນັບສູນເສຍໄປ. ບັນດາຜູ້ນິຍົມຕຸກກະຕານ້ຳພວມປະສົບກັບການທ້າທາຍຫຼາຍຢ່າງ. ເລື່ອງສ້າງເວທີສະແດງຕຸກກະຕານ້ຳນ້ອຍໆຢູ່ໃນເຮືອນສະເພາະຂອງນັກສິລະປິນ ຟານແທງລຽມ ໄດ້ປະກອບສ່ວນຮັກສາມໍລະດົກຂອງຊາດໄວ້ ກໍ່ຄືໂຄສະນາ, ແນະນຳສິລະປະສະແດງຕຸກກະຕານ້ຳທີ່ເປັນມູນເຊື້ອຂອງຫວຽດນາມ ເຖິງເພື່ອນມິດສາກົນ.