ຮູບພາບນາງສາວ Edyta Roszko ຊາວໂປໂລຍດ້ວຍຕາສີຟ້າ, ຜົມທອງ ແລະ ເວົ້າພາສາຫວຽດນາມ ບໍ່ຂອດ, ແຕ່ລະມື້ຂີ່ລົດຖີບອ້ອມເກາະ, ມັກໂອ້ລົມກັບບໍ່ວ່າຜູ້ໃດທີ່ລາວພົບຢູ່ຕາມທາງ, ໄດ້ເປັນເລື່ອງທີ່ບໍ່ແປກປະຫຼາດສຳລັບຊາວເກາະຫຼີເຊີນອີກແລ້ວ. ສຳລັບ Edyta Roszko ແລ້ວ, ຫວຽດນາມຄືດັ່ງຄວາມຕິດໜີ້ໃນຊາດກ່ອນ, ໄດ້ພານາງມາຄົ້ນຫາ.
ນາງ Edyta Roszko
|
ການມາຫວຽດນາມກໍແມ່ນຄວາມສະເໜຫາຂອງ Edyta Roszko. ປີ 2002, ນາງໄດ້ຮ້ອງຂໍກະຊວງສຶກສາໂປໂລຍໄປຈີນເພື່ອຄົ້ນຄ້ວາສຶກສາ, ແຕ່ມີອາຈານຄົນໜຶ່ງໄດ້ບອກລາວວ່າ ຄວນໄປຫວຽດນາມ. ຕາມນັ້ນແລ້ວ, Edyta Roszko ໄດ້ມາສຶກສາຮ່ຳຮຽນ ຢູ່ຫວຽດນາມເປັນເວລາ 4 ປີ. ເພື່ອສາມາດອ່ານເອກະສານພາສາຫວຽດໄດ້, ນາງໄດ້ຕັດສິນໃຈຮຽນພາສາຫວຽດ. ນາງEdyta Roszko ເວົ້າວ່າ :
“ ປີ 2003, ຂ້າພະເຈົ້າມາຫວຽດນາມເປັນຄັ້ງທຳອິດ ແລະ ຕ້ອງພົວພັນແລກປ່ຽນດ້ວຍພາສາລັດເຊຍ. ຫຼັງຈາກນັ້ນ, ມີເອື້ອຍຄູຫວຽດນາມ 2 ຄົນໄດ້ສອນ ພາສາຫວຽດໃຫ້ຂ້າພະເຈົ້າ ແລະ ຂ້າພະເຈົ້າເອງກໍພະຍາຍາມຮຽນ ພາສາຫວຽດຢູ່ຕາມທາງ. ເພື່ອຮຽນ ພາສາຫວຽດໄດ້ດີ, ຂ້າພະເຈົ້າຢາກພົບປະໂອ້ລົມກັບຊາວຫວຽດນາມຍິ່ງຫຼາຍກໍຍິ່ງດີ”
ຮຽນຈົບຫຼັກສູດຢູ່ຫວຽດນາມໃນປີ 2005, Edyta Roszko ໄດ້ກັບຄືນເຮັດວຽກຢູ່ເອີລົບ, ແຕ່ຍາມໃດລາວກໍຄິດຮອດຄິດເຖິງຫວຽດນາມ. ເມືອ່ເຮັດບົດນິພົນວິທະຍາປ້ອງກັນປະລິນຍາເອກ, Edyta Roszko ໄດ້ຕັດສິນເລືອກເອົາ ແຂວງກວາງງ້າຍທາງພາກກາງຫວຽດນາມເພື່ອຄົ້ນຄ້ວາ. ນາງEdyta Roszko ໃຫ້ຮູ້ວ່າ :
“ ຂ້າພະເຈົ້າຢາກປ່ຽນວຽກງານ, ດັ່ງນັ້ນກໍສະຫຼະເວລາຮຽນເພີ່ມ, ອ່ານເອກະສານກ່ຽວກັບພາກກາງຫວຽດນາມ. ໂຄງການຂອງຂ້າພະເຈົ້າແມ່ນກ່ຽວກັບການເຫຼື້ອມໄສ, ສະນັ້ນໃນປີ 2006-2007 ຂ້າພະເຈົ້າຄົ້ນຄ້ວາວັດທະນະທຳ ຊາຮີ່ງ ແລະ ໄດ້ອອກໄປເກາະຫຼີເຊີນເປັນເວລາ 1 ປີ. ”
Edyta Roszko ມີຄວາມປະທັບໃຈກັບລະບົບວັດທະນະທຳການເຫຼື້ອມໄສຢູ່ແຂວງກວາງງ້າຍ, ພິເສດແມ່ນຢູ່ ເກາະຫຼີເຊີນ. ວັດທະນະທຳການເຫຼື້ອມໄສຢູ່ ເກາະຫຼີເຊີນກໍເປັນເອກະລັກສະເພາະ ດ້ວຍພິທີອາໄລຫາກອງທະຫານປ້ອງກັນໝູ່ເກາະຮວ່າງຊາ, ພິທີໄຫວ້ບູຊາປາວານ. ປີ 2013, Edyta Roszko ໄດ້ແຕ່ງໂຄງການຄົ້ນຄ້ວາວັດທະນະທຳທະເລຂອງຫວຽດນາມ ຍື່ນສະເໜີຕໍ່ສະຫະພາບເອີລົບ ແລະ ໄດ້ຮັບການຕົກລົງເຫັນດີ. ກັບຄືນ ເກາະຫຼີເຊີນ, Edyta Roszko ມີຄວາມປະຫຼາດໃຈຕໍ່ບັນດາການປ່ຽນແປງຢູ່ເກາະແຫ່ງນີ້. ນາງEdyta Roszko ເວົ້າວ່າ :
“ ພາຍຫຼັງ 7 ປີ ໄດ້ກັບຄືນມາໃໝ່, ຂ້າພະເຈົ້າເຫັນວ່າບັນດາພິທີກຳຢູ່ ເກາະຫຼີເຊີນໄດ້ມີການປ່ຽນແປງ. ເມື່ອກ່ອນນີ້, ເມື່ອທຳພິທີ, ແມ່ຍິງບໍ່ມີສິດເຂົ້າບ່ອນສັກສິດຍ້ອນຂະລຳ ແຕ່ປະຈຸບັນ, ສາມາດເຂົ້າໄປໄດ້ຢ່າງສະບາຍ, ນັບທັງແຂກທ່ອງທ່ຽວນັ້ນອີກ. ທາງດ້ານວັດທະນະທຳກໍປ່ຽນແປງ ເພາະຕາມການເວລາ, ວັດທະນະທຳກໍຕ້ອງເປີດກ້ວາງອອກ”
ເຖິງວ່າຊີວິດມີການປ່ຽນແປງກໍຕາມ, ແຕ່ຊາວເກາະຫຼີເຊີນ ຍັງຄົງຮັກສາຈິດໃຈຮັກແພງມະນຸດ, ມີຄວາມຈິງໃຈຕໍ່ແຂກຄົນທັງຫຼາຍ, ອັນໄດ້ເຮັດໃຫ້ Edyta Roszko ຍິ່ງເພີ່ມຄວາມຮັກເກາະແຫ່ງນີ້. ນາງEdyta Roszko ເປີດເຜີຍວ່າ :
“ ຢູ່ເກາະແຫ່ງນີ້, ປະຊາຊົນມີຊີວິດແບບໃກ້ຊິດຕິດແທດກັນ. ເຂົາເຈົ້າປຸກເຮືອນຕິດກັນ, ດັ່ງນັ້ນສາມາດຮູ້ກັນໝົດ ແລະ ມີຄວາມສາມັກຄີ, ອຸ້ມຊູຊ່ວຍເຫຼືອຊຶ່ງກັນ ແລະ ກັນ./.