(vovworld) – ໂດຍແມ່ນສາວຜູ້ໜຶ່ງທີ່ມີຮູບຮ່າງສວຍງາມ, ຜີວຂາວ, ຜົມດຳ, ໜ້າຕາສົດໄສ. ເວລານັ້້ນ, ເຮືອງຢາງ ນັກສຶກສາທີ່ຫາກໍ່ຮຽນຈົບມະຫາວິທະຍາໄລ ເປັນຜູ້ທີ່ເຮັດໃຫ້ຜູ້ຊາຍຫຼາຍຄົນສົນໃຈ, ແຕ່ລາວມີແຕ່ຮັກ ແລະ ແຕ່ງງານກັບຜູ້ຊາຍລາວຄົນໜຶ່ງທີ່ຮຽນໃນມະຫາວິທະຍາໄລດຽວກັນ. ຄວາມຮັກໄດ້ຜູກມັດຄູ່ບ່າວສາວຫວຽດ - ລາວນຳກັນ. ແລະ ປະຈຸບັນ, ເມື່ອຖືກຖາມກ່ຽວກັບຊີວິດຄອບຄົວ, ລາວທັງຍີ້ມຫົວທັງຕອບໂດຍທັນທີວ່າ “ພໍໃຈຢູ່”. ພວກເຮົາພ້ອມກັນຊອກຮູ້ກ່ຽວກັບຄອບຄົວນ້ອຍໆທີ່ເຕັມໄປດ້ວຍຄວາມສຸກຂອງເອື້ອຍ ເຮືອງຢາງ, ຜ່ານບົດສາລະຄະດີຂອງນັກຂ່າວ ຢ້ຽວຮົ່ງ ທີ່ມີຫົວຂໍ້ວ່າ “ພໍໃຈເມື່ອເອົາຜົວຄົນລາວ”.
ລູກສອງຄົນຂອງເອື້ອຍຢາງ - ອ້າຍຜາດອນ
ພາຍຫຼັງເລິກງານເວລາ 16 ໂມງ 30 ນາທີ, ເອື້ອຍ ເຮືອງຢາງ ກໍ່ຟ້າວຝັ່ງຊັບຊ້ອນເອກະສານ, ເຄື່ອງຂອງໃນບ່ອນເຮັດວຽກໄວ້ຢ່າງຮຽບຮ້ອຍ ແລະ ຂັບລົດຈັກຈາກມະຫາວິທະຍາໄລວັດທະນະທຳກັບເມືອຄອບຄົວຢູ່ ໄຕໂຮ່, ບ່ອນທີ່ມີລູກສອງຄົນພວມລໍຖ້າ. ແຕ່ເອື້ອຍກໍ່ບໍ່ລືມແວ່ຕະຫຼາດນ້ອຍຢູ່ແຄມທາງເພື່ອຊື້ຜັກບົ້ງ, ຊີ້ນໝູ, ປາເພື່ອແຕ່ງອາຫານແລງໃຫ້ຄອບຄົວ.
ກວ່າ 5 ປີ, ພາຍຫຼັງແຕ່ງງານກັບ ຜາດອນ ອິນສະແວງ, ຄົນລາວທີ່ມີບ້ານເກີດຢູ່ແຂວງອຸດົມໄຊ, ປະຈຸບັນແມ່ນຜູ້ອຳນວຍການບໍລິສັດທ່ອງທ່ຽວ ແລະ ແປພາສາ. ອ້າຍຕິດຄາກັບວຽກງານຫຼາຍຍ້ອນພວມເປີດຮ້ານອາຫານລາວຢູ່ຮ່າໂນ້ຍ. ຜົວເມຍເອື້ອຍມີລູກ 2 ຄົນ, ຜູ້ຊາຍກົກອາຍຸ 3 ກວ່າປີ, ສ່ວນຜູ້ຍິງມີອາຍຸເກືອບ 2 ປີ. ເຖິງວ່າມີຜູ້ຊ່ວຍວຽກໃນຄອບຄົວກໍ່ຕາມ, ແຕ່ເອື້ອຍຢາງ ຍາມໃດກໍ່ສະຫງວນເວລາແຕ່ງອາຫານແລງເອງໃຫ້ຄອບຄົວ. ເຖິງວ່າຜົວຕິດຄາກັບວຽກງານຫຼາຍ ແລະ ຕ້ອງໄປເຮັດວຽກຢູ່ໄກຈາກຄອບຄົວ, ແຕ່ເອື້ອຍກໍ່ບໍ່ຮູ້ສຶກໂສກເສົ້າເທື່ອ, ເພາະເວລາໃດເອື້ອຍກໍ່ຮັບຮູ້ໄດ້ຄວາມຮັກເຊິ່ງຜົວໄດ້ສະຫງວນໃຫ້ຄອບຄົວ.
“ຜົວຂ້າພະເຈົ້າຕິດຄາກັບວຽກງານຫຼາຍ, ແຕ່ເມື່ອກັບມາຄອບຄົວ, ອ້າຍກໍ່ຊ່ວຍຂ້າພະເຈົ້າອາບນ້ຳໃຫ້ລູກ, ໃຫ້ລູກກິນ ແລະ ລະຫຼິ້ນກັບລູກ. ແຕ່ລະເທື່ອເມື່ອຂ້າພະເຈົ້າຖືກເຈັບເປັນ, ອ້າຍກໍ່ເອົາໃຈໃສ່ເບິ່່ງແຍງຢ່າງສຸດຈິດສຸດໃຈ, ຈົນຜູ້ອື່ນກໍ່ຕ້ອງເວົ້າວ່າ “ເອົາຜົວລາວດີຫຼາຍ”. ຜົວຂ້າພະເຈົ້າຍາມໃດກໍ່ຖືຄອບຄົວເປັນຕົ້ນ .”
ເມື່ອຫາກໍ່ກ້າວເຂົ້າເຮືອນ 3 ຊັ້ນ, ບ່ອນທີ່ຜົວເມຍເອື້ອຍພວມດຳລົງຊີວິດພ້ອມກັບພໍ່ແມ່ ໄດ້ຍິນສຽງສາມພໍ່ລູກຢອກກັນ. ສຽງຫົວຂອງເດັກນ້ອຍເຮັດໃຫ້ຄວາມອິດເມື່ອຍໃນໃບໜ້າຂອງເອື້ອຍທະລາຍໄປ.
ເອື້ອຍ ເຮືອງຢາງ ແລະ ລູກສາວ
ອ້າຍຜາດອນ ປີນີ້ອາຍຸ 32 ປີ, ຄົນສູງພໍສົມຄວນ, ຜີວດຳ, ຈົ່ງຜົມແບບນັກສິນລະປິນ, ເວົ້າພາສາຫວຽດເກັ່ງທີ່ສຸດ, ອ້າຍໄດ້ແຕ່ງງານກັບ ເຮືອງຢາງ, ຜູ້ທີ່ພາໃຫ້ອ້າຍມີຄວາມຮັກນັບແຕ່ການພົບປະຄັ້ງແລກ.
“ເມຍຂ້າພະເຈົ້າແມ່ນຄົນໃຈດີ. ພິເສດແມ່ນເຫັນອົກເຫັນໃຈ, ແບ່ງປັນວຽກງານກັບຂ້າພະເຈົ້າ. ນອກຈາກເວລາໄປເຮັດວຽກແລ້ວ, ລາວຍັງສະຫງວນເວລາເບິ່ງແຍງ ແລະ ໃກ້ຊິດກັບລູກ. ແຕ່ລະເທື່ອເມື່ອກັບມາຄອບຄົວໄດ້ຍິນສຽງອ່ອນຫວານຂອງເມຍ, ຂ້າພະເຈົ້າກໍ່ຮູ້ສຶກມ່ວນຫຼາຍ”.
ຄອບຄົວໃດກໍ່ເຊັ່ນກັນ, ເລື່ອງຜົວເມຍຜິດກັນກໍ່ແມ່ນເລື່ອງທຳມະດາ, ແຕ່ຄອບຄົວນີ້ພັດບໍ່ເຄີຍຜິດຖຽງກັນຈັກເທື່ອ, ພຽງແຕ່ມີທັດສະນະຕ່າງກັນນ້ອຍໜຶ່ງເທົ່ານັ້ນ.
“ເມຍ: ເມື່ອຜິດກັນ, ທັງສອງຜົວເມຍຕ່າງກໍ່ມິດງຽບ, ມີແຕ່ຜິດກັນມື້ໜຶ່ງເທົ່ານັ້ນ. ມື້ຕໍ່ມາກໍ່ໂອ້ລົມນຳກັນເປັນປົກກະຕິ.
ຜົວ: ເມື່ອຜິດກັນ, ສອງຜົວເມຍມັກນັ່ງໂອ້ລົມ, ຊອກຫາສາຍເຫດເພື່ອແກ້ໄຂໃນທັນທີ. ຄອບຄົວຂ້າພະເຈົ້າແມ່ນຄອບຄົວວັດທະນະທຳ, ດັ່ງນັ້ນບໍ່ປະໃຫ້ເກີດສະພາບໂຕ້ຖຽງກັນ“.
ເມື່ອເວົ້າເຖິງລູກເຂີຍຂອງຕົນ. ປ້າ ເຮືອງ, ແມ່ເອື້ອຍຢາງ, ໃຫ້ຮູ້ວ່າ:
“ລູກເຂີຍຂ້າພະເຈົ້າແມ່ນຄົນໃຈດີ, ນອກຈາກເວລາໄປເຮັດວຽກ, ເມື່ອກັບມາຄອບຄົວລາວກໍ່ຊ່ວຍເມຍເບິ່ງແຍງລູກ, ເຄົາລົບ, ກະຕັນຍູກັບພໍແມ່. ພວກຂ້າພະເຈົ້າຖືລາວຄືລູກຄີງ, ລາວເຄີຍໂອ້ລົມ, ຖາມຂ່າວ, ແບ່ງປັນທຸກສິ່ງທຸກຢ່າງກັບພໍ່ແມ່. ພວກຂ້າພະເຈົ້າຮູ້ສຶກພໍໃຈຫຼາຍ. ລູກສາວເອົາຜົວເປັນຄົນດີຄືແນວນັ້ນພວກຂ້າພະເຈົ້າກໍ່ອຸ່ນອ່ຽນໃຈ“.
19 ໂມງປາຍ, ພາຍຫຼັງໃຫ້ລູກສາວກິນເຂົ້າປຽກແລ້ວ, ອ້າຍ ຜາດອນ ພ້ອມກັບຄອບຄົວກໍ່ຮັບປະທານອາຫານ, ໃນພາເຂົ້າທີ່ມີຜັກບົ້ງຂົ້ວກັບຫົວຜັກທຽມ, ຊີ້ນໝູຕົ້ມເຄັມ, ປາເຂັງຈື່ນ ນັ້ນ, ສຽງໂອ້ລົມ, ສຽງຫົວທີ່ເບີກບານມ່ວນຊື່ນໄດ້ດັ່ງກ້ອງກັງວານໃນຫ້ອງຮັບປະທານອາຫານທີ່ເຕັມໄປດ້ວຍຄວາມສຸກ.