ເຖິງວ່າຢູ່ແຫ່ງໃດກໍ່ຕາມ, ເມື່ອບຸນປີໃໝ່ປະຈຳຊາດ ແລະ ລະດູບານໃໝ່ວຽນມາ, ຊາວຫວຽດນາມ ແຕ່ລະຄົນລ້ວນແຕ່ໄດ້ຫວນຄືນສິ່ງທີ່ເຮັດໄດ້ໃນປີເກົ່າ ແລະ ສ້າງແຜນປະຕິບັດວຽກງານໃນປີຕໍ່ໄປ. ສຳລັບຊາວໜຸ່ມຫວຽດນາມ ແລ້ວ, ປີໃໝ່ແມ່ນເຕັມໄປດ້ວຍບັນດາການຄາດຄະເນ, ຄວາມໄຟ່ຝັນໃນຕໍ່ໜ້າ. ປີໃໝ່, ໄວໜຸ່ມຫວຽດນາມ ຫວັງວ່າຈະປະສົບຄວາມໂຊກດີ ແລະ ຜົນສຳເລັດ. ຕໍ່ໄປແມ່ນສາລະຄະດີຂອງນັກຂ່າວທູຮັ່ງ ທີ່ມີຫົວຂໍ້ວ່າ: ລະດູບານໃໝ່ ແລະ ຄວາມປາດຖະໜາຂອງໄວໜຸ່ມ
(ພາບປະກອບ: thcslongthanhbac.violet.vn)
ຈຸດເວລາສົ່ງທ້າຍປີເກົ່າ, ຕ້ອນຮັບປີໃໝ່ໄດ້ວຽນມາແລ້ວ. ໃນໂອກາດລະດູບານໃໝ່, ປະຊາຊົນຫວຽດນາມ ທຸກຄົນລ້ວນແຕ່ຫວັງຢາກມີສຸຂະພາບເຂັ້ມແຂງ, ມີຄວາມສຸກຄວາມຈະເລີນ, ວັດທະນາຖາວອນໃຫ້ແກ່ຕົວເອງ, ຄອບຄົວ ແລະ ໃຜໆກໍ່ປາດຖະໜາກ່ຽວກັບອະນາຄົດອັນສົດໃສກ່ວາອີກໃຫ້ແກ່ປະເທດຊາດ. ການ “ສ້າງແບບຢ່າງຊາວໜຸ່ມໃນໄລຍະໃໝ່, ປະກອບສ່ວນສ້າງຊີວິດວັດທະນະທຳໃໝ່“ ແມ່ນໜຶ່ງໃນບັນດາສານໃນໂຄງການດຳເນີນງານ ໂດຍອົງການຊາວໜຸ່ມກອມມູນິດໂຮ່ຈິມິນ ໄດ້ປະຕິບັດໃນປີ 2013. ເພື່ອນຫງວຽນທິແທງແທງ (Nguyễn Thị Thanh Thanh) ນັກສຶກສາມະຫາວິທະຍາໄລກົດໝາຍ ນະຄອນໂຮ່ຈິມິນ ແບ່ງປັນວ່າ:
“ໃນໄລຍະເວລາປະຈຸບັນ ດ້ວຍບັນດາການກະທົບດ້ານແນວຄິດ, ການເມືອງ, ວັດທະນະທຳ, ສັງຄົມ, ເສດຖະກິດ…ນັກສຶກສາຫຼາຍຄົນມີສະຕິຄວາມຮັບຮູ້ທີ່ແຕກຕ່າງກັນກ່ຽວກັບການສ້າງພາບພົດສ່ວນບຸກຄົນ. ນ້ອງ ແລະ ບັນດາເພື່ອນນັກສຶກສາເຂົ້າໃຈວ່າ: ວຽກງານທຳອິດຕ້ອງປະຕິບັດ ນັ້ນແມ່ນຕ້ອງເຄົາລົບ ກົດໝາຍ ແລະ ຕ້ອງມີສະຕິຄວາມຮັບຮູ້ປະຕິບັດໜ້າທີ່ຂອງຕົນ”
ລະດູບານໃໝ່
(ພາບ:chamsockhachhang.vn)
ລະດູບານໃໝ່ໄດ້ນຳມາເຊິງຄວາມອົບອຸ່ນ, ຕົ້ນໄມ້ໃບຫຍ້າແຕກດອກ ອອກໜໍ່, ຂຽວສົດງົດງາມ ແລະ ເຕັມໄປດ້ວຍພະລັງຊີວິດ. ກ້າວເຂົ້າສູ່ລະດູບານໃໝ່, ໄວໜຸ່ມມີຄວາມຮູ້ສຶກວ່າຕົນເອງມີຄວາມເຕີບໃຫ່ຍຂຶ້ນ ແລະ ຄວາມມຸ້ງຫວັງ, ຄວາມໄຟ່ຝັນຂອງໄວໜຸ່ມເກືອບຄືວ່າມີຄວາມແຮງກ້າກ່ວາອີກ. ສຳລັບຊາວໜຸ່ມຫວຽດນາມ ຫຼາຍຄົນແລ້ວ, ຕ້ອນຮັບປີໃໝ່ກໍ່ແມ່ນຈຸດເວລາເພື່ອສ້າງຄວາມໄຟ່ຝັນໃຫ້ປະກົດຜົນເປັນຈິງ. ດ່ວານແມັງຮຸງ (Đoàn Mạnh Hùng) ນັກສຶກສາປີສຸດທ້າຍ, ມະຫາວິທະຍາໄລຄົມມະນາຄົມຂົນສົ່ງຮ່າໂນ້ຍ ແບ່ງປັນວ່າ:
“ປີໃໝ່ນີ້, ນ້ອງມີຄວາມໄຟ່ຝັນຢາກກາຍເປັນນັກວິສາວະກອນກໍ່ສ້າງຂົວແຫ່ງຕ່າງໆ, ກໍ່ສ້າງບັນດາເສັ້ນທາງເພື່ອເຊື່ອມຕໍ່ປະເທດຊາດ. ນຳປະເທດຊາດກ້າວຂຶ້ນ. ຖ້າການຄົມມະນາຄົມມີການພັດທະນາ, ຂົງເຂດອື່ນໆຈຶ່ງຈະພັດທະນາໄປານຳ”
ໃນຕົ້ນລະດູບານໃໝ່, ເພື່ອນໜຸ່ມຫຼາຍຄົນມີຄວາມປາດຖະໜາຢາກອຸທິດສ່ວນກຳລັງເຫື່ອແຮງທີ່ໜຸ່ມແໜ້ນ, ປະກອບສ່ວນເຮັດໃຫ້ປະເທດຊາດມີການພັດມະນາ ແລະ ເຊື່ອມໂຍງເຂົ້າກັບໂລກ. ທ່ານເຈືອງດິ່ງຕວຽນ (Trương Đình Tuyển) ອະດີດລັດຖະມົນຕີກະຊວງການຄ້າຫວຽດນາມ ຖືວ່າ: ເມື່ອອຸດົມການຂອງຊາວໜຸ່ມແຕ່ລະຄົນ ສອດຄ່ອງກັບອຸດົມການລວມຂອງຊາດ, ການເຄື່ອນໄຫວຂອງໄວໜຸ່ມຈະປະກອບສ່ວນປະຕິບັດບັນດາໜ້າທີ່ອັນໃຫ່ຍຫຼວງເປັນຢ່າງດີ. ທ່ານເຈືອງດິ່ງຕວຽນ ຖືວ່າ:
“ປະຈຸບັນ, ພວກເຮົາມີເງື່ອນໄຂການເຮັດວຽກທີ່ສະດວກສະບາຍພໍສົມຄວນ. ບໍ່ພຽງແຕ່ໄດ້ເຮັດວຽກໃນບັນດາວິສາຫາກິດ ຫລືອົງການຂອງລັດ, ບັນດາເພື່ອນໜຸ່ມຕ້ອງກໍ່ຮ່າງສ້າງຕົວ, ຕ້ອງກ້າເຮັດກ້າທຳ. ຕ້ອງຊອກຫາບັນດາຂົງເຂດດຳເນີນທຸລະກິດ, ຮູບແບບດຳເນີນທຸລະກິດທີ່ເໝາະສົມ, ແນ່ນອນວ່າພວກເພື່ອນໜຸ່ມຈະປະສົບຜົນສຳເລັດ”
ຕ້ອນຮັບປີໃໝ່ດ້ວຍຄວາມມຸ້ງຫວັງຈະປະສົບຜົນສຳເລັດ, ນັກທະລຸກິດໜຸ່ມຫວຽດນາມ ຫຼາຍຄົນໄດ້ກຳນົດທິດກ້າວເດີນສະເພາະໃຫ້ແກ່ຕົນ ແຕ່ເຂົາເຈົ້າລ້ວນແຕ່ມີຄວາມເມົາມົວ, ເດັດດ່ຽວ ແລະ ມີຄວາມຕັດສິນໃຈເດີນຕາມອຸດົມການ, ເຊື່ອໝັ້ນຕໍ່ຕົນເອງ, ຂະຫຍັນຂັນເຂື່ອນ, ກຽມພ້ອມກັບທຸກໆການປ່ຽນແປງ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມແບບຍືນຍົງ. ອ້າຍຫງວຽນແທນເຟືອງ (Nguyễn Thành Phương) ຜູ້ອຳນວຍການໃຫ່ຍກຸ່ມບໍລິສັດ Kangaroo ໃຫ້ຮູ້ວ່າ: ໃນປີ 2012, ເຖິງວ່າເສດຖະກິດໂລກໄດ້ປະສົບກັບຄວາມຫຍຸ້ງຍາກກໍ່ຕາມ ແຕ່ຜະລິດຕະພັນຂອງກຸ່ມບໍລິສັດ Kangaroo ຍັງບັນລຸລະດັບການເຕີບໂຕເພີ່ມຂຶ້ນທົບ 6 ເທົ່າ, ຍອດລາຍຮັບບັນລຸກ່ວາ 920 ຕື້ດົ່ງ. ໃນປີ 2013, ອ້າຍຫງວຽນແທນເຟືອງ ປາດຖະໜາຢາກນຳເຄື່ອງໝາຍການຄ້າຂອງຫວຽດນາມ ອອກສູ່ຕະຫຼາດໂລກ:
“ພວກຂ້າພະເຈົ້າວາງຈຸດໝາຍຮອດປີ 2016, ກຸ່ມບໍລິສັດ Kangaroo ຈະກາຍເປັນກຸ່ມບໍລິສັດອັນດັບໜຶ່ງຢູ່ພາກພື້ນອາຊີຕາເວັນອອກສ່ຽງໃຕ້ກ່ຽວກັບສິນຄ້າທີ່ກຸ່ມບໍລິສັດພວມດຳເນີນທຸລະກິດ“
ເມື່ອລະດູບານໃໝ່ ແລະ ບຸນປີໃໝ່ປະຈຳຊາດວຽນມາ, ປະຊາຊົນຫວຽດນາມ ທຸກຄົນເຖິງວ່າຢູ່ພາຍໃນ ແລະ ຕ່າງປະເທດກໍ່ຕາມກໍ່ລ້ວນແຕ່ອວ່ຍໜ້າສູ່ປະເທດຊາດດ້ວຍຄວາມປາດຖະໜາຢາກໃຫ້ປະເທດຊາດພັດທະນາ ແລະ ສະຫງົບສຸກ. ໃນຈິດໃຈຂອງບັນດາທະຫານທີ່ພວມປະຕິບັດໜ້າທີ່ປົກປັກຮັກສາເຂດໝູ່ເກາະທະເລຢູ່ຫ່າງໄກ ເກືອບຄືວ່າກໍ່ບໍ່ມີໄລຍະຫ່າງລະຫວ່າງໝູ່ເກາະກັບເຂດດິນຕໍ່ແຜ່ນອີກແລ້ວ. ນ້ຳໃຈອັນອົບອຸ່ນຂອງປະຊາຊົນຫວຽດນາມ ທຸກຄົນທີ່ມຸ້ງໄປສູ່ເຂດທີ່ຫ່າງໄກຂອງປະເທດຊາດແມ່ນແຫຼ່ງລະດົມກຳລັງໃຈອັນໃຫ່ຍຫຼວງ ເພື່ອໃຫ້ບັນດາທະຫານປະຕິບັດໜ້າທີ່ສຳເລັດ. ເປັນຄັ້ງທຳອິດໄດ້ຕ້ອນຮັບບຸນປີໃໝ່ປະຈຳຊາດຫ່າງໄກຈາກຄອບຄົວ, ນັກຮົບໜຸ່ມຫງວຽນວັນຮູຍ (Nguyễn Văn Huy) ຢູ່ເກາະຊອງຕື້ໄຕ (Song tử tây) ຂຶ້ນກັບເຂດໝູ່ເກາະເຈື່ອງຊາ ເລົ່າຄວາມໃນໃຈສູ່ຟັງວ່າ:
“ທະຫານເຮືອຕ້ອງຍອມເສຍສະຫຼະເພື່ອໃຫ້ປະຊາຊົນຕ້ອນຮັບບຸນປີໃໝ່ດ້ວຍຄວາມສະຫງົບສຸກ. ພວກຂ້າພະເຈົ້າຢາກເວົ້າພຽງຄຳດຽວວ່າ: ຖ້າຫາກທະຫານເຮືອຍັງມີຊີວິດຢູ່, ອະທິປະໄຕເຂດໝູ່ເກາະທະເລຫວຽດນາມ ຍັງຄົງໄດ້ຮັບການປົກປັກຮັກສາຢ່າງໝັ້ນຄົງ“
ລະດູບານໃໝ່ໄດ້ເປີດສາກໃຫ້ແກ່ວິວັດທະນາການໃໝ່. ໄວໜຸ່ມຫວຽດນາມ ດ້ວຍຈິດໃຈບໍ່ຫວາດຫວັ່ນຕໍ່ຄວາມຫຍຸ້ງຍາກ, ຂະຫຍັນຂັນເຄື່ອນ, ມີຫົວຄິດປະດິດສ້າງ, ຢາກອຸທິດສ່ວນໃຫ້ແກ່ການພັດທະນາເສດຖະກິດ-ສັງຄົມຂອງປະເທດຊາດ. ວຽກງານແຕ່ລະຢ່າງທີເຂົາເຈົ້າເຮັດ, ເຖິງວ່າຈະນ້ອຍ ຫຼືໃຫ່ຍກໍ່ຕາມ ກໍ່ລ້ວນແຕ່ປະກອບສ່ວນເສີມສ້າງໃຫ້ແກ່ລະດູບານໃໝ່ຂອງປະເທດຊາດ.