(vovwold) - ໃນຂອບເຂດການເຄື່ອນໄຫວວັດທະນະທຳ “ຊຸມວັນເອີລົບຢູ່ຫວຽດນາມ”, ຢູ່ສະຖາບັນ Goethe, ຮ່າໂນ້ຍ, ພວມຈັດງານວາງສະແດງ “ພາບເລື່ອງ, manga & Co, ວັດທະນະທຳພາບເລື່ອງເຢຍລະມັນ”. ງານວາງສະແດງດຶງດູດແຂກມາຊົມເປັນຈຳນວນຫຼວງຫຼາຍ.
(ພາບ: BTC)
ງານສະແດງ “ພາບເລື່ອງ, manga & Co, ວັດທະນະທຳພາບເລື່ອງເຢຍລະມັນ”, ຜູ້ຊົມຈະໄດ້ເຫັນພາບເລື່ອງ manga 55 ເລື່ອງ ແລະ ພາບນະວະນິຍາຍຂອງຈິດຕະກອນທີ່ມີຊື່ສຽງຂອງເຢຍລະມັນ 13 ຄົນ. ຈຸດພິເສດແມ່ນ, ຈິດຕະກອນທັງໝົດທີ່ມີພາບເລື່ອງວາງສະແດງຢູ່ທີ່ນີ້ ລ້ວນແຕ່ບໍ່ໄດ້ຮັບການບຳລຸງສ້າງດ້ານສິລະປະຢ່າງເປັນທາງການ, ເຂົາເຈົ້າພຽງແຕ່ແມ່ນຈິດຕະກອນສະໝັກຫຼິ້ນ, ແຕ່ພັດສ້າງເປັນບັນດາພາບເລື່ອງທີ່ມີຊີວິດຊີວາ ແລະ ເຕັມໄປດ້ວຍສີສັນຫຼາກຫຼາຍ. ດຣ. Almuth Meyer Zollitsch, ຫົວໜ້າສະຖາບັນ Goethe ຮ່າໂນ້ຍ, ໃຫ້ຮູ້ວ່າ:
“ງານວາງສະແດງນີ້ແມ່ນໝາກຜົນ ແຫ່ງການວາງແຜນກ່ອນນີ້ 3 ປີຂອງພວກຂ້າພະເຈົ້າ, ດ້ວຍຈຸດໝາຍແນະນຳໃຫ້ໂລກກ່ຽວກັບວັດທະນະທຳພາບເລື່ອງຂອງເຢຍລະມັນ. ພວກຂ້າພະເຈົ້າໄດ້ເລືອກເຟັ້ນນັກແຕ້ມພາບເລື່ອງເຢຍລະມັນ 13 ຄົນ ທີ່ມີວິທີແຕ້ມ ກໍ່ຄືມີຫົວເລື່ອງແນະນຳທີ່ແຕກຕ່າງກັນ”.
ຈຸດພິເສດຂອງຊຸດພາບເລື່ອງທີ່ວາງສະແດງຢູ່ທີ່ນີ້ ແມ່ນຜ່ານຕົວລະຄອນໃນພາບເລື່ອງຜູ້ຊົມສາມາດເຫັນໄດ້ສິລະປະຫຼາຍຮູບຫຼາຍແບບ ແລະ ເຕັມໄປດ້ວຍສີສັນຫຼາກຫຼາຍ. ວິທີແຕ້ມຂອງຈິດຕະກອນ 13 ຄົນກໍ່ແຕກຕ່າງກັນ ນັບທັງດ້ານເຕັກນິກ, ເນື້ອໃນ ແລະ ຮູບການພິມຈຳໜ່າຍ. ແຕ່ເຂົາເຈົ້າພັດມີຈຸດລວມນັ້ນແມ່ນຄວາມມານະພະຍາຍາມປ່ຽນໃໝ່ຮູບການສະແດງຈາກການເລົ່າເລື່ອງເປັນຮູບພາບ. ຈິດຕະກອນ ງວຽນແທ່ງຟອງ, ຜູ້ທີ່ເຄີຍໄດ້ຮັບລາງວັນໃຫຍ່ກ່ຽວກັບພາບເລື່ອງຢູ່ງານວາງສະແດງ Espai Cromatic ຢູ່ແອດສະປາຍ ແລະ Festival ພາບເລື່ອງສາກົນ Bucheon ຢູ່ ສເກົາຫຼີ, ໃຫ້ຮູ້ວ່າ:
“ວິທີແຕ້ມຂອງບັນດາຈິດຕະກອນເຢຍລະມັນ ທີ່ງານວາງສະແດງຄັ້ງນີ້ແມ່ນມີຫຼາຍຮູບຫຼາຍແບບ, ຫຼາຍຮູບການ. ນອກນັ້ນ, ຂ້າພະເຈົ້າເຫັນວ່າ, ໃນງານວາງສະແດງນີ້, ບັນດາຈິດຕະກອນເຢຍລະມັນ ໄດ້ນຳໃຊ້ເຕັກນິກທົ່ວໄປຫຼາຍຢ່າງ ເພື່ອແຕ້ມພາບເລື່ອງ. ນີ້ແມ່ນສິ່ງດູດດື່ມທີ່ສຸດໃນຂະນະທີ່ພາບເລື່ອງທີ່ແຕ້ມທາງຄອມພີວເຕີພວມພັດທະນາຢ່າງແຮງໃນປະຈຸບັນ. ວິທີແຕ້ມຂອງຈິດຕະກອນເຢຍລະມັນ ກໍ່ແຕກຕ່າງກັນຫຼາຍ ກັບວິທີແຕ້ມຂອງຍີ່ປຸ່ນ, ຈີນ, ສເກົາຫຼີ.”
ເມື່ອເຫັນບັນດາພາບເລື່ອງທີ່ງານວາງສະແດງ, ຜູ້ຊົມສາມາດຄົ້ນຫາໂລກທີ່ມີຫຼາຍຮູບຫຼາຍສີຂອງພາບແຕ້ມເຢຍລະມັນ. ບາງເທື່ອແມ່ນພາບເລື່ອງຕະຫຼົກ, ບາງເທື່ອແມ່ນພາບເລື່ອງເຢາະເຢີ້ຍຜູ້ທີ່ມີຊື່ສຽງໃດໜຶ່ງ, ຫຼືພາບເລື່ອງທີ່ໂສກເສົ້າດ້ວຍການໃຊ້ສີຂາວ, ດຳ. ງານວາງສະແດງໄດ້ສ້າງຄວາມເພີດເພີນ, ຄວາມສະບາຍໃຈ ແລະ ຄວາມນຶກຄິດໃຫ້ແກ່ຜູ້ຊົມ. ຈິດຕະກອນ ຫງວຽນງອກກວນ, ແບ່ງປັນວ່າ:
“ງານວາງສະແດງນີ້ໄດ້ສ້າງຄວາມດູດດື່ມ ເພາະວ່າມັນມີສີສັນສະເພາະ ບໍ່ຄືກັນກັບພາບເລື່ອງຂອງຫວຽດນາມ, ພາບເລື່ອງເຢຍລະມັນມີລັກສະນະປັດສະຍາ ດ້ວຍບັນດາເລື່ອງລາວທີ່ມີຄວາມໝາຍເລິກເຊິ່ງ, ບໍ່ອະທິບາຍດ້ວຍຮູບພາບຫຼາຍຄືພາບເລື່ອງເຄີຍມີຢູ່ຫວຽດນາມ. ຢາກເຂົ້າໃຈ, ຜູ້ຊົມຕ້ອງມີການຄົ້ນຄິດ.”
ບັນດາພາບແຕ້ມກ່ຽວກັບເລື່ອງລາວທີ່ມ່ວນໆ ຫຼືຫົວເລື່ອງປະຫວັດສາດ, .. ລ້ວນແຕ່ຖືກແຕ້ມທາງຄອມພີວເຕີ, ຫຼືແຕ້ມໃສ່ເຈ້ຍດ້ວຍສໍດຳ ໄດ້ສະແດງໃຫ້ເຫັນຄວາມສາມາດຂອງຈິດຕະກອນແຕ່ລະຄົນ. ຜ່ານບັນດາຫົວເລື່ອງກ່ຽວກັບຊີວິດທີ່ອຸດົມສົມບູນ, ບັນດາບັນຫາທີ່ພົ້ນເດັ່ນໃນຍຸກປະຈຸບັນ, ບັນດາພາບເລື່ອງຂອງເຂົາເຈົ້າໄດ້ປະກອບສ່ວນສ້າງຄວາມສົນໃຈໃຫ້ແກ່ຜູ້ຊົມ. Line Hoven, ແມ່ນໜຶ່ງໃນຈຳນວນຈິດຕະກອນ 13 ຄົນທີ່ເຂົ້າຮ່ວມງານວາງສະແດງ, ໃຫ້ຮູ້ວ່າ:
“ຜ່ານງານວາງສະແດງຄັ້ງນີ້, ພວກຂ້າພະເຈົ້າຢາກແນະນຳລັກສະນະຫຼາຍຮູບຫຼາຍແບບ ແລະ ອຸດົມສົມບຸນ ທັງດ້ານເນື້ອໃນ ແລະ ຮູບການຂອງພາບເລື່ອງເຢຍລະມັນ, ນັ້ນກໍ່ແມ່ນວັດທະນະທຳພາບເລື່ອງຂອງເຢຍລະມັນ.”
ງານວາງສະແດງພາບເລື່ອງເຢຍລະມັນ ບໍ່ພຽງແຕ່ແນະນຳສິລະປະຫຼາຍຮູບຫຼາຍແບບຂອງພາບເລື່ອງເທົ່ານັ້ນ, ຫາກຍັງແມ່ນໂອກາດເພື່ອໃຫ້ຜູ້ມີຄວາມນິຍົມກັບພາບເລື່ອງພ້ອມກັນແລກປ່ຽນບັນດາບັນຫາທີ່ສະແດງອອກຜ່ານຮູບແຕ້ມແຕ່ລະແຜ່ນ. ອ້າຍຫງວຽນກວາງຮູຍ, ນັກສຶກສາປີທີ 4 ມະຫາວິທະຍາໄລວິຈິດສິນ ຮ່າໂນ້ຍ, ແບ່ງປັນວ່າ:
“ນີ້ເປັນເທື່ອທຳອິດທີ່ຂ້າພະເຈົ້າມາງານວາງສະແດງພາບເລື່ອງເຢຍລະມັນ, ຂ້າພະເຈົ້າຮູ້ສຶກປະທັບໃຈເພາະວ່າ ມີບາງພາບແຕ້ມແມ່ນຕາມທ່າອ່ຽງແຕ້ມພາບ manga ຍີ່ປຸ່ນ, ແຕ່ຍັງມີສີສັນສະເພາະ. ລັກສະນະຊາດຖືກສະແດງອອກຜ່ານສີສັນ ແລະ ການປະດິດຮູບ. ໃນພາບເລື່ອງເຢຍລະມັນ, ສີສັນຊາດຖືກສະແດງອອກຢ່າງຈະແຈ້ງ. ສ່ວນພາບເລື່ອງຂອງຫວຽດນາມພັດສະແດງສີສັນຊາດບໍ່ຈະແຈ້ງ ”
ທີ່ງານວາງສະແດງ, ຜູ້ມາຢາມບໍ່ພຽງແຕ່ມີໂອກາດໄດ້ຊົມບັນດາພາບເລື່ອງທີ່ພິມເປັນປື້ມຂອງຈິດຕະກອນ 13 ຄົນ ເທົ່ານັ້ນ, ຫາກນີ້ຍັງແມ່ນໂອກາດເພື່ອໃຫ້ຜູ້ນິຍົມສິລະປະຈິດຕະກຳຄົ້ນຫາຈຸດທີ່ເປັນເອກະລັກສະເພາະໃນສິລະປະພາບເລື່ອງ ກໍ່ຄືວັດທະນະທຳຂອງເຢຍລະມັນອີກດ້ວຍ.