ໃນຊຸມມື້ແຕ່ວັນທີ 15 ຫາວັນທີ 17/2/2014, ໝູ່ບ້ານວັດທະນະທຳ- ທ່ອງທ່ຽວບັນດາເຜົ່າ ຫວຽດນາມຢູ່ດົງໂມ, ເຊີນໄຕ, ຮ່າໂນ້ຍ ຍິ່ງຟົດຟື້ນມວນ ຊື່ນຂຶ້ນຕື່ມດ້ວຍບັນດາງານບຸນທີ່ເປັນເອກະລັກສະເພາະ, ບັນດາຮີດຄອງປະເພນີ, ບັນດາບົດເພງຊົມເຊີຍລະດູບານໃໝ່ຂອງປະຊາຊົນ 54 ເຜົ່າໃນວັນບຸນ “ ສີສັນລະດູບານໃໝ່ໃນທຸກແຖບຖິ່ນທົ່ວປະເທດຊາດ”.
ໝໍພອນຊາວເຜົ່າ ໂລໂລພວມກະກຽມທຳພິທີພາວະນາຟ້າຝົນ
|
ໃນເດີນບ້ານທີ່ກ້ວາງໃຫຍ່, ໝໍພອນຊາວເຜົ່າ ໂລໂລ ຢູ່ເມືອງແມ່ວຫວາກ ແຂວງຮ່າຢາງ ພວມອ່ານບົດສະດຸດີເຊື້ອເຊີນເທວະດາຟ້າແຖນມາເປັນສັກຂີພິຍານພິທີພາວະນາຟ້າຝົນຂອງຊາວບ້ານ. ພິທີພາວະນາຟ້າຝົນຂອງຊາວເຜົ່າ ໂລໂລໄດ້ຮັບເລືອກເປັນການເຄື່ອນໄຫວເປີດສາກໃຫ້ວັນບຸນ“ສີສັນລະດູບານໃໝ່ໃນທຸກແຖບຖິ່ນທົ່ວປະເທດຊາດ” ປີນີ້. ທ່ານໂຮ່ຫວຽດເຊີນ ຜູ້ອຳນວຍການສູນວັດທະນະທຳແຂວງ ຮ່າຢາງ ໃຫ້ຮູ້ວ່າ :
“ຊາວເຜົ່າ ໂລໂລເວົ້າສະເພາະ ແລະ ພໍ່ແມ່ພີນ້ອງປະຊາຊົນບັນດາເຜົ່າໃນແຂວງຮ່າຢາງເວົ້າລວມ, ຢູ່ແຫ່ງນີ້, ດິນຟ້າອາກາດຮ້າຍແຮງທີ່ສຸດ, ບໍ່ເອື້ອ ອຳນວຍຄວາມສະດວກ, ອາກາດໜາວຈັດ ແລພ ຝົນຕົກບໍ່ຫຼາຍ, ດັ່ງນັ້ນ ໃນໂອກາດຕົ້ນປີ, ຊາວເຜົ່າ ໂລໂລ ເຄີຍທຳພິທີພາວະນາຟ້າຝົນ, ພາວະນາໃຫ້ ລະດູການຜະລິດໄດ້ຮັບຜົນດີ, ປະຊາຊົນຢູ່ເຢັນເປັນສຸກ ”
ໂດຍມີຄວາມແຕກຕ່າງກັບຊາວເຜົ່າ ໂລໂລ, ໃນພິທີພາວະນາຟ້າຝົນຂອງຊາວເຜົ່າກໍໃນແຂວງກວາງນາມນັ້ນ, ແມ່ນມີການເຂົ້າຮ່ວມຂອງບັນດາ ເຈົ້າກົກເຈົ້າເຫຼົ່າ, ພ້ອມກັບຊາວບ້ານຢ່າງຫຼວງຫຼາຍ. ພິພີກຳຖືກດຳເນີນໃນທ່າມກາງສຽງຄ້ອງດັ່ງກ້ອງກັງວານຂຶ້ນໄປທົ່ວເຂດ. ນາງ ເຢືອງທີແທງລານ ຊາວເຜົ່າ ກໍ ເວົ້າວ່າ :
“ ຂ້າພະເຈົ້າມີຄວາມພາກພູມໃຈເປັນຢ່າງຍິ່ງເມອໄດ້ເຕົ້າໂຮມກັນຢູ່ແຫ່ງນີ້ພ້ອມກັບບັນດາເຜົ່າອ້າຍນ້ອງ. ໄດ້ແບ່ງປັນຄວາມມວ່ນຊື່ນລະຫວ່າງຊົນເຜົ່າ ກໍ ພວກຂ້າພະເຈົ້າກັບຊົນເຜົ່າອື່ນໆ”
ຢູ່ແຈ່ໜຶ່ງໃນບ້ານ, ຊາວເຜົ່າ ບເຣົາໃນແຂວງກອມຕຸມພວມກະກຽມເຫຼົ້າໄຫ, ໄກ່ 3 ໂຕ, ໝູ 3 ໂຕ, ແບະ 1 ໂຕ ພ້ອມດ້ວຍບັນດາເມັດເຂົ້າເປືອກພັນໂດຍວາງເທິງໃບຕອງກ້ວຍ ເພື່ອກະກຽມທຳພິທີໄຫວ້ບູຊາຕົ້ນເຂົ້າ. ໃນຂະນະດຽວກັນ, ຢູ່ເຮືອນຮ້ານຂອງຊາວເຜົ່າຜູ້ໄທ, ລຸງ ມຸນຫຼວງ ພວມທຳພິທີໄຫວ້ບູຊາເທວະດາຟ້າແຖນ.
ພ້ອມກັບຄວາມເຄັ່ງຂຶມຂອງຂັ້ນຕອນຈັດພິທີ, ບັນດາວາດຟ້ອນ, ຈັ່ງຫວະເຕັ້ນລຳ, ສຽງຂັບລຳທຳເພງປະສານກັບສຽງຂຸ່ຍ, ສຽງແຄນ, ສຽງພິນ ໄດ້ກັງວານຂຶ້ນ, ຍິ່ງເຮັດໃຫ້ບັນຍາກາດຂອງງານບຸນເພີ່ມຄວາມຄຶກຄື້ນມ່ວນຊື່ນ. ທ້າວ ເວືອງວັນຕ້ຽນ ຊາວເຜົ່ານຸ່ງ ໃນແຂວງ ກາວບັງ ມີຄວາມພາກພູມໃຈເພາະ ເປັນຄັ້ງທຳອິດໄດ້ມາຮ່ວມວັນບຸນໃຫຍ່ຂອງບັນດາເຜົ່າ. ທ້າວເວືອງວັນຕ້ຽນເປີດເຜີຍວ່າ: (ເທບ)
“ ມື້ນີ້ນ້ອງມ່ວນຫຼາຍເພາະໄດ້ແລກປ່ຽນວັດທະນະທຳກັບປະຊາຊົນບັນດາເຜົ່າໃນທົ່ວປະເທດ. ນ້ອງຮູ້ສຶກປະທັບໃຈກ່ຽວກັບຊຸດອາພອນຂອງເຜົ່າ ປາແທນ ໃນແຂວງຮ່າຢາງ, ພິເສດແມ່ນຜ້າຄຸມຫົວ ແມ່ນຄັກຫຼາຍ. ມາແຫ່ງນີ້, ນ້ອງໄດ້ແລກປ່ຽນວັດທະນະທຳ ແລະ ຮຽນເອົາໄດ້ຫຼາຍສິ່ງຫຼາຍຢ່າງຈາກເຜົ່າອື່ນໆ ”
ວັນບຸນ “ ສີສັນລະດູບານໃໝ່ໃນທຸກແຖບຖິ່ນທົ່ວປະເທດຊາດ” ໄດ້ກາຍເປັນວັນດຳເນີນຊີວິດວັດທະນະທຳ, ສິລະປະວັນນະຄະດີທີ່ລື້ງເຄີຍກັບ ປະຊາຊົນບັນດາເຜົ່າຫວຽດນາມ. ຜ້າຄຸມຫົວ, ໝວກ, ຂອງຂວັນຕ່າງໆ ທີ່ບັນດາຜູ້ຄົນມາຈາກເຜົ່າຕ່າງໆມອບໃຫ້ແກ່ກັນເປັນຂອງຂວັນນັ້ນ, ປຽບເໝືອນຄຳໝັ້ນໝາຍ, ນັດກັນຮອດເວລາດຽວກັນຂອງປີໜ້າ ຈະພົບກັນໃໝ່ທີ່ຊາຍຄາຮ່ວມນີ້ເພື່ອແລກປ່ຽນວັດທະນະທຳນຳກັນ.