(vovworld)- ບັນດາຄວາມຊົງຈຳທີ່ຮ້າຍກາດຂອງສົງຄາມ, ການພົບປະທີ່ຕື້ນຕັນໃຈຂອງບັນດາພົນທະຫານ້ຢູ່ສອງຟາກຝັ່ງສະໜາມຮົບ, ຄວາມໃນໃຈຂອງກຸ່ມທະຫານຜ່ານເສິກ ອາເມລິກາ ໃນການກັບຄືນຢ້ຽມຢາມ ຫວຽດນາມ ໄດ້ຖືກສະແດງໃຫ້ເຫັນຜ່ານຮູບເງົາເອກະສານທີ່ມີຊື່ວ່າ “ແຫ່ງທີ່ສະຫງົບສຸກຂອງພົນທະຫານ” ໂດຍ ກຸ່ມທະຫານຜ່ານເສີກ ອາເມລິກາ ປະຕິບັດການຜະລິດໃນປີ 2012 ດ້ວຍຈຸດປະສົງຢາກສົ່ງສານທີ່ວ່າ: ປາສະຈາກຄວາມອາຄາດບາດໝາງ, ພ້ອມກັນດຳເນີນການໄກ່ເກ່ຍ, ແລະ ພ້ອມກັນຮຳບາດແຜສົງຄາມ.
ບັນດາທະຫານຜ່ານເສິກ ອາເມລິກາ ໃນການກັບຄືນຢ້ຽມຢາມ ຫວຽດນາມ
|
ດ້ວຍການໃຊ້ເວລາ 45 ນາທີ, ຮູບເງົາເອກະສານ “ແຫ່ງທີ່ສະຫງົບສຸກຂອງພົນທະຫານ” ແມ່ນບັນດາຄວາມຊົງຈຳກ່ຽວກັບສົງຄາມ, ຄວາມຮູ້ສຶກມີຄວາມສະຫງົບສຸກເມື່ອມາຮອດຫວຽດນາມ, ແມ່ນຄວາມສະໜິດສະໜົມ, ຄວາມເມດຕາກະລຸນາຊຶ່ງຊາວຫວຽດນາມ, ບັນດານັກຮົບເກົ່າຫວຽດນາມສະຫງວນໃຫ້ແກ່ບັນດາຜູ້ຢືນຢູ່ຟາກກົງກັນຂ້າມບົນສະໜາມຮົບ.
Dave Hansen ຕົວລະຄອນເອກ, ພ້ອມທັງແມ່ນຜູ້ລິເລີ່ມປະຕິບັດການຜະລິດຮູບເງົາ, ຊຶ່ງໄດ້ເຄີຍເຂົ້າຮ່ວມການສູ້ຮົບບົນສະໜາມຮົບ ແຄແຊງ ໄລຍະ 1968-1971 ດ້ວຍບົດບາດແມ່ນທະຫານເຮືອບິນເອລິກອບແຕພະຍາບານ. ກໍເຊັ່ນດຽວກັນກັບທະຫານຜ່ານເສິກອາເມລິກາຫຼາຍຄົນອື່ນ, ພາຍຫຼັງສົງຄາມ, Dave Hansen ໄດ້ຖືກກະທົບດ້ານຈິດຕະສາດ. ເພາະສະນັ້ນ, ບໍ່ມີຍາມໃດທີ່ທ່ານຢາກເຕື້ອງເຖິງການສູ້ຮົບ, ທ່ານບໍ່ຢາກປະເຊີນໜ້າກັບອະດີດຕະການ ແລະ ແນ່ນອນວ່າ ບໍ່ມີຍາມໃດທີ່ທ່ານຄິດວ່າ ຈະມີວັນໄດ້ກັບຄືນສູ່ບ່ອນທີ່ເຮັດໃຫ້ທ່ານມີຄວາມຫຼອກຫຼອນອັນສະຫຍົດສະຫຍອງ. ແຕ່ຕາມການເວລາ, ທຸກໆຄວາມນຶກຄິດໄດ້ເລີ່ມປ່ຽນແປງໄປ. ທ່ານ Dave Hansen ເວົ້າວ່າ :
“ ຂ້າພະເຈົ້າໄດ້ຮັບຄຳເຊີນເຂົ້າຮ່ວມການພົບປະສັງສັນຂອງສະມາຄົມນັກບິນຂັບ ເຮືອບິນເອລິກອບແຕ ທີ່ໄດ້ເຂົ້າຮ່ວມການສູ້ຮົບຢູ່ຫວຽດນາມທີ່ຈັດຂຶ້ນຢູ່ ລາດເວກາດ ແລະ ຂ້າພະເຈົ້າໄດ້ຕັດສິນໄປຮ່ວມ. ຂ້າພະເຈົ້າໄດ້ຂັບລົດໄປ, ຂ້າພະເຈົ້າໄດ້ຄິດເຖິງບັນດາຜູ້ທີ່ຂ້າພະເຈົ້າໃກ້ຈະພົບ ແລະ ທຸກສິ່ງທີ່ຂ້າພະເຈົ້າໃກ້ຈະປະເຊີນໜ້າ. ເວລານັ້ນ, ບັງເອີນ ຂ້າພະເຈົ້າໄດ້ຫຼັ່ງນ້ຳຕາເພາະບໍ່ສາມາດອົດກັ້ນໄດ້, ເພາະບັນດາຄວາມໂສກເສົ້າ, ຄວາມສູນເສຍໃນການສູ້ຮົບໄດ້ວຽນມາຢ່າງກະທັນຫັນ. ສຳລັບຂ້າພະເຈົ້າແລ້ວ, ການພົບປະນັ້ນໄດ້ຊ່ວຍຂ້າພະເຈົ້າຜ່ານຜ່າຄວາມຫຼອກຫຼອນຈາກອະດີດຕະການ ແລະ ລົບລ້າງມັນອອກຈາກແນວຄິດຈິດໃຈ ”
ພາຍຫຼັງການພົບປະເທື່ອນັ້ນ, ໄດ້ໂອ້ລົມກັບທະຫານຜ່ານເສິກອາເມລິກາຫຼາຍຄົນ, Dave Hansen ໄດ້ຕັດສິນໃຈກັບຄືນຢ້ຽມຢາມຫວຽດນາມ. ທ່ານໄດ້ຕົກລົງຊັກຊວນທະຫານຜ່ານເສິກອາເມລິກາຈຳນວນໜຶ່ງມາຫວຽດນາມອີກດ້ວຍ. Dave Hansen ກ່າວວ່າ :
“ ຂ້າພະເຈົ້າປາຖະໜາວ່າ ເມື່ອທຸກໆຄົນດຳເນີນການຢ້ຽມຢາມນີ້, ໄດ້ປະເຊີນໜ້າກັບຄວາມຈິງ, ໄດ້ພົບກັບບັນດາຜູ້ຄົນທີ່ພວກເຮົາໄດ້ເຄີຍຕັ້ງໃຈດັບສູນກັນ, ຊຶ່ງຈະຊ່ວຍໃຫ້ວິວັດການໄກ່ເກ່ຍດຳເນີນໄປຢ່າງວ່ອງໄວກວ່າ ”
ໃນເດືອນ 3/2012, ພາຍໃຕ້ການອຸປະຖຳຈາກອົງການ Feace Trees ຫວຽດນາມ, Dave Hansen ພ້ອມກັບເພື່ອນບາງຄົນຂອງຕົນ ໄດ້ເດີນທາງມາຮອດຫວຽດນາມ ເພື່ອປະຕິບັດການຜະລິດຮູບເງົາເອກະສານ “ແຫ່ງທີ່ສະຫງົບສຸກຂອງພົນທະຫານ”
ຖານທີ່ໝັ້ນ ແຄແຊງຊຶ່ງແມ່ນກຸ່ມທີ່ໝັ້ນຖືກອາເມລິກາກໍ່ສ້າງແບບຖາວອນເມື່ອປີ 1968 . ນີ້ແມ່ນແຫ່ງຕັ້ງສູນກາງບັນຊາຂອງ ລັດຖະມົນຕີກະຊວງປ້ອງກັນປະເທດອາເມລິກາ Mc Namara ແນໃສ່ຮັບໃຊ້ແກ່ເປົ້າໝາຍ ຕັດເສັ້ນທາງລຳລຽງຂົນສົ່ງຈາກພາກເໜືອໃຫ້ພາກໃຕ້. ເດືອນ 5/1971, Roger Hill ໄດ້ຮັບຄຳສັ່ງຖືກຈັດສົ່ງໄປສະໜາມຮົບຫວຽດນາມ ເພື່ອປະຕິບັດໜ້າທີ່ປົກປັກຮັກສາສະຖານີຖ່າຍທອດສື່ສານຢູ່ໃກ້ກັບເຂດປອດການທະຫານ ແຄແຊງ. ກວ່າ 40 ປີທີ່ຜ່ານມາ, ຄວາມຮູ້ສຶກຢ້ານກົວຂອງ Roger Hill ກ່ຽວກັບຊຸມວັນທີ່ ເຮືອບິນເອລິກອບແຕ ຂອງລາວຖືກບຸກໂຈມຕີ ຍາມໃດກໍຫຼອກຫຼອນໃນຄວາມຊົງຈຳຂອງທ່ານ. Roger Hill ເວົ້າວ່າ :
“ ເວລານັ້ນ, ຂ້າພະເຈົ້າຄິດວ່າ ເຮົາໃກ້ຈະຕາຍແລ້ວ. ຂ້າພະເຈົ້າຮູ້ສຶກວ່າ ເຮືອບິນເອລິກອບແຕ ພວມບິນຕາມເນີນພູ ແລະ ຂ້າພະເຈົ້າພວມລົງຫັ້ນ. ຂ້າພະເຈົ້າບໍ່ສາມາດພັນລະນາໄດ້ໝົດກ່ຽວກັບຮູບພາບໃນເວລານັ້ນ”
ໂຊກດີທີ່ Roger Hill ໄດ້ລອດຊີວິດ ແລະ ພຽງແຕ່ຖືກບາດເຈັບເທົ່ານັ້ນ, ແຕ່ Eddie ເພື່ອນຂອງທ່ານໄດ້ເສຍຊີວິດ. ໃນການກັບຄືນຢ້ຽມຢາມສະໜາມຮົບເກົ່າດ Roger Hill ກໍໄດ້ພົບກັບບັນດານັກຮົບເກົ່າ ຊຶ່ງແມ່ນກຳລັງທະຫານປົດປ່ອຍພາກໃຕ້ ໄດ້ເຂົ້າຮ່ວມບັ້ນຮົບແຄແຊງ ໃນວັນນັ້ນ. ທ່ານ ເລຮົ່ງແຫ້ງ ນັກຮົບເກົ່າ ຢູ່ເມືອງ ເຮື້ອງຮ້ວາ ແຂວງ ກວາງຈິ ໃຫ້ຮູ້ວ່າ :
“ ພາຍຫຼັງຊຸມວັນເດືອນປີເຂົ້າຮ່ວມສົງຄາມ, ໄດ້ພົບບັນດາທະຫານຜ່ານເສິກອາເມລິກາຄືນ, ຂ້າພະເຈົ້າຮູ້ສຶກວ່າ ເຂົາເຈົ້າແມ່ນບັນດາຜູ້ໃຈດີ, ມີຄວາມສຸດຈະລິດ. ມີບາງຄົນຍັງຖືກຫຼອກຫຼອນດ້ວຍຜົນຮ້າຍສົງຄາມ ແລະ ປະຈຸບັນ ເຂົາເຈົ້າຍາມໃດກໍມີຄວາມຫວັງຜູກຮັດນ້ຳໃຈມິດຕະພາບດ້ວຍບັນດາການເຄື່ອນໄຫວມະນຸດສະທຳ ແນໃສ່ບັນເທົາຄວາມເຈັບປວດທີ່ສົງຄາມກໍ່ຂຶ້ນ ”
ອະດີດຕະການໄດ້ຖືກຫວນຄືນ ແລະ ກໍຖືກປິດໄວ້ ຄືດັ່ງອະນຸສອນ. ໃຜໆຕ່າງກໍເຫັນໄດ້ເຖິງຜົນຮ້າຍຢ້ອນຫຼັງຂອງສົງຄາມ. Dave Hansen ກ່າວວ່າ :
“ ຂ້າພະເຈົ້າຄິດວ່າ ເຂົາເຈົ້າເລີ່ມຮັບຮູ້ວ່າ ເຂົາເຈົ້າບໍ່ຕ້ອງຢ້ານກົວຢູ່ແຫ່ງນີ້ອີກແລ້ວ. ເປັນໜ້າປະທັບໃຈທີ່ສຸດ, ບໍ່ອາດເວົ້າຈົນສຸດໄດ້. ເຂົາເຈົ້າໄດ້ເດີນບົນໄລຍະທາງຍາວເປັນເວລາ 40 ປີ ”
ການປູກຕົ້ນໄມ້, ຂົນຂວາຍແຜ່ບໍລິຈາກເງິນເພື່ອຊ່ວຍໜູນ%ຍກງານເກັບກູ້ລະເບີດຍັງບໍ່ທັນແຕກ, ໜູນຊ່ວຍປະຊາຊົນທ້ອງຖິ່ນປົວແປງຊີວິດການເປັນຢູ່. ບັນດາທະຫານຜ່ານເສີກ ອາເມລິກາ ໄດ້ບອກວ່າ ເຂົາເຈົ້າພວມເລີ່ມປະຕິບັດພາລະກຳໃໝ່. ນັ້ນແມ່ນພາລະກຳສັນຕິພາບ, ໄກ່ເກ່ຍ, ສ້າງຂົວເຊືອ່ມຕໍ່ມິດຕະພາບ ເພາະສຳລັບເຂົາເຈົ້າແລ້ວ, ຫວຽດນາມແມ່ນສ່ວນໜຶ່ງໃນຄວາມຊົງຈຳ. ທ່ານ Ryan Washburn ທະຫານຜ່ານເສີກ ອາເມລິກາ ໃຫ້ຮູ້ວ່າ :
“ຂ້າພະເຈົ້າຄິດວ່າ ຕົ້ນໄມ້ແຕ່ລະຕົ້ນທີ່ຖືກປູກຢູ່ແຫ່ງນີ້ ກໍເປັນການເຊີດຊູພົນທະຫານຄົນໜຶ່ງທີ່ໄດ້ເສຍຊີວິດ ແລະ ບໍ່ຮູ້ວ່າເຂົ້າເຈົ້າຢືນຢູ່ຟາກຝັ່ງໃດບົນສະໜາມຮົບ. ຈົ່ງເລີ່ມຕົ້ນຄືນໃໝ່, ກາຍເປັນໝູ່ເພື່ອນກັນ ແລະ ຈົ່ງປະໃຫ້ອະດີດຕະການຜ່ານພົ້ນໄປຕາມການເວລາ”
ເດືອນ 3/2014 , ຮູບເງົາເອກະສານ “ແຫ່ງທີ່ສະຫງົບສຸກຂອງພົນທະຫານ” ໄດ້ຖືກນຳມາສາຍຢູ່ ແຄແຊງ ແຂວງ ກວາງຈິ ຊຶ່ງແມ່ນໜຶ່ງໃນການເຄື່ອນໄຫວທຳອິດເພື່ອສ້າງກອງທຶນສະໜັບສະໜູນໂຄງການກໍ່ສ້າງສວນແຫ່ງໜຶ່ງທີ່ໃສ່ຊື່ວ່າ “ສວນໄກ່ເກ່ຍຢູ່ແຄແຊງ”. ຄາດວ່າ ຮູບເງົາເອກະສານດັ່ງກ່າວ ຈະຖືກນຳມາສາຍຢູ່ຕວກກີ ແລະ ຕາເວັນອອກກາງ ໃນເດືອນ 5 /2015 ແນໃສ່ສົ່ງສານເຖິງເພື່ອນມິດສາກົນທີ່ວ່າ “ ສົງຄາມແມ່ນໄຮ້ເຫດຜົນ ແລະ ຈົ່ງຊ່ວຍໃຫ້ຄົນລຸ່ນຫຼັງມີຊີວິດໃນໂລກສັນຕິພາບ ”.