ບໍ່ຮູ້ວ່າ ນັບແຕ່ເວລາໃດທີ່ບັນດາກ້ອນເຂົ້າຈີ່ ໄກ ມີຕົ້ນກຳເນີດຈາກຫາຍຟ່ອງ, ເຂົ້າຈີ່ ໄກ ໃຫຍ່ຊ່ຳ 2 ນິ້ວມື ແລະ ຍາວປະມານ 30 ຊັງຕີແມັດເທົ່ານັ້ນ. ເຂົ້າຈີ່ ໄກຖືກວາງຂາຍຢູ່ຫຼາຍແຂວງ, ນະຄອນໃນທົ່ວປະເທດຫວຽດນາມ.
ເຂົ້າຈີ່ ໄກ ມີຕົ້ນກຳເນີດຈາກຫາຍຟ່ອງ
|
ໃນເວລາປະມານ 3 ໂມງເຊົ້າ, ກໍແມ່ນຈຸດເວລາທີ່ຂ້ອງຄ່າກັບວຽກງານທີ່ສຸດຂອງບັນດາກຳມະກອນຜູ້ຜະລິດເຂົ້າຈີ່ຢູ່ນະຄອນຫາຍຟ່ອງ. ຢູ່ຮາກຖານຜະລິດເຂົ້າຈີ່ ກໍມີກຳມະກອນເຖິງ 7-8 ຄົນ, ແລະ ແຕ່ລະຄົນກໍມີວຽກສະເພາະຂອງໃຜຂອງລາວ. ແຕ່ລະມື້ຮາກຖານແຫ່ງນີ້ສາມາດຜະລິດເຂົ້າຈີ່ໄດ້ນັບໝື່ນກ້ອນ, ແລ້ວກໍແຈກຢາຍໄປຍັງທຸກແຫ່ງທີ່ນະຄອນຫາຍຟ່ອງ.
ຕາມລຸງ ກາວວັນກວງ, ຜູ້ທີ່ມີປະສົບການໃນການ ຜະລິດເຂົ້າຈີ່ຢູ່ນະຄອນຫາຍຟ່ອງເປັນເວລາ 60 ປີ, ເຂົ້າຈີ່ຊະນິດນີ້ໄດ້ຮັບຄວາມນິຍົມບໍລິໂພກບໍ່ພຽງແຕ່ຢູ່ຫາຍຟ່ອງເທົ່ານັ້ນ, ຫາກຍັງເປີດກ້ວາງສູ່ນະຄອນຫຼວງຮ່າໂນ້ຍອີກດ້ວຍ. ລຸງ ກາວວັນກວງ ໃຫ້ຮູ້ວ່າ : ເພື່ອຜະລິດເຂົ້າຈີ່ໄດ້ກ້ອນໜຶ່ງ ກໍບໍ່ແມ່ນເລື່ອງງ່າຍ, ຕ້ອງການມີຄວາມລະອຽດລະອໍ, ຈາກຂັ້ນຕອນເຮັດແປ້ງຕະຫຼອດຮອດຂັ້ນຕອນຕັດເຂົ້າຈີ່ອີກດ້ວຍ. ລຸງ ກາວວັນກວງ ເວົ້າວ່າ :
“ ເຮັດເຂົ້າຈີ່ນີ້, ກໍຕ້ອງມີສີມື, ຖ້າບໍ່ດັ່ງນັ້ນ, ຜູ້ຮຽນວິຊາຊີບ ເຖິງວ່າຈະໃຊ້ເວລານານປານໃດກໍຕາມ, ກໍບໍ່ອາດປັ້ນເຂົ້າຈີ່ໄດ້. ຖ້າຫາກປັ້ນບໍ່ງາມ, ກໍຈະເຮັດໃຫ້ເຂົ້າຈີ່ບໍ່ງາມເຊັ່ນກັນ ”
ສິ່ງທີ່ຊ່ວຍໃຫ້ເຂົ້າຈີ່ ໄກ ມີເຄື່ອງໝາຍການຄ້າທີ່ດີນັ້ນ ແມ່ນໃນນັ້ນ ຕ້ອງມີປາເຕ ແລະ ນ້ຳໝາກເຜັດອີກດ້ວຍ. ປ້າ ບຸຍທິຕ໋ວດ ຜູ້ເປັນເມຍຂອງລຸງ ກາວວັນກວງໃຫ້ຮູ້ວ່າ :
“ ປາເຕແມ່ນຖືກປຸ່ງແຕ່ງມາຈາກຕັບໝູ, ມັນ ແລະ ຊີ້ນດິບ. ພາຍຫຼັງຖືກລ້າງໃຫ້ສະອາດແລ້ວ, ກໍນຳເອົາໄປບົດໃຫ້ແລກ, ແລ້ວກໍໜຶ້ງໃນເວລາປະມານ 6 ຊົວໂມງ. ສ່ວນນ້ຳໝາກເຜັດ ແມ່ນຖືກປຸ່ງແຕ່ງຈາກໝາກເຜັດ, ໝາກເລັ່ນສົດ...ຈຶ່ງຈະແຊບ”
ເຂົ້າຈີ່ ໄກແມ່ນອາຫານປະເພດທົ່ວໄປຂອງຊາວນະຄອນຫາຍຟ່ອງ, ໂດຍສະເພາະແມ່ນສຳລັບນັກຮຽນ ແລະ ເດັກນ້ອຍ. ເຂົາເຈົ້າສາມາດຮັບປະທານໃນທຸກເວລາ, ເປັນຕົ້ນແມ່ນຍາມເຊົ້າ.
ຊາວນະຄອນຫາຍຟ່ອງເຄີຍລົມກັນວ່າ ຢາກກິນເຂົ້າຈີ່ທີ່ແຊບນົວນັ້ນ ແມ່ນ ຕ້ອງໄປຮ້ານລຸງ ກາວວັນກວງຢູ່ຖະໜົນຮ່າງເກັງ ແລະ ລາຄາເຂົາຈີ່ກ້ອນລະ ແຕ່ 2 ຫາ 5 ພັນດົງ ແຕ່ກໍຂຶ້ນກັບໄສ້ຂອງມັນຫຼາຍຫຼືນ້ອຍ. ປ້າ ບຸຍທິຕ໋ວດ ຜູ້ເປັນເມຍຂອງລຸງ ກາວວັນກວງໃຫ້ຮູ້ວ່າ :
“ ແຂກຫຼາຍຄົນມັກກິນເຂົ້າຈີ່ຂອງຮ້ານຂ້າພະເຈົ້າ. ຖ້າຫາກມາເທື່ອທຳອິດຊື້ 10 ກ້ອນ, ເທື່ອໜ້າມາ ກໍຕ້ອງຊື້ຮອດຮ້ອຍກ້ອນຢ່າງແນ່ນອນ ”
ນາງງວຽດ ແລະ ທ້າວລິງ ຊຶ່ງແມ່ນລູກຄ້າຂາປະຈຳຂອງຮ້ານເຂົ້າຈີ່ຂອງລຸງ ກາວວັນກວງ ເປີດເຜີຍວ່າ :
“ ມື້ໃດກໍເຊັ່ນດຽວກັນ, ຮອດເວລາປະມານ 5 ໂມງເຊົ້າ, ຂ້າພະເຈົ້າ ກໍໄດ້ມານີ້ແລ້ວເພື່ອຊື້ເຂົ້າຈີ່ມາເປັນອາຫານເຊົ້າໃຫ້ທັງຄອບຄົວ, ເພາະເຂົ້າຈີຢູ່ຮ້ານລຸງກວງ ແມ່ນແຊບ ແລະ ຮັບປະກັນຫຼັກອະນາໄມເປັນຢ່າງດີ” .