(vovworld) - ເກືອບ 2 ປີມານີ້, ແຂວງ ນີງທ້ວນ ໄດ້ສ້າງຕັ້ງ “ກຸ່ມຊາວກະສິກອນມີຄວາມນິຍົມດຽວກັນ” ກ່ວາ 300 ກຸ່ມໃນບັນດາຂົງເຂດຄືປູກຝັງ, ລ້ຽງສັດ, ຜະລິດດຳເນີນທຸລະກິດ…, ຊ່ວຍຊາວກະສິກອນນັບໝື່ນຄົນເສີມຂະຫຍາຍບົດບາດຂອງຕົນໃນປະຊາຄົມ, ປັບປຸງຊີວິດເປັນຢູ່. ບົດຂຽນ “ກຸ່ມຊາວກະສິກອນມີຄວາມນິຍົມອັນດຽວກັນ” ຢູ່ແຂວງ ນີງທ້ວນ ຊ່ວຍເຫຼືອກັນພັດທະນາເສດຖະກິດ ຂອງ ຖູ່ຍລີງ, ນັກຂ່າວ VOV.
ຊາວກະສິກອນແລກປ່ຽນບົດຮຽນນຳກັນ
ສະມາຄົມຊາວກະສິກອນແຂວງ ນີງທ້ວນ ສົມທົບກັບຄະນະປະສານງານໂຄງການໜູນຊ່ວຍກະສິກຳ - ຊາວກະສິກອນ - ຊົນນະບົດ ແຂວງກໍ່ສ້າງແຜນຮ່າງ “ກຸ່ມຊາວກະສິກອນມີຄວາມນິຍົມດຽວກັນ”. ເມືອງ ນີງເຟືອກ ມີ 3 ຕາແສງເຂົ້າຮ່ວມໂຄງການນີ້ແມ່ນ: ເຟືອກວີງ, ເຟືອກທ໋າຍ ແລະ ອານຫາຍ ດ້ວຍຈຳນວນ 27 ກຸ່ມຊາວກະສິກອນ. ເປົ້າໝາຍເຂົ້າຮ່ວມກຸ່ມນີ້ສ່ວນຫຼາຍເປັນບັນດາຄອບຄົວທຸກຍາກ, ຄອບຄົວໃກ້ກັບມາດຕະຖານທຸກຍາກ, ຄົນງານຍິງ… ບັນດາກຸ່ມຊາວກະສິກອນ ໄດ້ສ້າງໜ່ວຍຕ່າງໆຄື: ໜ່ວຍລ້ຽງງົວ, ແບ, ແກະ, ໝ່ວຍປູກຝັງ, ໜ່ວຍດຳເນີນທຸລະກິດ, ໜ່ວຍຮ່ວມສຳພັນທຳການຜະລິດ… ບັນດາຄອບຄົວເຂົ້າຮ່ວມໂຄງການບໍ່ພຽງແຕ່ໄດ້ຮັບການໜູນຊ່ວຍດ້ານເງິນລົງທຶນ, ແນວພັນປູກ, ແນວພັນສັດລ້ຽງ, ວັດສະດຸກໍ່ສ້າງຈາກຄະນະຄຸ້ມຄອງໂຄງການແຂວງ ນີງທ້ວນ ເທົ່ານັ້ນ ຫາກຍັງໄດ້ຮັບການແນະນຳດ້ານເຕັກນິກການລ້ຽງສັດ, ປູກຝັງ, ສ້າງແຜນການຜະລິດ ອີກດ້ວຍ. ຄອບຄົວເອື້ອຍ ມາງທິກວິ໋ງ ຢູ່ບ້ານ ລຽນເຊີນ, ຕາແສງ ເຟືອກວີງ, ເມືອງ ນີງເຟືອກ ແມ່ນຄອບຄົວປະສົບກັບຄວາມຫຍຸ້ງຍາກຫຼາຍ. ເອື້ອຍມີລູກ 3 ຄົນ, ຄອບຄົວຂອງເອື້ອຍດຳລົງຊີວິດຕົ້ນຕໍ່ແມ່ນອີງໃສ່ການເຮັດຈ້າງຂອງເອື້ອຍ. ການນຳບ້ານ ລຽນເຊີນ 2 ຈັດໃຫ້ເອື້ອຍເຂົ້າກຸ່ມລ້ຽງງົວ Hifer, ຄອບຄົວຂອງເອື້ອຍໄດ້ຮັບການໜູນຊ່ວຍແມ່ພັນງົວ 2 ໂຕ. ນັບແຕ່ມື້ໄດ້ຮັບງົວນັ້ນ, ເອື້ອຍໄດ້ເບິ່ງແຍງດູແລຢ່າງລະອຽດ, ແມ່ພັນງົວ 2 ໂຕພັດທະນາເປັນຢ່າງດີ. ເອື້ອຍ ມາງທິກວິ໋ງ ແບ່ງປັນວ່າ:
“ລັດໄດ້ເອົາໃຈໃສ່ ແລະ ໃຫ້ຄອບຄົວຂ້າພະເຈົ້າງົວ 2 ໂຕ, ຂ້າພະເຈົ້າມີຄວາມເບີກບານມ່ວນຊື່ນທີ່ສຸດ. ຄອບຄົວຂອງຂ້າພະເຈົ້າຈະພະຍາຍາມລ້ຽງງົວເປັນຢ່າງດີເພື່ອຫລຸດພົ້ນອອກຈາກຄວາມທຸກຍາກ, ຊີວິດການເປັນຢູ່ພັດທະນາດີກ່ວາເກົ່າ.”
ຄອບຄົວທຸກຍາກ ແລະ ຄອບຄົວໃກ້ກັບມາດຕະຖານທຸກຍາກ ຊາວເຜົ່າ ຢາລາຍ 10 ຄອບຄົວຢູ່ບ້ານ ຕ່າເຢືອງ, ຕາແສງ ເຟືອກທ໋າຍ, ເມືອງ ນີງເຟືອກ, ກໍ່ມີຄວາມເບີກບານມ່ວນຊື່ນເມື່ອເຂົ້າຮ່ວມໃນກຸ່ມໂຄງການລ້ຽງງົວ Hifer ໂດຍຄະນະປະສານງານໂຄງການໜູນຊ່ວຍກະສິກຳ - ຊາວກະສິກອນ - ຊົນນະບົດແຂວງ ນີງທ້ວນ ໜູນຊ່ວຍ. ໂດຍໄດ້ຮັບການໜູນຊ່ວຍແມ່ພັນງົວ 2 ໂຕ, ບັນດາຄອບຄົວທຸກຍາກໄດ້ຮັບການເຝິກອົບຮົມດ້ານເຕັກນິກການລ້ຽງສັດ, ວິທີລ້ຽງແມ່ພັນງົວ ແນວໃດໃຫ້ມີປະສິດທິຜົນ. ອ້າຍ Chamale ເທາະ, ນາຍບ້ານ ຕາເຢືອງ, ໃຫ້ຮູ້ວ່າ:
“ເມື່ອເຂົ້າຮ່ວມໂຄງການລ້ຽງງົວ Hifer ຂອງໂຄງການໜູນຊ່ວຍກະສິກຳ - ຊາວກະສິກອນ - ຊົນນະບົດ, ທີ່ໜຶ່ງແມ່ນໄດ້ຮັບການເຝິກອົບຮົມດ້ານເຕັກນິກ, ວິທີເກັບຮັກສາຫົວອາຫານດ້ວຍສິ່ງເສດເຫຼືອຈາກການຜະລິດກະສິກຳຄື: ເຟືອງ, ທີສອງແມ່ນວິທີລ້ຽງງົວ, ສັກຢາກັນພະຍາດຄືແນວໃດ, ທີສາມແມ່ນໄດ້ຮັບແມ່ພັນງົວ 2 ໂຕ ເພື່ອປັບປຸງຊີວິດການເປັນຢູ່, ພິເສດແມ່ນຄອບຄົວທຸກຍາກ. ປະຈຸບັນ, ຍ້ອນມີການລ້ຽງງົວຄອບຄົວທຸກຍາກຈຶ່ງປັບປຸງຊີວິດການເປັນຢູ່ໄດ້ສ່ວນໃດສ່ວນໜຶ່ງ.”
ພາບປະກອບ
ປະຈຸບັນ, ທົ່ວແຂວງ ນີງທ້ວນ ມີ 300 “ກຸ່ມຊາວກະສິກອນມີຄວາມນິຍົມດຽວກັນ” ເຄື່ອນໄຫວໃນຫຼາຍຂົງເຂດທີ່ຕິດພັນກັບບັນດາມູນຄ່າ. ບັນດາກຸ່ມນີ້ພວມຮັກສາການເຄື່ອນໄຫວຢ່າງມີປະສິດທິຜົນທີ່ສຸດ. ທ່ານ ເຈົາວັນກີ່, ປະທານສະມາຄົມຊາວກະສິກອນແຂວງ ນີງທ້ວນ, ໃຫ້ຮູ້ວ່າ: ຕາມວິວັດການ, ແຂວງ ນີງທ້ວນ ພວມກະກຽມສິ້ນສຸດໂຄງການ. ບົນພື້ນຖານນັ້ນ, ສະມາຄົມຊາວກະສິກອນໄດ້ຕິດຕາມກວດກາ, ປັບປຸງ 108 ກຸ່ມຕື່ມອີກ, ບຸລິມະສິດໃຫ້ບັນດາກຸ່ມໄດ້ຮັບແຫຼ່ງເງິນຈາກໂຄງການ ໜູນຊ່ວຍກະສິກຳ - ຊາວກະສິກອນ - ຊົນນະບົດ, ຮັກສາການເຄື່ອນໄຫວ, ຍົກສູງສະຕິຄວາມຮູ້, ເສີມຂະຫຍາຍທ່າແຮງຂອງກຸ່ມ, ຮັບປະກັບ 4 ປັດໄຈແມ່ນວຽກງານຜະລິດລວມ, ຈັດຕັ້ງການຜະລິດດຳເນີນທຸລະກິດ, ວຽກງານຄຸ້ມຄອງດ້ານການເງິນ, ການຮ່ວມສຳພັນຕະຫຼາດ.
“ໃນໄລຍະຈະມາເຖິງ, ສະມາຄົມຊາວກະສິກອນ ສືບຕໍ່ສະເໜີຄະນະຄຸ້ມຄອງໂຄງການສືບຕໍ່ລົງທຶນເພື່ອຈັດຕັ້ງຊຸດເຝິດອົບຮົມໃຫ້ບັນດາຖັນແຖວຄູສອນ, ເພື່ອມີບົດຮຽນນອກຈາກບົດຮຽນຂອງຕົນເອງແລ້ວ ເຂົາເຈົ້າຍັງມີທັກສະເພື່ອຖ່າຍທອດໃຫ້ຊາວກະສິກອນ. ເຮັດໄດ້ຄືແນວນັ້ນ, ການເຄື່ອນໄຫວຂອງກຸ່ມຈຶ່ງບັນລຸປະສິດທິຜົນໃນໄລຍະຈະມາເຖິງ”
ບໍ່ພຽງແຕ່ນຳມາເຊິ່ງຜົນປະໂຫຍດໂດຍກົງໃຫ້ທ້ອງຖິ່ນແລ້ວ, ບັນດາໂຄງການ “ກຸ່ມຊາວກະສິກອນມີຄວາມນິຍົມດຽວກັນ” ໂດຍສະມາຄົມຊາວກະສິກອນແຂວງຮ່ວມສຳພັນກັບຄະນະປະສານງານໂຄງການໜູນຊ່ວຍກະສິກຳ - ຊາວກະສິກອນ - ຊົນນະບົດແຂວງ ນິງທ້ວນ ປະຕິບັດຍັງຊ່ວຍໃຫ້ຊາວກະສິກອນຢັ້ງຢືນບົດບາດຂອງຕົນໃນການພັດທະນາເສດຖະກິດ - ສັງຄົມຂອງວົງຄະນະຍາດອີກດ້ວຍ.