(vovworld) - ສຳລັບການກໍ່ສ້າງຊົນນະບົດໃໝ່, ເລື່ອງເອົາໃຈໃສ່ປະຕິບັດຮູບແບບທົ່ງນາຂະໜາດໃຫຍ່ແມ່ນໜຶ່ງໃນບັນດາມາດຕະການເພື່ອປະກອບສ່ວນປະຕິບັດເສດຖະກິດຈາກການຈັດຕັ້ງການຜະລິດຢ່າງມີປະສິດທິຜົນ. ໂດຍກຳນົດໄດ້ຄວາມສຳຄັນນັ້ນ, ແຂວງ ກວາງບີ່ງ ຖືນີ້ແມ່ນບາດກ້າວບຸດທະລຸຸເພື່ອແນໃສ່ຫັນປ່ຽນໂຄງປະກອບກະສິກຳ ຕາມທິດຜະລິດເປັນສິນຄ້າແບບຍືນຍົງ, ຍົກສູງມູນຄ່າລາຍຮັບໃຫ້ແກ່ຊາວກະສິກອນ. ນັກຂ່າວ ເຟືອງກຸກ ມີບົດຂຽນກ່ຽວກັບເລື່ອງແຂວງ ກວາງບີ່ງ ບຸລິມະສິດພັດທະນາທົ່ງນາຂະໜາດໃຫຍ່.
ນັບແຕ່ເມື່ອຜັນຂະຫຍາຍການປະຕິບັດໂຄງການກໍ່ສ້າງຊົນນະບົດໃໝ່, ແຂວງ ກວາງບີ່ງ ມີແຜນນະໂຍບາຍວາງແຜນຜັງເຂດທົ່ງນາ, ສ້າງທົ່ງນາຂະໜາດໃຫຍ່ ແລະ ຫັນປ່ຽນຜົນລະປູກ, ກໍ່ສ້າງເສັ້ນທາງໃນເຂດທົ່ງນາ, ເສັ້ນທາງລະຫວ່າງບ້ານ, ສ້າງເຂດຄອງເໝືອຖາວອນ. ເລື່ອງລົງທຶນກໍ່ສ້າງພື້ນຖານໂຄງລ່າງຮັບໃຊ້ການພັດທະນາກະສິກຳ ໄດ້ປະກອບສ່ວນນຳກົນຈັກເຂົ້າໃນການຜະລິດກະສິກຳ, ເພີ່ມລາຍຮັບໃຫ້ແກ່ປະຊາຊົນ. ພ້ອມກັນນັ້ນ, ຜ່ານການໄປທັດສະນະສຶກສາຮຳ່ຮຽນເອົາບົດຮຽນກ່ຽວກັບວິທີຈັດຕັ້ງການຜະລິດຢ່າງມີປະສິດທິຜົນຢູ່ບັນດາແຂວງໃກ້ຄຽງນັ້ນ, ມີບາງທ້ອງຖິ່ນໃນແຂວງກ້າໝູນໃຊ້ທົດລອງຮູບແບບທົ່ງນາຂະໜາດໃຫຍ່ໃນທ້ອງຖິ່ນຂອງຕົນ. ຜົນທີ່ໄດ້ຮັບນັ້ນແມ່ນ, ໃນເບື້ອງຕົ້ນຮູບແບບນີ້ໄດ້ສ້າງການຫັນປ່ຽນຕັ້ງໜ້າພໍສົມຄວນທັງດ້ານປະລິມານ, ຄຸນນະພາບ, ມຸນຄ່າ. ຍ້ອນເຫດນັ້ນ, ຮູບແບບນີ້ໄດ້ ແລະ ພວມໄດ້ຮັບຄວາມເອົາໃຈໃສ່ຜັນຂະຫຍາຍທະວີຄຸນຈາກຫຼາຍທ້ອງຖິ່ນ… ຮອດຈຸດເວລານີ້, ເຂດທົ່ງນາຂອງແຕ່ລະຄອບຄົວຊາວກະສິກອນຢູ່ເມືອງ ເລ້ຖູຍ, ແຂວງ ກວາງບີ່ງ ບໍ່ຜະລິດແບບກະແຈກກະຈາຍຄືແຕ່ກ່ອນອີກແລ້ວ. ເຂດທົ່ງນາທີ່ມີເນື້ອທີ່ເກືອບ 1 ha, ເສັ້ນທາງໄປສູ່ເຂດທົ່ງນາໄດ້ຮັບການກໍ່ສ້າງດ້ວຍເບຕົງຢ່າງຖາວອນ, ມີຄວາມສະດວກທີ່ສຸດໃນການນຳກົນຈັກເຂົ້າໃນເຂດທົ່ງນາ... ປ້າ ເຈ່ີນທິແທງ, ຢູ່ຕາແສງ ຟອງຖູຍ, ເມືອງ ເລ້ຖູຍ ໃຫ້ຮູ້ວ່າ: ແຕ່ລະປີ, ຄອບຄົວຂອງປ້າໄດ້ຜະລິດເຂົ້າ 2 ລະດູດ້ວຍເນື້ອທີ່ນາທັງໝົດແມ່ນ 6 ໄລ່. ປ້າແທງ ເວົ້າວ່າ, ກ່ອນນີ້ ເມື່ອໄປເຮັດໄຮ່ ເຮັດນາແມ່ນປະສົບກັບຄວາມຫຍຸ້ງຍາກທີ່ສຸດ, ປະຈຸບັນ, ຂີ່ລົດຈັກພຽງ 2, 3 ນາທີກໍ່ໄປຮອດເຂດທົ່ງນາແລ້ວ:
“ມີຜົນປະໂຫຍດຫຼາຍຢ່າງ. ຕົວຢ່າງຄື, ກ່ອນນີ້, ເມື່ອຫາບເຂົ້າສານ, ຫາບເຄື່ອງຂອງຕ່າງໆຜ່ານເສັ້ນທາງນີ້ແມ່ນປະສົບກັບຄວາມຫຍຸ້ງຍາກຫຼາຍ. ເມື່ອເສັ້ນທາງໄດ້ຮັບການກໍ່ສ້າງສຳເລັດແລ້ວ, ລົດປະເພດໃດກໍ່ສາມາດໄປມາໄດ້.”
ການກໍ່ສ້າງທົ່ງນາຂະໜາດໃຫຍ່ຢູ່ແຂວງ ກວາງບີ່ງ
(ພາບປະກອບ)
ມາຮອດປະຈຸບັນ, ທົ່ວແຂວງໄດ້ດຶງດູດວິສາຫະກິດນັບ 10 ແຫ່ງເຂົ້າຮ່ວມການເຊັນສັນຍາປະຕິບັດຮູບແບບທົ່ງນາຂະໜາດໃຫຍ່, ທີ່ປູກເຂົ້າປູກໝາກເພັດ, ມັນຕົ້ນ, ໝາກຖົ່ວດິນ, ສາລີ, ມັນດ້າງ… 14/14 ຕາແສງ, ເທດສະບານຢູ່ເມືອງ ກວາງນີງ ໄດ້ຜັນຂະຫຍາຍການສ້າງທົ່ງນາຂະໜາດໃຫຍ່ ແລະ ຫັນປ່ຽນຜົນລະປູກ ດ້ວຍເນື້ອທີປະມານ 5.200 ເຮັກຕາ, ຊ່ວຍໃຫ້ກະສິກອນຫັນປ່ຽນຜົນລະປູກ. ຕາແສງຮ່າມນີງ ແມ່ນທ້ອງຖິ້ນນຳໜ້າໃນການຫັນປ່ຽນຜົນລະປູກ, ມາຮອດປະຈຸບັນ, ໃນທົ່ວຕາແສງມີເນື້ອທີ່ປູກໝາກໂມແມ່ນ 15 ເຮັກຕາ, ດ້ວຍ 3 ເຂດທີ່ກ້ວາງໃຫຍ່. ທ່ານ ຮ່າຊວນຮືງ, ຮອງປະທານຄະນະກຳມະການປະຊາຊົນຕາແສງ ຮ່າມນີງ, ເມືອງ ກວາງນີງ, ແຂວງ ກວາງບີ່ງ ໃຫ້ຮູ້ວ່າ: ລາຍຮັບຈາກການປູກໝາກໂມເພີ່ມຂຶ້ນທົບ 3 ຫາ 4 ເທື່ອເມື່ອທຽບໃສ່ການປູກເຂົ້າ:
“ສະມັດຕະພາບຂອງການປູກໝາກໂມສູງ ດັ່ງນັ້ນພໍ່ແມ່ປະຊາຊົນມີຄວາມເບີກບານມ່ວນຊື່ນເມື່ອປູກໝາກໂມ. ຈາກເນື້ອທີ່ດິນໜຶ່ງໄຮ່ ຖ້າປູກເຂົ້າແມ່ນສ້າງລາຍຮັບໄດ້ 3 ລ້ານດົ່ງ/ປີ, ແຕ່ເມື່ອຫັນມາປູກໝາກໂມຈະສ້າງລາຍຮັບໄດ້ແຕ່ 10 – 12 ລ້ານດົ່ງ/ໄຮ່. ຍ້ອນສ້າງລາຍຮັບສູງ, ດັ່ງນັ້ນພວກຂ້າພະເຈົ້າກຳນົດວ່ານີ້ແມ່ນໜຶ່ງໃນບັນດາຄາດໝາຍລົບລ້າງຄວາມອຶດຫິວ, ຫລຸດຜ່ອນຄວາມທຸກຍາກ, ນຳຊີວິດການເປັນຢູ່ຂອງປະຊາຊົນກ້າວຂຶ້ນ.”
ປີ 2016, ແຂວງ ກວາງບີ່ງ ໄດ້ສຸມໃສ່ການຜະລິດຕາມຮູບແບບທົ່ງນາຂະໜາດໃຫຍ່ດ້ວຍເນື້ອທີດິນກ່ວາ 6.600 ເຮັກຕາ. ເລື່ອງພັດທະນາບັນດາຮູບແບບການຜະລິດ ແລະ ຍູ້ແຮງການຮ່ວມສຳພັນໃນການຜະລິດ ໄດ້ສ້າງວຽກເຮັດງານທຳເປັນປົກກະຕິໃຫ້ຄົນງານນັບໝື່ນໆຄົນ. ທ່ານ ຫງວຽນກວກອຸດ, ຫົວໜ້າສາຂາພັດທະນາຊົນນະບົດ, ສັງກັດພະແນກກະສິກຳ ແລະ ພັດທະນາຊົນນະບົດແຂວງ ກວາງບີ່ງ ໃຫ້ຮູ້ວ່າ: ແຂວງ ກວາງບີ່ງ ເອົາໃຈໃສ່ຕິດພັນການຜະລິດ ກັບການປຸງແຕ່ງ, ການຈຳໜ່າຍຜະລິກຕະພັນກະເສດບົນພື້ນຖານພັດທະນາບັນດາຮູບແບບການຮ່ວມມື, ຮ່ວມສຳພັນກັບວິສາຫະກິດ:
“ແຂວງ ກວາງບີ່ງແມ່ນໜຶ່ງໃນບັນດາແຂວງອະນຸມັດຜ່ານໂຄງການສ້າງໂຄງປະກອບຂະແໜງກະສິກຳໄວກ່ວາໝູ່. ແລະຮຽກຮ້ອງໃຫ້ບັນດາວິສາຫະກິດລົງທຶນເຂົ້າຂົງເຂດການຜະລິດກະສິກຳ. ມາຮອດປະຈຸບັນ, ການຮ່ວມສຳພັນລະຫວ່າງການຜະລິດກະສິກຳກັບບັນດາວິສາຫະກິດມີການຫັນປ່ຽນຕ່າງໆທີ່ສຳຄັນ. ຮູບແບບການຜະລິດໃນເຂດທົ່ງນາຂະໜາດໃຫຍ່ໄດ້ຮັບການເບີດກ້ວາງເທື່ອລະກ້າວ. ບັນດາພື້ນຖານໂຄງລ່າງໃຫ້ແກ່ການພັດທະນາການຜະລິດກະສິກຳໄດ້ຮັບການລົງທຶນຢ່າງແຮງ”
ເພື່ອໃຫ້ຮູບແບບທົ່ງນາຂະໜາດໃຫຍ່ສືບຕໍ່ໄດ້ຮັບການເປີດກ້ວາງ, ເສີມຂະຫຍາຍຢ່າງມີປະສິດທິຜົນ, ບັນດາທ້ອງຖິ່ນໃນແຂວງພວມຍູ້ແຮງວຽກງານສ້າງເຂດທົ່ງນາຂະໜາດໃຫຍ່ ແລະ ຫັນປ່ຽນຜົນລະປູກ, ເພີ່ມທະວີການສົ່ງເສີມກັບບັນດາວິສາຫະກິດ, ຄອບຄົວຊາວກະສິກອນ, ເພື່ອດຳເນີນການເຊັນສັນຍາປະຕິບັດຮູບແບບນີ້. ນອກຈາກນັ້ນ, ອຳນາດການປົກຄອງທ້ອງຖິ່ນກໍ່ເອົາໃຈໃສ່ເຖິງວຽກງານຄຸ້ມຄອງລັດ ໃນຂອດແນວພັນປູກ ແລະ ຂະຫຍາຍຜົນລະປູກໃນການຜະລິດຕາມຮູບແບບທົ່ງນາຂະໜາດໃຫຍ່.