(vovworld) – ທ້ວນເລີ້ຍ ແມ່ນຕາແສງຢູ່ເຂດຫ່າງໄກ, ຕັ້ງຢູ່ທິດເໜືອເມືອງ ດົ່ງຟູ໋, ແຂວງບິ່ງເຟືອກ, ດ້ວຍຈຳນວນພົນລະເມືອງກວ່າ 50% ແມ່ນຊາວເຜົ່າສ່ວນໜ້ອຍ. ໃນສົງຄາມ, ນີ້ແມ່ນເຂດດິນຖືກທຳລາຍຢ່າງໜັກໜ່ວງ. ປະຈຸບັນ, ໃນຂະບວນການກໍ່ສ້າງຊົນນະບົດໃໝ່, ຊາວຊົນເຜົ່າສ່ວນໜ້ອຍຢູ່ທີ່ນີ້ ໄດ້ສາມັກຄີກັນ ເພື່ອກໍ່ສ້າງບ້ານເກີດເມືອງນອນໃຫ້ນັບມື້ນັບຮັ່ງມີ.
ຊາວກະສີກອນເຂົ້າຮ່ວມການກໍ່ສ້າງເສັ້ນທາງ
(ພາບ: ອິນເຕີແນດ)
ເມື່ອກັບຄືນຕາແສງທ້ວນເລີ້ຍ ໃນວັນທ້າຍເດືອນ 4, ພວກເຮົາເຫັນໄດ້ແຈ້ງການພັດທະນາຢູ່ທີ່ນີ້ໃນແຕ່ລະວັນ. ບັນດາປ່າຢາງພາລາທີ່ກວ້າງໃຫຍ່ພວມຢູ່ໃນລະດູການເກັບກ່ຽວ, ບັນດາເສັ້ນທາງເບຕົງທີ່ສວຍງາມ, ໂຮງຮຽນຫຼັງໃໝ່, ເຮືອນຕຶກຫຼາຍຫຼັງຖືກປຸກສ້າງຕິດກັນ, ເຮັດໃຫ້ໂສມໜ້າຂອງເຂດດິນທີ່ທຸກຍາກໃນເມື່ອກ່ອນມີການປ່ຽນແປງຢ່າງເຫັນໄດ້ຊັດ. ເມື່ອພາພວກຂ້າພະເຈົ້າລົງບ້ານທ້ວນເຕິນ ຫ່າງຈາກຄະນະກຳມະການປະຊາຊົນຕາແສງ 10 ກວ່າກມ ບົນເສັ້ນທາງດິນແດງທີ່ຫາກໍ່ໄດ້ຮັບການເປີດກວ້າງນັ້ນ, ທ່ານ ຫວໍຈ້ອງຄາງ, ປະທານຄະນະກຳມະການປະຊາຊົນຕາແສງໃຫ້ຮູ້ວ່າ. ໃນສອງ, ສາມປີມານີ້, ຢາງພາລາຂາຍໄດ້ດີດ້ວຍລາຄາສູງ ແລະ ປະຊາຊົນໄດ້ເປັນເຈົ້າການຫັນປ່ຽນໂຄງປະກອບຜົນລະປູກ, ສັດລ້ຽງ, ດັ່ງນັ້ນຊີວິດການເປັນຢູ່ຂອງຊາວເຜົ່າ ສະຕຽງ, ໄຕ່, ນຸ່ງ, ຂະແມ ກໍ່ໄດ້ດີກວ່າເກົ່າ. ນັບສິບຄອບຄົວຢູ່ທ້ວນເຕິນ ໄດ້ກາຍເປັນຄອບຄົວຮັ່ງມີ, ມີເຮືອນຕຶກຫຼັງໃໝ່, ມີລົດຂົນສົ່ງ ແລະ ລົດເກັງ. ທ່ານ ຫວໍຈ້ອງຄາງ ເວົ້າວ່າ:
“ມາຮອດປະຈຸບັນ, ຊີວິດຂອງຊາວຊົນເຜົ່າໄດ້ຮັບການຍົກສູງຂຶ້ນຢ່າງເຫັນໄດ້ຊັດ, ຈາກເຮືອນມຸງຫຍ້າຝາໄມ້ເຮ້ຍ, ປະຈຸບັນໄດ້ມີເຮືອນປຸກສ້າງທີ່ໃຫຍ່ໂຕ ແລະ ມີອຸປະກອນທີ່ມີຄ່າອີກ. ຊາວຊົນເຜົ່າໄດ້ເປັນເຈົ້າການນຳໃຊ້ວິທະຍາສາດເຕັກນິກເຂົ້າໃນການພັດທະນາເສດຖະກິດ, ຫັນປ່ຽນໂຄງປະກອບຜົນລະປູກ, ສັດລ້ຽງ, ດັ່ງນັ້ນຊີວິດຂອງປະຊາຊົນໄດ້ຮັບການຍົກສູງຂຶ້ນຢ່າງຈະແຈ້ງ“.
ຊີວິດຂອງຊາວຊົນເຜົ່າໄດ້ຮັບການຍົກສູງຂຶ້ນ
ເຮືອນຕຶກຫຼາຍຫຼັງຖືກປຸກສ້າງຕິດກັນ
(ພາບ: ອິນເຕີແນດ)
ຕາແສງທ້ວນເລີ້ຍ ແມ່ນແຫ່ງດຳລົງຊີວິດຂອງ 15 ຊົນເຜົ່າ ດ້ວຍ 2.400 ກວ່າຄອບຄົວ ແລະ ພົນລະເມືອງເກືອບ 14.000 ຄົນ. ໂດຍແມ່ນເຂດທີ່ກວ້າງໃຫຍ່ ແລະ ການບຸກເບີກທີ່ດິນຍາກ, ດັ່ງນັ້ນໃນຊຸມປີ 90 ຂອງທົດສະວັດກ່ອນ, ນີ້ແມ່ນດິນທີ່ຮົກເຮື້ອວ່າງເປົ່າ ດ້ວຍລະເບີດໝາກໝີ່ນຈາກສົງຄາມຍັງຕົກຄ້າງຫຼາຍ. ແຕ່ຍ້ອນມີການອອກແຮງງານຢ່າງດຸໝັ່ນຂະຫຍັນພຽນຂອງປະຊາຊົນ, ບັນດາທົ່ງຫຍ້າໃນເມື່ອກ່ອນ ໄດ້ກາຍເປັນສວນໄມ້ທີ່ຂຽວສົດງົດງາມ ພວມແຕກດອກອອກໜໍ່. ພະນັກງານກະສີກຳເມືອງດົ່ງຟູ໋, ສະມາຄົມຊາວກະສີກອນຕາແສງ ໄດ້ຂົນຂວາຍປະຊາຊົນນຳໃຊ້ຄວາມກ້າວໜ້າດ້ານວິທະຍາສາດເຕັກນິກເຂົ້າໃນການປູກຝັງ, ລ້ຽງສັດ. ບັນດາຄອບຄົວທີ່ມີເງື່ອນໄຂຊ່ວຍເຫຼືອບັນດາຄອບຄົວທີ່ທຸກຍາກກ່ຽວກັບແນວພັນ, ທຶນຮອນ ແລະ ເຕັກນິກການຜະລິດ ເພື່ອພ້ອມກັນບືນຕົວຂຶ້ນ ຫຼຸດພົ້ນອອກຈາກຄວາມທຸກຍາກ. ຍ້ອນເຫດນັ້ນ, ປີກາຍນີ້, ທົ່ວຕາແສງມີເກືອບ 50 ຄອບຄົວຫຼຸດພົ້ນອອກຈາກຄວາມທຸກຍາກ ແລະ 200 ກວ່າຄອບຄົວມີລາຍຮັບແຕ່ 300 – 400 ລ້ານດົ່ງ. ລາຍຮັບສະເລ່ຍໃສ່ຫົວຄົນໃນທົ່ວຕາແສງບັນລຸ 15 ລ້ານດົ່ງ/ປີ. ທ່ານ ເລຢູຍຮ່ຽນ, ປະທານສະມາຄົມຊາວກະສີກອນຕາແສງທ້ວນເລີ້ຍ, ເມືອງດົ່ງຟູ໋, ໃຫ້ຮູ້ວ່າ:
“ໃນຊຸມປີຜ່ານມາ, ສະມາຄົມຊາວກະສີກອນໄດ້ໃກ້ຊິດຕິດແທດກັບຊາວກະສີກອນ, ສົມທົບກັບບັນດາຂະແໜງທີ່ກ່ຽວຂ້ອງ, ບັນດານັກວິທະຍາສາດ ເພື່ອເຝິກອົບຮົມ, ຖ່າຍທອດວິທະຍາສາດເຕັກນິກໃຫ້ປະຊາຊົນໃນຕາແສງ. ຈາກນັ້ນ, ປະຊາຊົນມີຈຶ່ງຮູ້ນຳໃຊ້ເຂົ້າໃນການຜະລິດ ແລະ ພັດທະນາເສດຖະກິດຄອບຄົວ. ເສດຖະກິດຂອງປະຊາຊົນໃນຕາແສງນັບມື້ນັບພັດທະນາ, ອັດຕາຄອບຄົວທຸກຍາກໄດ້ຫຼຸດລົງຫຼາຍ“
ເຝິກອົບຮົມກ່ຽວກັບການຖ່າຍທອດວິທະຍາສາດເຕັກນິກໃຫ້ແກ່ຊາວກະສີກອນ
(ພາບ: ອິນເຕີແນດ)
ນັບແຕ່ມີໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ຊາວຕາແສງທ້ວນເລີ້ຍ ໄດ້ຕອບສະໜອງຢ່າງສຸດຈິດສຸດໃຈ, ສະຫງວນທີ່ດິນນັບພັນຕາລາງແມດເພື່ອສ້າງທາງຄົມມະນາຄົມຊົນນະບົດ. ກິດຈະກຳສາຍໄຟຟ້າຍາວ 8 ກມ ທີ່ສົ່ງໄຟຟ້າລົງບ້ານທ້ວນຕ໋ຽນ ດ້ວຍຍອດຈຳນວນເງິນ 3 ຕຶ້ກວ່າດົ່ງ ກໍ່ແມ່ນເງິນບໍລິຈາກຂອງປະຊາຊົນ, ອັນໄດ້ນຳເອົາແສງສະຫວ່າງມາໃຫ້ນັບຮ້ອຍຄອບຄົວ. ສິ່ງທີ່ໜ້າຊື່ນຊົມ ນັ້ນແມ່ນປະຊາຊົນຢູ່ທີ່ນີ້ ຍາມໃດກໍ່ສາມັກຄີ, ຊ່ວຍເຫຼືອເຊິ່ງກັນ ແລະ ກັນ ເພື່ອພ້ອມກັນພັດທະນາເສດຖະກິດ ແລະ ກໍ່ສ້າງບ້ານເກີດເມືອງນອນ. ເອື້ອຍ ນົງທິແຮງ, ຊົນເຜົ່ານຸ່ງ, ຢູ່ບ້ານທ້ວນເຕິນ, ຕາແສງທ້ວນເລີ້ຍ, ເມືອງດົ່ງຟູ໋, ແຂວງບິ່ງເຟືອກ, ໃຫ້ຮູ້ວ່າ:
“ຄອບຄົວຂ້າພະເຈົ້າໄດ້ສະຫງວນທີ່ດິນ 3 ໄຮ່ ເພື່ອກໍ່ສ້າງທາງ, ແລະ ສະຫງວນ 1 ໄຮ່ ເພື່ອກໍ່ສ້າງເຮືອນແຫ່ງສາຍຈິດມິດໃຈ ໃຫ້ບັນດາຄອບຄົວທີ່ທຸກຍາກ. ຄອບຄົວຂ້າພະເຈົ້າກໍ່ໃຫ້ບັນດາຄອບຄົວອື່ນໆກູ້ຢືມທຶນ 135 ລ້ານດົ່ງ ເພື່ອປະກອບສ່ວນລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ ຂອງທ້ອງຖີ່ນ. ເຮົາຊ່ວຍເຫຼືອເພື່ອໃຫ້ທຸກຄົນມີຄວາມອິ່ມໜຳສຳລານ“.
ມາຮອດປະຈຸບັນ, ເມືອງດົ່ງຟູ໋ ພວມຂະຫຍາຍບັນດາຮູບແບບຜະລິດທີ່ໄດ້ນຳມາເຊິ່ງປະສິດທິຜົນທາງດ້ານເສດຖະກິດສູງຂອງປະຊາຊົນຕາແສງທ້ວນເລີ້ຍ ເຖິງບັນທ້ອງຖີ່ນອື່ນໆຄືຮູບແບບລ້ຽງໄກ່, ລ້ຽງແຂ້, ລ້ຽງງູ… ມີ 10 ກວ່າວິສາຫະກິດປຸງແຕ່ງຢາງພາລາ, ໝາກມວງຫີມພະພານ ໄດ້ລົງທຶນພັດທະນາການຜະລິດຢູ່ຕາແສງທ້ວນເລີ້ຍ, ສ້າງວຽກເຮັດງານທຳເປັນປົກກະຕິໃຫ້ແກ່ຜູ້ອອກແຮງງານນັບຮ້ອຍຄົນໃນທ້ອງຖີ່ນ. ດ້ວຍຈິດໃຈສາມັກຄີ ແລະ ອອກແຮງງານຢ່າງດຸໝັ່ນຂະຫຍັນພຽນຂອງຊາວເຜົ່າສ່ວນໜ້ອຍຢູ່ທີ່ນີ້ ໄດ້ສ້າງເປັນພະລັງຊີວິດໃໝ່ຢູ່ເຂດດິນປະຕິວັດໃນເມື່ອກ່ອນ, ປະກອບສ່ວນສ້າງບ້ານເກີດເມືອງນອນບິ່ງເຟືອກ ໃຫ້ນັບມື້ນັບຮັ່ງມີ ແລະ ສວຍງາມກວ່າອີກ.