(vovworld) - ຂະບວນການ “ທົ່ວປວງຊົນສາມັກຄີກໍ່ສ້າງຊີວິດທາງດ້ານວັດທະນະທຳຢູ່ເຂດຊຸມຊົນ” ໄດ້ຮັບການປຸກລະດົມເປັນເວລາກວ່າ 10 ປີ ຜ່ານມາ ແລະ ໃນຊຸມປີມໍ່ໆນີ້ແມ່ນຂະບວນການກໍ່ສ້າງຊົນນະບົດໃໝ່ ລ້ວນແຕ່ໄດ້ຮັບການຜັນຂະຫຍາຍຢູ່ບ້ານຕ່າງໆໃນແຂວງດັກລັກ. ມີຫຼາຍບ້ານໄດ້ຮັບຜົນງານດີເດັ່ນຍ້ອນລະດົມໄດ້ກຳລັງແຮງຂອງປະຊາຊົນ ແລະ ເສີມຂະຫຍາຍລັກສະນະປະຊາຄົມໃນແຕ່ລະກິດຈະກຳ, ແຕ່ລະວຽກງານອັນລະອຽດ. ຕາແສງແອອາຕູ, ນະຄອນບວນມາທວດ, ແມ່ນໜຶ່ງໃນບັນດາແບບຢ່າງຄືດັ່ງກ່າວ.
ປະຊາຊົນເຂົ້າຮ່ວມການກໍ່ສ້າງທາງຄົມມະນາຄົມ
(ພາບ: ອິນເຕີແນດ)
ເສັ້ນທາງເບຕົງໃນບ້ານ 1, ຕາແສງແອອາຕູ ດ້ວຍຕົ້ນໝາກສູງທຽມຟ້າທີ່ປູກເປັນແຖວຢູ່ລຽບຕາມສອງພາກທາງ ໄດ້ກາຍເປັນເສັ້ນທາງທີ່ເປັນແບບຢ່າງຂອງບ້ານ 1. ເຖິງວ່າຍາວພຽງ 120 ແມດ, ກວ້າງ 2,5 ແມດ, ດ້ວຍມູນຄ່າ 26 ລ້ານດົ່ງເທົ່ານັ້ນ, ແຕ່ຄວາມສະອາດ ແລະ ຄວາມສະດວກສະບາຍຂອງເສັ້ນທາງນີ້ ໄດ້ເປີດສາກໃຫ້ຂະບວນການກໍ່ສ້າງທາງຄົມມະນາຄົມຢູ່ບ້ານ 1, ນັບແຕ່ປີ 2006. ມາຮອດປະຈຸບັນ, ບັນດາເສັ້ນທາງໃນບ້ານລ້ວນແຕ່ໄດ້ຮັບການປູຢາງ ຫຼື ກໍ່ສ້າງດ້ວຍເບຕົງ ດ້ວຍຄວາມຍາວທັງໝົດ 1,5 ກມ, ຍອດມູນຄ່າກວ່າ 360 ລ້ານດົ່ງ, ໃນນັ້ນປະຊາຊົນປະກອບ 316 ລ້ານດົ່ງ. ພາຍຫຼັງກໍ່ສ້າງທາງສຳເລັດແລ້ວ, ປະຊາຊົນຍັງບໍລິຈາກເງິນເພື່ອກໍ່ສ້າງຫໍປະຊຸມໃນບ້ານ 1 ດ້ວຍເນື້ອທີ 150 ຕາລາງແມດ ແລະ ສະໜາມກວ່າ 1000 ຕາລາງແມັດ ເພື່ອຮັບໃຊ້ໃຫ້ແກ່ການເຄື່ອນໄຫວກິລາອີກດ້ວຍ.
“ຂ້າພະເຈົ້າຢູ່ທີ່ນີ້ມາເປັນເວລາ 30 ປີແລ້ວ, ປະຈຸບັນທ້ອງຖີ່ນມີການປ່ຽນແປງຫຼາຍຢ່າງ, ຢູ່ບ້ານ 1 ໄດ້ມີຫໍປະຊຸມທີ່ໃຫຍ່ໂຕ ແລະ ສວຍງາມ, ມີສະໜາມກິລາອີກ, ສ່ວນເສັ້ນທາງໄປມາໂດຍ ລັດ ແລະ ປະຊາຊົນພ້ອມກັນເຮັດ. ໂດຍໄດ້ຮັບຄວາມເອົາໃຈໃສ່ຈາກພັກ ແລະ ລັດ, ຄອບຄົວຂ້າພະເຈົ້າກໍ່ຄືຄອບຄົວອື່ນໆໃນບ້ານໄດ້ປະກອບກຳລັງເຫື່ອແຮງ ແລະ ບໍລິຈາກເງິນເພື່ອກໍ່ສ້າງຊົນນະບົດໃໝ່. ”
ສ່ວນຢູ່ບ້ານ ຢູ່, ເສັ້ນທາງເບຕົງໄປຍັງທ່ານ້ຳໄດ້ຮັບການກໍ່ສ້າງສຳເລັດກ່ອນນີ້ສອງສາມເດືອນ. ເພື່ອກໍ່ສ້າງເສັ້ນທາງນີ້, ນອກຈາກຂົນຂວາຍ 580 ກວ່າຄອບຄົວໃນບ້ານບໍລິຈາກເງິນແລ້ວ, ທາງຕາແສງຍັງຂົນຂວາຍປະຊາຊົນເຂົ້າຮ່ວມການຂົນສົ່ງອຸປະກອນ ແລະ ປະກອບທີ່ດິນອີກ. ເອີື້ອຍ ເຮີເງີງ ເອບານ, ໃນບ້ານຢູ່, ໃຫ້ຮູ້ວ່າ:
“ແຕ່ລະຄອບຄົວປະກອບ 200.000 ດົ່ງ ເພື່ອກໍ່ສ້າງເສັ້ນທາງໄປຍັງທ່ານ້ຳ. ເມື່ອເສັ້ນທາງໄດ້ຮັບການກໍ່ສ້າງສຳເລັດແລ້ວ, ເອື້ອຍນ້ອງໄປເອົານ້ຳກໍ່ສະດວກສະບາຍກວ່າ. ພວກຂ້າພະເຈົ້າດີໃຈຫຼາຍ.”
ໂດຍມີຄວາມສາມັກຄີເປັນຈິດໜຶ່ງໃຈດຽວຂອງຄະນະຄຸ້ມຄອງບ້ານ, ບັນດາອົງການຈັດຕັ້ງມະຫາຊົນ ແລະ ແຕ່ລະຄອບຄົວປະຊາຊົນ, ມາຮອດປະຈຸບັນ, ບ້ານຢູ່ ບັນລຸໄດ້ 13/19 ມາດຖານກໍ່ສ້າງຊົນນະບົດໃໝ່, 98% ຈຳນວນຄອບຄົວປະຊາຊົນລ້ວນແຕ່ໄດ້ຮັບນາມມະຍົດຄອບຄົວວັດທະນະທຳ. ບ້ານຢູ່ ກໍ່ໄດ້ຮັບການຮັບຮອງວ່າແມ່ນບ້ານວັດທະນະທຳໃນຫຼາຍປີຢ່າງລຽນຕິດ. ວຽກງານອະນຸລັກຮັກສາວັດທະນະທຳທີ່ເປັນມູນເຊື້ອຂອງບັນດາເຜົ່າໄດ້ຮັບການປະຕິບັດດີພໍສົມຄວນ. ຜູ້ເຖົ້າ, ຜູ້ແກ່ຍັງເມົາມົວກັບວຽກງານສອນໃຫ້ລຸ້ນໜຸ່ມວິທີຕີຄ້ອງ, ອາຊີບຕ່ຳຫູກ, ປຸງແຕ່ງເຫຼົ້າໄຫ. ນັກສິລະປະການ ອີບລວາ ອາເດີເຮິງ, ໃນບ້ານຢູ່, ໃຫ້ຮູ້ວ່າ:
“ຂ້າພະເຈົ້າຂົນຂວາຍພວກຫຼານມາຮຽນ, ທຳອິດແມ່ນໃຫ້ພວກຫຼານຮຽນຕີຄ້ອງດ້ວຍໄມ້ໄຜ່, ເມື່ອຕີໄດ້ດີແລ້ວ ຈຶ່ງໃຫ້ຕີຄ້ອງທອງ. ສອງເດືອນເທື່ອໜຶ່ງ, ບັນດານັກສິລະປະການກໍ່ເຕົ້າໂຮມກັນຢູ່ຫໍປະຊຸມຕີຄ້ອງເພື່ອບໍ່ໃຫ້ລືມ, ທັງຮັບໃຊ້ໃຫ້ປະຊາຊົນໃນບ້ານອີກ. ”
ເດັກນ້ອຍຮຽນຕີກອງດ້ວຍໄມ້ໄຜ່
(ພາບ: ອິນເຕີແນດ)
ວຽກງານລະດົມກຳລັງແຮງຂອງປະຊາຊົນ ເພື່ອຮັບໃຊ້ໃຫ້ປະຊາຊົນພວມໄດ້ຮັບການປະຕິບັດຢ່າງມີປະສິດທິຜົນຢູ່ບັນດາບ້ານໃນຕາແສງແອອາຕູ. ຄວາມສາມັກຄີເປັນຈິດໜຶ່ງໃຈດຽວຂອງປະຊາຊົນ ແມ່ນລູກກະແຈເພື່ອຜັນຂະຫຍາຍລາຍການ, ແຜນການຕ່າງໆຂອງທ້ອງຖີ່ນສຳເລັດຜົນ. ທ່ານ ຫງວຽນຟຸກເລີ້ຍ, ຫົວໜ້າຄະນະຮັບຜິດຊອບວຽກງານແນວໂຮມບ້ານ 1, ແບ່ງປັນວ່າ:
“ເບິ່ງລວມແລ້ວ, ປະຊາຊົນເຂົ້າໃຈໄດ້ວ່າ, ເງິນຂອງປະຊາຊົນແມ່ນຮັບໃຊ້ໃຫ້ປະຊາຊົນ, ດັ່ງນັ້ນເຂົາເຈົ້າຈຶ່ງຕອບສະໜອງແລະ ປະຕິບັດດີທີ່ສຸດ. ອາດເວົ້າໄດ້ວ່າ “ບັ້ນຂົນຂວາຍທົ່ວປວງຊົນສາມັກຄີກໍ່ສ້າງຊີວິດວັດທະນະທຳຢູ່ເຂດຊຸມຊົນ” ໃນບ້ານ 1 ໄດ້ຮັບການສະໜັບສະໜູນທີ່ສຸດຈາກປະຊາຊົນ, ອັນໄດ້ເຮັດໃຫ້ຂະບານການຕ່າງໆລ້ວນແຕ່ສຳເລັດຜົນ”.
ການອະນຸລັກຮັກສາວັດທະນະທຳທີ່ເປັນມູນເຊື້ອ ເພື່ອຮັບໃຊ້ຊີວິດທາງດ້ານຈິດໃຈຂອງປະຊາຊົນພວມໄດ້ຮັບການປະຕິບັດດີພໍສົມຄວນຢູ່ຕາແສງ ແອອາຕູ, ນະຄອນ ບວນມາທວດ. ປີ 2013 ນີ້, 89% ຈຳນວນຄອບຄົວໃນຕາແສງບັນລຸໄດ້ນາມມະຍົດຄອບຄົວວັດທະນະທຳ, ຕາແສງ ແອອາຕູ ກໍ່ໄດ້ຮັບການຮັບຮອງວ່າແມ່ນຕາແສງວັດທະນະທຳລະດັບນະຄອນໃນເວລາ 3 ປີຢ່າງລຽນຕິດ, ແລະ ປະຈຸບັນພວມໄດ້ຮັບການຕີລາຄາເພື່ອຮັບຮອງວ່າແມ່ນຕາແສງວັດທະນະທຳລະດັບແຂວງ. ປີນີ້, ຕາແສງແອອາຕູ ກໍ່ສູ້ຊົນເພື່ອບັນລຸໃຫ້ໄດ້ 11 ມາດຖານໃນໂຄງການກໍ່ສ້າງຊົນນະບົດໃໝ່.