(vovworld) - ໂດຍແມ່ນຕາແສງຢູ່ເຂດພູດອຍ, ລະດັບການພັດທະນາຕຳ່ສົມຄວນ, ແຕ່ຍ້ອນມີຄວາມຄ່ອງແຄ້ວໃນການຊີ້ນຳນຳພາຂອງອຳນາດການປົກຄອງ, ຄວາມເຫັນດີເຫັນພ້ອມ ແລະ ການສະໜັບສະໜູນຂອງປະຊາຊົນ, ບາງຕາແສງຢູ່ເມືອງ ກຣົງແປກ, ແຂວງດັກລັກ ຈຶ່ງບັນລຸໄດ້ 19 ມາດຖານໃນໂຄງການແຫ່ງຊາດກໍ່ສ້າງຊົນນະບົດໃໝ່. ຜົນສຳເລັດໃນເບື້ອງຕົ້ນພວມເປັນການສົ່ງເສີມຫຼາຍທ້ອງຖີ່ນໃນແຂວງດັກລັກ ຍູ້ແຮງວິວັດການກໍ່ສ້າງຊົນນະບົດໃໝ່.
ການນຳຫ້ອງການກະສິກຳ ແລະ ພັດທະນາຊົນນະບົດເມືອງກວດກາວຽກງານກໍ່ສ້າງທາງຄົມມະນາຄົມ
(ພາບ: ອິນເຕີແນດ)
ກ່ອນນີ້ 3 ປີ, ເມື່ອຫາກໍ່ຜັນຂະຫຍາຍໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່, ຕາແສງຮ່ວາດົງ ພຽງແຕ່ບັນລຸໄດ້ 7/19 ມາດຖານກ່ຽວກັບຊົນນະບົດໃໝ່ເທົ່ານັ້ນ. ໃນນັ້ນບາງມາດຖານສຳຄັນຄື: ຫຼຸດຜ່ອນອັດຕາຄອບຄົວທຸກຍາກ, ລາຍຮັບສະເລ່ຍໃສ່ຫົວຄົນຍັງຕຳ່, ການກໍ່ສ້າງພື້ນຖານໂຄງລ່າງການສຶກສາ, ສາທາລະນະສຸກຍັງອ່ອນດ້ອຍເມື່ອທຽບໃສ່ມາດຖານທີ່ໄດ້ວາງອອກ. ຮ່ວາດົງ ຍັງແມ່ນຕາແສງ “ຈຸດຮ້ອນ“ ກ່ຽວກັບຄວາມສະຫງົບປອດໄພ, ຄວາມເປັນລະບຽບຮຽບຮ້ອຍຂອງແຂວງດັກລັກ ຢູ່.
ໂດຍປະຕິບັດໂຄງການກໍ່ສ້າງຊົນນະບົດໃໝ່, ບັນດາບ້ານໃນທ້ອງຖີ່ນໄດ້ຈັດຕັ້ງການປະຊຸມເພື່ອໃຫ້ປະຊາຊົນເລືອກຕັ້ງຄະນະພັດທະນາຂັ້ນບ້ານ ແນໃສ່ຜັນຂະຫຍາຍບັນດາມະຕິ, ແຜນການຂອງຂັ້ນເທິງ ແລະ ຂອງຕາແສງເຖິງປະຊາຊົນດ້ວຍຫຼາຍຮູບການ. ພ້ອມກັນນັ້ນ, ພະນັກງານ, ສະມາຊິກພັກແຕ່ລະຄົນ ຕ້ອງແມ່ນຜູ້ນຳໜ້າໃນແຕ່ລະວຽກງານລະອຽດ ເພື່ອໃຫ້ປະຊາຊົນເຫັນ, ສະໜັບສະໜູນ ແລະ ປະຕິບັດຕາມ. ໃນວິວັດແຫ່ງການກໍ່ສ້າງທາງຄົມມະນາຄົມໃນບ້ານ, ພະນັກງານອຳນາດການປົກຄອງບາງຄົນໄດ້ເປັນແບບຢ່າງນຳໜ້າ, ຊຳ້ບໍ່ໜຳໄດ້ຄຳ້ປະກັນຊັບສິນຂອງຄອບຄົວ ກູ້ຢືມເງິນຈາກທະນາຄານເພື່ອກໍ່ສ້າງທາງ, ສ້າງຄວາມສະດວກໃຫ້ປະຊາຊົນໄປມາ, ດັ່ງນັ້ນຈຶ່ງໄດ້ຮັບການສະໜັບສະໜູນຈາກປະຊາຊົນທີ່ສຸດ. ປ້າ ເລືອງທິເດີ້ຍ, ຢູ່ບ້ານ 17, ຕາແສງຮ່ວາດົງ, ເມືອງ ກຣົງແປກ, ໃຫ້ຮູ້ວ່າ:
“ພວກຂ້າພະເຈົ້າສະໜັບສະໜູນໂຄງການແຫ່ງຊາດນີ້ທີ່ສຸດ. ເມື່ອບໍ່ທັນມີທາງເບຕົງ, ເວລາຝົນຕົກ, ການໄປມາຍາກຫຼາຍຍ້ອນຂີ້ຕົມເຕັມທາງ. ປະຈຸບັນ, ພວກຂ້າພະເຈົ້າສູ້ຊົນກໍ່ສ້າງທາງເບຕົງ, ບໍ່ພຽງແຕ່ສ້າງຄວາມສະດວກໃຫ້ພວກຂ້າພະເຈົ້າໃນການໄປມາເທົ່ານັ້ນ, ຫາກໃຫ້ລູກຫຼານໄດ້ໄປຮຽນບົນເສັ້ນທາງສະອາດສວຍງາມອີກດ້ວຍ“.
ມາຮອດປະຈຸບັນ, ພາຍຫຼັງເກືອບ 5 ປີ ແຫ່ງການຜັນຂະຫຍາຍການປະຕິບັດໂຄງການກໍ່ສ້າງຊົນນະບົດໃໝ່, ຮອດເດືອນ 6/2015, ຕາແສງຮ່ວາດົງ ບັນລຸໄດ້ 19 ມາດຖານ, ໂສມໜ້າຊົນນະບົດມີການປ່ຽນແປງຫຼາຍຢ່າງ, ລະບົບທາງຄົມມະນາຄົມຕາແສງໄດ້ຮັບການກໍ່ສ້າງດ້ວຍເບຕົງກວ່າ 90%, ໂຮງຮຽນທຸກຊັ້ນໄດ້ຮັບການກໍ່ສ້າງຢ່າງຄົບຖ້ວນ, ຈຳນວນຄອບຄົວທຸກຍາກຫຼຸດລົງເຫຼືອພຽງ 3,4%, ລາຍຮັບສະເລ່ຍໃສ່ຫົວຄົນບັນລຸ 33 ລ້ານດົ່ງ/ປີ, ເພີ່ມຂຶ້ນທົບ 2 ເທົ່າເມື່ອທຽບໃສ່ປີ 2010. ທ່ານ ຫງວຽນດິ່ງເວື້ອງ, ປະທານຄະນະກຳມະການປະຊາຊົນຕາແສງຮ່ວາດົງ, ໃຫ້ຮູ້ວ່າ, ເພື່ອບັນລຸໄດ້ບັນດາຜົນງານດັ່ງກ່າວ, ສິ່ງສຳຄັນທີ່ສຸດແມ່ນຄວາມຕັດສິນໃຈຂອງທັງລະບົບການເມືອງ ແລະ ຄວາມເຫັນດີເຫັນພ້ອມ, ການສະໜັບສະໜູນຂອງປະຊາຊົນ. ຕ້ອງຖືປະຊາຊົນເປັນໃຈກາງ ແລະ ຕ້ອງເຮັດແນວໃດໃຫ້ເຂົາເຈົ້າເຫັນ, ເຂົ້າໃຈ ແລະ ສະໜັບສະໜູນ, ວິວັດການປະຕິບັດຈຶ່ງປະສົບຜົນສຳເລັດໄດ້.
ເດືອນ 5/2015, ຕາແສງ ແອອາກາວ, ນະຄອນບວນມາທວດ ໄດ້ຮັບການຮັບຮອງວ່າເປັນຕາແສງບັນລຸມາດຖານຊົນນະບົດໃໝ່. ນີ້ແມ່ນຕາແສງບັນລຸມາດຖານຊົນນະບົດໃໝ່ກ່ອນໝູ່ໃນວິວັດແຫ່ງການປະຕິບັດໂຄງການແຫ່ງຊາດກໍ່ສ້າງຊົນນະບົດໃໝ່ຢູ່ແຂວງດັກລັກ ໄລຍະ 2010-2015. ທ່ານ ຫງວຽນວັນເຈື່ອງ, ປະທານຄະນະກຳມະການປະຊາຊົນຕາແສງ ແອອາກາວ, ໃຫ້ຮູ້ວ່າ, ໄລ່ຮອດເດືອນ 8/2012, ຕາແສງບັນລຸພຽງ 9/19 ມາດຖານກ່ຽວກັບຊົນນະບົດໃໝ່ເທົ່ານັ້ນ. ເພື່ອບັນລຸໄດ້ 10 ມາດຖານທີ່ຍັງເຫຼືອ, ອຳນາດການປົກຄອງຕາແສງ, ບັນດາອົງການຈັດຕັ້ງມະຫາຊົນລ້ວນແຕ່ເຂົ້າຮ່ວມ ດ້ວຍຄວາມຕັດສິນໃຈສູງ. ແຕ່ລະເນື້ອໃນມາດຖານລ້ວນແຕ່ຖືກຍົກອອກປຶກສາຫາລື, ຮັບເອົາຄວາມເຫັນໃນກອງປະຊຸມປະຊາຊົນແຕ່ລະບ້ານ. ແບ່ງງານໃຫ້ສະມາຊິກແຕ່ລະຄົນໃນອຳນາດການປົກຄອງຕາແສງ ຮັບຜິດຊອບແຕ່ລະມາດຖານ, ແຕ່ລະບ້ານ ເພື່ອເປັນເສນາທິການບັນດາບັນຫາລະອຽດໃນແຕ່ລະມາດຖານ. ຍ້ອນເຫດນັ້ນ, ປະຊາຊົນແຕ່ລະຄົນລ້ວນແຕ່ກຳໄດ້ແຜນນະໂຍບາຍ, ເຫັນດີເຫັນພ້ອມ ແລະ ຕັ້ງໜ້າເຂົ້າຮ່ວມຂະບວນການ. ທ່ານ ຟານວັນເຈື່ອງ, ເວົ້າວ່າ:
“ຢາກເຮັດວຽກງານດັ່ງກ່າວໃຫ້ໄດ້, ແມ່ນຕ້ອງມີການຊີ້ນຳນຳພາຢ່າງເປັນເອກະພາບ, ທັງລະບົບການເມືອງຕ້ອງເຂົ້າຮ່ວມ. ຂ້າພະເຈົ້າເອງກໍ່ຮັບຜິດຊອບ 2 ມາດຖານຫຍຸ້ງຍາກທີ່ສຸດ ນັ້ນແມ່ນທາງຄົມມະນາຄົມ ແລະ ໂຮງຮຽນ. ຂ້າພະເຈົ້າຕ້ອງເອົາໃຈໃສ່ເຖິງມາດຖານຍາກທີ່ຈະບັນລຸໄດ້ເພື່ອສຸມໃສ່, ຊອກຫາວິທີແກ້ໄຂ, ພະຍາຍາມເພື່ອບັນລຸມາດຖານນັ້ນໃຫ້ໄດ້ຕາມກຳນົດ“.
ຄວາມຈິງແຫ່ງການຜັນຂະຫຍາຍໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່ຢູ່ດັກລັກ ສະແດງໃຫ້ເຫັນວ່າ, ເພື່ອບັນລຸໄດ້ບັນດາມາດຖານທີ່ໄດ້ວາງອອກ, ພ້ອມກັບການຊີ້ນຳນຳພາຢ່າງຄ່ອງແຄ້ວ, ໃກ້ຊິດຂອງອຳນາດການປົກຄອງ, ສິ່ງສຳຄັນທີ່ສຸດນັ້ນແມ່ນຕ້ອງມີຄວາມເຫັນດີເຫັນພ້ອມ, ການສະໜັບສະໜູນຂອງປະຊາຊົນ. ນີ້ແມ່ນປັດໃຈສຳຄັນຊ່ວຍໃຫ້ວິວັດການຜັນຂະຫຍາຍສະດວກສະບາຍ ແລະ ບັນລຸປະສິດທິຜົນ.