(vovworld) – ໃນການກໍ່ສ້າງຊົນນະບົດໃໝ່, ແຂວງກວາງນິງ ໄດ້ເອົາໃຈໃສ່ເປັນພິເສດເຖິງການພັດທະນາບັນດາຮູບແບບຍົກສູງປະສິດທິຜົນການຜະລິດ ດ້ວຍການຍູ້ແຮງການຮ່ວມສຳພັນລະຫວ່າງລັດ - ວິສາຫະກິດ, ນັກວິທະຍາສາດ ແລະ ຜູ້ຜະລິດໃນການຈຳໜ່າຍຜະລິດຕະພັນໃຫ້ແກ່ຊາວກະສີກອນ. ຢູ່ເທດສະບານກວາງອຽນ, ໃນເບື້ອງຕົ້ນຮູບແບບນີ້ໄດ້ນຳມາເຊິ່ງຜົນປະໂຫຍດຫຼາຍຢ່າງໃຫ້ແກ່ຊາວກະສີກອນ ກໍ່ຄືຂະບວນການກໍ່ສ້າງຊົນນະບົດໃໝ່.
(ພາບ ອິນເຕີແນດ)
ໂຄງການຜະລິດຜັກສະອາດຢູ່ເທດສະບານກວາງອຽນ, ໂດຍບໍລິສັດຫຸ້ນສ່ວນຫວຽດລອງ ຜັນຂະຫຍາຍ ໄດ້ໝູນໃຊ້ບັນດາຜົນງານດ້ານວິທະຍາສາດ ເຕັກໂນໂລຢີທີ່ທັນສະໄໝ ກ່ຽວກັບແນວພັນ, ຄຸນນະພາບ, ຫຼັກອະນາໄມ ແລະ ໄດ້ຮັບການຜະລິດຕາມມາດຕະຖານ (VietGap) ໝາຍເຖິງຮູບແບບຜະລິດກະສີກຳທີ່ດີ. ປີ 2012, ທາງບໍລິສັດໄດ້ຜັນຂະຫຍາຍໂຄງການນີ້ໃນເນື້ອທີ່ກວ່າ 10 ເຮັກຕາ, ຮອດປີ 2013 , ໂຄງການໄດ້ຮັບການຜັນຂະຫຍາຍໃນເນື້ອທີ່ 32 ເຮັກຕາ. ເພື່ອຮັບໃຊ້ໃຫ້ໂຄງການດັ່ງກ່າວ, ທາງບໍລິສັດໄດ້ລົງທຶນກໍ່ສ້າງເສັ້ນທາງໃນເຂດທົ່ງນາ 1.500 ແມດ, ກໍ່ຄືເປີດຊຸດເຝິກອົບຮົມດ້ານເຕັກນິກປູກ ແລະ ບົວລະບັດຜັກໃຫ້ແກ່ຊາວກະສີກອນ. ປ້າ ດັ້ງທິຢຸງ, ຢູ່ຕາແສງໂກ້ງຮ່ວາ, ເທດສະບານກວາງອຽນ, ໃຫ້ຮູ້ວ່າ:
“ນັບແຕ່ທາງບໍລິສັດຫວຽດລອງ ນຳໃຊ້ເຕັກນິກເຂົ້າໃນການປູກຝັງໃນຕາແສງ, ຂ້າພະເຈົ້າເຫັນວ່າມີການປ່ຽນແປງຫຼາຍຢ່າງ, ນັບແຕ່ຜູ້ອອກແຮງງານ, ແນວພັນ, ຕະຫຼອດຮອດການໃຊ້ຢາຂ້າສັດຕູ. ປູກຜັກຕາມເຕັກໂນໂລຢີນີ້ຈະຮັບປະກັນຫຼັກອະນາໄມ, ບໍ່ໃຊ້ຢາຂ້າສັດຕູພືດຫຼາຍ. ການຈຳໜ່າຍຜະລິດຕະພັນກໍ່ຮັບປະກັນກວ່າ. ປູກຜັກໄດ້ເທົ່າໃດ ກໍ່ຂາຍໄດ້ເທົ່ານັ້ນ. ລາຍຮັບໃນແຕ່ລະເດືອນຂອງພວກຂ້າພະເຈົ້າກໍ່ຮັບປະກັນກວ່າ“.
(ພາບ ອິນເຕີແນດ) ປະຈຸບັນ, ໂຄງການນີ້ພວມປະຕິບັດທົດລອງຢູ່ຕາແສງໂກ້ງຮ່ວາ ແລະ ຫຼັງຈາກນັ້ນຈະຂະຫຍາຍອອກຢ່າງກວ້າງຂວາງຢູ່ຕາແສງກວາງອຽນ ແລະ ບາງເມືອງອື່ນໆ. ເພື່ອຮັບປະກັນຄຸນນະພາບ, ທາງບໍລິສັດ ໄດ້ສົມທົບກັບສະຖາບັນຕົ້ນໄມ້ທັນຍາຫານ ແລະ ສະບຽງອາຫານ, ສະຖາບັນວິທະຍາສາດ ກະສີກຳ ເພື່ອຖ່າຍທອດເຕັກນິກປູກ ແລະ ບົວລະບັດຜັກ, ການໃສ່ຟຸ່ນເຄມີ, ຢາຂ້າສັດຕູພືດ ເພື່ອຮັບປະກັນຄຸນນະພາບ ເພື່ອຮັບໃຊ້ໃຫ້ແກ່ການຜະລິດຜັກສະອາດ, ນັບແຕ່ການປູກຝັງ, ບົວລະບັດ ຕະຫຼອດຮອດການຫຸ້ມຫໍ່ລ້ວນແຕ່ໄດ້ຮັບການກວດກາຢ່າງລະອຽດ ແລະ ເປັນປະຈຳ. ທ່ານ ເລກວາງທັ໋ງ, ຜູ້ອຳນວຍການບໍລິສັດຫຸ້ນສ່ວນຫວຽດລອງ, ໃຫ້ຮູ້ວ່າ, ໃນຕາແສງໂກ້ງຮ່ວາ ມີເກືອບ 50% ຈຳນວນຄອບຄົວເຂົ້າຮ່ວມໂຄງການ, ແລະ ຈຳນວນນີ້ນັບມື້ນັບເພີ່ມຂຶ້ນ. ເມື່ອໂຄງການໄດ້ຮັບຜົນສຳເລັດ ຈະສ້າງວຽກເຮັດງານທຳໃຫ້ຜູ້ອອກແຮງງານຫຼາຍຄົນ ແລະ ສ້າງລາຍຮັບເປັນປົກກະຕິໃຫ້ແກ່ຊາວກະສີກອນໃນທ້ອງຖີ່ນ, ປະກອບສ່ວນກໍ່ສ້າງຊົນນະບົດໃໝ່. ທ່ານ ເລກວາງທັ໋ງ, ຜູ້ອຳນວຍການບໍລິສັດຫຸ້ນສ່ວນ ຫວຽດລອງ, ໃຫ້ຮູ້ວ່າ:
“ຂ້າພະເຈົ້າຄິດວ່າ ເມື່ອເຫັນຜະລິດຕະພັນຂອງວິສາຫະກິດບັນລຸໄດ້ມູນຄ່າເສດຖະກິດສູງ, ປະຊາຊົນກໍ່ຈະສະມັກໃຈປະຕິບັດຕາມ. ດັ່ງນັ້ນວິສາຫະກິດຕ້ອງເປັນແບບຢ່າງເພື່ອໃຫ້ປະຊາຊົນປະຕິບັດຕາມ “.
ໃນໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ແຂວງກວາງນິງ ກຳນົດວ່າ ປະຊາຊົນມີບົດບາດເປັນເຈົ້າ, ຄຽງຂ້າງນັ້ນຍັງມີວິສາຫະກິດຫຼາຍແຫ່ງໄດ້ສົບທົບກັບທ້ອງຖີ່ນຕ່າງໆ ເພື່ອກໍ່ສ້າງບັນດາເຂດຜະລິດສະເພາະຕາມທິດຮ່ວມສຳພັນແບບຍືນຍົງລະຫວ່າງລັດ - ວິສາຫະກິດ - ນັກວິທະຍາສາດ ແລະ ຜູ້ຜະລິດ. ໃຫ້ຂໍ້ສັງເກດກ່ຽວກັບບົດບາດຂອງບັນດາຮູບແບບຜະລິດຕາມທິດຮ່ວມສຳພັນນີ້, ທ່ານ ເຈືອງກົງງ່ານ, ຫົວໜ້າຄະນະກໍ່ສ້າງຊົນນະບົດໃໝ່ແຂວງກວາງນິງ, ຖືວ່າ:
“ມີບັນດາວິສາຫະກິດ ຈຶ່ງສາມາດຈຳໜ່າຍຜະລິດຕະພັນກະເສດເຊິ່ງຊາວກະສີກອນຜະລິດອອກໄດ້. ພວກຂ້າພະເຈົ້າຖືນັ້ນແມ່ນແກ່ນສານເພື່ອສືບຕໍ່ໂຄສະນາ, ຂະຫຍາຍອອກຢ່າງກວ້າງຂວາງ ແນໃສ່ສ້າງເປັນຂະບວນການກໍ່ສ້າງຊົນນະບົດໃໝ່ຢູ່ກວາງນິງ ແລະ ນັ້ນແມ່ນກຳລັງໜູນ ເພື່ອປະຕິບັດການກໍ່ສ້າງຊົນນະບົດໃໝ່ ດ້ວຍບົດບາດທົ່ວສັງຄົມຮ່ວມແຮງຮ່ວມໃຈກໍ່ສ້າງຊົນນະບົດໃໝ່“.
ຜົນສຳເລັດໃນເບື້ອງຕົ້ນຂອງການກໍ່ສ້າງຊົນນະບົດໃໝ່ຢູ່ກວາງນິງ ນັ້ນແມ່ນໄດ້ສ້າງເປັນຂະບວນການແຂ່ງຂັນອອກແຮງງານ ທຳການຜະລິດ, ບື່ນຕົວຂຶ້ນສ້າງຄວາມຮັ່ງມີໃນໝູ່ປະຊາຊົນ, ໃນນັ້ນມີການປະກອບສ່ວນສຳຄັນຂອງວິສາຫະກິດຫຼາຍແຫ່ງ, ອັນໄດ້ປະກອບສ່ວນຍູ້ໄວຄວາມຄືບໜ້າໃນການປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່