(vovworld) - ປະຈຸບັນ, ໃນຂະນະທີ່ຫຼາຍທ້ອງຖີ່ນຢູ່ເຂດຊົນນະບົດ, ຊາວກະສີກອນບໍ່ສາມາດຫາເງິນລ້ຽງຊີບດ້ວຍການຜະລິດກະສີກຳເປັນຕົ້ນໄດ້ ຍ້ອນລາຍຮັບບໍ່ໝັ້ນທ່ຽງ, ແຕ່ຢູ່ເມືອງອຽນແຄ໋ງ, ແຂວງນິງບິ່ງ, ບັນດາຄອບຄົວຊາວກະສີກອນບໍ່ພຽງແຕ່ຫຼຸດພົ້ນອອກຈາກຄວາມທຸກຍາກເທົ່ານັ້ນ, ຫາກຍັງບືນຕົວຂຶ້ນສ້າງຄວາມຮັ່ງມີຈາກການປູກຕົ້ນໄມ້ກະສີກຳດ້ວຍລາຍຮັບນັບລ້ານດົ່ງ/ເຮັກຕາ/ປີໄດ້. ເພື່ອຮັບຜົນງານຄືດັ່ງກ່າວແມ່ນຍ້ອນມີວິທີເຮັດຢ່າງມີຫົວຄິດປະດິດສ້າງຕາມຮູບແບບຜັດປ່ຽນກັນປູກເຂົ້າ, ລ້ຽງປາ ແລະ ປູກພືດ.
ຕາແສງແຄ໋ງແທ່ງ ແມ່ນ 1 ໃນຈຳນວນ 3 ຕາແສງທຳອິດຂອງເມືອງອຽນແຄ໋ງ, ແຂວງນິງບິ່ງ, ໄດ້ຮັບການເລືອກເຟັ້ນເປັນຕາແສງແບບຢ່າງໃນການປະຕິບັດໂຄງການກໍ່ສ້າງຊົນນະບົດໃໝ່. ຢູ່ທີ່ນີ້ພື້ນຖານໂຄງລ່າງຄື: ເຄືອຂ່າຍໄຟຟ້າ, ທາງຄົມມະນາຄົມ, ໂຮງຮຽນ, ສຸກສາລາຂອງຕາແສງລ້ວນແຕ່ໄດ້ຮັບການກໍ່ສ້າງຢ່າງໃຫຍ່ໂຕ ແລະ ສວຍງາມ. ພິເສດ, ຊີວິດຂອງປະຊາຊົນນັບມື້ນັບໄດ້ຮັບການຍົກສູງຂຶ້ນ. ເມື່ອຮັບຜົນງານຄືດັ່ງກ່າວແມ່ນຍ້ອນປະຊາຊົນຢູ່ທີ່ນີ້ໄດ້ນຳໃຊ້ຮູບແບບຜະລິດກະສີກຳ 3 ໃນ 1 ຢ່າງມີປະສິດທິຜົນ. ນີ້ແມ່ນຮູບແບບສົມທົບການປູກຕົ້ນໄມ້ກະສີກຳຊະນິດຕ່າງໃນເນື້ອທີ່ດຽວກັນ: ໃຕ້ຮ່ອງນຳ້ແມ່ນລ້ຽງຫອຍ, ປາ. ໃນພື້ນດິນປູກເຂົ້າ, ຜັກ, ພືດ; ເທິງຮ້ານປູກຕົ້ນໝາກໂຕ່ນ ຕົ້ນໝາກບວບ, ໝາກແຕງ... ພາຍຫຼັງ 5 ປີທີ່ປະຕິບັດຮູບແບບນີ້, ຊາວກະສີກອນ ບ້ານ 13 ສາມາດສ້າງລາຍຮັບສະເລ່ຍໄດ້ກວ່າ 100 ລ້ານດົ່ງ/ເຮັກຕາ/ປີ. ທ່ານ ຟ້າມວັນລ້າຍ, ຢູ່ບ້ານ 13, ໃຫ້ຮູ້ວ່າ, ສະເພາະປີ 2013, ຄອບຄົວທ່ານສ້າງລາຍຮັບໄດ້ 500 ລ້ານດົ່ງ/ເຮັກຕາ/ປີ.
“ບໍ່ພຽງແຕ່ປູກຕົ້ນໝາກມະລະເທົ່ານັ້ນ, ຫາກຍັງປູກຕົ້ນເຄືອຫຼາຍຊະນິດຄື: ຕົ້ນໝາກໂຕ່ນ, ໝາກແຕງເພື່ອສົ່ງອອກອີກດ້ວຍ. ປະຈຸບັນ, ຍັງປູກຕົ້ນໝາກເຜັດຕື່ມອີກ. ເຮັດແບບນີ້ແມ່ນບໍ່ຖືກຫຼຸບທຶນຈັກເທື່ອ, ຫາກລາຍຮັບນັບມື້ນັບເພີ່ມຂຶ້ນ“.
ປີ 2013, ສະເພາະເນື້ອທີ່ປູກຕົ້ນໝາກມະລະ, ຄອບຄົວເອື້ອຍ ຟ້າມແທງເຊີນ ຢູ່ບ້ານ 13 ສາມາດສ້າງລາຍຮັບໄດ້ 8 ລ້ານດົ່ງ/ເຮັກຕາ, ພ້ອມກັບນັບສິບລ້ານດົ່ງຈາກຕົ້ນໝາກໂຕ່ນ ແລະ ຕົ້ນໝາກເຜັດ. ດ້ວຍການປູກຕົ້ນໄມ້ກະສີກຳຫຼາຍຊະນິດ ແລະ ລ້ຽງສັດທີ່ມີມູນຄ່າສູງນັ້ນ. ປະຈຸບັນ, ຜະລິດຕະພັນກະສີກຳໄດ້ນຳມາເຊິ່ງປະສິດທິຜົນດ້ານເສດຖະກິດ ແລະ ຍົກສູງຊີວິດການເປັນຢູ່ຂອງຄອບຄົວຂຶ້ນຕື່ມ. ເອື້ອຍ ຟ້າມແທງເຊີນ, ແບ່ງປັນວ່າ:
“ນັບແຕ່ນຳໃຊ້ຮູບແບບນີ້, ເສດຖະກິດຂອງຄອບຄົວຂ້າພະເຈົ້າກໍ່ເພີ່ມຂຶ້ນທົບ 2-3 ເທົ່າເມື່ອທຽບໃສ່ຊຸມປີກ່ອນ. ລາຍຮັບຈາກການປູກຕົ້ນໝາກບວບ ແລະ ຕົ້ນໝາກໂຕ່ນແມ່ນ 15 ລ້ານດົ່ງ/ປີ. ຂ້າພະເຈົ້າໄດ້ປຸກສ້າງເຮືອນຫຼັງໜຶ່ງດ້ວຍແຫຼ່ງລາຍຮັບຈາກການປູກຕົ້ນໄມ້ກະສີກຳ “.
ຈາກ 5 ຄອບຄົວທຳອິດທີ່ປູກຕົ້ນໄມ້ກະສີກຳຕາມຮູບແບບ 3 ໃນ 1 ນັ້ນ, ມາຮອດປະຈຸບັນ, ທົ່ວຕາແສງແຄ໋ງແທ່ງ ໄດ້ມີ 67 ຄອບຄົວເຂົ້າຮ່ວມ. ຕາມທ່ານ ຟ້າມວັນເຢິນ, ເລຂາຄະນະພັກຕາແສງແຄ໋ງແທ່ງແລ້ວ, ປະສິດທິຜົນເສດຖະກິດສູງຈາກຮູບແບບນີ້ ໄດ້ປະກອບສ່ວນຢ່າງຫຼວງຫຼາຍເຂົ້າໃນວຽກງານຫຼຸດຜ່ອນອັດຕາສ່ວນຄອບຄົວທຸກຍາກໃນຕາແສງຈາກ 9,6% ໃນ 3 ປີກ່ອນ, ລົງເຫຼືອພຽງ 3% ໃນປະຈຸບັນ.
“ຈຸດໝາຍສຳຄັນທີ່ສຸດຂອງພວກຂ້າພະເຈົ້າແມ່ນຊຸກຍູ້ການພັດທະນາການຜະລິດ, ຍົກສູງຊີວິດຂອງປະຊາຊົນ. ພິເສດແມ່ນສຳລັບຄອບຄົວທີ່ທຸກຍາກ, ພວກຂ້າພະເຈົ້າກໍ່ມີມາດຕະການລະອຽດຄືໃຫ້ເຂົາເຈົ້າກູ້ຢືມທຶນ, ສ້າງວຽກເຮັດງານທຳເພື່ອໃຫ້ເຂົາເຈົ້າສາມາດສຳພັດກັບຮູບແບບພັດທະນາເສດຖະກິດ, ຍົກສູງລາຍຮັບຂຶ້ນຕື່ມ“.
ຈາກຜົນງານທີ່ບັນລຸໄດ້, ເມືອງອຽນແຄ໋ງ ກຳນົດຈະສືບຕໍ່ພັດທະນາກະສີກຳຕາມທິດນຳໃຊ້ບັນດາຮູບແບບຜະລິດທີ່ນຳມາເຊິ່ງມູນຄ່າເສດຖະກິດສູງ ແລະ ບັນລຸຄາດໝາຍສູ້ຊົນເພື່ອກາຍເປັນເມືອງນຳໜ້າຂອງແຂວງນິງບິ່ງກ່ຽວກັບການກໍ່ສ້າງຊົນນະບົດໃໝ່ໃນປີ 2020. ທ່ານ ເລຈູງແທ່ງ, ຮອງເລຂາປະຈຳຄະນະພັກເມືອງ ອຽນແຄ໋ງ, ໃຫ້ຮູ້ວ່າ:
“ປະຊາຊົນຜະລິດກະສີກຳເປັນຕົ້ນ, ດັ່ງນັ້ນພວກຂ້າພະເຈົ້າພວມຊອກຫາຫຼາຍຮູບແບບທີ່ດີເພື່ອຜັນຂະຫຍາຍ. ຖ້າໄດ້ຮັບການພັດທະນາຢ່າງກວ້າງຂວາງ, ແລະ ມີສົ້ນອອກ, ນີ້ຈະແມ່ນປັດໃຈຮັບປະກັນໃຫ້ແກ່ການກໍ່ສ້າງຊົນນະບົດໃໝ່ຂອງເມືອງອຽນແຄ໋ງ, ພິເສດແມ່ນປະກອບສ່ວນຍົກສູງລາຍຮັບກໍ່ຄືຄຸນນະ ພາບຊີວິດການເປັນຢູ່ຂອງປະຊາຊົນຂຶ້ນ“.
ບັນດາຜົນງານເຊິ່ງຊາວກະສີກອນເມືອງອຽນແຄ໋ງ, ແຂວງນິງບິ່ງ ບັນລຸໄດ້ນັ້ນ ເປັນການພິສູດໃຫ້ເຫັນວ່າ, ຊາວກະສີກອນສາມາດສ້າງຄວາມຮັ່ງມີໃນທົ່ງນາຂອງຕົນໄດ້ ຖ້າຫາກຮູ້ປ່ຽນແປງແບບວິທີປູກຝັງຢ່າງເໝາະສົມ ເພື່ອຍົກສູງມູນຄ່າການຜະລິດກະສີກຳ. ດ້ວຍຮູບແບບຜະລິດກະສີກຳ 3 ໃນ 1, ປະລິມານການຜະລິດເຂົ້າ ແລະ ພືດສູງ, ຈາກນັ້ນຄຸນນະພາບຊີວິດການເປັນຢູ່ຂອງຊາວກະສີກອນໃນເຂດຊົນນະບົດນັບມື້ນັບໄດ້ຮັບການຍົກສູງຂຶ້ນ.