(vovworld) - ເມືອງ ຟອງດຽນ, ນະຄອນ ເກີນເທີ ຫາກໍ່ໄດ້ຮັບການຮັບຮອງຈາກ ນາຍົກລັດຖະມົນຕີວ່າແມ່ນເມືອງບັນລຸມາດຖານຊົນນະບົດໃໝ່. ພາຍຫຼັງ 5 ປີແຫ່ງການປະຕິບັດໂຄງການແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ໂສມໜ້າຊົນນະບົດຂອງເມືອງ ຟອງດຽນ ນັບມື້ນັບຈະເລີນເຕີບໂຕ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງຢ່າງຈະແຈ້ງ. ບົດຂຽນ “ເມືອງ ຟອງດຽນ, ນະຄອນ ເກີນເທີ, ກໍ່ສ້າງຊົນນະບົດໃໝ່ຢ່າງໝັ້ນຄົງ” ຂອງ ຟານແອງ, ນັກຂ່າວ VOV.
ພິທີຮັບໃບຢັ້ງຢືນເປັນເມືອງຊົນນະບົດໃໝ່
ຟອງດ່ຽນ ແມ່ນເມືອງຊົນນະບົດໃໝ່ທຳອິດຢູ່ແຂວງ ເກີນເທີ ແລະ ແມ່ນທ້ອງຖິ່ນທີ 2 ຂອງເຂດທົ່ງພຽງແມ່ນຳ້ຂອງ, ຖັດຈາກເທດສະບານ ຫງາໄບ, ແຂວງ ເຫົ້າຢາງ, ບັນລຸມາດຖານຊົນນະບົດໃໝ່. ຈາກເມືອງໜຶ່ງຢູ່ຊານນະຄອນທີ່ທຸກຍາກ, ພື້ນຖານໂຄງລ່າງບໍ່ ພັດທະນາຢ່າງຄົບຊຸດ, ເສດຖະກິດອີງໃສ່ການຜະລິດກະສິກຳເປັນຕົ້ນ, ແຕ່ດ້ວຍບັນດາຄວາມມານະພະຍາຍາມ, ເປັນຈິດໜຶ່ງໃຈດຽວຂອງອຳນາດການປົກຄອງ ແລະ ປະຊາຊົນໄດ້ເຮັດໃຫ້ເຂດຊົນນະບົດຟອງດ່ຽນ ມີໂສມໜ້າໃໝ່. ຟອງດ່ຽນ ໄດ້ເລືອກເຟັ້ນວິທີການລົງທຶນພື້ນຖານໂຄງລ່າງເຂດຊົນນະບົດເທື່ອລະກ້າວ, ສຸມໃສ່ກໍ່ສ້າງຄົມມະນາຄົມຊົນນະບົດ ແລະ ຊົນລະປະທານຢ່າງຄົບຊຸດສ້າງເງື່ອນໄຂໃຫ້ປະຊາຊົນພັດທະນາການຜະລິດ. ນອກນັ້ນ, ເມືອງກໍ່ຫັນປ່ຽນໂຄງປະກອບການຜະລິດໃນເນື້ອທ່ີດິນປູກເຂົ້ານຳມາເຊິ່ງປະສິດທິຜົນຕຳ່ ມາປູກຕົ້ນໄມ້ປະເພດອື່ນໆຄື: ພືດ, ຕົ້ນໄມ້ປະດັບ, ລ້ຽງປູກສິນໃນນຳ້ຕິດພັນກັບການທ່ອງທ່ຽວເຮືອນສວນ, ທ່ອງທ່ຽວຊີວະພາບ… ມາຮອດຈຸດເວລານີ້, ໂສມໜ້າຊົນນະບົດຂອງເມືອງໄດ້ມີການປ່ຽນແປງຢ່າງເຫັນໄດ້ຊັດ. ມີໂຮງຮຽນ, ສຸກສາລາຫຼາຍແຫ່ງໄດ້ຮັບການກໍ່ສ້າງໃໝ່. ບັນດາເສັ້ນທາງເປັນຕົມຍາມລະດູຝົນໃນເມື່ອກ່ອນປະຈຸບັນໄດ້ຮັບການປູຢາງ, ເບຕົງ ແລະ ບັນດາຂົວຊົ່ວຍາວໄດ້ໄດ້ຮັບການກໍ່ສ້າງດ້ວຍເບຕົງ. ປະຈຸບັນ, ລາຍຮັບສະເລ່ຍໃສ່ຫົວຄົນໃນບໍລິເວນເມືອງບັນລຸ 35 ລ້ານດົ່ງ/ຄົນ/ປີ, ເພີ່ມຂຶ້ນ 14 ລ້ານດົ່ງເມື່ອທຽບໃສ່ປີ 2011. ທ່ານນາງ ຮ່ວາງທິເຟືອງ, ຕາແສງ ເຍີນອ໋າຍ, ເມືອງ ຟອງດຽນ, ໄດ້ແບ່ງປັນວ່າ:
“ປະຈຸບັນ, ເສັ້ນທາງໄປມາກໍ່ສະດວກສະບາຍ, ດອກໄມ້ທີ່ປູກຕາມ 2 ຟາກທາງກໍ່ສວຍງາມທີ່ສຸດ. ພໍ່ແມ່ປະຊາຊົນໃນບໍລິເວນເມືອງໃຜໆກໍ່ເບີກບານມ່ວນຊື່ນ.”
ພ້ອມກັບການຜັນຂະຫຍາຍຫຼາຍມາດຕະການຢ່າງຄົບຊຸດ, ເມືອງ ຟອງດ່ຽນ ກໍ່ຍູ້ແຮງວຽກງານໂຄສະນາເຜີຍແຜ່ເພື່ອໃຫ້ປະຊາຊົນເຫັນແຈ້ງບົດບາດເປັນເຈົ້າ ແລະ ຜົນປະໂຫຍດອັນແທດຈິງຂອງປະຊາຊົນໃນການກໍ່ສ້າງຊົນນະບົດໃໝ່. ດັ່ງນັ້ນ, ຂະບວນການຮ່ວມແຮງຮ່ວມໃຈກໍ່ສ້າງຊົນນະບົດໃໝ່ໄດ້ແຜ່ຂະຫຍາຍເຖິງປະຊາຊົນແຕ່ລະຄົນຢ່າງແທ້ຈິງ ແລະ ລະດົມຫຼາຍແຫຼ່ງກຳລັງພ້ອມກັນເຮັດ. 5 ປີຜ່ານມາ, ເມືອງ ຟອງດ່ຽນ ລະດົມແຫຼ່ງທຶນໄດ້ 1.800 ຕື້ດົ່ງໃຫ້ແກ່ການກໍ່ສ້າງຊົນນະບົດໃໝ່, ໃນນັ້ນ, ປະຊາຊົນປະກອບຈຳນວນເງິນເກືອບ 260 ຕື້ດົ່ງ ແລະ ແຫຼ່ງເງິນຈາກສັງຄົມແມ່ນເກືອບ 200 ຕື້ດົ່ງ. ທ່ານ ຫງວຽນວັນສື, ປະທານຄະນະກຳມະການປະຊາຊົນເມືອງ ຟອງດ່ຽນ, ໃຫ້ຮູ້ວ່າ:
“ຜົນສຳເລັດນີ້ພຽງແຕ່ແມ່ນຜົນງານໃນເບື້ອງຕົ້ນເທົ່ານັ້ນ, ພວກຂ້າພະເຈົ້າຍັງບໍ່ທັນເພິ່ງພໍໃຈເທື່ອ ຫາກຍັງຕ້ອງມີຄວາມຕັດສິນໃຈສູງກ່ວາອີກເພື່ອຮັກສາ, ກຳແໜ້ນນາມມະຍົດແມ່ນເມືອງຊົນນະບົດໃໝ່. ໃນໄລຍະຈະມາເຖິງ, ເມືອງສືບຕໍ່ຍົກລະດັບການສ້ອມແປງ, ລົງທຶນກໍ່ສ້າງໃໝ່ລະບົບພື້ນຖານໂຄງລ່າງຂັ້ນຮາກຖານ, ສືບຕໍ່ຊີ້ນຳຂະແໜງກະສິກຳແນະນຳໃຫ້ປະຊາຊົນຫັນປ່ຽນໂຄງປະກອບການຜະລິດຕາມການຮ່ວມສຳພັນເພື່ອຍົກສູງລາຍຮັບໃຫ້ແກ່ປະຊາຊົນ.”
ທາງຄົມມະນາຄົມໄດ້ປູຢາງຢ່າງງາມຕາ
ເພື່ອຮັກສານາມມະຍົດເມືອງຊົນນະບົດໃໝ່ ແລະ ຮັບປະກັນຄຸນນະພາບ, ປະສິດທິຜົນຂອງໂຄງການນັ້ນ, ເມືອງ ຟອງດຽນ ຈະສືບຕໍ່ສຸມໃສ່ພັດທະນາຊີວິດການເປັນຢູ່ຂອງປະຊາຊົນ, ຍູ້ແຮງວຽກງານໂຄສະນາເຜີຍແຜ່ກ່ວາອີກ, ສ້າງຄວາມເຫັນດີເຫັນພ້ອມໃນໝູ່ປະຊາຊົນ. ຄຽງຄູ່ກັນນັ້ນ, ນະຄອນຈະສືບຕໍ່ສົມທົບກັບທ້ອງຖິ່ນສຸມໃສ່ຜັນຂະຫຍາຍການສະຖິຕິ, ກວດກາຄືນລະດັບປະຕິບັດສຳເລັດໂຄງການຈຸດໝາຍແຫ່ງຊາດໃນການກໍ່ສ້າງຊົນນະບົດໃໝ່ຂອງແຕ່ລະຕາແສງ, ເພື່ອມີບັນດາການໜູນຊ່ວຍ, ມາດຕະການເໝາະສົມແນໃສ່ຮັກສາບັນດາມາດຕະຖານຢ່າງໝັ້ນຄົງ. ທ່ານ ເລວັນເຕີມ, ຮອງປະທານຄະນະກຳມະການປະຊາຊົນນະຄອນ ເກີນເທີ, ເນັ້ນໜັກວ່າ: ຜົນສຳເລັດຂອງເມືອງ ຟອງດຽນ ແມ່ນພື້ນຖານ, ປະຖົມປັດໄຈເພື່ອໃຫ້ນະຄອນ ເກີນເທີ ສືບຕໍ່ບັນລຸໄດ້ບັນດາໝາກຜົນສູງກ່ວາໃນການກໍ່ສ້າງຊົນນະບົດໃໝ່.
“ນອກຈາກການລະດົມກຳລັງເພື່ອສຸມໃສ່ກໍ່ສ້າງເມືອງ ຟອງດ່ຽນ ກາຍເປັນເມືອງຊົນນະບົດໃໝ່ນັ້ນ, ນະຄອນເກີນເທີພວກຂ້າພະເຈົ້າຍັງມີຄວາມເອົາໃຈໃສ່ເປັນພິເສດເຖິງທ່າແຮງຂອງ ຟອງດ່ຽນ ແມ່ນເຂດຊີວະພາບດ້ວຍຄວາມສາມາດບົ່ມຊ້ອນໃຫ້ແກ່ການພັດທະນາການທ່ອງທ່ຽວ. ພວກຂ້າພະເຈົ້າຈະມີແຜນການລົງທຶນກໍ່ສ້າງແຫ່ງນີ້ໃຫ້ເປັນເຂດທ່ອງທ່ຽວຊີວະພາບທັດສະນີຍະພາບ, ການທ່ອງທ່ຽວປະຊາຄົມ.”
ເລື່ອງເມືອງ ຟອງດ່ຽນ ບັນລຸມາດຖານຊົນນະບົດໃໝ່ ຈະແມ່ນກຳລັງໜູນເພື່ອໃຫ້ເມືອງສືບຕໍ່ປັບປຸງກ່ຽວກັບໂຄງປະກອບໂຄງລ່າງ, ຫັນປ່ຽນໂຄງປະກອບການຜະລິດ. ໄລຍະຈະມາເຖິງ, ເມືອງສືບຕໍ່ລະດົມແຫຼ່ງກຳລັງຕື່ມອີກເພື່ອພັດທະນາເຂດຊົນນະບົດແບບຍືນຍົງ, ສຸມໃສ່ຍົກສູງຊີວິດທາງດ້ານວັດຖຸ, ຈິດໃຈໃຫ້ແກ່ປະຊາຊົນໃນຊຸມປີຕໍ່ໆໄປ.