(vovworld) - ເດີນເຢືອງ ແມ່ນເຂດປູກຜັກໃຫຍ່ກວ່າໝູ່ຂອງແຂວງເລິມດົ່ງ. ອາຊີບປູກຜັກຢູ່ເດີນເຢືອງ ແມ່ນມີມາແຕ່ດົນນານແລ້ວ. ພ້ອມກັບໂຄງການກໍ່ສ້າງຊົນນະບົດໃໝ່, ຊາວກະສີກອນເມືອງເດີນເຢືອງ ຍັງຍູ້ແຮງການນຳໃຊ້ວິທະຍາສາດເຕັກນິກຕາມທິດອຸດສາຫະກຳສູງ ເພື່ອແນໃສ່ສ້າງຄວາມໝັ້ນຄົງ ແລະ ຍົກສູງຄຸນນະພາບຜະລິດຕະພັນ, ປະກອບສ່ວນພັດທະນາເສດຖະກິດ - ສັງຄົມຂອງທ້ອງຖີ່ນ.
ການປູກຜັກຕາມເຕັກໂນໂລຢີໃໝ່
(ພາບ: ອິນເຕີແນດ)
ມຸງໄປສູ່ຈຸດໝາຍເຖິງປີ 2015, ເດີນເຢືອງ ຈະແມ່ນເມືອງທຳອິດຢູ່ແຂວງເລິມດົ່ງ ບັນລຸໄດ້ 19/19 ມາດຖານກ່ຽວກັບການກໍ່ສ້າງຊົນນະບົດໃໝ່. ກ່ອນອື່ນໝົດ, ເມືອງສຸມໃສ່ກໍ່ສ້າງພື້ນຖານໂຄງລ່າງ. ນັບແຕ່ຕົ້ນປີມາຮອດປະຈຸບັນ, ເດີນເຢືອງລະດົມທຶນໄດ້ 7,7 ຕຶ້ດົ່ງ. ໃນນັ້ນລັດລົງທຶນ 5,8 ຕຶ້ດົ່ງ, ສ່ວນຍັງເຫຼືອໂດຍປະຊາຊົນປະກອບ. ທ່ານ ທ໋າຍອອນ, ເລຂາຄະນະພັກເມືອງເດີນເຢືອງ ໃຫ້ຮູ້ວ່າ, ໃນໂຄງການຈຸດໝາຍແຫ່ງຊາດ, ການກໍ່ສ້າງພື້ນຖານໂຄງລ່າງເສດຖະກິດສັງຄົມແມ່ນຕາມທິດທັນສະໄໝ. ພິເສດແມ່ນເອົາໃຈໃສ່ເປັນພິເສດເຖິງການຍົກສູງຊີວິດການເປັນຢູ່ຂອງປະຊາຊົນ ຕິດພັນກັບວຽກງານຫຼຸດຜ່ອນຄວາມທຸກຍາກຢ່າງໄວ ແລະ ໝັ້ນຄົງ.
“ເມືອງເດີນເຢືອງແມ່ນເມືອງທຸກຍາກ, ພິເສດນັບແຕ່ປີ 2005 ມາຮອດປະຈຸບັນ, ເມືອງສຸມໃສ່ເຂົ້າບັນດາໂຄງການຈຸດສຸມ, ພັດທະນາຊົນນະບົດ. ໂດຍແມ່ນເມືອງຜະລິດກະສີກຳ, ເດີນເຢືອງ ໄດ້ຫັນປ່ຽນຜົນລະປູກ, ສັດລ້ຽງ, ນຳໃຊ້ເຕັກນິກ, ເຕັກໂນໂລຢີສູງເຂົ້າໃນການຜະລິດກະສີກຳ, ຍົກສູງສະມັດຕະພາບ, ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການປັບປຸງໃຫ້ດີຂຶ້ນ“.
ການປູກຜັກຕາມເຕັກໂນໂລຢີໃໝ່
(ພາບ: ອິນເຕີແນດ) ປີ 2013 ເນື້ອທີ່ປູກຜັກທັງໝົດຂອງເມືອງເດີນເຢືອງ ແມ່ນເກືອບ 22.000 ເຮັກຕານັ້ນ, ໃນນັ້ນເນື້ອທີ່ນຳໃຊ້ເຕັກໂນໂລຢີສູງກວມປະມານ 70%, ບັນລຸລາຍຮັບສະເລ່ຍແຕ່ 120-150 ລ້ານດົ່ງ/ເຮັກຕາ/ປີ. ສະເພາະເນື້ອທີ່ໝູນໃຊ້ເຕັກໂນໂລຢີສູງບັນລຸລາຍຮັບສູງທົບ 2 ເທົ່າ, ບາງເທື່ອທົບ 5 ເທົ່າ.
ເດີນເຢືອງ ແມ່ນທ້ອງຖີ່ນມີຫຼາຍຊົນເຜົ່າດຳລົງຊີວິດຢູ່ຮ່ວມກັນຄື: ຊົນເຜົ່າເຈີຣູ, ເກີຮໍ… ດ້ວຍຄວາມດຸໝັ່ນຂະຫຍັນພຽນ, ພ້ອມກັບການຖ່າຍທອດວິທະຍາສາດເຕັກນິກເຂົ້າໃນການຜະລິດ, ມີຫຼາຍຄອບຄົວຊາວຊົນເຜົ່າສ່ວນໜ້ອຍຢູ່ເດີນເຢືອງ ໄດ້ຮູ້ວິທີຜະລິດຕາມເຕັກໂນໂລຢີໃໝ່. ທ່ານ ທ໋າຍອອນ, ໃຫ້ຮູ້ວ່າ:
“ເມືອງເດີນເຢືອງ ມີຜູ້ເຊື່ອຖືສາສະໜາກວມ 75%. ແຕ່ດ້ວຍຄວາມເຫັນດີເຫັນພ້ອມໃນສັງຄົມ, ເຂົາເຈົ້າໄດ້ສາມັກຄີກັນທຳການຜະລິດ, ຍົກສູງຊີວິດການເປັນຢູ່ຂອງປະຊາຊົນ ແລະ ພັດທະນາຊົນນະບົດຕາມທິດກ້າວໜ້າ “.
ການປູກດອກໄມ່ຢູ່ເດີນເຢືອງຕາມເຕັກໂນໂລຢີໃໝ່
(ພາບ: ອິນເຕີແນດ) ນຳໜ້າໃນຂະບວນການກໍ່ສ້າງຊົນນະບົດໃໝ່ ແລະ ນຳໃຊ້ວິທະຍາສາດເຕັກນິກເຂົ້າໃນການຜະລິດກະສີກຳຢູ່ເດີນເຢືອງ ແມ່ນຕາແສງ ກາໂດ. ກາໂດ ມີພົນລະເມືອງເກືອບ 11.000 ຄົນ. ໃນນັ້ນຊາວຊົນເຜົ່າກວມ 25%. ພາຍຫຼັງກວ່າ 2 ປີ ແຫ່ງການກໍ່ສ້າງຊົນນະບົດໃໝ່, ມາຮອດປະຈຸບັນ, ທາງຕາແສງປະຕິບັດໄດ້ 15 ມາດຖານ. ຊີວິດການເປັນຢູ່ຂອງຊາວຊົນເຜົ່າຢູ່ແຫ່ງນີ້ໄດ້ຮັບການຍົກສູງຂຶ້ນ, ລາຍຮັບສະເລ່ຍໃສ່ຫົວຄົນໃນແຕ່ລະປີບັນລຸໄດ້ແຕ່ 28-30 ລ້ານດົ່ງ/ຄົນ. ການກໍ່ສ້າງຮູບແບບໝູນໃຊ້ຄວາມກ້າວໜ້າດ້ານວິທະຍາສາດເຂົ້າໃນການຜະລິດຜັກ, ດອກໄມ້ໃຫ້ແກ່ຊາວຊົນເຜົ່າສ່ວນໜ້ອຍຢູ່ກາໂດ ໄດ້ຊ່ວຍໃຫ້ເຂົາເຈົ້າສຳພັດ, ທຳຄວາມຊິນເຄີຍກັບແບບວິທີຜະລິດໃໝ່, ນຳມາເຊິ່ງປະສິດທິຜົນດ້ານເສດຖະກິດສູງ. ປະຈຸບັນທັງຕາແສງມີເນື້ອທີ່ຜະລິດຜັກກວ່າ 1.500 ເຮັກຕາ, ລາຍຮັບສະເລ່ຍແມ່ນ 150 ລ້ານດົ່ງ/ເຮັກຕາ. ຄອບຄົວອ້າຍ ຫວູກວາງເຫົ້າ ມີເນື້ອທີ່ປູກຝັງ ເກືອບ 15.000 ຕາລາງແມັດ, ໃນ 2 ປີຜ່ານມາ, ອ້າຍໄດ້ລົງທຶນກໍ່ສ້າງເຮືອນແກ້ວ, ລະບົດຫົດນຳ້ໃຫ້ເນື້ອທີ່ປູກດອກໄມ້ 4000 ຕາລາງແມັດ. ອ້າຍໃຫ້ຮູ້ວ່າ:
“ປີນີ້ແມ່ນປີທີ 3 ທີ່ຂ້າພະເຈົ້າໄດ້ເຮັດວຽກໃນເຮືອນແກ້ວ. ເຫັນວ່າປູກດອກໄມ້ລາຍຮັບກໍ່ເປັນປົກກະຕິກວ່າ. ປະຈຸບັນມີຫຼາຍຄົນພວມປ່ຽນໃໝ່ການຜະລິດ, ກໍ່ສ້າງເຮືອນແກ້ວເພື່ອປູກຕົ້ນໄມ້ທີ່ໃຫ້ສະມັດຕະພາບສູງກວ່າຄືຕົ້ນຝ້າຍ, ຕົ້ນໝາກເຜັດ “.
ການປູກດອກໄມ່ຢູ່ເດີນເຢືອງຕາມເຕັກໂນໂລຢີໃໝ່
(ພາບ: ອິນເຕີແນດ) ໃນຊຸມປີຕໍ່ໜ້າ, ເມືອງເດີນເຢືອງ ສືບຕໍ່ສົ່ງເສີມຊາວກະສີກອນເປີດກວ້າງ, ພັດທະນາຮູບແບບເສດຖະກິດໃໝ່. ເດີນເຢືອງກໍ່ພວມຫັນປ່ຽນຜົນລະປູກທີ່ໃຫ້ສະມັດຕະພາບ, ຄຸນນະພາບສູງ ເພື່ອຮັບໃຊ້ການຜະລິດ, ເພີ່ມທະວີການຖ່າຍທອດເຕັກນິກການຜະລິດຕາມທິດອຸດສາຫະກຳສູງ, ແລະ ມາດຖານ VietGap, ເຊິ່ງແມ່ນມາດຖານສາກົນຢູ່ຫວຽດນາມ. ເມືອງເດີນເຢືອງ ຍັງດຶງດູດແຫຼ່ງທຶນກໍ່ສ້າງພື້ນຖານໂຄງລ່າງໃນເຂດຜະລິດຜັກ, ຍົກສູງຄຸນນະພາບຜັກ, ຕອບສະໜອງຄວາມຕ້ອງການພາຍໃນປະເທດ ແລະ ສົ່ງອອກ. ຍ້ອນເຫດນັ້ນ, ປະຊາຊົນຈຶ່ງຫັນປ່ຽນຜົນລະປູກ ເພື່ອພ້ອມກັນຫຼຸດພົ້ນອອກຈາກຄວາມທຸກຍາກ, ກໍ່ສ້າງຊົນນະບົດໃໝ່ຢ່າງມີປະສິດທິຜົນ.