(vovworld) - ໃນໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຢູ່ຫວຽດນາມ, ເລື່ອງຮ່ວມສຳພັນລະຫວ່າງລັດ, ນັກວິທະສາດ, ນັກທຸລະກິດ ແລະ ຊາວກະສີກອນ ແມ່ນປັດໃຈສຳຄັນເພື່ອໃຫ້ຂະແໜງກະສີກຳພັດທະນາຢ່າງໝັ້ນຄົງ, ປະກອບສ່ວນຍົກສູງຊີວິດການເປັນຢູ່ຂອງຊາວກະສີກອນ. ຕາມແຜນນະໂຍບາຍດັ່ງກ່າວ, ແຂວງກ່າເມົາ ຢູ່ເຂດທົ່ງພຽງແມ່ນຳ້ຂອງໄດ້ປະກົດມີບັນດາຮູບແບບວິສາຫະກິດສົມທົບກັບຊາວກະສີກອນ,ເປີດທິດທາງຜະລິດຢ່າງມີປະສິດທິຜົນ, ປະກອບສ່ວນຍູ້ແຮງວິວັດການກໍ່ສ້າງຊົນນະບົດໃໝ່.
ເຂົ້າປອດສານພິດຂອງກ່າເມົາ
ໂດຍແມ່ນຜູ້ໜຶ່ງທີ່ມັກຊອກຫາ, ຄົ້ນຄ້ວາ, ທ່ານ ຫວູມິງຂາຍ, ຜູ້ອຳນວຍການໃຫຍ່ບໍລິສັດຫຸ້ນສ່ວນການຄ້າ ແລະ ຜະລິດຫວິ້ງຟູ໋,ແຂວງກ່າເມົາ ມີໂອກາດໄປຫຼາຍປະເທດ ແລະ ເຫັນວ່າຜະລິດຕະພັນຫຼາຍປະເພດຂອງຫວຽດນາມ ບໍ່ທັນມີເຄື່ອງໝາຍການຄ້າໃນຕະຫຼາດສາກົນ, ພິເສດແມ່ນເຂົ້າສານ. ຍ້ອນເຫດນັ້ນ, ທ່ານຈຶ່ງປາຖະໜາຢາກຜະລິດເຂົ້າປອດສານພິດທີ່ມີເຄື່ອງໝາຍການຄ້າຢູ່ໂລກ. ດ້ວຍການນຳໃຊ້ກົນຈັກອັດຕະໂນມັດເຖິງເກືອບ 90%, ບໍ່ໃສ່ຟຸ່ນເຄມີ, ຢາຂ້າສັດຕູພືດ.. ໃນການປູກຝັງ. ທ່ານ ຫວໍມິງຂາຍ, ໃຫ້ຮູ້ວ່າ:
“ກ່ອນນີ້, ຜະລິດຕະພັນກະເສດຂອງຫວຽດນາມ ບໍ່ມີເຄື່ອງໝາຍການຄ້າ. ຂ້າພະເຈົ້າຜະລິດກະສີກຳຕາມມາດຕະຖານຂອງອາເມລິກາ ແລະ ເອີລົບ, ສ້າງເຄື່ອງໝາຍເຂົ້າສານປອດສານພິດຕາມມາດຕະຖານສາກົນ ແລະ ໄດ້ຮັບການຢັ້ງຢືນຈາກອົງການສາກົນ. ຈາກນັ້ນຈຶ່ງສ້າງຄວາມໄວ້ເນື້ອເຊື່ອໃຈ, ສ້າງເຄື່ອງໝາຍການຄ້າໃຫ້ເຂົ້າສານຫວຽດນາມ ໃນຕະຫຼາດສາກົນ“.
ເຂົ້າປອດສານພິດສີດຳ
ຕາມທ່ານ ຫວໍວັນຂາຍ, ຜະລິດຕະພັນເຂົ້າປອດສານພິດເຕົ້າໂຮມທາດຊີວະສາດທຳມະຊາດຫຼາຍຢ່າງທີ່ມີປະໂຫຍດໃຫ້ແກ່ສຸຂະພາບ ແລະ ປິ່ນປົວພະຍາດ. ຍ້ອນເຫດນັ້ນ, ເພື່ອຜະລິດເຂົ້າປອດສານພິດ, ທ່ານໄດ້ເລືອກເອົາເຂດດິນອູມິງຫ້າ, ຕາແສງແຄ໋ງອານ, ເມືອງອູມິງ, ແຂວງກ່າເມົາ ເພື່ອປູກເຂົ້າ. ຍ້ອນນີ້ແມ່ນເຂດດິນເປົ່າຫວ່າງ, ບໍ່ມີໃຜປູກຝັງ, ປອດສານພິດ. ດັ່ງນັ້ນມັນສະດວກທີ່ສຸດໃຫ້ແກ່ການຜະລິດເຂົ້າປອດສານພິດຕາມມາດຕະຖານຂອງກະຊວງກະສີກຳອາເມລິກາ ແລະ ເອີລົບ.
ວິວັດການຜະລິດເຂົ້າປອດສານພິດຈາກການປູກຝັງ, ບົວລະບັດເຖິງການເກັບກ່ຽວລ້ວນແຕ່ຕາມມາດຕະຖານກະສີກຳຂຽວຂອງສາກົນທີ່ໄດ້ຮັບການຮັບຮອງຈາກອາເມລິກາ ແລະ ເອີລົບ. ຍ້ອນເຫດນັ້ນ, ວິວັດການເລືອກເຟັ້ນແນວພັນເຂົ້າໃນສະພາບແວດລ້ອມທຳມະຊາດແມ່ນເຄັ່ງຄັດທີ່ສຸດ, ໂດຍບໍ່ຜ່ານການຫັນປ່ຽນແຊນ. ການບົວລະບັດຕົ້ນເຂ້ົາກໍ່ລະອຽດລະອໍທີ່ສຸດ. ທ່ານ ຫວໍມິງຂາຍ, ໃຫ້ຮູ້ວ່າ, ປະຈຸບັນຟາມຂອງທ່ານມີເນື້ອທີ່ 320 ກວ່າເຮັກຕາ, ຜະລິດເຂົ້າ 3 ປະເພດຕາມມະຕະຖານສາກົນ, ແລະ ໄດ້ຮັບການຮັບຮອງຈາກອົງການຮອນລັງ:
“ຟາມນີ້ຜະລິດເຂົ້າສາມປະເພດ, ທີໜຶ່ງແມ່ນເຂົ້າສຳລັບຄົນເບົາຫວານ, ອ້ວຍພີ, ໂລກມະເຮັງ ແລະ ຜູ້ເປັນໂລກຫົວໃຈ ແລະ ເສັ້ນເລືອດ ຍ້ອນມັນມີທາດຊີວະສາດຫຼາຍ. ທີສອງແມ່ນສິນໃນນຳ້ທີ່ສົ່ງອອກເອີລົບ; ທີສາມແມ່ນຜັກ ແລະ ໝາກໄມ້ຮັບໃຊ້ພາຍໃນປະເທດ. ຜະລິດຕະພັນທັງສາມປະເພດນີ້ລ້ວນແຕ່ໄດ້ຮັບການຮັບຮອງຈາກອົງການຮອນລັງຕາມມາດຕະຖານອາເມລິກາ ແລະ ເອີລົບ“.
ເຂົ້າປອດສານພິດສີແດງ
ປີ 2013, ຜະລິດຕະພັນເຂົ້າປອດສານພິດຂອງທ່ານ ຫວໍມິງຂາຍ ໄດ້ຈຳໜ່າຍຢູ່ພາຍໃນປະເທດ ແລະ ສົ່ງອອກປະເທດຕ່າງໆຢ່າງເປັນທາງການຄື: ອາເມລິກາ, ເອີລົບ, ສິງຄະໂປ ແລະ ສເກົາຫຼີ. ພ້ອມກັບເນື້ອທີ່ປູກເຂົ້າປອດສານພິດ, ທ່ານ ຫວໍມິງຂາຍ ຍັງປູກພືດປະເພດຕ່າງໆທີ່ສາມາດລ້ຽງສິນໃນນຳ້ໄດ້. ຈາກນັ້ນ, ສະມັດຕະພາບເຂົ້າຈຶ່ງເພີ່ມຂຶ້ນສູງ, ບັນລຸແຕ່ 2,5 – 3 ໂຕນ/ເຮັກຕາ. ໄລ່ສະເພາະໃນປີ 2014, ຟາມຂອງທ່ານ ຫວໍມິງຂາຍ ໄດ້ສະໜອງເຂົ້າປອດສານພິດ, ພ້ອມກັບຜະລິດຕະພັນອື່ນຈາກເຂົ້າ, ຜັກ, ສິນໃນນຳ້ໃຫ້ຕະຫຼາດ 1.000 ກວ່າໂຕນ. ທ່ານ ໂງແທງຟອງ, ຮອງປະທານຄະນະກຳມະການປະຊາຊົນຕາແສງອານແຄ໋ງ, ໃຫ້ຮູ້ວ່າ:
“ຮູບແບບຜະລິດເຂົ້າປອດສານພິດຂອງອ້າຍຂາຍ, ໄດ້ຮັບປະກັນສຸຂະພາບໃຫ້ຜູ້ບໍລິໂພກ, ກໍ່ຄືປະກອບສ່ວນແກ້ໄຂວຽກເຮັດງານທຳໃຫ້ແກ່ປະຊາຊົນໃນທ້ອງຖີ່ນ.“
ເຂົ້າປອດສານພິດຊະນິດຕ່າງໆ
ຕາມທ່ານ ໂງແທງຟອງ ແລ້ວ, ແຜນນະໂຍບາຍຮ່ວມສຳພັນລະຫວ່າງລັດ, ນັກວິທະຍາສາດ, ນັກທຸລະກິດ ແລະ ຊາວກະສີກອນເພື່ອສ້າງເປັນຜະລິດຕະພັນກະເສດໃໝ່ນັ້ນແມ່ນບາດກ້າວບຸກທະລຸໃນການກໍ່ສ້າງຊົນນະບົດໃໝ່. ຕາມແຜນການ, ຮອດປີ 2015, ກ່າເມົາ ສູ້ຊົນມີ 14 ຕາແສງຂຶ້ນໄປບັນລຸມາດຖານຊົນນະບົດໃໝ່ໃຫ້ໄດ້. ໃນຂະນະທີ່ມີຫຼາຍຕາແສງຍັງປະສົບກັບຄວາມຫຍຸ້ງຍາກພວມຊອກຫາທິດທາງພັດທະນາໃໝ່, ຮູບແບບຜະລິດເຂົ້າປອດສານພິດຂອງທ່ານ ຫວໍມິງຂາຍນັ້ນ ແມ່ນຮູບແບບເພື່ອສ້າງບັນດາຜະລິດຕະພັນກະເສດທີ່ມີເຄື່ອງໝາຍການຄ້າ, ນຳມາເຊິ່ງຜົນປະໂຫຍດຢ່າງໃຫຍ່ຫຼວງໃຫ້ແກ່ປະຊາຊົນ ແລະ ສ້າງມູນຄ່າເສດຖະກິດສູງ. ຮູບແບບນີ້ພວມໄດ້ຮັບການຂະຫຍາຍອອກຢ່າງກວ້າງຂວາງ, ປະກອບສ່ວນແທດຈິງເຂົ້າໃນໂຄງການກໍ່ສ້າງຊົນນະບົດໃໝ່ບໍ່ພຽງແຕ່ຢູ່ແຂວງກ່າເມົາ ເທົ່ານັ້ນ, ຫາກຍັງຢູ່ຫຼາຍທ້ອງຖີ່ນອີກດ້ວຍ.