(vovworld) - ການກໍ່ສ້າງຊົນນະບົດໃໝ່ແມ່ນໜຶ່ງໃນບັນດາແຜນນະໂຍບາຍໃຫຍ່ຂອງພັກ ແລະ ລັດ ເຊິ່ງພວມໄດ້ຮັບການຜັນຂະຫຍາຍຢ່າງກວ້າງຂວາງຢູ່ທ້ອງຖີ່ນຕ່າງໆຂອງຫວຽດນາມ, ເຖິງວ່າແຕ່ລະແຫ່ງຈະມີວິທີເຮັດແຕກຕ່າງກັນກໍ່ຕາມ, ແຕ່ສິ່ງທີ່ເຄີຍເຫັນຢູ່ບັນດາຕາແສງທີ່ບັນລຸມາດຖານຊົນນະບົດໃໝ່, ນັ້ນແມ່ນການສ້າງຄວາມເຫັນດີເຫັນພ້ອມສູງໃນໝູ່ປະຊາຊົນ, ໃນນັ້ນວຽກງານຂົນຂວາຍປະຊາຊົນມີບົດບາດສຳຄັນ. ບົດຂຽນ “ເຮັກວຽກງານຂົນຂວາຍປະຊາຊົນເປັນຢ່າງດີເພື່ອໃຫ້ປະຊາຊົນຮ່ວມຈິດຮ່ວມໃຈກໍ່ສ້າງຊົນນະບົດໃໝ່“ ຂອງ ຫງວຽນຮ່ຽນ ແລະ ເລເທີມ, ນັກຂ່າວວິທະຍຸກະຈາຍສຽງຫວຽດນາມ.
ໃນຊຸມມື້ນີ້, ປະຊາຊົນຕາແສງ ຮ່ວາງອານ, ເມືອງຫຽບຮ່ວາ, ແຂວງບັກຢາງ, ມີຄວາມພາກພູມໃຈທີ່ສຸດ, ເພາະຕາແສງຫາກໍ່ໄດ້ຮັບການຮັບຮອງວ່າເປັນຕາແສງບັນລຸມາດຖານຊົນນະບົດໃໝ່. ປີ 2011, ຕາແສງ ຮ່ວາງອານ ໄດ້ຮັບການເລືອກເຟັ້ນເປັນຕາແສງປະຕິບັດການກໍ່ສ້າງຊົນນະບົດໃໝ່. ໃນເບື້ອງຕົ້ນແຫ່ງການຜັນຂະຫຍາຍ, ເຖິງວ່າເງື່ອນໄຂເສດຖະກິດຂອງຕາແສງຍັງປະສົບກັບຄວາມຫຍຸ້ງຍາກກໍ່ຕາມ, ແຕ່ອຳນາດການປົກຄອງ ແລະ ປະຊາຊົນຕາແສງ ຮ່ວາງອານ ໄດ້ມີຄວາມຕັດສິນໃຈສູງ ເພື່ອປະຕິບັດສຳເລັດໂຄງການກໍ່ສ້າງຊົນນະບົດໃໝ່. ທຳອິດແມ່ນຜັນຂະຫຍາຍການບຸກເບີກໜ້າພຽງເພື່ອກໍ່ສ້າງທາງເບຕົງລະຫວ່າງຕາແສງ. ເພື່ອເຮັດວຽກງານນີ້ໃຫ້ໄດ້, ພະນັກງານບ້ານ, ຕາແສງ ໄດ້ລົງໄປແຕ່ລະບ້ານ, ແຕ່ລະຄອບຄົວ ເພື່ອຂົນຂວາຍປະຊາຊົນ, ໂຄສະນາໃຫ້ເຂົາເຈົ້າຮູ້ແຜນນະໂຍບາຍຂອງພັກ ແລະ ລັດ. ອ້າຍ ໂງວັນຮຸ່ງ, ຢູ່ບ້ານ ເຕິນເລິບ, ຕາແສງ ຮ່ວາງອານ, ແມ່ນໜຶ່ງໃນບັນດາຜູ້ທຳອິດທີ່ໄດ້ສະໝັກໃຈບໍລິຈາກທີ່ດິນເພື່ອກໍ່ສ້າງທາງ ແລະ ປະກອບແຮງງານເຂົ້າໃນການກໍ່ສ້າງຊົນນະບົດໃໝ່, ແບ່ງປັນວ່າ:
“ຂ້າພະເຈົ້າຄິດວ່າໃນການກໍ່ສ້າງຊົນນະບົດໃໝ່, ເມື່ອມີທາງກວ້າງເຮົາຈະໄດ້ຊົມໃຊ້ຜົນປະໂຫຍດຫຼາຍ, ດັ່ງນັ້ນຄອບຄົວຂ້າພະເຈົ້າຈຶ່ງບໍລິຈາກທີ່ດິນ, ຮັບໃຊ້ໃຫ້ແກ່ການເປີດກວ້າງທາງ. ມີເສັ້ນທາງກວ້າງຂວາງ, ສະອາດ, ສວຍງາມຄືແນວນີ້, ການໄປມາກໍ່ສະດວກສະບາຍ. ຂ້າພະເຈົ້າຫວັງວ່າ ຢູ່ບ່ອນໃດກໍ່ມີເສັ້ນທາງງາມຄືແນວນີ້ເພື່ອສ້າງຄວາມສະດວກໃຫ້ແກ່ປະຊາຊົນ“.
ແບ່ງໜ້າທີ່ໃຫ້ສະມາຊິກພັກຢູ່ເມືອງ ຫຽບຮ່ວາເຮັດວຽກງານໂຄສະນາຂົນຂວາຍປະຊາຊົນ
ໂດຍມີຄວາມເປັນເອກະພາບສູງໃນຖັນແຖວການນຳຕາແສງ ແລະ ຄວາມເຫັນດີເຫັນພ້ອມສູງໃນໝູ່ປະຊາຊົນ, ເລື່ອງຜັນຂະຫຍາຍການກໍ່ສ້າງທາງຈຶ່ງໄດ້ຮັບການປະຕິບັດຢ່າງໄວ, ຖືກກັບຄວາມຄືບໜ້າທີ່ໄດ້ວາງອອກ. ທາງຕາແສງໄດ້ເລືອກຕັ້ງຄະນະຕິດຕາມກວດກາປະຊາຄົມ, ຄະນະກວດກາປະຊາຊົນ ເພື່ອຕິດຕາມກວດກາຈາກຂອດວາງແຜນກຳນົດເຖິງການລົງທຶນກໍ່ສ້າງໂຄງລ່າງເສດຖະກິດ, ສັງຄົມຢ່າງແໜ້ນແຟ້ນ. ເມື່ອຈັດຕັ້ງການປະຕິບັດ, ຖ້າປະສົບກັບຄວາມຫຍຸ້ງຍາກ, ຄ້າງຄາ, ການນຳທ້ອງຖີ່ນຈະແລກປ່ຽນກັບປະຊາຊົນໂດຍກົງ, ເພື່ອພ້ອມກັນແກ້ໄຂຄວາມຫຍຸ້ງຍາກ. ຍ້ອນເຫດນັ້ນ, ປະຊາຊົນຈຶ່ງຮັບຮູ້ແຈ້ງຄວາມຮັບຜິດຊອບ, ສິດຜົນປະໂຫຍດ ແລະ ພັນທະຂອງຕົນໃນການກໍ່ສ້າງຊົນນະບົດໃໝ່. ທ່ານ ຫງວຽນຊວນເຈື່ອງ, ປະທານຄະນະກຳມະການແນວໂຮມປະເທດຊາດຕາແສງ ຮ່ວາງອານ, ໃຫ້ຮູ້ວ່າ:
“ແນວໂຮມປະເທດຊາດສົມທົບກັບອຳນາດການປົກຄອງເຮັດວຽກງານທັງໝົດຢ່າງປະຊາທິປະໄຕ, ທຸກແຜນນະໂຍບາຍ, ໂຄງການໄດ້ຮັບການຜັນຂະຫຍາຍເຖິງປະຊາຊົນ ເພື່ອໃຫ້ປະຊາຊົນຮູ້, ປຶກສາຫາລື, ປະກອບຄວາມເຫັນ ແລະ ຕົກລົງນຳກັນ, ດັ່ງນັ້ນການຜັນຂະຫຍາຍວຽກງານກໍ່ສ້າງຊົນນະບົດໃໝ່ຈຶ່ງສະດວກສະບາຍ.“
ສະຫະພັນແມ່ຍິງເມືອງຫຽບຮ່ວາປະຕິບັດການຕິດຕາມກວດກາຢູ່ຕາແສງຮ່ວາງອານ
ຕາມທ່ານ ມາຍເຊີນ, ຫົວໜ້າຄະນະຊີ້ນຳການກໍ່ສ້າງຊົນນະບົດໃໝ່ເມືອງ ຫຽບຮ່ວາແລ້ວ, ຫຼາຍຕາແສງໃນເມືອງໄດ້ຮຳ່ຮຽນ ແລະ ນຳໃຊ້ວິທີເຮັດທີ່ດີ ກໍ່ຄືບັນດາຜົນງານໃນການກໍ່ສ້າງຊົນນະບົດໃໝ່ຂອງຕາແສງ ຮ່ວາງອານ. ໃນປີ 2015, ທົ່ວເມືອງມີ 25 ຫົວໜ່ວຍຈົດຊື່ບັນລຸມາດຖານຊົນນະບົດໃໝ່. ປະຈຸບັນມີ 2 ຕາແສງແມ່ນ ດວານບ໋າຍ ແລະ ຮ່ວາງອານ ໄດ້ຮັບການຮັບຮອງວ່າບັນລຸມາດຖານຊົນນະບົດໃໝ່, ສ່ວນຕາແສງ ຮ່ວາງເລືອງ ແລະ ຊວນເກີມ ພວມພະຍາຍາມປະຕິບັດໃຫ້ສຳເລັດມາດຖານທັງໝົດ ເພື່ອໄດ້ຮັບການຮັບຮອງເປັນຕາແສງຊົນນະບົດໃໝ່ໃນທ້າຍປີນີ້. ທ່ານ ມາຍເຊີນ ໃຫ້ຮູ້ວ່າ:
“ບົດຮຽນທຳອິດເຊິ່ງພວກເຮົາຖອດຖອນມາໄດ້ໃນການກໍ່ສ້າງຊົນນະບົດໃໝ່ນັ້ນແມ່ນ ຕ້ອງເສີມຂະຫຍາຍປະຊາທິປະໄຕ ແລະ ພູມປັນຍາລວມໝູ່ຂອງປະຊາຊົນ. ທີສອງແມ່ນຖັນແຖວການນຳຈາກຂັ້ນບ້ານເຖິງຂັ້ນຕະແສງຕ້ອງມີຄວາມສາມາດ, ມີຄວາມສຸດຈິດສຸດໃຈກັບວຽກງານ, ມີຄວາມຮັບຜິດຊອບ ແລະ ເປັນແບບຢ່າງໃນການປະຕິບັດ“.
ຜົນສຳເລັດໃນການກໍ່ສ້າງຊົນນະບົດໃໝ່ຢູ່ເມືອງ ຫຽບຮ່ວາ, ແຂວງບັກຢາງສະແດງໃຫ້ເຫັນວ່າ, ຖ້າລະດົມກຳລັງແຮງຂອງປະຊາຊົນໄດ້, ເຖິງວ່າການກໍ່ສ້າງຊົນນະບົດຈະຍາກຄືແນວໃດກໍ່ສາມາດຜ່ານຜ່າໄດ້. ເຮັດວຽກງານຂົນຂວາຍປະຊາຊົນເປັນຢ່າງດີ ເພື່ອໃຫ້ປະຊາຊົນຮັບຮູ້ແຈ້ງບັນຫາ ແລະ ຖືຕົນເປັນເຈົ້າໃນການກໍ່ສ້າງຊົນນະບົດໃໝ່ ແມ່ນຈະເສີມຂະຫຍາຍບົດບາດເປັນເຈົ້າຂອງປະຊາຊົນໄດ້. ນັ້ນແມ່ນໜຶ່ງໃນບັນດາເຄັດລັບເພື່ອໃຫ້ໂຄງການກໍ່ສ້າງຊົນນະບົດໃໝ່ສຳເລັດຜົນ.